Escéniques

La compañía Nun Tris celebra’l so quince aniversariu con una fiesta y col estrenu d’un obra basada nun guión de F. Fellini. Na obra van participar Arantxa Fernández, Rafa Abenza, Mercedes Verástegui y Antón Caamaño. L’estrenu va facese en La Llaboral de Xixón, el 30 de xunetu a partir de les nueve la nueche.

A la dirección ta Inma Rodríguez, siendo ayudante de dirección Sonia Vázquez.

Amás, ta prevista una esposición resume de los quince años de la compañía.

El Conceyu Bimenes celebra estos díes la XV Fiesta de la Oficialidá de la Llingua Asturiana, cola que fai alcordanza de la hestórica fecha del 5 de xunetu de 1997, na que’l Plenu del Conceyu aprobó la oficialidá de la llingua asturiana nel territoriu yerbatu.

Esti xueves, 30 de xunu, na Casa la Cultura de Santuyano, a les 20.30 hores y dientro d’estos actos va tener llugar la representación de la obra costumista asturiana ‘Xuacu y Telva’, a cargo del Grupu de Teatru ‘El Hórreo’, de Barcia (Valdés).

El xueves 23 de xunu a les 19:00 hores nel salón d’actos del Centru Municipal Integráu d’El Llano, en Xixón, na cai Ríu d’Oru 37, organízase l’estrenu d’una obra de teatru. L’accesu a esta actividá entamada por Xega Xoven ye llibre y gratuitu.

Na dómina actual (2011) munches persones creen vivir na modernidá. Yá naide cuestiónase si los negros son malvaos demonios, los xudíos una raza inferior o la democracia l’estáu políticu idílicu. Nun ye hasta cuando lo distinto, lo estraño y lo poco familiar pasa a tar dientro de les nueses vides, y empezamos a cuestionanos si realmente vivimos encadenaos polos nuesos prexuicios dientro d’un mundu preparáu pa la nuesa rebeldía conformada.

N’Uviéu vive Susi, la Xefa del Departamentu d’Informática de la Facultá de Medicina, qu’acaba de camudase al pisu de Olimpia, una moza de 28 años que trabaya como prostituta. Ésta sabe bien sobre la negación xeneralizada de la sociedá tocantes al so trabayu, pero nun lu importa, al contrariu qu’a Susi, que nun sabe cómo tomase’l fechu de que la so nueva compañera de pisu, que-y paecía tan duce y curiosa, se dedique a daqué totalmente contrario a los sos principios. Susi vese sumida nun tornáu de tracamundiu qu’amenacia con destruyir tola so conformista esistencia. P’ayudar nesti caos tien al so amigu Carlos, estudiante de medicina, que la sofita nunes ocasiones y n’otres confúndela entá más.

L’Academia de la Llingua Asturiana espubliza na so colección “Mázcara”, que lleva yá quince llibros, la obra teatral qu’algamó’l Premiu de Teatru d’esta institución na so edición del añu 2009, “La fuxida”, de la que ye autor l’escritor Xaviel Vilareyo, que tien espublizaos llibros n’asturianu y gallego-asturianu, tantu de narrativa, como de poesía y ensayu.

“La fuxida” ye una obra dramática sobre los enfotos y aspiraciones instintives del ser humanu. una metáfora sobre la dualidá y les contradicciones internes presentes en cada persona. Una obra sobre’l materialismu y l’idealismu, sobre la construcción de la utopía dientro de la inevitable diversidá humana, sobre la persecución, les diferencies de pensamientu y la inexorable fuxida d’aquellos mundos que nos resulten dafechu abellugosos.

L’estrenu taba previstu n’avientu, pero “Folías” tuvo d’esperar hasta agora pola mancadura de la baillarina Andrea Lebeña. Esti vienres 27 de mayu a les 20:30 hores con Manuel Badás, la recuperada Andrea Lebeña y Miguel Quiroga, llegan al Xovellanos. Esta pieza de danza contemporanea enmárcase dientro del ciclu Másqueteatru.

“Tamos equí pa cuntavos daqué, nun sabemos el qué. Tamos equí presos de la nuesa llocura interna. Esnudamos les nueses emociones, narrar, enfilar, llanzar. Zarraos nun espaciu mental apoderáu pola perda de control na que los sentimientos amuésense desinhibidamente. Mecanismos que nun funcionar afechiscamente.” Manuel Badás.

“Folías” ñaz a partir de la esploración de l’amuesa desinhibida de los sentimientos. Como llínea musical principal partimos de “Diferencias sobre Las Folias” d’Antonio Martín y Coll. Esta pieza musical llévanos a investigar sobre’l repertoriu barrocu español, la repercusión de les Folías en tol mundu y a buscar ciertes rotures musicales que potencien la creación d’esi espaciu mental de los intérpretes.

Coreográficamente la pieza s’estructura en solos, dúos y tríos. Sicasí, nun ye una estructura convencional na qu’a cencielles s’asoceden les pieces danciaes una tres otra; sinón que los trés intérpretes permanecen en tou momentu nel escenariu: trabayando con dos espacios. Un espaciu mental nel que los intérpretes amuesen los sos sentimientos y desenvuelven les sos individualidaes y un espaciu esterior nel que los demás intérpretes sofiten esa individualidá.

El baillarín y coreógrafu Sunny Singh propónnos que mos metamos nel espíritu de les películes de Bollywood. Al traviés de les sos azogosos ya hipnótiques dances, vamos l’espectáculu amuesa los tópicos argumentales que la industria cinematográfica hindú supo esplotar tan bien. La heroína, guapa y humilde, oxetu del amor del héroe de la hestoria; el villanu, malváu y bien ricu, que de toes toes quier consiguir los favores de la moza interponiéndose ente los dos namoraos. Y como siempres, tres delles vicisitúes, l’amor siempres trunfa. Esti musical “Bollywood, el viaje”, va tar en La Llaboral de Xixón, los díes 27 y 28 de mayu.

Una hestoria más vieya que’l mundu, que sirve de hilatura a unos númberos musicales llenos de lluz y color col so suntuosu vestuariu (600 traxes), 18 baillarinos n’escena y una banda sonora de rabiosa actualidá.

Descuentu: los socios del Club La Llaboral Ciudá de la Cultura tienen un descuentu del 20% pa dos entraes aplicable hasta 90 minutos enantes del entamu de la función. Les llocalidaes pueden mercase nel Centru de Recepción de Visitantes y Tienda de La Llaboral Ciudá de la Cultura y nel Puntu d’Información en Campu Valdés, Xixón. El pagu de les entraes ha facese en metálicu y el sociutendrá d’acreditar la so pertenencia al Club amosando la so tarxeta personal y DNI.

Les Xornaes de Llingua y Cultura Asturiana lleguen a la so décimosesta edición, y per primer vegada les actividaes ábrense al públicu, con cine n’asturianu, monologuismu, teatru y música.

El martes 17, un Festival de monólogos n’asturianu organizáu pola Asociación d’Intérpretes de la Canción Asturiana (AICA) pieslla los actos d’estes Xornaes cola participación de Ludivino Díaz “Pin de la Cotolla”, Marcelino Díaz Losada, Luz Mari del Sol, Armando Felgueroso “Min de les Pieces” y la presentación de Fernando Ruiz.

Amás, del 3 al 17 de mayu, na Biblioteca Municipal d’El Natahoyo ta celebrándose la esposición L’enigma del Palaciu Bao.

Programa completu d’actividaes de les Xornaes

El Ballet Real de Suecia llega al Xovellanos el miércoles 11 de mayu. La visita del potente equipu suecu a Xixón, trai a Christian Spuck, unu de los más interesaos y completos ceadores de la escena del ballet internacional. Fundáu en 1773, el Royal Swedish Ballet forma, xunto col de París, Copenhague y San Petersburgu, el cuartetu de balléts nacionales más antiguos y prestixosos del mundu, con un elencu que ye a responder a les más difíciles esixencies virtuoses.

El programa que presenten nesta ocasión consta de dos pieces: Tableau Perdu, obra de Christian Spuck, y Rättika, una creación de Mats Ek.

Tableau Perdu (23 min.)

Estrenada en 2007 pol mesmu Real Ballet de Suecia y basada na Sinfonía númberu 4 de Felix Mendelssohn, Christian Spuck diz sobre la so obra: “Esta sinfonía ye guapa ya intensa. Coles mesmes puedes esperimentala como daqué superficial, como daqué que foi creáu pa gustar… Nun se trata de visualizar la música. Quiero amosar la so cualidá interna, tolo qu’esiste ente les notes… La mio inspiración visual pa Tableau Perdu vien de la gran fascinación que siento pa cola pintura del Rococó francés, más concretamente les d’Antoine Watteau. Neses obres, veo a families acomodaes posando con un paisaxe de fondu. Deseaba captar les sos posiciones y el so llinguaxe corporal nel mio ballet… Trato de crear una ilusión del Ballet clásicu utilizando tutús de tul y zapatielles de punta a manera de cita. Anque dacuando les llínees pures del sieglu dieciocho se desmoronen” .

Rättika (35 min.)

Esta pieza ta enllena de sentíu del humor. Mats Ek inspírase na grabación qu’Anne-Sophie Mutter realizó en 1997 del Conciertu Pa Violín en Re Mayor de Johannes Brahms. La interpretación de Mutter atrapó al coreógrafu: “Mutter llega al estremu. Ye una música enllena de puxanza que reafita la vida ensin ser romántica… La mio ambición foi crear un conciertu, una interpretación coreográfica de la música”.

L es Xornaes de Llingua y Cultura Asturiana lleguen a la so décimosesta edición, y per primer vegada les actividaes ábrense al públicu, con cine n’asturianu, monologuismu, teatru y música.

Mañana, martes 10 de mayu, a les seis de la tarde, el grupu Asturmitomanía llega al Atenéu La Calzada con “Vamos a contar un cuentu”, una prestosa, tienra y orixinal historia, na que toos deprienden que, pa vivir en paz, ye obligao respetar yaceutar a los demás tal como son, por bien distintos que seyan.

El xueves 12, a les siete y media la tarde, el grupu folk Gueta na fonte toca dientro de les Xornaes, zarrándoles el martes 17, un Festival de monólogos n’asturianu organizáu pola Asociación d’Intérpretes de la Canción Asturiana (AICA) cola participación de Ludivino Díaz “Pin de la Cotolla”, Marcelino Díaz Losada, Luz Mari del Sol, Armando Felgueroso “Min de les Pieces” y la presentación de Fernando Ruiz.

Amás, del 3 al 17 de mayu, na Biblioteca Municipal d’El Natahoyo ta celebrándose la esposición L’enigma del Palaciu Bao.

Programa completu d’actividaes de les Xornaes

El pasáu 28 d’abril estrenábase nel Teatru Prendes de Candás “Los amorinos de Bastián y Bastiana”. La obra, una ópera de Mozart, adaptóse al públicu infantil y fízose n’asturianu, per parte de la compañía profesional de teatru Producciones Nun Tris. Esti vienres, 6 de mayu, nel Vital Aza de La Pola L.lena va producise’l próximu pase de la obra.

La función ta dientro de les actividaes programaes na Axenda Didáctica del Serviciu de Política Llingüística.

”Los amorinos…” ta adaptada y dirixida por Antón Caamaño, y nella participen Vanessa del Riego, como Bastiana; Pablo Romero, como Bastián y Antón Caamaño, como Colás. Al pianu va tar Manuel Burgueras y al cargu de la escenografía, Pablo Maojo. Amás, como ayudante de direción participa na obra Inma Rodríguez.