Festival de Lorient

L’Espace Marine de Lorient  enllenose na nueche del domingu pal conciertu de Nolwenn Leroy que tenía colgáu’l cartelu de “nun hai billetes” dende munchos díes enantes y que nun defraudó a los sos seguidores, magar siga siendo un espectáculu dafechamente comercial, onde la recuperación del folc bretón ye más un recursu qu’una propuesta.

El grupu Soldat Louis, nacíu nes cais de Lorient, celebró’l so 30 aniversariu con más de 4.000 espectadores el sábadu pela nueche nun Espace Marine con toles entraes vendíes dende díes atrás. Soldat Louis foi fiel a la so reputación como grupu, garantizando un ambiente intenso, un directu llimpio y atrevío, onde’l guión ye perfectamente conocíu por un públicu de toles edaes.

Asturies tuvo un añu más al altor de la so representación davezu nel Festival Intercélticu de Lorient nel desfile del domingu nel qu’esti añu’l brillu diba ser pala vecina galicia pol so añu de celebración. La Banda de Gaites Fonte Fuécara y el Grupu Folclóricu Prau Llerón animaron al so pasu dende’l Puertu Pesca al Estadiu Moustoir de Lorient les cais de la ciudá.

El gaiteru asturianu Pedro Pangua tornó esta edición a Lorient depués de munchos años ensin averase al Festival Intercélticu pa impartir la tradicional Masterclass cola que se abre la programación del Palaciu de Congresos.