Europa

Dempués de les declaraciones de la formación Unidá Nacionalista Asturiana, nes qu’afirmaben que’l BNG vetare a les formaciones asturianes nel pactu electoral Europa de los Pueblos, Andecha Astur remitió un comunicáu nel que niega qu’Asturies vaya quedar fuera d’esta coalición. Los responsables de la formación salen al pasu de lo que consideren “un despropósitu”, yá qu’AA ye socia fundadora d’esta organización dende la so creación va cinco años.

Sicasí, los independentistes reconoces problemes cola formación BNG, que “nun van evitar una presencia honrosa d’Asturies dientro la coalición”. “Andecha Astur permanez a día de güei como miembru de plenu drechu de la coalición”, confirmen.

Los problemes que surden col BNG vienen porque la formación “non solo se niega a firmar l’alcuerdu de non inxerencia n’Asturies propuestu por Andecha Astur sinón que, amparándose nel númberu votos col que cunta -y que la coalición precisa p’afitar el parllamentariu européu- pretende vetar la nuesa participación na mesma, lo que nun algamaron gracies al sofitu col que’Andecha Astur cunta por parte’l restu formaciones d’EdP”.

Amás, AA camienta “patéticos” los intentos de la UNA por entrar na coalición Europa de los Pueblos “de la qu’enxamás nun formó parte”. Pa la formación nacionalista “non solo se punxeron na avezada situación de ridículu, sinón qu’intentaron perxudicar la posición asturiana dientro la coalición”. “Con estes posiciones, UNA perxudica seriamente a Asturies nes negociaciones”, recalquen.

La Directora Xeneral de Política Llingüística, Consuelo Vega Díaz, va asistir güei llunes y mañana, 21 d’abril, a les Xornaes sobre “La Carta Europea de Llingües Rexonales o Minoritaries: llogros y retos” que van celebrase nel Muséu Guggenheim de Bilbao cola participación, d’ente otros, del tovía lehendakari vascu, Juan José Ibarretxe.

La Presidencia Española del Conseyu d’Europa, en collaboración col Ministeriu d’Alministraciones Públiques y el Departamentu de Cultura del Gobiernu Vascu, por aciu de la Vicesonseyería de Política Llingüística, asina como la Universidá del País Vascu organicen estes xornaes nes que, mediante ponencies, comunicaciones, meses redondes y debates, se van analizar distintos aspectos relacionaos cola Carta Europea de les Llingües Minoritaries y Rexonales, asina como esperiencies na promoción y protección de dalgunes llingües minoritaries.

La ceremonia d’apertura va celebrase güei a les siete la tarde nel Atrium del Muséu Guggenheim, cola participación de Marta Vlardell Coma, representante Permanente d’España énte’l Conseyu d’Europa; Iñaki Goirizaleia rector de la Universidá del País Vascu y Juan José Ibarretxe, presidente d’Euskadi, que va dar llectura a la ponencia “La promoción del euskara nel País Vascu”.

Darréu, Terry Davis, Secretariu Xeneral del Conseyu d’Europa va falar de “La protección de la diversidá cultural n’Europa. La contribución del Conseyu d’Europa”.

La xornada van pesllala Lluis M.ª De Puig i Olivé, Presidente de l’Asamblea Parllamentaria del Conseyu d’Europa, cola conferencia “La protección de les minoríes n’Europa”; y un representante del Gobiernu d’España, pendiente de confirmación, que va falar de “La protección de les llingües rexonales o minoritaries n’España: una esperiencia válida pa Europa”.

Programa completu de les xornaes

La revista catalana “Els Marges”, una de les espublizaciones más importantes na filoloxía catalana ta acabante editar el so númberu 87 incluyendo un artículu críticu del profesor Ramón d’Andrés sobre la torna al catalán de la novela “Hestoria universal de Paniceiros”, onde s’analiza la novela dende dellos puntos de vista.

L’artículu, redactáu en catalán, titúlase “Astúries i l’asturià a la traducció catalana de la Historia universal de Paniceiros” y supón un averamientu más ente dos ámbitos filolóxicos con munches coses en común.

Páxina web de la revista “Els Marges”

El Conseyu de la Mocedá del Principáu d’Asturies entama dientro de la estaya de programes europeos y como parte de la so collaboración col Gobiernu de la Rexón de Campaña, un cursu de llingua italiana intensivu pa operadores socioculturales que va celebrase en Nápoles ente’l 7 y el 25 de setiembre de 2009.

El cursu inclúi docencia, manutención (agospiu en réxime de pensión completa) y visites turístiques pela zona. Los participantes tendrán de facese cargu de los gastos de desplazamientu.

El plazu de presentación de solicitúes finaliza’l miércoles 11 de mayu de 2009, confirmando la disponibilidá de plaza’l 20 de mayu. Pa más información pue llamase al teléfonu 985250668.

L’asturianu ye’l protagonismu del primer reportaxe de la serie “Els altres bilingüismes” (Los otros billingüismos), espublizada pol diariu catalán Avui. Embaxo esti nome común van espublizase dellos reportaxes nos que van dase a conocer los movimientos de reinvidicación de llingües del estáu español non oficiales.

Artícu completu d’Avui

El Parlamentu Européu apautose esti día nuna resolución que puxa por afitar l’usu de los subtítulos nos programes televisivospa facilitar el deprendimientu de llingües minoritaries al tiempu que garantiza’l caltenimientu de los acuerdos de convivencia llingüística.

El Parlamentu Européu apautose nesta resolución que garantiza’l caltenimientu de los acuerdos de convivencia llingüística establecíos nos territorios que tienen más d’una llingua oficial. Con esta resolución solicitase tamién que’l Conseyu de la Unión Europea ellabore un informe añal sobre’l progresu del multillingüismu nos sistemes educativos.

La resolución salió alantre col sofitu de 335 diputaos y promoviéronla los socialistes, apoyaos pol Grupu Lliberal y los Verdes.

Paralelamente a la presencia d’Asturies n’Expolíngua Portugal, la Conseyería de Cultura va presentar güei, xueves 5, en Lisboa, una antoloxía poética billingüe, coeditada pol Gobiernu del Principáu y la editorial Trea y coordinada por Xuan Bello. El llibru, tituláu Una mirada diversa / Uma olhada diversa, quier ser un homenaxe a la lliteratura portuguesa, una de las más ilustres d’Occidente, y una manifestación del interés afectuosu y comprensivu qu’Asturies siente por Portugal.

La presentación va facese na sede del Institutu Cervantes de Lisboa a les 18.30 hores. Van tar presentes nella dos de los poetes portugueses antologaos: valter hugo mãe y Nuno Júdice.

Nos años ochenta, Asturies vivió un movimientu de recuperación de la llingua asturiana y de renovación de la so lliteratura. Nesti procesu, nesta busca d’otres tradiciones lliteraries qu’arriquecieron la propia, la pasión pola llingua y la lliteratura portugueses ye fundamental. Dende l’apaición en 1985 de Memoria d’outru ríu, d’Eugénio de Andrade, munchos poetes portugueses convirtiéronse pa los escritores asturianos nun espeyu onde se mirar.

P’analizar esta rellación arriquecedora, organízase nel mesmu Institutu Cervantes una mesa redonda onde van participar, cola moderación de Marta Magadán, presidenta del Gremiu d’Editores de Asturies, escritores asturianos y portugueses: Martín López-Vega, Roberto González-Quevedo, Xuan Bello, valter hugo mãe y Nuno Júdice.

Esti sábadu 28 de febreru na Cai Victor Chávarri, 19 d’Uviéu presentase’l Comité d’Apoyu d’Asturies a la Candidatura d’Izquierda Anticapitalista a les Elecciones Europees.

nel actu van intervenir Miguel Urban, (miembru de Izquierda Anticapitalista de Madrid)y Gael Quirante, (miembru de la dirección nacional del recién constituyíu Nuevu Partíu Anticapitallista NPA de Francia).

La televisión estatal turca cortó esti martes la tresmisión en direutu del discursu del cabezaleru del principal partíu pro-kurdu al dirixise a los sos diputaos nel parlamentu en llingua kurda, un incidente que sorraya les tensiones nesti país candidatu a la Unión Europea sobre la cuestión d’usar esti idioma en público, anteriormente prohibíu, a pesar de los últimos pasos que dio’l gobiernu pa suavizar les restricciones, incluyíu’l llanzamientu d’una canal estatal en kurdu.

El fechu asocede enantes de les elecciones municipales del 29 de marzu, nes que’l partíu nel Gobiernu, AK, ta compitiendo col Partíu de la Sociedá Democrática (DTP), prokurdu, en Diyarbakir, la mayor ciudá na rexón sureste.

El Gobiernu suecu anunció’l so compromisu coles llingües minoritzaes del país, con una partida de 70 millones de corones pa meyorar la protección de la llingua finesa, del meänkieli, el jiddish, el romaní y los dialectos sami, les principales llingües falaes nel país, amás del suecu.

El ministru d’integración de Suecia, Nyamko Sabuni, reconocío que “el futuru de les llingües minorizaes nacionales ye inciertu, y pa dalgunes llingües la situación ye complicada”. El ministru comprometióse a trazar una “estratexa colectiva” pa responder a les necesidaes d’estes minories, asina como pa “incrementar la so consciencia y asegura que Suecia fai cumplir los sos compromisos en materia de drechos humanos”.