Emigración

Esti sábadu viniente, 16 de xunu, celébrase la octava edición de la Nueche Folk entamada pol Centru Asturianu de Barcelona. Esti añu’l cartelu tien la novedá d’incluyir a un grupu internacional, Meliouank, veníos de la Bretaña francesa. A ellos xuniráse’l grupu asturianu La Bandina La Curuxa, que compartiran cartelo coles bandes de gaites y baille llocales, Andecha pol Raigañu (Centru Asturianu de Barcelona), Avoengo (Centru Gallegu de Barcelona) y la City of Barcelona Pipe Band and Fergus Muirhead (Banda de Gaites Escocesa).

Les actuaciones entamarán a les 20.00 hores, nes instalaciones del Centru Asturianu de Barcelona nel barriu barcelonés de Sarrià. La entrada ye de baldre.

Más de cien persones d’ocho países estremaos tán matriculaes nel primer cursu en llinia de llingua asturiana p’asturianos nel esterior, entamáu pol Conseyu de Comunidaes Asturianes y la Conseyería de Cultura del Gobiernu d’Asturies, qu’informó de que’l periodu d’inscripción remató “con gran demanda”.

L’Arxentina, Brasil, Chile, Cuba, España, México, Noruega y Uruguai son los estaos dende los que s’apuntaron les más de 100 persones que van deprender asturianu o meyorar el so nivel al traviés del cursu.

El Gobiernu recuerda que “per primer vegada, tolos centros asturianos del mundu, y les persones venceyaes a los mesmos, tienen la oportunidá de participar nun cursu on line d’asturianu, de gran calidá didáctica, tecnolóxicamente novedosu y coordináu dende Asturies”.

Nun comunicáu que s’asoleyaba esti miércoles pela tardi, IX-Verdes quería dexar afitáu’l retayu que nestes eleiciones se-yos fai a los emigrantes asturianos.

“La única manera que tienen los emigrantes asturianos de defender los sos intereses ye exerciendo’l so derechu al votu, cada vez más atrabancáu, nestes próximes elecciones”. Asina lo entiende, el coordinador xeneral d’IX d’Asturies, Jesús Iglesias denunciando que’l PP y PSOE ta retayando importantes derechos democráticos a los emigrantes. L’alcuerdu suscritu ente éstos dos partíos quitó del derechu al votu nos comicios municipales a los emigrantes y agora oblíga-yos a formalizar tou un trámite burocráticu d’inscripción nel rexistru d’electores nos consulaos pa poder participar nes elecciones autonómiques del próximu 22 de mayu.

Nel comunicáu recueyese tamién qu’ésti próximu sábadu 23 d’abril remata’l plazu pa realizar el censu nel rexistru d’electores, Jesús Iglesias animó a los asturianos residentes fuera del Estáu a qu’alleguen a les urnes pos “una vegada que los emigrantes nun pesen nada electoralmente, tampoco lo fadrán nos presupuestos estatal y autonómicu” señaló’l coordinador d’Izquierda Xunida d’Asturies.

Jesús Iglesias apuntó qu’anque’l votu emigrante nun vieno beneficiando electoralmente a Izquierda Xunida d’Asturies, ye una cuestión de “ética la defensa d’éstos derechos democráticos” cada vez más amenorgaos.

El candidatu d’IX Verdes a la Presidencia d’Asturies califica esto de involución y “ una marcha tras” sorrayando que’l Gobiernu de José Luis Rodríguez Zapatero incumplió dellos compromisos afiguraos al traviés de la Llei de Memoria Histórica, como’l d’ampliar el derechu al votu a los nietos d’emigrantes.

La Oficina de Política Llingüística ta acabante anunciar la creación d’un cursu “que pretende aprovechar les ventayes de les nueves tecnoloxíes y dar a conocer esti idioma ente los descendientes de los emigrantes asturianos”. El plazu pa inscribise va rematar el seis de mayu, coincidiendo col Día de les Lletres Asturianes. Trátase d’un programa que va dexar a los asturianos de cualesquier parte del mundu, deprender la llingua de so dende les sos cases o centros asturianos, nos horarios y al ritmu que cada persona prefiera.

El cursu nómase ‘Falar y más falar’ y va otorgar a los participantes nesta iniciativa un diploma a la fin del cursu. Pa inscribise ye preciso unviar la fueya de preinscripción a la dirección falarymasfalar@gmail.com. P’apuntase ye necesariu disponer d’un ordenador con accesu a internet y una cuenta de corréu lletrónicu pa facer tutoríes y p’unviar y recibir el material didáctico.

Los conteníos van facilitase nun discu compactu a cada alumnu. Les duldes van poder resolvese al traviés de tutoríes personalizaes per aciu del corréu lletrónicu o los servicios de foru de les redes sociales.

El cursu va constar d’un total de 60 hores lectives, a lo llargo d’ocho semana. Les feches d’entamu y finalización de les clases van comunicar a cada alumnu con una antelación mínima de diez díes. A la fin del cursu fadráse una prueba escrita. Los alumnos que la superen van recibir un certificáu qu’acreita les sos conocencies.

La Comisión Delegada del Conseyu de Comunidaes Asturianes apautóse esti vienres en que’l Día de Les Lletres nel Esterior seya esti añu, los díes 8 y 9 d’abril, nos Centros Asturianos de Rosario y Paraná na República Arxentina. Nel 2010 fízose en Castellón y Barcelona y nel 2009 nos centros asturianos de Lausanna y Berna en Suiza.

El Conseyu de Comunidaes Asturianes, qu’entama esta actividá dende hai años en collaboración cola Dirección Xeneral de Política Llingüística y l’Academia de la Llingua, aprovechó tamién pa facer anuncia de que se ta trabayando yá nel programa.

La Escuela de Branu d’Asturianía, que se desarrolla tolos años na segunda quincena de xunetu, va tener esti añu alumnos y alumnes de nueva incorporación col entamar de la cuarta promoción. El programa d’estos cursos de branu inclúin 300 hores lectives distribuyíes en trés cursos o niveles a realizar n’Asturies nos meses de xunetu, tres los que s’entrega el diploma acreditativu de la formación.

La Comisión Delegada del Conseyu de Comunidaes Asturianes ye l’órganu consultivu y d’asesoramientu en materia d’emigración de les instituciones de la Comunidá Asturianes y tien por presidente al que dirixera la COnseyería de Cultura del Principáu hai años en dellos gobiernos socialestes. Manuel Fernández de la Cera.

Na tarde d’esti xueves, 28 d’ochobre, de magar les ocho la tarde, va celebrase’l Día de les Lletres Asturianes en Madrid. L’actu va consistir nun recital de poesía asturiana por María Esther García López, el fallu del VIII Concursu de Rellatu Curtiu n’asturianu, convocáu pol Cnetru y la entrega del premiu y presentación del cuentu ganador del 2010, a cargu de David Rivas.

ASBRU entama’l próximu 28 de mayu a les 20h na Casa d’Asturies en Bruxeles una conferencia que va tener como protagonista al escritor asturianu Ricardo Menéndez Salmón (Xixón, 1971).

Más información na web d’ASBRU

El sábadu va celebrase la Selmana Cultural Asturiana “La Semanona”, en Mallorca, organizada pol Centru Asturianu na islla. La Plaza S’Escorxador, va ser el llugar onde se celebre un pasacais los miembros del grupu folclóricu “L’Artusu” de Mieres, a partir de les 12:30 hores. A la una, celebraráse un concursu d’echadores de sidra, patrocináu por sidra Menéndez, incluyendo una actuación de los gaiteros Xandru Castro y David Muiño.

A les 15.30 nueva actuación a cargu de L’Artusu y preba de productos asturianos a precios populares, amás d’un sortéu de viaxes a Asturies.

Piésllase esta primer xornada con actuación de la banda de gaites Añaquinos, a les ocho y cuartu y con DJ Qking, que dende les 10 va pinchar “30 años de música asturiana”: Melendí, Los Ilegales, El Sueño de Morfeo, Los Berrones, Tino Casal, Australian Blonde, Nacho Vegas, Víctor Manuel, Dixebra,Vicente Díaz….

El domingu 20, na mesma plaza, la xornada va entamar con un pasacais de L’Artusu, a media mañana. A la una, va cocinase y servise, una Gran Fabada pa 300 persones con fabes de Grau y compangu d’Embutíos Vallina. La ración (fabada, agua y pan) venderáse a 6 euros hasta fin d’esistencies. A les nueve, entréguense los premios del sortéu de viaxes a Asturies.

La Casa d’Asturies en Valencia va celebrar esti añu’l Día d’Asturies a lo llargo de más d’una selmana enllena d’actividáes culturales, lúdices, deportives y festives. El sábaduy embaxo la ponte les Flores nel antiguu cauce’l Turia van celebrase les actividaes dende’l meudía y hasta la nueche, cola participación la banda gaites “Avante Cuideiru”, fabada popular, banda de música, deportes tradicionales a cargu’l grupu “Espor d’Asturies”, castiellos hinchables, música y la meyor comida asturiana.

La dirección de la Casa d’Asturies de Valencia ta acabante anunciar l’ampliación del plazu del concursu de rellatos curtios n’asturianu hasta’l 23 d’agostu por mor de “les numeroses peticiones” que-yos ficieron.

L’actu d’entrega de premios, llectura de poemes y de los rellatos ganadores, posponse tamién pa incluyilu nos actos de la Selmana Cultural d’Asturies. L’actu del Día de les Lletres en Valencia tendrá llugar el 12 de setiembre na sala cultural municipal La Petxina.

El rellatu tendrá de ser una narración n’asturianu o gallego-asturianu de tema llibre, orixinal ya inédita, con un máximu de 20 folios y un mínimo de 5. Los trabayos han unviase al corréu electrónicu casturvalencia@gmail.com