Escéniques

Doscientes noventa y nueve compañíes teatrales de tol mundu presentaron los sos proyectos artíticos pa ser incluíos dientro la programación de la prósima Feria Europea de Teatru pa Neños (FETEN) que va celebrase en Xixón del 12 al 17 de febreru de 2006. El certame xixonés bate asina na so prósima cita’l so record de participación de compañíes.

Les cerca de 300 compañíes pertenecen a 17 comunidaes y a 14 países (Arxentina, Armenia, Bélxica, Chile, Dinamarca, Finlandia, Francia, Inglaterra, Italia, Portugal, Puerto Rico, República Checa, Suiza y Venezuela). Tres el procesu de selección a cargu de técnicos de la Fundación Municipal de Cultura y especialistes en teatru infantil, más de 40 compañías van ser les que participen en FETEN 2006, una feria que va cuntar con más de 60 representaciones, ente les que s’ incluin espectáculos d’animación na cai, pasucais, y toa triba de técniques y de formatos.

Les sedes de FETEN 2006 van ser les del añu pasáu: Teatru Xovellanos, Centru Municipal Integráu XiXón-Sur, Colexata San Xuan Bautista, Centru de Cultura Antigu Institutu, centros municipales y varies cais y places de la ciudá de Xixón.

Les compañíes participantes en FETEN 2006 opten a los siete premios previstos (meyor espectáculu, meyor dirección, meyor interpretación masculina, meyor interpreteación femenina, meyor testu, meyor escenografía, meyor vestuariu y caracterización).

La compañía catalana Els Comediants pon n’escena esti martes 6 y el miércoles 7 en Xixón el so últimu espectáculu: ‘Las mil y una noches’, una dramaturxa de Joan Font y Luisa Hurtado que remanez la destrucción de miles de llibros de la Biblioteca de Bagdag na última guerra d’Irak.

Xente de bien diversa procedencia y llugar traen a la biblioteca arruinada de la ciudá de Bagdag hestories de Sherezade y de toles voces del mundu. Esti ye’l filu argumental del últimu montaxe de Els Comediants que va poder vese esti martes y el miércoles nel Teatru Xovellanos de Xixón.

Ambientada con música en directu d’una orquestina de cuerda y percusión, la obra adaptada por Joan Font y Luísa Hurtado tenta ser, en palabres de los sos autores una respuesta a les preguntes de ¿Por qué nun fabular sobre la posible peripecia d’un grupu de personas reuníes pa salvar exemplares de Les Mil y Una Nueches y contase unos a otros les histories que contién? ¿Por qué nun pensar que mientres dalguién remembra la historia, ésta esiste?”.

El Foru pola Poesía presenta esti xueves 1 d’avientu la primera d’una serie de publicaciones que va entamar col oxetivu de difundir la obra lliteraria d’autores vinculaos a la Cuenca’l Nalón. La poeta Ana Rosa Fernández firma’l discu-llibru ‘El pesu de la lluz’ col que’l Foru materializa el so proyectu conxuntu.

El Teatru municipal de San Martin del Rei Aureliu en L’Entregu va acoyer esti xueves 1 a les 20.00 hores l’actu de presentación de la obra d’Ana Rosa Fernández. Amás de la presencia de l’autora van intervenir nel actu el prologuista de ‘El pesu de la lluz’, Javier García Cellino, la presidenta del Foru pola Poesía, Eli Felgueroso y les recitadores Noelí Puente y Paqui Jambrina. La parte musical del eventu va tar a cargu de los cantantes Liliana Fernández, Marisa Valle y Fernando Valle, acompañaos polos músicos de la orquesta del Conservatoriu del Nalón Beatriz Losa, al pianu; Alejandro Gónzález, a la flauta; Ángel Calvo, al violín; y Xulio Arbesú a la guitarra.

La edición de ‘El pesu de la lluz’ d’Ana Rosa Fernández ye la primera d’una serie entamada pol Foru pola Poesía, una inicitiva conxunta na que participen l’asociación de muyeres Les Filanderes, Cauce del Nalón y Reciella Malory.

Los díes 2 y 3 d’avientu, el Teatru Palacio Valdes d’Aviles acueye l’estrenu absolutu d’”El cartero de Neruda”, producida y dirixida por Jose Sámano, que cunta colos atractivos de tener como actores principales a Miguel Ángel Muñoz, que fuere miembru del grupu UPA Dance, Jose Ángel Egido, premiáu con un Goya pol so papel en “Los lunes al sol”, y el debut de Marina San Jose, la fía de Víctor Manuel y Ana Belen.

La obra, llevaba al cine por Michael Radford en 1995, ye agora adaptada por Jose Sámano dende la conocida novela d’Antonio Skármeta, cola diferencia de que la cinta taba basado na decada de los cincuenta, mentes que la pieza dramática ta allugada nos setenta, enantes del golpe d’estáu de Pinochet.

El Teatru Palaciu Valdes completa asina la so programación, trayendo otru estrenu de los más esperaos na escena teatral española. Depues d’estrenase n’Asturies, l’espectáculu va percorrer varies ciudaes españoles nuna xira que va durar hasta’l mes d’abril.

Carlos Madera, director xeneral de Promoción Cultural y Política Llingüística, presentó ayeri na Conseyería de Cultura la sesta edición de los premios Asturias de teatru, que como l’añu anterior va cellebrase nel Nuevu Teatru de La Felguera, y nel que parte como favorita la compañía Teatro del Norte.

El 16 d’avientu, a les ocho la tarde, va cellebrase nel Nuevu Teatru de La Felguera la gala del teatru, premios Asturias. Nestos galardones son los mesmos creadores y actores los qu’escueyen a los ganadores, al travies d’un sistema de votación de representación del conxuntu d’activiades y profesiones esceniques. Al premiu puen optar obres de teatru, danza, musicales, cabaret, marionetes, títeres o circu. Amás d’una categoría pa les obres amateurs, que preselecciona FETEAS (la Federación de Teatru Amateur d’Asturies).

Ente los candidatos d’esta edición pa facese col premiu más relevante del panorama asturianu destaca la compañía Teatro del Norte dirixida por Etelvino Vázquez, qu’acapara gran parte de les nominaciones cola so obra “El viejo celoso” de Cervantes, qu’opta a Meyor espectáculu, Meyor Dirección, Meyor Interprete Masculín, Meyor Interprete Femenina y Meyor Escenografía.

La siguiente compañía con más númberu de candidatures, un total de tres, ye Higienico Papel pol espectáculu “Shower Power”.

Al premiu al meyor autor de los testos en castellán y asturianu compiten Laura Iglesia por “Shower Power” , Pedro Lanza por “El caballero de la murnia figura”, Jorge Moreno por “Harpías” y Pilar Murillo por “La escultura”.

El Teatru Palacio Valdés d’Avilés acueye esti viernes 11 la estrena de la última obra de Dolfo Camilo Díaz: “Puntu y coma”, un monólogu dramáticu arrepresáu pola compañía Higiénico Papel ya interpretáu nel so papel protagonista pol actor Silvino Torre.

El repasu críticu a la realidá social, les contradicciones de la naturaleza humana y una visión desopilante del sinsentíu de la vida caltericen el testu de Dolfo Camilo Díaz que va estrenase esta tarde n’Avilés. La obra parte d’un encargu de la compañía Higiénico Papel al autor tres l’ésitu del so anterior monólogu “Autopsia” y supón la incursión na dramatruxa en llingua asturiana d’esti veteranu grupu de teatru. “Puntu y coma” estrénase a les 19.30 hores nel coliséu avilesín.

La compañia vasca Tantakka repreenta esti miércoles 26 nel Teatru Xovellanos de Xixón el so últimu montaxe: ‘Paradero desconocido’, obra de Kathrine Kressman, dirixida por Fernando Bernués ya intepretada por Kike Díaz de Rada ya Isidoro Fernández.

La traxedia vivida polos xudíos europeos n’Alemania nazi ye l’argumentu d’esta obra dramática que cuenta con música de Iñaki Salvador y Pello Ramírez.

Visionario, incisivo y con un final imprevisible ‘Paradero desconocido’ publicóse en 1938 y en pocu tiempu fue considerada una obra maestra. The New York Times Book Review afirmó en 1939: “Esta historia ye la perfección mesma, ye la denuncia más rotunda del nazismu que haya aparecío enxamás”. Pero amás ye un testo de plena actualidá, un avisu a navegantes pa tar al tantu de les corrientes fanátiques que tamién anguañu percuerren Europa.

La compañía Margen pon n’escena esti viernes 21 nel Teatru Xovellanos de Xíxón el so primer montaxe en llingua asturiana: “Xulia”, adaptación de la obra homónima del dramaturgu suecu August Strindberg. La obra estrénase nel coliséu playu después d’un esistosu andar per otros escenarios del país.

Verónica Gutiérrez, José Antonio Lobato y Ángeles Arenas, dirixíos por Arturo Castro, van ser los encargaos de dar vida a los personaxes del drama de Strindberg, nuna versión del so clásicu “La Señorita Xulia” elaborada por Arturo Castro y Jose Antonio Lobato y tornada al asturiano pol escritor Pablo Texón.

L’acción del drama aístiase a finales del sieglo XIX nun llugar de la vieya Europa campesina. Na nueche máxica de San Xuan. Xulia, la fía y única heredera d’un señor rural, n’ausencia del padre baxa a beber y a bailar colos criaos col fin d’olvidar el desaire que’l so prometíu-y fizo abandonándola. D’ehí pa en delantre desarróllase una acción enllena de tensiones dramátiques y emociones escéniques que la veterana maestría de los actores de Margen llogren caltener en tou momentu.

La función escomienza a les 20.00 hore nel Teatru Xovellanos.

Más de mil quinientos espectadores asistieron a les ocho funciones que la compañía asturiana Nun Tris ufiertó nel so últimu viaxe per Arxentina y Uruguay. A la vuelta d’esta nueva xira per tierres americanes los artistes xixoneses amuésense contentos de l’acoyida a la so obra Albentestate y echen en falta más apoyu institucional a la promoción del teatru asturianu nel esterior.

N’alcordanza que fai Nun Tris del so periplu al otru llau del atlánticu a lo llargo de los pasaos meses d’agostu y setiembre agradezse l’apoyu y l’acoyida brindaos a la so compañía poles entidaes coles que s’alcontraron n’Arxentina y Uruguay. Al empar, la compañía, remembra que l’espectáculu Albentestate, col que viaxaben a América, malpenes cuntaba col apoyu económicu de la Conseyería de Cultura: un total de tres mil euros pa un proyectu cifráu en alrodiu de venticuatro mil.

Los responsables del grupu de teatru profesional aluden al apoyu qu’otres comunidaes autónomes dan a les compañíes pa les sos xires pel esterior: “alcuando’l cincuenta por cientu de ls producción” y afirmen que n’Asturies la puesta en marcha de polítiques asemeyaes podía dar un puxu importante al teatru fechu por artistes del país.

Albentaste, la obra cola que xiraron per Arxentina y Uruguay ye una versión d’Antígona escrita por Harold Zúñiga ya Ingrid López, que combina dramaturxa, música y danza. Bonos Aires y Rosario, n’Arxentina y Flores, Montevideo y Paysandú, n’Uruguay, fueron les ciudaes visitaes per Nun Tris na so xira.

Los arxentinos Les Luthiers tienen previsto actuar nel Teatru Campoamor d’Uvieu los prósimos 1 y 3 de payares col so espectáculu ‘Las obras de ayer’, dientro de la xira qu’esti famosu quintentu tien prevista per España, percorriendo ciudaes como Vigo, A Coruña, Llión o Compostela.

El grupu Les Luthiers, que se xuntaron nel añu 1965 a partir d’un conciertu de los coros universitarios en Tucumán, ta formáu por Carlos López Puccio, Carlos Núñez Cortes, Daniel Ravinovich, Jorge Maronna y Marcos Mundstock.

Nesta ocasión vienen a España a presentar el so espectáculu ‘Las obras de ayer (el refrito)’, estrenáu en mayu del añu 2002 nel Teatru Astengo de la ciudá de Rosario. Nel inclúinse temes tan conocíos como ‘El explicado’, ‘La balada del 7º regimiento’ o ‘El sendero de Warren Sánchez’.