Educación

Representantes de los sindicatos CC.OO, SUATEA, ANPE y CSI-CSIF manifestaron el so esmolecimientu pola situación que vive l’IES Universidá Llaboral por mor de les obres entames nesi centru. Después d’un conceyu colos responsables del IES, los sindicatos constataron les dificultaes creaes pal empiezu normal del cursu de los alumnos de Formación Profesional y les deficiencies que presenta’l centru pal so usu docente.

Según denunciaron los representantes sindicales darréu de la so reunicón colos responsables del centru de la Llaboral inda nun hai fecha d’escomienzu del cursu nin se conoz la disponibilidá d’aules, asina como tolo que cinca al suministru de lluz, agua, llimpieza y aséu. Los accesos al centru son otru de los problemes detectaos polos sindictos que denuncien nun comunicáu conxuntu les dificultaes que se tan creando pa los propios alumnos afectaos poles obres y el treslláu d’aules.

Los sindicatos piden nel so comunicáu l’entamu d’una Comisión integrada per toles partes (administración, dirección del centru, profesorao y dirección d’obres) pa solventar los problemes esistentes y desixen-y a les autoridaes educatives que garanticen l’empìezu del cursu en condiciones que nun perxudiquen a los alumnos matriculaos nel centru de FP y el cumplimientu de la lexislación vixente en materia d’obres públiques y prevención de riesgos llaborales.

L’Academia de la Llingua Asturiana va entamar mañana viernes 16 nel Aula Magna de la Universidá d’Uviéu la entrega de los certificaos y diplomes de los sos Cursos de Branu. L’actu va tar presidíu pol rector Juan Vázquez y pola presidenta de la institución llingüística Ana Cano.

Un total de ciento cincuenta alumnos participaron nos cursos de l’Academia matriculaos nos siete niveles impartíos: Cursu Elemental de Llingua Asturiana, Cursu Avanzáu, Capacitación pa la Traducción al asturianu -tolos tres inxertos nos Cursos d’Estensión Universitaria-; los cursos de Llingua asturiana ya Internet; El cine n’asturianu; Otros xuegos y tradiciones populares na enseñanza; y la primer fase del Curso de Capacitación en Gallego-Asturiano.

L’actu d’entrega de los diplomes va celebrase nel Aula Magna a les 19.30 hores d’esti viernes.

El portavoz nacional d’Izquierda Asturiana (IAS) Inaciu Llope afirma que’l Principáu ye una de les poques comunidaes autónomes onde inda nun ta implantada la gratuidá de los llibros de testu pa escolinos. Llope criticó al viceconseyeru d’Educación José Luis Iglesias Riopedre poles sos declaraciones escusando al so departamentu de nun poder ufiertar esta midida demandada polos pás y más d’alumnos.

IAS considera “inxustificable l’ausencia d’esta midida por parte d’un gobiernu autocalificáu de la izquierda plural” y celtién que les escuses de Riopedere “nun son más qu’echar balones fuera énte una realidá social que fai de la gratuidá de los llibros de testo un auténticu clamor popular”.

La formación nacionalista defende que la implantación d’esta midida “nun diba supondría nengún gastu inasumible pa l’ administración talo y como amuesen recientes estudios qu’asitien n’alrodiu del 1% del total del gastu n’Educación lo necesario para entamalo”. A xuiciu d’IAS de nun facilitase los testos de baldre a los escolinos: “el preceptu constitucional que consagra la Obligatoriedá y la Gratuidá de la enseñanza queda n’entedichu”, ya que, según caltienen: “la non aplicación d’esta medida implica un déficit no referente a la igualdá d’oportunidades nel sistema educativu..

4.. El actual sistema vigente en Asturies supone un gasto de unos 200 euros anuales a cada unidad familar en los distintos tramos educativos. Esto supone un gasto inasumible para una gran cantidad de familias con escasez de recursos económicos o con un número elevado de hijos. 5.. Esta realidad que aún persiste en algunas comunidades autónomas como la asturiana da la espalda a la tendencia de la mayoría de los países de la UE donde la gratuidad de los libros es ya una realidad incontestable (con la excepción de Portugal e Irlanda).

El sindicatu SUATEA denuncia nun comunicáu qu’al empiezu del nuevu cursu escolar la ufierta de l’asignatura de llingua asturiana sigue ensin xeneralizase en tolos centros docentes. Pa la organización sindical l’actitú de l’Administración énte estes insuficiencies lloñe de solventales “suxer la desviación del alumnáu dica otres optatives”.

Al pesar de les promeses reiteraes cada añu polos responsables políticos de l’administración autonómica la Llei d’Usu y Promoción del Asturianu sigue ensin cumplise no tocante a la ufierta de l’asignatura de llingua asturiana en tolos centros d’enseñanza. Esta ye una de les carencies sobre les que llama l’atención SUATEA acabante empezar el nuevu cursu n’Asturies. “Nun nos consta que l’administración, más allá de la propaganda oficial, faga nada pa facer efectiva esta ufierta”, afirma’l sindicatu na so valoración del escomienzu de les clases.

SUATEA denuncia tamién la esistencia de centros onde se sobrepasesn les ratios por aula conteníes nos alcuerdos y que sigue amenguando la ufierta de ciclos formativos y fomentándos la concertación. El sindicatu demanda énte esta situación un apoyu decidíu a la escuela pública y al so profesoráu, asina como’l cumplimientu efectivu de la llei no tocante a la ufierta de llingua asturiana.

Los escolinos de Llingua Asturiana y Lliteratura de 2u d’ESO cuenten nesti cursu con un nuevu llibru de testu. El volume tituláu Rede 2 y publicáu por VTP Editorial ye obra de Mº Paz Fonticiella y Mº Esther García.

El nuevu testu guía de l’asignatura d’asturianu consta de seis unidaes temátiques qu’ufierten la posibilidá de repartise a razón de dos en cada trimestre del cursu. Caúna d’estes unidaes constrúyese alredor d’un núcleu d’interés que pueda resulta-yos suxerente a los alumnos y alumnes (los cuentos de mieu, la música, les mascotes, etc.).

El volume publicáu por VTP Editorial vien a sumase a los llibros de testu pa la enseñanza de la nuestra llingua elaboraos nos últimos años por equipos pedagóxicos pa les distintes editoriales asturianes.

La editorial Trabe acaba de publicar un nuevu llibru de testu empobináu a los alumnos de Llingua Asturiana y Lliteratura de 4º de la ESO. El volume tituláu Torrecerréu ta coordináu por Serverino Antuña y tenta desenvolver les posibilidaes comunicatives n’asturianu de los alumnos.

El volume apaez dividíu n’ocho lleciones nes que se traten temes de comunicación colos que se pueden alcontrar los alumnos (buscar trabayu, participar nun concursu, elexir delegáu o delegada de clase…), xunto a temes non necesariamente referíos a la llingua o a la lliteratura: ciencies, matemátiques, etc. Amás d’estes llecciones, el llibru lleva dos proyectos de trabayu: ún sobre la Ría de Villaviciosa y otru un comentariu de testo d’un poema de Xuan Xosé Sánchez Vicente.

Torrecerréu acompáñase d’un CD incorporáu con grabaciones de situaciones cotidianes de fala y llectures literaries, coles que se pretende que tanto el profesor como l’alumnu trabayen los aspectos orales del asturianu.

Xunta Severino Antuña formen l’equipu d’autores Nuria Campo Varela, Alberto Cobreros Gil, Antón García, Esther Prieto y Xulio Viejo.

El secretariu xeneral de FETE-UXT n’Asturies Daniel Rodríguez pidió a la Conseyería d’Educación que cambie l’actual sistema de convocatories de places pa Secundaria n’años alternos. Pa esti sindicatu anguaño la nuestra comunidá ta en situación de desventaya respective a otres a la hora d’ufiertar places pa demandantes asturianos.

Rodríguez aseguró que talo s’entamen agora les convocatories: un añu pa Primaria y al siguiente pa Secundaria, ta favoreciéndose que cada convocatoria seya prácticamente pa tol estáu, dalgo que nun ocurre n’otres comunidaes autónomes. Pa FETE-UXT esti sistema “fai que nun podamos competir con otres comunidaes, nun tenemos nada que nos protexa como en Euskadi o Galicia, por exemplu”.

Daniel Gutiérrez respondía asina al brinde fechu pol responsable de Recursos Humanos de la Conseyería d’Educación Arturo Verano pa que los sindicatos d’enseñanza negociaran coles autoridaes educatives los términos de la convocatoria de Secundaria.

La Universidá d’Uviéu va poner en marcha col empiezu del nuevu cursu el programa “a.duo”, una iniciativa que quier poner en contactu a estudiantes del país y estranxeros col oxetivu de facilitar la estancia d’estos nel nuestru país y l’intercambiu cultural. Los participantes nel programa van algamar una puntuación estra nel baremu de selección pa optar a beques Erasmus.

Gracies a esta iniciativa los alumnos estranxeros van atopase más integraos na vida universitaria del so país d’acoyida y el contactu con alumnos nativos va vali-yos pa afayase respective a la realidá cotidiana, l’accesu a los tresportes públicos, atopar agospiamientu o una meyor orientación pela ciudá.

Los estudiantes asturianos o d’otres comunidaes españoles que participen nel programa “a.duo”, amás de conocer una nueva visión del mundu al través del so contactu con estudiantes foriatos van disfrtutar d’una bonificación especial na tabla de méritos pa solicitar ayudes y beques como les del programa Erasmus y al finar la so participación nel proyectu van recibir un documentu acreditativu de la propia Universidá.La cumplimentación d’un formulariu ye l’únicu trámite que se desixe pa participar nel programa “a.duo”.

Más información

Los cursos de branu de l’Academia de la Llingua inauguráronse esti llunes 1 en Santantolín d’Ibias, el llugar onde tien la sé esta escuela de formación llingüística. Un cursu elemental de llingua asturiana, otru avanzáu y dellos cursos d’afondamientu cultural y llingüísticu empobinaos a mayestros, xunta la primer fase d’un cursu de capacitación en gallego-asturianu son les ufiertes d’esta XXIII edición.

El cursu elemental de llingua asturiana ta abiertu pa toa clase d’alumnos, independientemente de la so formación y nivel d’estudios. Consta de sesenta hores lectives y el so oxetivu ye que los alumnos algamen el Certificáu Básicu de Conocencia de la Llingua Asturiana. Completar la formación del nivel elemental ye l’oxetivu del cursu avanzáu de llingua asturiana, tamién de sesenta hores lectives y empobináu a los alumnos que ya tienen la Certificación Básica de Conocencia.

Los cursos d’afondamientu cultural y llingüísticu van empobiaos al profesoráu que ya cuenta cola certificación afayadiza (la propia de l’Academia o les espedíes pola Universidá d’Uviéu) y tien como oxetivu el perfeccionamientu y reciclaxe llingüísticos y l’averamientu interdisciplinar a la realidá cultural asturiana.

Nesta edición de los cursos de branu de l’Academia va impartise per primer vez la Fase I d’un cursu de capacitación en gallego-asturianu, encamentáu a la institución llingüística pola Conseyería d’Educación y que forma parte del Programa Rexonal de Formación. El so oxetivu principal ye afondar n’aspectos teórico-prácticos del Gallego-Asturianu.

Los XXIII cursos de branu de l’Academia de la Llingua van desarrollase en Santantolín d’Ibias hasta’l prósimu 12 d’agostu.

El prósimu 4 d’agostu escomienza n’Uviéu la Universidá de Veranu de l’asociación AEGEE nomada “Think Green” (piensa en verde), un espaciu educativu y de convivencia nel qu’estudiantes de varios países europeos van afondar na conocencia de la naturaleza d’Asturies y la mitoloxía tradicional del país.

Na Universidá de Veranu que se va desarrollar en diversos llugares d’Asturies participen 15 moces y 15 mozos procedentes de 16 países, ente ellos Inglaterra, Finlandia, Alemania, Francia, Italia, Grecia, Croacia, Rusia, Ucrania, Turquía, Hungría, Macedonia, Eslovenia, Eslovaquia. y Perú. La delegación territorial de l’asociación AEGEE (Association des Etats Généraux des Etudiants de l’Europe)ye la organizadora d’estos alcuentros, un proyectu que se desarrolla simultáneamente n’otros países al empar que na nuestra comunidá.

Con esta actividá AEGEE-Asturies pretende presentar a los participantes el nuestu país como dalgo diferente al estereotipu que se tien sobre España. Pa ello los dos exes principales sobre los que xira esta Universidá de Veranu van ser la naturaleza, la cultura y la mitoloxía” asturianes. Nel cursu d’estes xornaes van entamase delles escursiones per Asturies (Picos d’Europa, Descensu’l Sella, Pravia, Llanes, Villaviciosa, etc.) y actividaees culturales, como visites a museos y centros d’interés (Pueblu d’Asturies, Muséu Etnográficu de Quirós, Universidá Llaboral, Santa María del Naranco y San Miguel de Lliño, Cuadonga,…).

L’oxetivu de los alcuentros que se celebren en toa Europa organizaos pola asociación AEGEE ye despertar la concencia de los estudiantes énte’l mediu ambiente y l’entornu cultural de los diversos países. Al mesmu tiempu que se va celebrar na nuestra comunidá el “Think Green” trenta mozos y moces asturianos van participar en proyectos simultáneos en países como Italia, Polonia, Croacia y Hungría.