Escéniques

El Nuevu Teatru de La Felguera presenta la obra d’Adolfo Camilo Díaz “Puntu y Coma”. Nesta obra intervién Silvino Torre y ta dirixida por Laura Iglesias. La puesta n’escena de la obra ye de la compañía Higiénico Papel. Como avecen ser les obres d’Adolfo Camilo Díaz la comedia negra ye’l xérneru predominante nesta representación del recien ganador del Premiu Maria Xosefa Xovellanos.

Puntu y coma desenvuelve la conversación de Cipriano, un home ensin perres que visita al so padre que ta en coma nun cuartu d’hospital. Cipriano entama una confesión na que fai un repasu de la relación ente dambos y depués de colar de la casa del padre. Dende esi momentu l’aición desenvuélvese nun enguedeyu nel qu’alluma l’humor asturianu.

“El viaje a ninguna parte” de Teatro Margen conivrtióse na obra ganadora de los premios Asturies de les Artes Escéniques. La compañía Margen tenía 6 nominaciones de les qu’algamó 5 premios. La gala que se desenvolvió nel teatru Mari Peña de La Felguera premió, tamién, a Kamante Teatro pola so obra de teatru infantil “Que viene el lobo”.
Na so intervención na gala d’entrega de los Premios Asturies de les Artes Escéniques Alán García, director del Teatru Prendes de Candás, reivindicó l’usu de la llingua asturiana. Teatro Margen consiguió los premios al Meyor espectáculu p’adultos, a la meyor dirección, meyor actor, actriz y meyor iluminación. Dase la circunstancia de qu’el premiu al meyor actor disputábenlu dos actores de la compañía Margen.
La compañía Kamante Teatro algamó’l premiu al meyor montaxe infantil por “Que viene el lobo”; asina mesmo la so autora, Luisa Aguilar, fízose col premiu al meyor autor asturianu , y el espectáculu recibió’l reconocimientu al meyor espectáculu empobináu pal públicu infantil.
Teatro Margen

El Teatru Palacio Valdés d’Avilés tendrá la primera función de la obra “Travesía sobre nieve en Bagdad” del grupu de teatral Barataria Teatro. La última obra del grupu de L’Entregu toca la situación de guerra d’Iraq asina como les complicaes relaciones personaxes nes que s’entemecen situaciones nes que l’espectador puede alcontrase. Los personaxes nun tán vinculaos a la guerra, anque sí falen de la mesma.
“Travesía sobre nieve en Bagdad” ye una obra dirixida por Roberto Corte. El director esplicó la estructura de la obra na que destacó los elementos abiertos pa la interacción del espectador. Los diferentes personaxes de la obra busquen ufrir un conxuntu de lo que ye la sociedá actual.

Noelia Francisco Martínez y Elena Rato formen el colectivu Ratopaco qu’estos díes presenta na Sala Borrón el montaxe “Expendo el arte”, una coreografía que se realiza nel espaciu d’una máquina espendedora. Nesti montaxe Noelia Francisco y Elena Rato coviértense n’osetos en constante venta y, al tiempu, en daqué non vendible. L’aición de la máquina ye la d’espender imáxenes artístiques procedentes d’otros trabayos del colectivu. L’acición tará acompañada pola música de Raul Martínez.

El monologuista Carlos Cellero estrenará’l monólogu “Tamos asina”, sobre la situación del asturianu, na ceremonia d’entrega de los premios de narrativa Xosefa Xovellanos y de poesía Xuan María Acebal qu’añalmente entrega la Conseyería de Cultura. L’actu fadráse nos sótanos de la Conseyería de Cultura a partir de les 19,00 hores.

El narrador Milio’l del Nido va cuntar les sos hestories nel Centru Social El Cortijo de La Corredoria, nun actu organizáu pola asociación de vecinos “El Conceyín”. L’actuación entamará a les 19,30 de güei 7 d’avientu de 2006.

Milio’l del Nido ye ún de los más nomaos contadores de cuentos del país, amás de ser l’impulsor de bien d’actividaes venceyaes a la recuperación y dignificación de la cultura asturiana. Tien publicaos “Contáronmelo pa que lo contara” y “Y qué quies, si tengo oreyes”, los dos cola editorial Trabe, asina mesmo tamién tien una caset con bien de les sos narraciones.

El monologuista Carlos Alba va facer delles actuaciones n’Uviéu. La primer d’elles sedrá nel Teatru Filarmónica cola obra “Por falar vencí la güestia”. L’actuación fadráse’l domingu 10 d’avientu a partir de les 20,00 hores. El llunes la biblioteca de Vallobín sedrá l’escenariu pa “Catálogo de rarezas humanas”, una narración oral p’adultos qu’entamará’l llunes 11 d’avientu a partir de les 18,30. Esta narración fadráse depués nes Biblioteques de Ciudá Naranco, día 12 d’avientu a les 19,30, y na Biblioteca de Ventanielles el vienres 15 d’avientu a partir de les 19,30.

Cuenta l’autor nel so espaciu web de “Por falar vencía la güestia” que ye un espectáculu basáu nes tonaes y cantares de los últimos años del sieglu XIX y de los primeros del sieglu XX. La fin ye la de recuperar histories d’enantes, usando’l versu al tiempu que se-y da una figura teatral al monologuista.

Carlos Alba

La obra del escritor asturianu Adolfo Camilo Díaz “País” representaráse’l sábadu 2 d’avientu a partir de les 20,00 hores nel espaciu escénicu de la Plaza de l’Habana de la capital del conceyu de Llanera. La obra ta dirixída por Andrés Presumido.
La traxicomedia País desenvuélvese nes Cuenques onde’l sacrásticu sentíu del humor d’Adolfo Camilo Díaz s’axunta cola crítica social faciendo una reflexón sobre l’Asturies posindustrial. Nesta crítica al poder sindical l’espectador tien tiempu pa camentar sobre bien de referencies familiares a tolos asturianos y asturianes.

El Conseyu de la Mocedá d’Asturies y la Oficina d’Información Xuvenil de Grau, xunta la Casa Conceyu, entamen un festival sobre los aspectos más bizarros de la cultura actual. Dende’l 1 d’avientu y hasta’l 9 d’avientu Grau acoyerá bien d’actividaes venceyaes a los gustos más kitch. Artistes como Cuco Suárez o Goyo Ramos participarán nesta novena. Escritores, representaciones teatrales y cine complementarán les actividaes d’esta Selmana bizarra.

Novena bizarra

El Conceyal de Cultura, Juan José Fernández, y el Conceyal d’Educación, Román Álvarez, presentaron la V Selmana Nacional d’Arte Contemporániu AlNorte. Xunto a ellos, na presentación, tuvieron el Director de la Escuela Superior d’Arte, Roberto Crespo, y el Director de la Escuela Municipal de Cerámica, Ramón Rodríguez.
Les actividaes de AlNorte entamen el prósimu 1 d’avientu con una charra del ilustrador Pablo amargo. AlNorte ye un alcuentru xeneracional col oxetivu de dinamizar Asturies alredor del arte, averando la espresión artística contemporánia a los ciudadanos. Y too ello mediante’l diálogu y de les sos actividaes teórico-práctiques, cuntando con artistes profesionales, noveles, estudiantes, especialistes, historiadores, neños y espectadores, implicando d’esa forma a tolos sectores culturales.
Asina, Avilés va cuntar con taller d’artista impartíu por Benjamín Gutiérrez y una de les esposiciones seleccionaes y becaes n’esta edición, la de Tadanori Yamaguchi. Nos dos casos el puntu d’alcuentru de les actividaes sedrá’l Centru Municipal d’Arte y Esposiciones na cai Llano Ponte 49 d’Avilés.
Otru polu d’actividá va ser como n’otres vegaes la Escuela Superior d’Arte, nel Palaciu de Campusagráu, onde se van impartir los talleres de didáctica infantil y xuvenil por Ana María Barberena, Alicia García y Beatriz García.