Festival de Lorient

Los galeses perdieron la so gaita tradicional hai dellos sieglos, pero gora tan enfotaos en recuperar el so instrumentu tradicional al tempu que’l tambor que-y facía compaña. Los trabayos nesti sen, emplegando la gaita gallega y el tambor asturianu como base, pudieron vese esti añu en Lorient.

Los galeses ta trabayando enforma cola gaita gallega, abondo asemeyada a la qu’emplegaben nesi país hai trescientos años, pa recuperar el so cimeru instrumentu tradicional. Y lo mesmo asocede col tambor, que yera al apecer enforma asemeyáu al que s’emplega n’Asturies.

Un grupu galés amosó esta selmana en Lorient los avances que vienen faciendo nesti sentíu cola intepretación de temes tradicionales colos instrumentos de los países celtes de su.

Los grupos de la delegación asturiana siguen actuando en Lorient, con la bandina como protagonista na nueche d’esti martes cola so actuación nel Espace Bretagne, nun conciertu gratuitu qu’encandiló al públicu bretón cola collaboración de los asturianos que s’alcuentren na villa bretona.

Esti miércoles a les 3 actúa Fespeyu nel Palaciu de Congresos, depués de qu’aportaren ayeri a Lorient los componentes del grupu.

L’animación nocherniega ye una de les calterístiques más nomaes del pabellón asturianu en Lorient, nel que s’alluguen los que más allarguen la folixa na villa bretona. Toles nueches, hasta qu’aporta la hora del pieslle, les actuaciones atraen a la mayoría de los más folixeros del llugar.

Asturies ye ensin dubia’l país onde pasen les caberes hores los bretones, escoceses ya irlandeses a los que-yos presta la música de los países celtes del sur.

Alberto Coya amosó la so calidá na entrega de Premios del Troféu Mac Crimmon en Lorient nel qu’interpretó una pieza amañosa pal so virtuosismu y dellos exercicios de dixitación que-yos prestaron abondo a los gaiteros escoses, bretones ya irlandeses presentes nel salón onde se facía la entrega de Premios.

Con un conciertu amañosu y empobináu a un públicu fiel, Pennóu Skoulm enllenó de música pala danza la nueche del festival esti sábadu, contrastando col rok de Dixebra y Les Ramones de la nuece anterior. Esti grupu, que ñaciere nel 1982 de la complicidá de do grupos de Fest-Noz, Kornog et Gwerz, tornaba esti añu a los escenarios depués d’un períodu de retiru.

El gaiteru gallegu Alberto Coya foi’l ganador de la edición 2009 del troféu Mccrimmon de Gaita solista que tuvo llugar como tolos años nel Palaciu de Congresos de Lorient, nuna reñida final qu’amosó un pergrande nivel interpretativu y na que quedó segundu l’asturianu Pablo Carrera.

El gaiteru gallegu Pedro Álvarez foi l’encargáu d’entamar el Troféu McCrimmon 2009 que’l Festivval de Lorient dedica na so XXIX edición a la gaitta asturiana y gallega.

El gaiteru asturianu Jesús Fernández siguiolu nel orde d’actuación interpretando la so pieza bretona con convinción y firmeza y dando exemplu de mayestría na so interpretación asturiana. Y Borja Rodil siguió a Jesús con unaactuación tan completa como segura tanto na parte bretona como na gallega y asturiana del so repertoriu. Xurxo Fernández, el cuartu de los gaiteros en concursu, fizo una espléndida interpretación de la so pieza gallega que compensó dafechu les duldes qu’amosara na pieza bretona cola qu’entamo como los demás concursantes la so actuación. Y si Xurxo brilló na so interpretación gallega entá brilló más na suya asturiana Hugo Noval con un floreao como pocos se tocaran nesti Palaciu de Congresos de Lorient, axuntáu a una pieza bretona tocada con elegancia y una gallega que lu aupó como favoritu a falta de les demás actuaciones. Tres d’Hugo tocó-y otra vbuelta a un representante gallegu, nesti casu alberto Coya que perconoz la música de nueso pol so pasu pol Conservatoriu asturianu y que ye engforma conocíu polos gaiteros asturianos. Coya col so bon facel calterísticu ufrió una variante na so interpretación tanto gallega como asturiana,interpretando dos pieces separtaes en llugar d’un set como ficieron los demás concursantes, y fízonos xubir al puertu a los asturiannos amosand’l dominiu que tien d’esa pieza del nuesu folclor. Darréu Pablo Carrera dexó nidia la so veteranía y por qué lleva cuatro años viniendo a Lorient a amosar la calidá de los nuesos gaiteros. Poco se pue dicir d’una interpretación axustada y brillante que finó con una mayestría na pieza asturiana que nun fizo sinon rubricar lo que ya dexare claro nes dos pieces que lo precedieron. Y pa finar, Pablo Dalama tam ién dexó nidia la so veteranía dende la primera de les sos pieces, la bretona, a la cabera asturiana, bien escoyida pales sos cualidaes personales bien conocíes de los asturianos.