Emigración

El Centru Asturianu de Mendoza trabaya col enfotu de mover la música y la gastronomía asturiana dientro de la so comunidá, llogrando al tiempu que’l restu de los arxetinos s’alleguen a la cultura del nuestru país. Asina, la Escuela Internacional de Turismu, Hotelería y Gastronomía de Mendoza va poner, pa socios y amigos, un cursu de cocina asturiana a lo llargo de tres díes que dea a conocer la cocina más tradicional, la nueva cocina y la repostería típica de la tierra. Una forma mui duce de mostrar lo meyor de la tierra.

Mesmo que la comida, la música ye otra de les apuestes de los mendocinos. Por eso, remembrando’l mes de la hispanidá, el Centru Asturianu de Mendoza convidó a la Banda de Gaites Villa de Mieres pa qu’esti miercoles día cuatro, a partir de les nueve y media la nueche, xuba a los escenarios del Auditoriu Ángel Bustelo una representación de venticinco persones que-y amuesen a la sociedá arxentina lo meyor de la cultura asturiana. Una fiesta de folclore qu’axunta, aínda más, los llazos de la tierra y col mundu. Y viceversa.

El conseyeru de Xusticia, Seguridá Pública y Rellaciones Esteriores, Francisco Javier García Valledor, recoyó la Madreña d’Oru del Centru Asturianu de Sevilla nun actu celebráu’l vienres 22 de setiembre na capital andaluza nel que participaron más de docientos emigrantes asturianos asentaos nesa ciudá. L’actu–que contó cola presencia del director xeneral de Xusticia de la Xunta d’Andalucía, Alberto Gómez Linda; el presidente del Conseyu de Comunidaes Asturianes, Mauuel Fernández de la Cera, y el presidente del Centru Asturianu de Sevilla, Jose Luis Bedia Fernández– foi un homenaxe a los emigrantes asturianos qu’a lo llargo de tola historia marcharon d’Asturies “pa persiguir un suañu” que, munches veces, nun pudieron algamar, acordies coles palabres del presidente del Centru Asturianu.

Valledor recoyó’l galardón qu’esti añu taba dedicáu precisamente a tolos asturianos y asturianes qu’un día dexaron la so tierra na busca d’aquelles oportunidaes de vida qu’Asturies nun-yos pudo dar. El conseyeru insistió precisamente en tolo qu’Asturies-yos debe a los sos emigrantes y que, en parte, trata de compensase coles polítiques en favor de la emigración que ta desendolcando la so Conseyería y que tán nel II Plan Integral d’Emigración. “Asturies nun puede entendese ensin el concursu de les decenes de miles de compatriotes qu’un día marcharon pero qu’en dengún momentu perdieron l’amor pola so tierra”, señaló Valledor , pa insistir en qu’esa aportación ha de siguir anguaño. “L’Asturies del futuru tamien vos correspuende a vosotres y a vosotros, con tantu derechu como correspuende a los que vivimos nel so territoriu”.

El conseyeru indicó qu’al empiezu de la llexislatura, cuando tomó posesión del so cargu, propunxose que los emigrantes asturianos tuvieren na axenda política d’Asturies con tol protagonismu que merecíen y a eso empobinó los sos esfuerzos. “Vosotros direis ensin duda queda muncho tovía por facer, pero nunca primero la política d’emigración mereciere tanta atención”.

Valledor terminó la so intervención allabando’l trabayu del Centru Asturianu de Sevilla y tuvo palabres de recuerdu pal so anterior presidente. “Quiero recordar güei a Joaquín, que tantos años foi l’impulsor d’esti Centru Asturianu, cuyu amor pola tierra animó permanentemente la so vida”.

El conseyeru de Xusticia participa güei nos actos del Día d’Asturies organizaos pol Centru Asturianu de Málaga en Torremolinos.

El conseyeru de Xusticia, Seguridá Pública y Rellaciones Esteriores del Principáu d’Asturies, Francisco Javier García Valledor, recibió’l sábadu 23 de setiembre de manes del presidente del Centru Asturianu de Málaga, Florentino Martínez Roces, l’escudu d’esa institución nel actu de celebración del Día d’Asturies organizáu pola entidá na Casa Cultura de Torremolinos.

Florentino Martínez señaló que la distinción, otorgada por decisión unánime de la Xunta Directiva, suponía un reconocimientu al esfuerzu fechu pola Conseyería y, especialmente, pola Axencia Asturiana d’Emigración en favor de los emigrantes asturianos nesta llexislatura cuyu fechu más significativu foi l’aprobación y el desarrollu del II Plan Integral d’Emigración ‘Asturies cola so Xente’.

Nel so discursu d’aceptación, Valledor agradeció la distinción y estendió los meritos de la mesma al llabor del conxuntu del Gobiernu del Principáu, yá que la gran novedá que metió’l Plan d’Emigración ye’l so caracter integral, qu’implica a cuasi tolos departamentos de l’Alministración Autonómica. El conseyeru insistió nel gran sentimientu d’asturianía qu’hai ente los asturianos y asturianes del esterior y que-y gustaría que s’espardiera a los asturianos de dientro. “Dende’l Principáu d’Asturies nun ficimos otra cosa que reconocer la gran aportación que los nuestros emigrantes ficieron a Asturies y que sólo agora ta empezando malapenes a agradecese-yos y valora-yos”, indicó.

El pregón del actu, nel que participaron cuasi doscientos asturianos y asturianes mesmo residentes na provincia andaluza como otros que taben pasando unos díes de descansu nesa localidá de la Costa del Sol y que contó cola asistencia d’una nutrida representación del Ayuntamientu de Llangreu, encabezada pola so alcaldesa, corrió a cargu del etnógrafo y profesor Fernando de la Puente y versó sobre los oríxenes del Himnu d’Asturies. L’actuación musical corrió a cargu de la Banda de Gaites ‘Trabladar’, d’Aviles, y de la profesora de gaita del Centru Asturianu, Carina, que, como recordó’l so presidente, ye una “asturiana d’adopción” que quier mover la cultura y la música asturianes en Malaga.

El Centru Asturianu de Säo Paulo va celebrar el próximu día 24 de setiembre, a partir de les dos de la tarde (hora local), un homenaxe gastronómicu a la rexón, dientro de les instalaciones de la Sociedade Hispano-Brasileira. Amás de la típica fabada, l’arroz con llechi, mazanes y el vinu de la tierra, los asistentes van poder esfrutar d’un espectáculu musical a cargu del grupu folclóricu Lembraza e Agarimo y los músicos Jose Luis García y David García (gaita y tambor, respectivamente) de la banda de gaites Villa de Xixón.

El Centru Asturianu de Málaga va celebrar ente los díes 22 y 24 de setiembre los actos de conmemoración del Día d’Asturies con un pregón que va correr a cargu del etnógrafu y folclorista Fernando de la Puente. Nos actos, nos que va actuar la banda de gaites Tabladar d’Aviles, l’agrupación etnográfica Reija de La Felguera y la Escuela Municpal de Baille de Pizarra, va facese imposición de los Escudos d’Oru a l’alcaldesa de Llangreu, Esther Díaz y al conseyeru de Xusticia, Francisco Javier Garcia Valledor, asina como la entrega de la Montera Picona al presidente de la Peña La Buena Gente de Torremolinos, Sebastián Lara.

Tres d’una recepción oficial per parte del Ayuntamientu de Torremolinos a la representación institucional del Principáu, el vienres día 22, a les siete de la tarde, va facese-y un homenaxe póstumu a Esteban Diaz Cimadevilla, asturianu que foi alcalde d’esti conceyu na II República. Al actu van asistir una fía y un nietu de Diaz, residente en Venezuela, asina como l’alcaldesa de Llangreu con miembros de la so corporación municipal, el director de l’Axencia Asturiana d’Emigración, Luis Miguel Fernández Romero, y la directora de la Oficina de Rellaciones coles Comunidaes Asturianes. L’actuación de la banda de gaites Tabladar, d’Aviles, de l’agrupación etnográfica Reija, de La Felguera, y la Escuela Municipal de Baille de Pizarra, van dar pasu a una degustación de la gastronomía asturiana y malagueña pa tolos asistentes.

El sábadu día 23, a les siete la tarde, va tener llugar una ofrenda floral a la Santina y una misa nel so honor na se social del Centru Asturianu de Málaga. A les ocho, la Casa la Cultura de Torremolinos va acoyer la llectura del pregón per parte del etnógrafu y folclorista Fernando de la Puente, asina como les imposiciones de la banda a la Xanina 2006, a Isabel María Ávila Pino, los Escudos d’Oru a l’alcaldesa de Llangreu, Esther Díaz y al conseyeru de Xusticia, Francisco Javier Garcia Valledor, asina como la entrega de la Montera Picona al presidente de la Peña La Buena Gente de Torremolinos, Sebastián Lara.

Coincidiendo cola Feria San Miguel, que va tener como pregonera a Luz Casal, na Plaza Blas Infante de Málaga ta prevista una representación institucional del Principáu xunto a la banda de gaites Tabladar.

L’última día de los festeyos, el domingu 24, los representantes asturianos van asistir a la Romería de San Miguel asina como a la xinta d’hermandá na se social del Centru. Tres del repartu de la tradicional botella vinu y bollu preñáu a los socios de la entidá, les gaites de Tablador y los miembros de Reija volverán dar una exhibición de cultura asturiana, cola que van pesllar los actos del Día d’Asturies en Málaga.

El pasáu 10 de setiembre, el Centru Asturianu – Casa d’Asturies del Uruguay, situáu na ciudá de Montevideo, celebró’l tradicional Día d’Asturies cola actuación de la banda de gaites Güestia, xunto colos uviedinos Xácara, convidaos especialmente pa tala ocasión. Asinamesmo, el cuerpu de baille de Güestia fixo exhibición de les dances típiques d’Asturies acompañaes pol conxuntu de baille del Centru, Les Madreñes.

Los festeyos del Día d’Asturies nel Centru Asturianu – Casa d’Asturies del Uruguay empezaron cola tradicional procesión de la Santina, nuna capiella allugada na rodiada de la institución, nel barriu del Prado. Tres de l’actu solemne, la banda de gaites Güestia, acompañada del so conxuntu de baille, fixeron una amuesa de folclore asturianu, tres de la que dieron pasu al cuerpu de baille Les Madreñes, perteneciente a la entidá.

Fontes de la organización estimen en más de 650 persones los participantes na xinta de la tradicional fabada asturiana, tres de la qu’actuó’l grupu asturianu Xácara que fuere convidáu al país latinoamericanu con motivu d’esta celebración.

La fiesta terminó con más música y baille asturianu, cola actuación, mano a mano, de les bandes Xácara y Güestia, que repasaron xuntos el repertoriu tradicional asturianu, mentes que los danzadores-yos facíen compaña a ritmu de saltones, muñeires y xotes.

Galería de semeyes del Día d’Asturies nel Uruguay

El Centru Asturianu de Lausanne celebró’l pasáu fin de selmana’l so Día d’Asturies na localidá suiza de Renens. Los actos de celebración, que contaron cola participación de la banda de gaites Marino Tapiega, que desfiló xunto a la banda escocesa Pipe Band of Lausanne y la banda de gaites Lauxebe, formada por gaiteros gallegos de Lausanne, Xinebra y Berna, foron retresmitios pola televisión de Lausanne. L’eventu contó tamien cola presencia del diputáu suizu Zyziadis y l’alcaldesa de Renens, Hugenin.

Les bandes de gaites desfilaron pela localidá de Renens onde tamien se celebró un conciertu de música rock. La xornada del domingu tuvo dedicada a los grupos folclóricos, que dieron un repasu a los diferentes bailles mesmo de Galicia, representaos pol grupu A Roda, que d’Asturies, con Marino Tapiega y l’Escarpín, del Centru Asturianu de Lausanne.

Album de semeyes

El próximu 29 de setiembre la Federación Española de Cuba tien previsto entrega-y a Jose Antonio Ventura, el trabayador social que l’Axencia Asturiana d’Emigración tien desplazáu a L’Habana, la so distinción máxima, ‘el premiu Cervantes’, que se-yos otorga a persones destacaes pol so trabayu colos españoles.

El pasáu 10 de setiembre, el Centru Asturianu de Monterrey A.C. celebró la fiesta d’Asturias, dientro de cuyu programa fixo la entrega del premiu Urogallu a María García Torrecillas, exiliada española y autora del llibru autobiográficu ‘Mi exilio’. Esti reconocimientu ye’l más importante de la institución, col que pretende premiar a aquellos que destacaron pol so llabor en favor de la comunidá emigrante.

Nos actos de celebración del Día d’Asturies en Monterrey tamien tuvo llugar un gran espectáculu folclóricu nel que se fizo amuesa de les tradiciones asturianes.

El próximu xueves 14 de setiembre 43 emigrantes asturianos procedentes de l’Arxentina, l’Uruguay, el Brasil, Venezuela y Cuba van volver pisar la so tierra d’orixe gracies al programa de la Operación Señaldá. Los asturianos de la diáspora, que van ser recibíos en próximu viemres pol conseyeru de Xusticia, Seguridá Pública y Rellaciones Esteriores, Francisco Javier García Valledor, van recorrer diferentes localidaes asturianes, amás de participar nel desfiles del Día d’America n’Asturies.

Ente los díes 14 y 28 de setiembre, 43 emigrantes van volver pisar la so tierra d’orixe gracies a la Operación Señaldá, un programa qu’ayuda a los asturianos de la diáspora que lleven decades ensin tornar a que puedan viaxar otra vez a Asturies.

El Museu de la Minería, el Pueblu d’Asturies, Cimavilla, los monumentos del Prerrománicu, el Museu del Xurásicu de Colunga, la costa central, el Museu de la Sidra o l’Archivu d’Indianos de Colombres son dalgunos de los sitios que van visitar nel tiempu que dura la so estancia n’Asturies. Amás, el próximu día 19 van asistir al desfile del Día d’America n’Asturies. Un desfile que rinde homenaxe a los emigrantes qu’abandonaron la tierra d’orixe pa siguir cola so vida nun nuevu continente, l’americanu.

Ventisiete de los cuarenta y trés emigrantes qu’esti añu tornen a la tierrina vienen dende l’Arxentina, mentes que cinco son del Uruguay, ún del Brasil, seis de Venezuela y 4 de Cuba.