Emigración

El Conseyeru de Xusticia, Seguridá Pública y Rellaciones Esteriores, Francisco Javier García Valledor, acompañáu del Director de l’Axencia Asturiana d’Emigración, Luis Miguel Fernández Romero, celebró la festividá del Día d’Asturies colos emigrantes asturianos residentes en Bruseles, los que reconocieron el so llabor cola entrega del Horru d’Oru. Nel actu institucional tamien foi distinguíu con esti galardón l’alcalde de la ciudá F. Timmermans.

Esti ye’l tercer añu que se festeyó, institucionalmente, el Día d’Asturies na Emigración, que se celebró’l primer añu en Madrid, en setiembre de 2004 y na ciudá arxentina de Buenos Aires en setiembre de 2005, siempre cola asistencia de Francisco Javier García Valledor y del Director d’Emigración del Gobiernu asturianu.

El Conseyeru y el so Director d’Emigración, tuvieron colos emigrantes asturianos nos festeyos que programaron pa los díes 8, vienres, 9 sábadu y 10, domingu de setiembre. El día 8 pela nueche, el Conseyeru recibió -na Sala Gótica del Ayuntamientu de Bruseles- L’Horru d’Oro del Centru Asturianu de Bruseles. Nel actu, tamien recibió’l mesmu galardón F. Timmermans, alcalde de Bruseles. Darreu hebo un conciertu del grupu de música tradicional asturiana Gueta na Fonte.

El sábadu 9, Valledor, vistíu col traxe del país, tuvo presente en toles xeres programaes pa esi día na Plaza d’España de Bruseles, ente les que figuraba un mercáu astur, pasacais de música tradicional y bailles asturianos, xuegos y deportes tradicionales, espicha nel Manneken Pis, procesión, puya’l ramu, bolos y intervención de les autoridaes. Los actos remataron con una actuación del maestru gaiteru Xuacu Amieva.

El Conseyeru de Xusticia, Seguridá Pública y Rellaciones Esteriores, Francisco Javier García Valledor, acompañáu del Director de l’Axencia Asturiana d’Emigración, Luis Miguel Fernández Romero, va celebrar la festividá del Día d’Asturies colos emigrantes asturianos residentes en Bruseles, quienes van reconocer el so llabor cola entrega del Horru d’Oru. Nel actu institucional tamien va ser distinguíu con esti galardón l’alcalde de la ciudá F. Timmermans.

Esti ye’l tercer añu que se festeya, institucionalmente, el Día d’Asturies na Emigración, que se celebró’l primer añu en Madrid, en setiembre de 2004 y na ciudá arxentina de Buenos Aires en setiembre de 2005, siempre cola asistencia de Francisco Javier García Valledor y del Director d’Emigración del Gobiernu asturianu.

El Conseyeru y el so Director d’Emigración, van permanecer colos nuesos emigrantes nos festeyos que tán programaos palos díes 8, vienres, 9 sábadu y 10, domingu de setiembre. El día 8 pela nueche, el Conseyeru va recibir-na Sala Gótica del Ayuntamientu de Bruseles- L’Horru d’Oro del Centru Asturianu de Bruseles. Nel actu, tamien va recibir el mesmu galardón F. Timmermans, alcalde de Bruseles. Darreu habrá un conciertu del grupu de música tradicional asturiana Gueta na Fonte.

El sábadu 9, Valledor, vistíu col traxe del país, va tar presente en toles xeres programaes pa esi día na Plaza d’España de Bruseles, ente les que figuren un mercáu astur, pasacais de música tradicional y bailles asturianos, xuegos y deportes tradicionales, espicha nel Manneken Pis, procesión, puya’l ramu, bolos y intervención de les autoridaes. El sábadu, a les 22:00 hores va rematar la fiesta Xuacu Amieva.

El próximu día 16 de setimbre, el Centru Asturianu de Castellón destaca la entrega del so máximu galardón, la Montera Picona d’Honor, que nesta ocasión va pal trabayu de la política asturiana d’emigración, representada por Luis Miguel Fernández Romero, director de l’Axencia Asturiana d’Emigración, y Manuel Fernández de la Cera, presidente del Conseyu de Comunidaes Asturianes, que van recoyer la distinción nos actos de celebración del Día d’Asturies.

El Centru Asturianu de Castellón quier reconocer con esta distinción los meritos, el trabayu y l’esfuerzu que se ta faciendo dende’l Gobiernu del Principáu d’Asturies pola emigración, nesti casu, interior. Nel actu d’entrega ta prevista l’asistencia del presidente de la FICA, asina como d’una amplia representación de la emigración, como son los centros asturianos de Barcelona, Alicante, Torrevieja y Casa d’Asturies de Valencia.

El Día d’Asturies en Castellón va terminar con un conciertu nel Teatru Principal de la ciudá basáu nun ampliu repertoriu de música y baille tradiconal asturiana a cargu de profesores y alumnos de la escuela d’asturianía de Levante asina como del Orfeón de Mieres, toos ellos desplazaos a Castellón con esti motivu.

Nel intermediu de les actuaciones va facese entrega de los diplomes acreditativos a los alumnos que ficieron el cursu de Llingua Asturiana’l pasáu mes de mayu, actu pal que se va contar cola presencia de Pablo Manzano, academicu de la Llingua, y de Marta López, profesora del cursu.

El pasáu sábadu 2 de setiembre inaguróse na se del Centru Asturianu de Bruseles una esposición d’óleos de Jesús Escudero Mendez. La muestra, colgada na sala d’actos del centru, va tar espuesta hasta’l 30 de setiembre de manera que tolos visitantes ya invitaos pal Día d’Asturies en Bruseles puedan esfrutar de la obra del pintor xixones.

Jesus Escudero Mendez ye un autodidacta, que siente, observa y tresllada al lienzu lo que lleva nel corazón. Les temátiques de la muestra tresportaron al cientu de persones qu’asistieron a la inauguracióna los paisaxes interiores d’Asturies, biesques, horros, playes y caminos que l’artista trabaya minuciosamente y al detalle.

La catedrática de Didáctica de la Llingua y Lliteratura de la Universidá d’Uvieu y cronista oficial de la ciudá, Carmen Ruiz-Tilve, va ser la encargada de pronunciar un pregón-conferencia’l sábadu 9 de setiembre nel Saló de Croniques del Ayuntamientu de Barcelona, na Plaza de Sant Jaume, 1, con motivu del Día d’Asturies. La charra, que va tener llugar a les doce la mañana, lleva por títulu ‘Asturias y Catalunya’.

El Centru Asturianu de Torrevieja llenase d’asturianía pa celebrar la festividá que remembra a la patrona d’Asturies, Nuestra Señora de Cuadonga. El pregón de Mª Paz Andreu va centrar el programa d’actividaes nel que nun falta una misa n’honor de La Santina, asina como la música tradicional asturiana representada pola banda de gaites L’Estruendu, del Centru Asturianu d’Alicante, y el cantante de canción asturiana Jose Antonio ‘Cantu La Vara’, ente otros.

Anque’l pregón de la torrevejense Mª Paz Andreu nun va tener llugar hasta’l sábadu 9 de setiembre, los organizadores del programa de festeyos del Centru Asturianu de Torrevieja adelántense a les celebraciones al empezar, mañana vienres a les diez y media la nueche, con un conciertu de la Banda de Música ‘Ciudá d’Uvieu’ nel recintu de Las Eras de La Sal.

Per otra parte, el sábadu día 2 va echar el piesllu’l Festival Internacional de Bandes, cola participación de la Banda de Música ‘Ciudá d’Uvieu’, actu pal que van tar acompañaos polos gaiteros Guti y El Pravianu.

Los actos de conmemoración del Día d’Asturies van allargase hasta’l día 10 de setiembre nel que nun va faltar la tradicional misa y procesión n’honor de La Santina, acompañada polos sones del grupu L’Estruendu, pa depues seguir con música asturiana, teatru n’asturianu, repartu del bollu y botella vinu y un concursu d’escanciadores, ente otres actividaes.

Na mañana d’ayeri, el director de l’Axencia Asturiana d’Emigración, Luis Miguel Fernández Romero, recibía nel so despachu de la Conseyería de Xusticia a la presidenta del Centru Asturianu de Melbourne, Olvido Simón, y a la vicepresidenta de la entidá, pa tratar los asuntos tocantes a los emigrantes asturianos n’Australia. Los asturianos de Melbourne, ente otres coses, manifestaron el so interes porque los sos descendientes, asina como les persones vinculaes al centru que nun son asturianos, puedan seguir aprendiendo de la cultura de la tierra, llogrando que nun se pierda asina l’heriedu y que los más mozos se vinculen al centru austral.

Ente les midides de les que se faló na reunión col director de l’Axencia Asturiana d’Emigración dióse anuncia de la visita de cuatro gaiteros pal prósimu mes de payares pa participar na fiesta de la hispanidá. Amás, ta previsto tamien que dalgún profesor acuda al centru de Melbourne pa enseña-yos folclore a los más mozos, ‘atrayendolos d’esta manera a la entidá’, y que se dote al centru con materiales a tala fin como traxes del país y gaites coles que poner clases.

Estímase que n’Australia hai aproximadamente unos 400 emigrantes asturianos, de los que 150 viven en Melbourne.

Luis Carlos Pardo Escudero, vicepresidente del Centru Asturianu de Barcelona, acompañáu del directivu Alberto Domínguez Palicio, fixo entrega de la insignia d’oru del Centru, máxima distinción de la institución, a Rafael Fernández, ex Presidente del Principáu d’Asturies, pol so llabor a favor d’Asturies y de los sos emigrantes.

Nel actu d’entrega, los representantes de la entidá remembraron l’enfotu de Fernández nes comunidaes asturianes na emigración y reconocieron especialmente’l so apoyu al Centru Asturianu de Barcelona. Agradecimientu que foi correspondíu por Fernández, que-y entregó al Centru un exemplar dedicáu de la obra ‘Asturias, veinte años de autonomía’.

El Centru Asturianu d’Alicante, como’l restu de les comunidaes asturianes del esterior, tien preparaos una serie d’actos conmemorativos nos xardinos de la Diputación Provincial alicantina pa celebrar, el prósimu 9 de setiembre, la festividá de La Santina. El grupu de gaites L’Estruendo y el coru de la comunidá emigrante van animar una fiesta que va pesllar baillando una danza prima.

A les ocho y media la tarde, los miembros de la comunidá asturiana n’Alicante van celebrar una misa con procesión hasta la Ilesia de Mª Auxiliadora n’honor de la Virxe de Cuadonga, tres de la que se fadrá una recepción oficial a autoridaes ya invitaos al eventu.

A lo llargo d’una espicha popular, los asistentes van celebrar un concursu d’escanciadores, mentes que’l grupu de gaites L’Estruendo y el coru de la entidá amenicen una xornada que va finar a la medianueche baillando la danza prima.

L’Axencia Asturiana d’Emigración y el Festival Internacional de Cine de Xixón preparen un alcuerdu pol que nos Centros Asturianos va facese una exhibición itinerante de títulos escoyíos que participaren na sección ‘Rellumes’ del certame.

La primer proyección va facese nel Centru de Buenos Aires, polo que Rosana Vega, trabayadora social de l’Axencia na capital arxentina, participó na reunión preparatoria celebrada’l pasáu día 23 d’agostu, con Luis Miguel Fernández Romero, Jose Luis Cienfuegos y Fran Gayo, responsables de l’Axencia y el certame, respectivamente.

La sección ‘Rellumes’ inclúi obres en cortometraxe de nuevos realizadores asturianos.

Trabáyase pa facer la primer proyección en Buenos Aires el prósimu mes d’abril y la idea ye que nella tean dalgunos de los trabayos premiaos pol certame cinematográficu xixones.