Escéniques

L’amuesa Dancia Xixón 2013 presenta ventinueve funciones al cargu de dieciocho compañíes de distintos llugares d’España. Un seminariu especializáu al cargu de Teresa Nieto, un ciclu de video danza y muncha calidá. Danza Xixón convirtióse, gracies a la so trayectoria, nun referente de la danza contemporanea nel norte peninsular.

Danza Xixón xubese a los escenarios del Centru de Cultura Antiguu Institutu, Teatro Xovellanos, Llaboral Teatru y n’otros espacios de Xixón. Cola collaboración d’El Güertu y l’Asociación Profesional de Danza d’Asturies.

El so oxetivu ye promover la conocencia d’esta forma d’espresión artística y de los sos llinguaxes al traviés de los espectáculos más actuales. Amás programáronse cuatro seminario especializaos de danza contemporanea y flamencu qu’imparte Teresa Nieto cola so compañía, los díes 19 y 20 d’ochobre. Teresa Nieto ye Premiu Nacional de Danza na modalidá de creación 2004, y Max 2007, 2009 y 2013 onde tuvo la reconocencia de meyor baillarina, meyor coreografía y meyor espectáculu de danza pola so creación Tacita a Tacita.

Danza Xixón ye un programa entamáu y financiáu pola Fundación Municipal de Cultura, Educación y Universidá Popular y el Teatru Xovellanos y patrocináu pol Ministeriu de Cultura, la Conseyería de Cultura del Principáu d’Asturies y Cajastur.

Programa completu de Dancia Xixón 2013

L’área de Cultura del Conceyu Ḷ.ḷena, en collaboración cola Federación Asturiana de Teatro Amateur del Principado de Asturias FETEAS y la Consejyería de Cultura, organiza un año más les Xornaes de Teatru Costumista Asturianu que tendrán llugar todos los vienres d’ochobre a les 20,00 hores, en Teatru Vital Aza, de La Pola, Ḷḷena.

Los grupos de teatru participantes nes Xornaes van ser: Santa Bárbara, Teatro Kumen, El Horreo y Teatro Carbayín.

Los bonos pa dir a les cuatro funciones tán a la venta na Casa Municipal de Cultura al preciu de 15 euros. Tamién se puen adquirir entraes individuales a 5 euros la función.

La primer representación será’l vienres, 4 d’ochobre, a cargu del grupo Santa Bárbara que va poner n’escena ‘De l’Argentina a la Pola’.

Una nueva edición de la «Selmana de teatru n’asturianu de Carbayín Alto» va cuntar con ocho grupo que van representar obres n’otros tantos vienres ente los díes 27 de setiembre y 15 de noviembre.

El director del Grupu Teatru Carbayín y organizador de l’actividá, José Ramón Oliva, destaca que se caltuvo’l nome como una alcordanza a los sos empiezos, magar qu’agora desenvuélvese a lo llargo de mes y mediu. Oliva presentó esta fin de selmana’l programa xuntu cola conceyala de Cultura, María José Sánchez, y el director de la Fundación Municipal de Cultura, Ramón Quirós.

Inaugura’l programa Chanclos Asgaya, cola obra «¿Quién ye’l postreru?», y siguen Traslluz, con «Que vienen los otros»; Santa Bárbara, con «Xente de la mar»; Rosario Trabanco, con «Aquellos maraviyosos años». La siguiente obra, «A difunta y outras herbas», ta escrita na fala d’occidente y interpretar El Cioyo, de Castropol. Dempués los anfitriones interpreten «-yos ayalgues de la marquesa»; L’Horru, «La trampes del vecín», y Trama, «Memoria de una gallina». Esta postrera ye en castellán y empobinada a neños.

El 1 de payares apurrirán los premios «Socorro la de Lin» a persones rellacionaes col teatru asturianu. Va Haber un premiu local y otru rexonal.

Teatru del Norte entama ente’l 22 y el 27 d’agostu nel Colexu’l Prial de L’Infiestu, los XV Alcuentros nel Norte, alcuentros de Pedagoxía Teatral, qu’anguaño cunten con alumnos d’Asturies, Galicia, Cantabria, Cataluña, Madrid, Estremadura y China. Anguaño los XV Alcuentros nel Norte van tener como tema ‘El cuerpu n’escena’ enfotándose nel usu de del cuerpu en situación de representación. Los Alcuentros cunten como siempres col sofitu del Conceyu de Piloña.

Dientro d’estos XV Alcuentros nel Norte representaranse una serie d’espectáculos-demostración que van tar abiertos a tol públicu de L’Infiestu. Les representaciones previstes entamen esti 23 d’agostu, a les 20 hores, cola conferencia demostración ‘La comedia del arte’, na que Etelvino Vázquez va encetar el pasáu y el presente de la Comedia del Arte como forma teatral vixente.

El sábadu, 24 d’agostu a les 22 hores, va ponese n’escena l’espectáculu “Pequenu xestu”, pieza creada ya interpretada por Antonio Sarrio, na que fala de la so esperiencia como actor, mientres treinta año, en Cambaleo Teatru.

Los teatros españoles van abrir la temporada 2013-2014 con una programación que, sometida a los rigores de l’austeridá, decantser nesta oportunidá polos dramaturgos nacionales y les adaptaciones de los clásicos. Nel casu asturianu, el Teatru Xovellanos de Xixón va presentar una obra de Wajdi Mouawad, Mariña, un títulu del reputáu dramaturgu y actor canadiense d’orixe llibanés que tuvo hasta xunu nel Romea de Barcelona.

La propuesta pa los próximos meses del Centru Dramáticu Nacional (CDN) calterizase pola diversidá “nel xéneru, estilu y estética” d’unos espectáculos que gocien de “una impecable factura artística”, según esplicó’l so director, Ernesto Caballero, na presentación de la nueva temporada.

Trenta y seis obres de 41 autores con compañíes convidaes como’l Teatru d’Arte de Moscú o producciones propies como Amantes, de Vicente Aranda, formen parte d’una ufierta pa la que se podía de 4,5 millones d’euros, menos de la metá que va seis años.

Nel Valle-Inclán tán programaes pala seronda representaciones como “Nada tres la puerta”, de temática europea, con llibretu de Juan Cavestany y empobinada por Mikel Gómez de Segura.

Ente les cites imprescindibles de la temporada tarán “Seuls”, de Wajdi Mouawad, el reputáu dramaturgu y actor canadiense d’orixe llibanés que va protagonizar la seronda xixonesa, y “Ubu Roi”, de Declan Donnellan con Ckeek by Jowl, programaes esti branu na Bienal de Venecia de teatru con un gran ésitu.

La tercer selmana d’agostu axunta la actividá teatral más completa del mes, entamando cola XXVII Muestra de Teatru de Llugones que se celebra na localidá asturiana hasta’l próximu día 23 d’agostu cola organización de Teatru del Norte y que tien una programación qu’arrecueye 5 espectáculos. Amás del 22 al 27 d’agostu van tener llugar los XV Alcuentros nel Norte, alcuentros de Pedagoxía Teatral en L’Infiestu.

La Muestra de Teatru de Llugones, qu’anguaño celebra los sos ventisiete años d’esistencia, celebrase ente’l 19 y el 23 d’agostu (con funciones a les 22.00 hores) na Casa de la Cultura de Llugones. La cita ye una les más veteranes d’Asturies, a lo que contribuyó’l sofitu incondicional que, añu tres d’añu, ufiertó’l pueblu de Llugones a esta Amuesa Teatral, empecipiada en 1986 pol Teatru del Norte.

La compañía La Texedora de Suaños, de Xixón, presentó ayeri martes, 20 d’agostu, la pieza de Sam Shepard ‘Llocos d’amor’ con dirección de Gemma de Luis. Nesti testu fundamental del teatru contemporaneu d’Estaos Xuníos el so autor recueye’l testigu d’autores como Tennesse Willians pa pasalo pol so particular realismu y falanos de la soledá, del amor y del deséu.

Otra compañía de Xixón, Teatru d’El Cuervu, protagoniza la velada d’esti miércoles 21 cola puesta n’escena de ‘Criaos y Bufones’ de Sandro Corderu na qu’el mesmu autor dirixe. La obra amuesa’l viaxe de dos actores al corazón mesmu del teatru, a les sos glories y miseries, un viaxe a nenguna parte. Y coles mesmes ye una antoloxía de fragmentos d’obres de teatru de Shakespeare, pero siempres dende’l prisma del humor, la tenrura y la señaldá.

El xueves, 22 d’agostu, va ser la vez de Konjuro Teatru que va poner n’escena la obra ‘Teatromaquia’ de Jorge Moreno con dirección del propiu autor, qu’amuesa una reflexón sobre’l teatru y los actores, pero esta vegada dende la óptica asturiana y dende l’humor y la sátira. Jorge Moreno ye unu de el autores asturianos más importantes del momentu.

L’amuesa conclúi’l vienres, 23 d’agostu, nesti casu a les 19.00 hores, cola presencia de Tragaluz Titeres, compañía de Pola de Siero, que va presentar el especetáculo familiar ‘Vaya par de Princeses’ con dirección de Joaquín Hernández. Tratar se d’un espectáculu de títeres del repertoriu de la compañía que se vale del humor p’acompañar el maxistral manexu de los títeres.

La Conseyera de Cultura, Ana González, y el viceconseyeru, Alejandro Calvo, presentaron esta selmana nel pabellón del Principáu d’Asturies de la Feria Internacional de Muestres el nuevu ‘Decálogu d’Artes Escnénicas’, col que l’Alministración rexonal quier sofitar al teatru profesional asturianu por aciu d’un nuevu marcu normativu». La conseyera dixo que’l documentu ye productu del «intensu trabayu realizáu xuntu colos conceyos y el sector profesional de les artes escéniques pa marcar les llínees de trabayu» que pretende llevase a cabu.

El llamáu Circuitu d’Artes Escéniques va poner a disposición de los conceyos una serie d’obres, fundamentalmente de teatru, en collaboración col Principáu d’Asturies. La programación va ser de calter semestral y va incluyir tantu espectáculos interiores como de cai. Va Tar cofinanciada polos conceyos y el Principáu y ta previstu qu’a lo llargo d’anguaño realícense 210 presentaciones en 22 conceyos, con un presupuestu cercanu a los 350.000 euros, de los que’l Principáu apurre’l 60%.

La Conseyera apuntó que la nueva normativa va entrar a partir de 2014, estremada en tres bloques. El fin de la mesma ye poder asegurar la presencia d’artes escéniques en más conceyos y en casi tol territoriu asturianu, anque nun cunten con un espaciu escénicu permanente. Amás, apuntó que tamién pretenden asegurar que siquier el 10% de los espectáculos sían de danza, qu’el 80% del catálogu de les obres que s’ufierten sían espectáculos de compañíes asturianes (un 10% más que l’añu anterior) y que un 15% de los espectáculos sían en llingua asturiana.

Otra llínea de sofitu ye la subvención p’actividaes escéniques d’empreses privaes y grupos de teatru profesional: 48.395 euros aprosimao pa producción y montaxe, distribución y presentación en festivales internacionales y nacionales, pa la promoción d’estes obres fora d’Asturies.

La nueva edición del Salón de teatru costumbrista asturianu de Candás foi presentada esta selmana na feria internacional de Muestres de Xixón, cola presencia d’organizadores, actores y xente del mundu de les artes escéniques. La edición d’anguaño del certame teatral más importante de la rexón anúnciase bien interesante con cuatro estreno absolutos al cargu de les compañíes «Rosario Trabanco», «Chanclos Asgaya», «Kumen» y «Xana» a partir del día 21.

Amás, per primer vegada na hestoria del Salón va haber dos compañíes del conceyu de Carreño, al sumase a la tradicional «Xana», de Perlora, el grupu de teatru “Les Ayalgues de Carreño”, que va tener protagonismu na apertura del certame y que ye’l primer grupu candasín invitáu al Salón.

El programa va desenvolver ente’l próximu día 21 y el 1 de setiembre, con dolce funciones, toes elles a les once de la nueche, nel Teatru Priendes de Candás.

El 16 d’agostu a les 22.30 hores, la Plaza del Centru Niemeyer d’Avilés va tresformase p’acoyer una de les producciones estrella d’anguaño del Festival Internacional de Teatru Clásicu de Mérida: “Hécuba”, el clásicu de Eurípides, revisáu por Juan Mayorga. La mutación de la Plaza va dexar apreciar un testu clásicu nel que Concha Velasco, Goya d’Honor de l’Academia de les Ciencies y Artes Cinematográfiques, acompañada d’un elencu de la talla de J. Pedro Carrión, Juan Gea o Pilar Bayona, va averar al públicu a les pasiones y miseries humanes.

Güei, vienres 28 de xunu, el monologuista Carlos Alba Cellero va tar a la vera’l Centru Cultural Valey, de Piedrasblancas, a les 20 hores, con La llei del cuchu, monólogu de Cellero.

El domingu, a les 21 hores, va voler actuar nes fiestes de Valliniello (Avilés), col so personaxe Sindo, que va cuntar la so vida, hestories, monólogos…