Escéniques

Güei, martes 6 de xunetu, tenía d’estrenase nel Teatru Riera de Villaviciosa la obra teatral Tuxa, un repasu de la vida y obra de la escritora maliayesa Tuxa Villaverde. Sicasí la situación del Teatru maliayu dempués de les llenes de les últimes selmanes, nun permite facer la representación. El director de la obra, Jose Luis Campa, llamentó la situación y denunció que “quince díes dempués del agua llégase a la conclusión de que les butaques nun tán en condiciones pol mugor”. La compañía busca yá otru teatru onde facer l’estrenu.

Dirixida por Jose Luis Campa, la pieza inclúi fragmentos de la propia obra de Tuxa, combinaos con partes biográfiques, con testos adaptaos y ellaboraos por autores de la talla de Lluis Portal (que yá escribió una obra asemeyada sobre la figura del escritor Carlos García de la Concha), Miguel González Pereda o Etelvino González López.

Mui trabayada n’escenografía y na interpretación (pa la que se cunta cola presencia de miembros del Grupu de Teatru Carbayín), Tuxa ye una muestra más de como’l teatru n’asturianu pue algamar altos niveles estéticos fuxendo de los tópicos costumistes tradicionales.

Pa esti martes, 6 de xunetu, a les 22:00 nel teatru Riera, ta previstu l’estrenu de la obra teatral Tuxa, promovida pol Serviciu de Normalización llingüística de la Comarca de la Sidra, cola ayuda de la Conseyería de Cultura y Turismu.

La obra ye un repasu de la vida y obra de la escritora maliayesa Tuxa Villaverde (Tornón 1882-1934), personalidá que s’intenta recuperar. Dirixida por Jose Luis Campa, la pieza inclúi fragmentos de la propia obra de Tuxa, combinaos con partes biográfiques, con testos adaptaos y ellaboraos por autores de la talla de Lluis Portal (que yá escribió una obra asemeyada sobre la figura del escritor Carlos García de la Concha), Miguel González Pereda o Etelvino González López.

Mui trabayada n’escenografía y na interpretación (pa la que se cunta cola presencia de miembros del Grupu de Teatru Carbayín), Tuxa ye una muestra más de como’l teatru n’asturianu pue algamar altos niveles estéticos fuxendo de los tópicos costumistes tradicionales.

Güei, 1 de xunetu, y mañana, a partir de les 20:30 hores, Concha Velasco va xubir al escenariu del Teatru Xovellanos de Xixón, con “La vida por delante”, una obra de Romain Gary, na versión dirixida por Josep María Pou, con Concha Velasco, Rubén de Eguia, Carles Canut y José Luis Fernández. Por esta interpretación Concha Velasco foi finalista como meyor actriz nos Premios Max 2010, xunto a Rosa Mª Sardá y Blanca Portillo, que finalmente s’alzó col premiu pol so Hamlet.

En 1980, na so casa de París, Romain Gary conclúi la so nota de suicidiu: “… Escosé hasta’l fondu”. Yera unu de los escritores más lleíos de la dómina con obra fecha cine (Los raigaños del cielu, John Huston, 1958 o Perru Blanco, Samuel Fuller, 1972), diplomáticu de carrera, xudíu d’orixe lituanu que se dexó gran parte de la familia n’Auschwitz, amigu de Camus y Malraux, y sobremanera, “un espíritu burllón” que se volvió vulnerable’l día que se namoró de Jean Seberg: la moza americana que vendía periódicos n’Ábout de souffle. Tres la muerte de Gary desatápase una de les burlles lliteraries del sieglu: él yera tamién Émile Foliar, l’escritor al que la crítica saludó como “un nuevu ya increíble talentu de la lliteratura” mientres “executaben” a Gary por autor de romanticismu tresnocháu”.

Como Émile Foliar, Romain Gary publicó en 1975 “La vida per delantre” (La vie devant soi) y nella daba vida a Madame Rosa, una vieya prostituta xudía, superviviente de los campos d’esterminiu, que curia de los fíos d’otres prostitutes. En 1977, Simone Signoret interpretóla pal cine (La vie devant soi, Moshé Mizrahi). Agora Concha Velasco, so la dirección de José María Pou, encárgase d’esnudala sobre l’escenariu. Inmensa, poderosa ya indiscutible, Concha Velasco retrata’l cansanciu, el maduror, l’humor negru y la tenrura d’un personaxe que lo vivió too y al que, sacante alifaces, difuntos y señardaes, poco-y queda.

Na so pensión, onde fueron creciendo pa marchar y dexala sola, los sos “fíos de puta” (asina los define nun momentu de la obra) namás queda Momo, el postreru de los sos “neños”. Momo ye adolescente, musulmán prauticante (asina lo decidió’l so padre, encarceláu n’asesinando a la so madre) y con tantes duldes, tantes entrugues rabioses que Madame Rosa ta ensin respuestes. Dos nesa casa rancia, dos xeneraciones cafiándose mutuamente y mutuamente curiándose. Mientres ella sabe enferma y afalaga una muerte duce, Momo intenta caltenela viva, y cuando ella quier saber de qué se ta morriendo, Momo revéla-y la verdá irremediable: “de la vida, Madame Rosa; namás de la vida”.

Güei, vienres 11 a les 20:15, nel Nuevu teatru de La Felguera (Llangréu) va ponese n ‘escena “El xuegu de yalta” de Brian Friel, con Marilú Casas y Lluis Antón González, embaxo la dirección Sara García Rodriguez.

“El xuegu de Yalta” ye obra de Brian Friel, al traviés de l’adaptación del cuentu de Chéjov “La dama del perrín” y cuenta una de les mas guapes hestories d’amor, escrita pol autor rusu y adaptada por dramaturgu irlandés Brian Friel, con torna agora de Lluis Antón González.

La escenografía y les lluces son de Beni García, hestóricu director del grupu avilesín Candilejas y la producción ye de Xulio Vigil un de los fundadores de Telón de Fondo nel añu 1973.

“5” (ni cuatro, ni seis)”, esti ye’l títulu del espectáculu de monólogos que va llegar el vienres 4 y sábadu 5, a les 20:30 hores, al Teatru Xovellanos de Xixón y qu’axunta a cinco cares imprescindibles de la comedia. Un homenaxe a un xéneru, el stand up comedy, que se va celebrar a partir de les 20:30 hores con Dani Rovira, Miguel Iribar, David Navarro,Nacho Garcia y Juanjo Albiñana.

Les entraes tán a la venta en Caxeros de Caxastur www.cajastur.es, TiqueExpress, 902 601 106 y Taquilla del teatru, hasta momentos enantes de l’actuación, por precios d’ente los 14 y 22 euros.

El domingu, 23 de mayu a les 20:30 hores, la compañía asturiana Barataria Teatro va poner n’escena nel Teatru Xovellanos “Fin de partida”, de Samuel Beckett, (Dublín, 1906 – París, 1989), dramaturgu, novelista, críticu y poeta; collaborador y discípulu de James Joyce y máximu representante del llamáu “teatru del absurdu”. En 1969 otorgáron-y el Premiu Nobel de Lliteratura “pola so escritura, que, anovando les formes de la novela y el drama, adquier el so grandor a partir de la indixencia moral del home modernu”.

Los sos testos son una fonda decepción sobro la condición humana, una carga de pesimismu nihilista papada d’humor negro, visiegu, sórdido inclusive. La so primer obra maestra ye “Esperando a Godot” (1948-1949), dempués van venir otres. Pero hai una onde la maestría de Beckett algama un grau d’escomiu, d’humor xavaz y bisturín despiadáu que lo cataloga, per siempres y pa siempres, como xeniu. Ye “Fin de partida” y el críticu Harold Bloom diz sobro ella que “ye la obra maestra del teatru de Beckett”.

La obra:

Fin de partida ye la hestoria de cuatro personaxes. Hamm, ciegu y incapacitado pa permanecer de pies; el so criáu Clov, sicasí, nun puede sentase. Nagg y Nell son los padres de Hamm y, por falta-yos les piernes, viven confinaos en cubos de basura.

Sobre la so versión de la obra de Beckett diz el so director Roberto Corte: “Tien Fin de partida unos personaxes que son, anque nos engañar les sos formes, la viva semeya de toos nós: entretiénense cuntándose hestories, exacerban la so inercia con jueguecitos, ármense putaes y provóquense. Pa cargar les tintes sobro les nueses miseries, l’autor fabricólos tamién físicamente defectuosos. Agora bien, más allá d’esi inmediatu circu de despropósitos, yá a midida que desenvuélvese l’acción, ye cuando se va texendo una evanescente poética sentimental de gran caláu….”

Ente los intérpretes: Jorge Moreno, Adrián Gómez Zamanillo, Silvino Torre y Eva Vallines, y na ayuda del director, Cristina Cillero .

Vidiu de la obra

El teatru torna otra vuelta a Villaviciosa esti sábadu 22 de mayu cola actuación de la compañía llangreana “Teatro Kumen” cola obra “L’encierru” nel Teatru Riera de La Villa, a les ocho de la tarde.

La obra “L’encierru” ye una comedia que trata sobre les hores que vivieren unos sindicalistes mineros dientro d’un pozu del Valle del Nalón.

El musical “Mamma Mia!”, basáu nos cantares del popular grupu Abba,llega güei xueves al Teatru Campoamor d’Uviéu dientro del ciclu ‘Teatru en primavera 2010’. El musical, que trunfó en ciudaes del mundu enteru va poder vese hasta’l día 30 d’esti mes con precios d’ente 30 y 50 euros.

El musical ‘Mamma mia!’ trunfó con una formación asemeyada, protagonizada siempres pola cantante catalana Nina, en Madrid y Barcelona, ciudaes onde tuvo dellos años de forma permanente. Dende l’añu pasáu la compañía ta de xira y anque s’anunciare pal branu de 2009, finalmente la fiebre d’Abba nun llegará a Asturies hasta’l próximu 20 de mayu.

El que nun paez que vaya poder actuar nes xornaes organizaes n’Uviéu, ye Daniel Diges, qu’interpreta nestos momentos a ún de los personaxes protagonistes del musical y que foi escoyíu apocayá como representante de TVE nel festival d’Eurovisión, que coincide en feches coles programaes pa Mamma Mía! n’Uviéu.

El vienres 14 y sábadu 15 a les 20:30 hores, la compañía catalana Joglars va llevar a escena nel Teatru Xovellanos una particular celebración, “2036 Omena – G”, un homenaxe futurista cargáu de retranca y de bon humor. Trátase a cencielles de camudar les feches y asitiase nel 75 aniversariu de la fundación de la compañía. El restu, en pallabres de Boadella, ye namás un cálculu de probabilidaes, munchos ensayos y l’esperiencia de 50 años.

El teatru torna otra vuelta a Ribeseya esti sábadu cola actuación de la compañía llangreana “Teatro Kumen” cola obra “L’encierru” na Casa Municipal de Cultura de la capital del conceyu, a les ocho de la tarde.

La obra “L’encierru” ye una comedia que trata sobre les hores que vivieren unos sindicalistes mineros dientro d’un pozu del Valle del Nalón.