Fiestes

Esti llunes 18, de magar les cinco la tarde, entamen les fiestes pa neños de Santiago y Santa Ana. A les 5 la tarde va repartise’l “bollín” a los neños, con refrescu, postre y regalu pa tolos socios.

Amás va facese una folixa na piscina’l conceyu, con música de la orquesta asturiana Tekila.

Esti vienres, 15 de xunetu, ábrense les fiestes de Santiago y Santa Ana col baille del sociu, amenizáu poles orquestes gallegues “Poceiro” y “Players”.

El baille va tener llugar nel Frontón del Parque de Riba de Grau, cola organziación de la Hermandá de Santiago y Santa Ana.

Amás, güei entama’l II Campeonatu de Padel nes pistes de l’Avenida de los Deportes.

Les fiestes de Santa Ana y Santiago celébrense del 15 al 26 de xunetu.

El pasáu 25 de xunu, el párrocu de Llastres echó’l pregón de les fiestes de San Xuan d’esta parroquia de Colunga y fízolo n’asturianu.

Poco enantes de la media nueche, D. Andrés, el cura de Llastres, dio entamu a la fiesta y a la tradicional foguera, organizada pola mocedá del llugar.

El próximu día 23 de xunu entamen en Xixón les celebraciones propies de les Fiestes de San Xuan y San Pedru, que van arrincar col tradicional enramáu de la fonte de Pelayo na Plaza’l Marqués. El día más llargu del añu marca l’entamu de les fiestes de branu que’l Teatru Xovellanos entama al traviés del so Departamentu de Festexos, nuna dilatada axenda qu’entama nel mes de xunu y que s’estiende a lo llargo de los meses de xunetu y agostu.

Les actividaes que tienen llugar por cuenta de la Nueche de San Xuan dan empiezu’l día 23 de xunu a les 21:00 hores col enramáu de la fonte de Pelayo. L’engalanáu de les fontes con flores y lloréu na víéspora de San Xuan ye una tradición qu’entá pervive en distintos llugares d’Asturies y Andecha de Cultura Tradicional na Señardá recupérala na fonte de la Plaza’l Marqués. A les 22:00 hores la Banda de Gaites Noega va llevar a cabu un pasacais dende la Plaza Mayor, pasando per Rodríguez San Pedro y rematando na playa de Pando/Poniente. Lo propio va facer la Banda de Gaites Villa de Xixón, partiendo de la Plaza del 6 d’Agostu, percorriendo Corrida y la Plaza d’Italia, hasta llegar tamién al mesmu arenal.

A les 00:00 hores va procedese al encendíu de la Foguera de San Xuan, que va dir acompañáu d’un espectáculu pirotécnicu y de la tradicional Danza Prima. Blima y Amigos van ufiertar un conciertu nel escenariu a les 00:15 hores, presentando’l so segundu y últimu trabayu discográficu, Blima Express (Tierra Discos, 2010).

La so formación actual de quintetu ta compuesta por Mapi Quintana, con una voz llena de matices y formada nel jazz y la tonada; Marcos G. Alonso (campeón de curdión diatónicu nel Festival Interceltique de Lorient 2010) y el templáu violín de Gonzalo Pumares. Fernando Oyágüez (Felpeyu) a la guitarra y Cabín (Balandrán) col contrabaxu apurren una rítmica enérxica y sólida.

Esti vienres, 24 de xunu, el Paséu de Begoña de Xixón va recibir l’actuación del Grupu Folclóricu Trebeyu a les 20:00 hores. El mesmu día y a la mesma hora, va ser la vez de Los Xustos na Plaza’l Parchís. Tamién el 24, pero esta vegada a les 20:30 hores, el Grupu Folclóricu Xolgoriu va actuar na Plaza d’Italia. Yá el sábadu, el Muséu del Pueblu d’Asturies y la Conceyalía de Cooperación, Cultura Tradicional y Política Llingüística organicen la Romería de San Pedru, recreación d’una fiesta de prau tradicional.

Tamién el 25 de xunu los Xardinos de la Reina van acoyer l’actuación del Grupu Folclóricu L’Allegría a les 12:00 hores. Y dende les 11:30 hasta les 00:00 hores el Muséu del Pueblu d’Asturies va ser l’escenariu, per cuartu añu consecutivu, de la Romería de San Pedru, na que va poder asistese a la misa cantada con gaita y n’asturianu, la puya’l ramu, averase a los bailles, xuegos y deportes tradicionales, pasar pel chigre a saborguiar la sidra y l’empanada o llevar la nuesa propia comida y esfrutala nel muséu. La xornada complétase con un doble conciertu, la quema de la tradicional foguera y la danza prima. La entrada ye llibre a toles actividaes.

El día 26 de xunu cuatro van ser les actuaciones que se van repartir per distintos puntos de la ciudá de Xixón. Asina, el Grupu Folclóricu Flor de Xaranzaina va actuar a les 12:00 hores nes fiestes de San Pedru del Polígonu de Pumarín. A la mesma hora la Banda de Música de Xixón “Villa de Xovellanos” va esplegar parte del so repertoriu na Ilesia de San Pedro. A les 13:00 hores el Grupu Folclóricu Los Collacios van ufiertar la so actuación en La Calzada. A les 18:00 hores la Plaza’l Parchís va ser testigu de los bailles del Grupu Excelsior. Y el últimu eventu d’esta xornada va tener llugar a les 19:00 hores na Plaza d’Italia col Grupu Folclóricu Xiringüelu.

El banzáu de Trasona va acoyer como cada añu les fiestes corveranes de San Xuan, cola tradicional foguera y delles actuaciones. A les diez de la nueche la Banda de Gaites de Corvera d’Asturies va entamar tocando, pa darréu sentir la voz d’Anabel Santiago xunto a la música d’Héctor Braga.

El grupu “Nun tris” va facer una acción teatral pa encender la foguera, actuando dempués los grupos Dixebra y Fala non caduca.

El Conceyu de Grau prepara la so Foguera de San Xuan pal xueves 23, de magar les doce la nueche. Pero enantes, a les 7, van engalanase les fontes de la villa moscona, cola actuación de la Coral de Grau y la Coral Dafne, nel patiu de la Casa Cultura.

El Parque d’Abaxu va cuntar cola Banda de Música Los Estudiantes (Uvieu), Aliendu, Lafu y Rebeca y el Grupu de Gaites Escuela de Música de Grau, de magar les diez de la nueche.

A les doce la nueche va prendese la foguera n’El Charcón.

El Centru Social La Semiente quier recuperar el vezu vecinal de facer fogures nos barrios, que dicen, “de va poco p’acó ta perdiendose y que marcaba muncho mas qu’una fecha”. Pa ello conviden a los vecinos a participar na so fogurera, que va cuntar con teatru, malabares, conxuros, danza prima, y música. Amás, conviden a la xente a recuperar “la tradición d’enrramar les fontes”.

La foguera va celebrase nel Prau d’al llau del Campu Fútbol, de magar les 22:30, prediendo la foguera a les 12.

El Conceyu de Cangas de Narcea convoca un concursu de cartelos pa les fiestes del Carmen y La Madalena. Los interesaos tendrán de presentar el cartelu xunto colos sos datos personales. Va concedese un primer premiu de 300 euros a aquel cartelu que’l xuráu decida, siendo dedicáu pa cartelu anunciador de les Fiestes y portada del llibru programa. El plazu ta abiertu hasta l’8 de xunu.

Bases completes

El Conceyu de Llangréu y l’Agrupación d’Etnografía y Folclor Reija, en collaboración cola Conseyería de Cultura y Turismu d’Asturies organicen esta quinta muestra cultural Tolo d’Asturies que va tener llugar los díes 7 y 8 de mayu. Tolo d’Asturies 2011 presenta una montonera actos que, dende primer hora de la mañana’l sábadu, van poner folixa y cultura tradicional nel recintu ferial de la estación central d’autobuses de Llangréu. Demientres los dos díes va desenvolvese’l yá clásicu mercáu tradicional d’artesanía y gastronomía y los talleres pa neños (animación, xuegos y deportes tradicionales, artesanía…) xunto cola Feria del discu y el llibru n’asturianu y de l’actuación de bandines tradicionales y grupos de baille.

A les 12:00h del sábadu 7 de mayu va tener llugar la inauguración oficial de Tolo d’Asturies cola intervención d’autoridaes y l’actuación de la Banda Gaites Conceyu Llangréu. Darréu d’esti actu inaugural va empezar la venta nel mercáu y l’actuación del gran Jerónimo Granda. A les 22:00 hores va tener llugar el gran conciertu de la feria cultural d’esti añu, l’escenariu de la carpa del recintu ferial va acoyer la música d’Héctor Braga y banda, N’Arba y Los Berrones. Un gran conciertu pa la noche d’esti sábadu con xente de la cuenca, del valle y la vuelta a los escenarios d’un grupu yá míticu de la música asturiana.

El domingu va siguir l’animación de bandines y grupos de bailles y l’actividá del mercáu dende les 11:00 hores hasta la clausura la feria. A les 13:00 va actuar la Banda Música de Llangréu. N’acabando esta guapa actuación va tener llugar la sesión vermú d’Asturianada con escenariu llibre y la participación de Marisa Valle Roso, . Yá de tarde, a les 18:00 va facese l’homenaxe a la tradición de la pandereta con un conciertu a cargu de Pandereteres de Fitoria y Les Filanderes. Como remate, el gran Xuacu Amieva va dar un conciertu pa pone-y el ramu a esta quinta edición de Tolo d’Asturies que va clausurase a les 21:00 hores del domingu 8 de mayu.