Escéniques

El Conceyal de Cultura del Ayuntamientu d’Aviles, Juan Jose Fernández Fernández, presentó ayeri’l programa del ciclu Teatru n’Asturianu, que se va desarollar ente los díes 7, 14 y 21 de xunetu a les 22.30 hores nel Teatru Palacio Valdes. Este ciclu, compuestu por tres representaciones de les que dos van ser presentaes n’estrenu absolutu, nun falta a la cita avilesina del mes de xunetu dende 1994.

Les desventures de Xuacu, de Jose Ramón Oliva, que tamien dirixe la escenografía, va llevar el día 7 de xunetu al Grupu de Teatru Carbayín que per primer vez na so historia va representar nel míticu teatru avilesín.

La obra Pais, d’Adolfo Camilo Díaz, con dirección d’Andres Presumido, y El pariente d’America, d’Alfonso Iglesias, reprensentada pola Compañía Asturiana de Comedies, lleguen a los escenarios del Palacio Valdes n’estrenu absolutu los díes 17 y 21 de xunetu, a les diez y media la nueche, pa completar esti ciclu de teatru fechu n’asturianu.

Depues de pasar per Londres y Madrid, la compañía Pajarita de Papel de Victoria Brittain y Gillian Slovo, trai esti martes día 27 de xunu al Teatru Filarmónica d’Uvieu, a les 20 hores, la representación de la obra ‘Guantánamo’ con motivu de la celebración del Día Internacional decretáu pola Organización de Naciones Uníes en favor de les víctimes de la tortura. La entrada a esta obra, organizada por Amnistía Internacional, va ser llibre.

Como reza’l cartel de la representación, la obra ye una obligación moral en defensa de la llibertá.

Nel so intentu por definir el teatru asturianu na actualidá, la compañía de teatru Producciones Nun Tris tien trabayao n’estremaos aspectos del teatru asturianu, dende la mitoloxía, la tradición oral o los monólogos. Agora tienen concentraos los sos esfuerzos en recuperar la comedia asturiana rellacionándola cola Commedia de’ll arte, orixen d’esta manifestación artística popular, cola obra ‘La vixigona nun tien remediu’.

‘La vixigona nun tien remediu’ abre con una pieza musical de gaita y tambor qu’acompaña a una compañía d’actores y volatineros hasta una plaza onde, al travies d’una coreografía, coloquen el telón y l’atrezzu. La obra cunta la historia d’un vieyu agarráu llamáu Don Calzón que ta namoráu de la guapa Sabelina que, al tiempu, ta namorada de Floro. Sicasí, el padre de la moza quier casala con diferentes pretendientes, en función del que más perres-y dea. Ente too ello, la Vixigona, criada viaya, ye la que va complicar y resolver tolos conflictos que surden a lo llargo d’una obra a la que, ente actu y actu, lleguen los volatineros al pueblu pa facer una función.

Güei a les ocho y media la tarde, el Grupu de Teatru Contraste, formáu en La Villa, estrena nel Teatru Xovellanos de Xixón el so últimu montaxe. ‘Los verdes campos del Eden’, de la que ye autor Antonio Gala, ye una obra que cunta cómo lo pequeño camuda lo patetico y cómo l’humor ye un sentimientu que va apareyáu a la tenrura.

El grupu de teatru Contraste formóse nel añu 1990 nel Ateneu Obreru de Villaviciosa. Dende esa fecha tien trabayao en montaxes con estrenes añales y pelos sos talleres de teatru tienen pasao abondos aficionaos, estudiantes y profesionales del mundu de la escena.

Contraste ye anguañu ún de los grupos de teatru más valoraos d’Asturies y promotor de la Federación de los grupos de teatru non profesionales y amateurs d’Asturies.

L’actor Carlos Alba, conocíu nel mundu del monologuismu como ‘Cellero’ va presentar un espectáculu dedicáu al fenómenu espertáu alredol del pilotu de Fórmula 1, que lleva por títulu ‘Alonsomanía’. El monólogu va poder vese esti xueves día 8 a les siete y media la tarde nel Centru Municipal d’El Coto de Xixón y el vienres día 9 a les diez y media la nueche nel Teatru Palacio Valdes d’Aviles.

Carlos Alba (Aviles, 1972) ye llicenciáu en Ciencies de la Información pola Universidá Complutense de Madrid, y trabaya como periodista, monologuista, cuentacuentos y actor. Formóse como actor en Replika. Academia del Actor, dirixida por Jaroslaw Bielski, y fixo abondos talleres formativos, trabayando en compañíes como La Diosa del Sarcasmo, Yelmo y Cháchara-Cuentacuentos.

El personaxe de Cellero, col que representa’l monologuismu cómicu asturianu, ta basáu nel bisgüelu del autor que trabayaba como carreteru, poro sabía y cuntaba abondes hestories, que valen a Carlos Alba d’excusa pa repasar temes d’actualidá como la guerra d’Irak, la contaminación del Prestige o’l fenómenu de mases que tien producío’l pilotu de Fórmula 1, Fernando Alonso.

La conocida obra de Federico García Lorca, ‘La casa de Bernarda Alba’ llega esta selmana al teatru Xovellanos de Xixón baxo la dirección d’Amelia Ochandiano y col un elencu d’actrices de gran prestixu. Margarita Lozano, María Galiana, Concha Hidalgo, Marta Calvó, Ruth Gabriel, Saturna Barrio, Coizalde Núñez, Adriana Ugarte y Palmira Ferrer van xubir los díes 1 y 2 de xunu a los escenarios xixoneses esta famosa pieza nel mesmu añu que se cumple’l setenta aniversariu de la muerte del so autor, asesináu en Granada na Guerra Civil española.

Tres meses antes de ser asesináu en Granada, Lorca acababa esta obra con unes palabres que sedríen preludiu de la so muerte: “Y nun quiero lloros. La muerte hai que mirala cara a cara. ¡Silenciu! Fundiremonos nuna mar de llutu. ¿Oyísteisme? ¡Silenciu, dixi silenciu! ¡Silenciu!”.

A piques de cumplise los setenta años d’estos fechos, Amelia Ochandiana adapta esta obra maestra cola que quier demostrar que la llucha de les muyeres, el glayíu rebelde de los oprimíos y los peligros de los grupos o sociedaes zarraes sobre si, tán a la orden del día.

Les actrices Margarita Lozano, María Galiana, Concha Hidalgo, Marta Calvó, Ruth Gabriel, Saturna Barrio, Goizalde Núñez, Adriana Ugarte y Palmira Ferrer, formen un espectacular repartu pa un proyectu ambiciosu nel que destaca’l mestizaxe de la so banda sonora, que cuerre a cargu de Las Voces Búlgaras y el cantador Enrique Morente.

El collaborador habitual de la Paramount Comedy y El Club de la Comedia, Agustín Jimenez presenta esti sábadu día 6 de mayu nel teatru municipal de L’Entregu la obra ‘7 pecados.es’, una crítica humorística de la sociedá española actual dende’l puntu de vista de personaxes como Papa Nöel, Cervantes, Superman o Rocky. El monólogu va poder vese en dos sesiones esti sábadu: una a les ochoy media la tarde y otra a les diez y media la nueche.

‘7 pecados.es’ da una vuelta de tuerca al xeneru del stand-up comedy español, al ser la primer obra d’esta natura basada nún únicu actor, tal y como fain nos escenarios de Broadway con gran esitu de públicu grandes actores como Billy Cristal o Woopy Gorlberg.

Siguiendo colos actos de la XXVI Selmana de les Lletres Asturianes los conceyos d’Uvieu, Xixón, Noreña, Carreño, La Pola L.lena y Cangas del Narcea son l’escenariu güei de diferentes representaciones teatrales. Pela so parte, les xornaes d’Universidá n’escena siguien con una ponencia de Boni Ortiz sobre Felipe Villa y la dignificación del teatru costumista asturianu, y otra de Montse Garnacho sobre cuentos populares llevaos al teatru. Finalmente, la sede de la RTPA, en Cabueñes (Xixón) va ser l’escenariu del DVD ‘Pieces d’obres teatrales y poetiques’ a cargu de Javier Maqua y Ramón Lluis Bande.

A les doce la mañana d’esti miercoles 3 de mayu la Sede de la RTPA en Cabueñes (Xixón) va acoyer la presentación del DVD Pieces, de obres teatrales y poetiques, a cargu de Javier Maqua y Ramón Lluis Bande. DVD que va entregase de regalu nel Día de les Lletres cola compra llibros y música n’asturianu nes llibreríes y tiendes de discos collaboradores con esta selmana.

L’Asociación pola Recuperación de los Sidros y les Comedies va representar a les seis de la tarde na Plaza la Constitución de Noreña la obra ‘Llegó la modernidá (comedia de guirrios); y una hora más tarde, nel Centru Cultural d’El Llano de Xixón la compañía Higienico Papel fadrá otro tanto cola obra de Dolfo Camilo Díaz ‘Puntu y coma’.

Ente les ocho y les ocho y media de la tarde otres tres obres van salir a escena. Telón de Fondo va representar nel Teatru Prendes de Candás ‘Una hora ensin televisión’, de Jaime Salom; la Compañía Asturiana de Comedies va llevar al Vital Aza de L.lena ‘Interdictu o pleitín d’aldea’; y Traslluz representará la obra de Carmen Duarte ‘Tocóme la lotería’ nel Teatru Toreno de Cangas.

La conseyera de Cultura, Comunicación Social y Turismu del Gobiernu d’Asturies, Ana Rosa Migoya, presentó ayeri nel patiu central de la Conseyería los actos de cellebración de la XXVII Selmana de les Lletres Asturianes, que nesta nueva edición ta dedicada al teatru asturianu. Amás de querer reconocer el llabor de la xente del mundu la escena, la conseyera de Cultura aprovechó esta presentación pa valorar los avances daos sobre’l Plan de Normalización del Asturianu, aprobáu hai un añu por unanimidá na Xunta Xeneral, emponderando’l trabayu de la Oficina de Política Llingüística sobromanera no tocante la oficialización toponímica.

Anque reconoció qu’anguaño esti xeneru al que se dedica la Selmana de les Lletres ‘nun ye’l más profusamente cultiváu, sí ye’l que mayor favor popular conserva’. La conseyera, que bautizó estes xornaes como ‘la gran folixa del teatru’, repasó les 23 representaciones esceniques que se van facer a lo llargo d’estos seis díes per otros tantos conceyos asturianos, amás de les presentaciones de llibros, DVD’s, recitales poeticos, llectures públiques, xornaes, conferencies y otros actos institucionales.

Migoya aprovechó esti actu de presentación pa valorar ‘positivamente’ el Plan de Normalización aprobáu hai un añu y que, en palabres de la conseyera, ‘sigue desarrollándose con dellos puntos clave que destaquen penriba los demás’. Nesi sen, quixo destacar l’aumentu del 65% nel presupuestu de la Oficina de Política Llingüística, asina como los avances en materia toponímica. Pa la conseyera los datos rescamplen: ’10 conceyos d’Asturies colos topónimos tradicionales oficiales por Decretos del Conseyu de Gobiernu; 7 nuevos Decretos que van dir aprobándose en feches mui próximes; y otros 29 conceyos onde la Xunta de Toponimia ta trabayando en comuña colos Ayuntamientos.’

Los servicios de normalización llingüistica de los conceyos, el trabayu de la Conseyería d’Educación y Ciencia y la edición de llibros n’asturianu y gallego-asturianu foron otros de los temes que la conseyera de Cultura destacó na rueda de prensa d’ayeri, que cuntó cola presencia de dalgunos representantes del mundu del teatru asturianu.

Mañana martes la Universidá d’Uvieu sal a escena cola Selmana de les Lletres Asturianes inaugurando un ciclu de conferencies y representaciones teatrales que van repartise a lo llargo de tola selmana y que va traer al Salón d’Actos de la Biblioteca del Campus del Milán al escritor Jon Cortázar, ente otros. Aviles, Mieres y la Casa Cultura da Veiga son otros de los llugares que mañana van remembrar el teatru asturianu.

Tres de la presentación oficial d’esta Selmana nel patiu de la Conseyería de Cultura a les once y media la mañana, la Universidá d’Uvieu va presentar les xornaes ‘Universidá n’escena’, que s’abren con una conferencia de la filóloga Inmaculada Urzainqui, directora del Institutu Feijoo d’Estudios del Sieglu XVIII, que va tratar ‘La entremesística asturiana’, pa depues dar pasu a la representación per parte de la compañía Telón de Fondo de ‘L’ensalmador’ d’Antón de Marirreguera.

A les ocho la tarde, el Teatru Palacio Valdes d’Aviles va presentar un poema dramático-musical de la Banda de Música de Corvera, dirixida por Jesús Cracio, que lleva por títulu ‘Ente bambalines. El teatru que lleves dientro’. Actu siguío, va inaugurase la escultura ‘Ente bambalines’ del artista Fidel Pena n’homenaxe al teatru asturianu.

A la mesma hora, Centru Cultural Caxastur de Mieres va llevar a escena la versión de la pieza de Strindberg ‘Xulia’ que fai la compañía de Teatru Margen. Mentes que la Casa Cultura da Veiga va acoyer la representación d’ ‘Informe pra úa academia’ de Franz Kafka que fai la compañía Bacanal Teatro.