Escéniques

La Pecera Elástica entama actividaes de danza, accesibles a tou tipu de persones, ensin necesidá d’esperiencia, y encontaes na técnica “Contact Improvisatión”.

El 13 de febreru, entámase una clas más Jam de Contact Improvisatión con Elisa Kopp. La clas va empezar a les 17.30 y la Jam a les 19 hores nel llocal de l’Asociación La Cámara, na cai Avilés 13 de Xixón. El preciu ye de 10 euro clas.

Los díes 25 y 26 de febreru en Lleón, con un programa entamáu pol Aula d’Artes del Cuerpu Universidá de Lleón. El monitores son Paz Broces Polo y Teresa García Santu Medero. Inscripciones n’Actividaes Culturales ULE, 987 291 634, recsac@unileon.es

Y sigue en Xixón el 27 de febreru con un taller entamáu por La Pecera Elástica, nel llocal de l’Asociación La Cámara. Les inscripciones pueden facese hasta’l 21 de febreru.

Esiste la posibilidá de siguir el trayectu asistiendo tantu al taller de Lleón como al de Xixón. Nesti casu ruégase confirmación antemanada d’asistencia pa la organización de la estancia.

Esti sábadu 12 a les 23.45 Cellero va actuar nel Sit And Go, chigre musical asitiáu na Avenida San Agustín d’Avilés. Amás, el sábadu 19 a la mesma hora y nel mesmu chigre, tará’l so personaxe El Pola echando monólogos.

La Compañía de Danza Antonio Najarro va ufiertar el vienres 21 a les 20:30 hores nel Xovellanos el so últimu trabayu coreográficu, “Jazzing Flamencu”. El coreógrafu y baillarín foi galardonáu nos Premios Max 2010 como Meyor Intérprete Masculín de Danza. Va Ser la primer vegada que Najarro presente énte’l públicu xixonés esti espectáculu nel que desenrrolla un personal llinguaxe del flamencu.

Antonio Najarro asítiase al mandu de la so compañía pa crear, dirixir y poner sobre la escena Jazzing Flamencu, terceru de los sos espectáculos tres Tangu Flamencu y Flamencoriental. Al igual que nes sos anteriores producciones, Najarro funde de nuevu la danza clásica colos nuevos enclinos vanguardistas tantu musicales como dancísticas que caractericen y rixen el so estilu personal como creador.

Soldepaz-Pachakuti, en collaboración col Comité de Solidaridá cola Causa Árabe, ufre la obra de teatru en castellán B-52 que va poder esfrutase’l 23 de xineru a las 20,30 hores. Nella, cinco collacios xugando a pilotar un bombarderu B-52 cuya misión ye destruyir oxetivos n’Iraq. El xuegu vuélvese tan seriamente apasionante, tan competitivu, que t< por paecer real.

La compañía de teatru ye El Perro Flaco Teatro, fundada n’Asturies nel 2006 y la obra que nos presenta, B-52, ye una obra espresamente escrita pa ellos por Santiago Alba Rico, el creador de los míticos Electroduendes.

Ente bombardéu y bombardéu danse duelos verbales d’aplastante comicidá, coreografíes surrealistes, sátires musicales qu’entren a degüellu y una puesta n’escena que paez salida del imaxinariu de Ray Bradbury.

Más información

El xueves, 13 de xineru, de magar les ocho la tarde, van representase “La Xilguerina!” y dellos sainetes nel Atenéu La Calzada a partir de les ocho la tarde, per parte del Grupu Rosario Trabanco. L’actuación forma parte de la Selmana Cultural de Los Moscones en Xixón.

Esti martes, 4 de xineru, a les 19:30 hores, el Centru Civicu de Posada de Llanes acueye la representación de la obra costumista “De tal palu tal astiella”, fecha pola compañía xixonesa Traslluz. La obra ta escritra por Carmen Duarte.

Yllana presenta nel Xovellanos una hilarante propuesta que sol títulu de “Zoo” encadena gags desternillantes basaos nel eternu conflictu ente l’home y la naturaleza. El so sellu personal nel tratamientu del teatru xestual vuelve trescalar esta producción, que s’alzó col Max 2010 al Meyor Espectáculu Infantil y que yá escosó toles llocalidaes nel Xovellanos .

Zoo ye la última aventura del grupu madrilanu Yllana. Inmensos nel arte de dicilo too a base de xestos y mímica, vuelven poner de pies un espectáculu escepcional y pa tolos públicos, una pieza escénica pa esfrutar en familia. Nacíos en 1991 como compañía de teatru d’humor xestual, Yllana foi desenvolviendo una actividá paralela na qu’al pie de les sos propies pieces orixinales produz distribúi y promueve montaxes d’otres compañíes.

“Zoo” va representase’l xueves 30 d’avientu a les 19:00 hores nel Teatru Xovellanos.

La revisión del yá clásicu y trotamundos “Bufaplanetes” llega al Xovellanos coles llocalidaes escoses nuna puesta n’escena que cunta col soporte na dirección de la gran coreógrafa Marta Carrasco.

Una seronda de 1982 Pep Bou, un apareyador por obligación y artista por vocación, colgaba llápiz y escuadra pa facer pómpares de xabón sobre un escenariu. Esti saltu profesional al vaciu foi a efectos de creatividá unu de los momentos más orixinales y vanguardistas na hestoria del espectáculu y titulóse “Bufaplanetes”.

Con eses pómpares de xabón Pep Bou convenció a espectadores de los seis continentes y agora, a casi tres décades d’entós, Bou revisita’l so Bufaplanetes convirtiéndolo en Rebufaplanetes.

El tiempu pasó pol espectáculu… pa bien. L’artista catalán esperimentó colos llinguaxes visuales hasta’l puntu de que’l xabón fechu pómpares yá nun ye tan solo una metáfora de lo efímero sinón que se volvieron arte en si mesmu, investigación de nueves maneres d’entender l’espaciu, de combinar increíblemente precisión técnica y cautivación teatral.

Esti espectáculu ta encamentáu a partir de cinco años y va tener llugar el miércoles 29 d’avientu a les 19:00 hores nel Teatru Xovellanos.

Esti martes 30 de payares, a les ocho la tarde, entama na Casa Cultura de La Pola Siero la representación de la obra teatral “Tuxa”, de manes de la compañía Teatro Contraste.

La obra ye un repasu de la vida y obra de la escritora maliayesa Tuxa Villaverde (Tornón 1882-1934), personalidá que s’intenta recuperar. Dirixida por José Luis Campa, la pieza inclúi fragmentos de la propia obra de Tuxa, combinaos con partes biográfiques, con testos adaptaos y ellaboraos por autores como Lluis Portal, Miguel González Pereda o Etelvino González López.

El sindicatu UXT celebra dos actividaes dedicaes al Día de la violencia de xéneru. Esti martes 23 de payares ábrese la esposición de semeyes “Les muyeres iraquines y la guerra”, cedida pol Institutu Asturianu de la Muyer, que va tar nel edificiu d’UXT Asturies, n’Uviéu, hasta’l 3 d’avientu.

La esposición ye una colección d’imaxes realizaes por profesionales de la fotografía de prensa qu’amuesa cómo en dómines de guerra les necesidaes básiques de les muyeres y la infancia son les primeres en ser sacrificaes. Pese a ello, el so trabayu consigue sofitar les sociedaes, responsabilizándose de les xeres doméstiques y familiares, apurriendo cuidaos médicos y supliendo servicios que l’estáu nun apurre. Nesti casu concretu, l’escenariu ye la guerra d’Iraq.

Amás, a les siete la tarde, UXT celebra nel mesmu espaciu una obra de teatru titulada “Performance”, por Factoria Norte. El testu ye de Jorge Moreno y el repartu ta formáu por Jorge Moreno y Ana Blanco.