Educación

Jose Luis Iglesias Riopedre, responsable d’Educación del Gobiernu del Principáu d’Asturies, anunció na inauguración de los cursos de branu qu’organiza l’Academia de la Llingua Asturiana en Santantolín d’Ibias que la Conseyería de la que ye titular ta estudiando la posibilidá de meter, cola nueva reforma de la Llei Orgánica d’Educación, los estudios de cultura y llingua asturiana na educación Infantil. D’esta manera, según Riopedre, ‘completaríase’ la ufierta d’asturianu nes escueles públiques, que yá cunten cola llingua como asignatura optativa en Primaria y Secundaria.

El conseyeru d’Educación, qu’estimó l’aumentu de profesores d’asturianu nos últimos cinco años nun 88 % y nun 33 % el d’alumnos que la escueyen como segunda llingua, dixo que la nueva opción ayudaría a ‘completar el currículo d’esta manera, promoviendo’l so aprendizaxe ente los escolinos ente 3 y 5 años’.

La edición de 2006 va xirar alredor de tres aries temátiques denominaes Espacios físicos y Espacios Emocionales, La Sociedá n’Estáu Llíquidu y la Identidá y les Rellaciones Interxeneracionales. Los Alcuentros Internacionales de Mocedá de Cagüeñes, organizaos pol INJUVE cola collaboración de los Conseyos de la Mocedá d’Asturies y Xixón, cumplen el so 22

aniversariu conformando una escuela de participación y convivencia democrática ente la mocedá asturiano, español y latinoamericano. Los Alcuentros de Cagüeñes amás de la formación ufren una serie d’actividaes lúdiques, complementaries a les aiciones formatives. Los Alcuentros de Cagüeñes desendólcanse dende’l 25 al 29 de septiembre nel Antigüu Institutu de Xixón y el plazu pa facer la inscripción acaba’l 31 de xunetu.

El Sindicatu Unitariu y Autónomu de Trabayadores de la Enseñanza d’Asturies, xunto con otres organizaciones, celebraron esta fin de selmana una reunión colos responsables de Formación Profesional de la Conseyería d’Educación, na busca d’arreglar ‘la caótica situación de los cinco Centros Integraos de FP’, yá que ‘nun cuenten con una normativa pal so funcionamientu, nin reglamentu de rexime internu y nin ta siquiera se conoz el rexime alministrativu del profesoráu de la rede pública que va poner clases nesos centros’. Por ello, SUATEA desixe a los reponsables d’Educación que se faiga una ‘negociación rial colos sindicatos sobre les condiciones de trabayu d’esos profesores porque, d’otra manera, nun se garantiza la claridá del procesu’.

Dende SUATEA, visto que los resultaos d’esta fin de selmana foron ‘decepcionantes’, desíxese una ‘negociación rial sobre les condiciones de trabayu del profesoráu pa que los sos derechos nun sían conculcaos’, yá que la casuística de cadún de los centros afectaos ye dafechu diferente.

Nun comunicáu fechu públicu esta mañana, SUATEA denuncia qu’estos cinco centros (Valliniello, Hostelería de Xixón, los dos centros de Valnalón y la Universidá Llaboral de Xixón) tienen d’empezar a furrular nel mes de setiembre y anguaño inda nun se sabe en dalgún d’ellos quien va ser el so Director/a, l’equipu directivu y inclusive quien va ser el profesoráu que va poner les clases nel prósimu cursu.

No tocante a la situación del IES Universidá Llaboral, que cuenta con una sentencia firme del TSXA qu’obliga a la Conseyería d’Educación a cesar al so actual director, SUATEA desixe ‘la execución inmediata de tala sentencia’.

El conseyeru d’Educación, José Luis Iglesias Riopedre, presentó esti vienres los datos de rendimientu escolar correspondientes al cursu 2004-05, qu’alluguen al país, xunta Euzkadi y y Navarra, nel meyor nivel de resultaos coles tases más altes d’España de titulaos de la ESO. estes comunidaes son tamién con nós les de mayor índiz de llectura de periódicos nel Estáu.

El Conseyeru destacó na presentación l’eleváu gastu por escolín (5.050 euros frente a los 2.500 de la media nacional) asna como’l sofitu que se-yos ufierta a los rapazos con problemes.

Sigún los resultaos que presentare Riopodre, el promediu d’escolinos que supera la educación Primaria ye n’Asturies del 95,4 por ciento y la tasa de idoneidá a los 12 años (proporción d’escolinos que progresen adecuadamente durante la etapa) ye del 87,3 por ciento, dos puntos penrriba la media nacional. La diferencia porcentual ye más favoratible entá a Asturies cuando se fai un analís d’otros ciclos educativos:la tasa de titulación na Enseñanza Secundaria Obligatoria (ESO) ye nesi casu del 84,5 por ciento.

El Conseyeru destacó tamién que’l rendimienty escolar ye meyor nes mujeres, que superen a los homes en cásique 15 puntos nel Estáu, aunque nesi parámetro Asturias amenorga la so ventaxa a una diferencia d’ente 4 y 6 puntos.

La Conseyería d’Educación del Gobiernu del Principáu d’Asturies, representada pol so asesor tecnicu, Fernando Padilla, aprovechó ayeri l’actu de celebración de la VI edición del día de les lletres gallegues-asturianes, pa presentar una iniciativa pionera pa la edición de manuales na ‘fala’, apoyáu pola creciente demanda per parte de los escolinos de la zona nel estudiu de la llingua.

El 18’5% de los escolinos de Primaria y Secundario de la comarca del Eo-Navia, escueyen de manera voluntaria l’asignatura de gallego-asturianu. Una iniciativa al alza, en palabres de Fernando Padilla que valoró l’aumentu progresivu na escolarización de la llingua en toa Asturies.

Nel actu d’homenaxe a les lletres gallego-asturianes del Occidente, que celebraron unos 500 neños de la zona, tuvo tamien presente’l responsable de la Oficina de Política Llingüística del Principáu, Ramón d’Andres, qu’animó a los más pequeños a cuidar la so cultura, asina como la so llingua.

L’Academia de la Llingua abre esti llunes 22 de mayu y hasta’l 2 de xunu el plazu de matrícula pa los cursos de branu que desendolca na Escuela-Hogar de Santantolín-Ibias del 31 de xunetu al 11 d’agostu de 2006. Xunta los cursos elemental y avanzáu ufiértense dellos cursos d’afondamientu, amás d’otros en collaboración cola Universidá d’Uviéu.Los cursos tan abondo solicitaos polo que nos primeros díes suelen ocupase dafechu toles places.

Dirixíos por Xosé Antón González Riaño y cuntando como secretariu con Pablo Xuan Manzano Rodríguez los cursos de branu de l’Academia son abondo nomaos ente los universitarios asturianos y ente los docentes que tienen de ver con materies que cinquen a la llingua, la lliteratura y dellos otros ámbitos de les humanidaes. Desendólquense en réxime d’internáu y ufierten una bona riestra de posibilidaes que van dende la obtención de los diplomes de conocencia básica o avanzada de la llingua asturiana a la capacitación pala traducción al asturianu o estayes pedagóxiques relacionaes coles nueves texnoloxíes.

Estos cursos tienen la calterística especial de que sólo puen siguise en réxime d’internáu y pa matriculase l’Academia dispón dende esti llunes d’un horariu que va de llunes a xueves de 9 a 15 hores y de 16 a 19 hores y el vienres de 9 a 14 hores. Síguese un orde rigorosu d’inscripción. Y amás del importe de la matrícula y una semeya, hai qu’enllenar tamién l’impresu de matriculación que se facilita na Academia.

Estos Cursos tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como “Entidá Organizadora d’Actividaes de Formación Permanente del Profesoráu”. Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies.

Más información sobre los cursos na páxina web de l’Academia

Beatriz Quirós, miembru del Secretariáu d’Asturies de SUATEA y Conseyera del Conseyu Escolar del Estáu pola Confederación STES-intersindicial, volvió manifestar que la LOE “nun ye la llei que necesita la escuela pública, porque beneficia a les patronales de la enseñanza privada y a la xerarquía eclesiástica. Poro les reformes educatives tienen de fortalecer a la escuela pública”. Pa ello STES-i ufiertó-y la so collaboración a la Ministra d’Educación, cola fin de “mitigar los aspectos más regresivos de les lleis y alcuerdos” algamaos hasta la fecha.

Quirós manifestó que, agora que quedar por facer la ellaboración del Estatutu Básicu Docente, “dixímos-y a la Ministra que va poder cuntar cola nuestra organización na nuestra llinia de clara defensa de la escuela pública y del conxuntu de trabayadores de la enseñanza, pa que mesmo nos desarrollos estatales como nos autonómicos de la LOE, s’aprueben midides que valgan pa fortalecer la educación pública”.

El Colexu Públicu “Jacinto Benavente” de Vega (Xixón) cellebrará otra vuelta esti añu l’homenaxe añal que-y brinda a Pepín de Pría esta Comunidá Educativa, reinaugurando nesta ocasión la placa que pon l‘ Ayuntamientu nel edificiu remodeláu de les antigues escueles. L’actu tendrá llugar el vienres 5 de Mayu con motivu del Día de les Lletres.

A partir de les 12,00 hores, pa los escolinos/es de sestu d’ Enseñanza Primaria convócase esti actu d´homenaxe a Pin de Pría en Llavandera cola reinauguración de la placa que pon l ‘ Ayuntamientu nel edificiu remodeláu de les antigues escueles. Neños y neñes del colexu recitarán y lleerán delles composiciones propies, al tiempu que coloquen una corona de lloréu na memoria del poeta llaniscu. Al actu tan invitaos los representantes de les Asociaciones de Vecinos de la fastera y Federación Rural, Asociaciones culturales y representantes políticos.

Esi mesmu día, a partir de les 15,00 hores, nel patiu del colexu fadráse una llectura de poemes y actuará’l grupu musical “LA QUINTANA”.

El colexu vien desendolcando tolos díes d’esta selmana, a les 12:15 hores y pa los escolinos/es de terceru, cuartu y quintu de Primaria, un Taller d ‘ INSTRUMENTOS TRADICIONALES amás de delles otres actividaes. Ente elles alcuéntrase una esposición so “INSTRUMENTOS TRADICIONALES”, dende el Martes día 2 de mayu na Biblioteca del centru, y un EXPOCUENTO, del 15 al 26 de Mayu , que consiste na esposición del cuentu tituláu “LAS CLASES DE TUBA” de la Fundación Municipal de Cultura y MURALES.

Del 24 al 28 d ‘ abril, los escolinos/es pintarán murales na grada rellacionaos cola Llingua Asturiana y la so oficialidá, los instrumentos musicales con dellos testos alusivos al tema u la memoria de Pin de Pría.

A los actos tan invitaos tolos pas y mas del colexu.

Los maestros d’asturianu de diez escueles de Xixón decidieron axuntase pa sacar alantre, en conxuntu, la XI edición de les Xornaes de Llingua y Cultura Asturiana, qu’empiecen esti vienres y que se van allargar hasta’l Día de les Lletres, el prósimu 5 de mayu. Coordinaos pol director de la escuela García Lorca, Miguel Badal, van llevar a más de dos mil nenos a participar en tou tipu d’actividaes rellacionaes cola llingua como son talleres, conciertos y concursos.

A lo llargo d’estos díes va facese entrega de premios del concursu ‘María Teresa González’ de carteles, poemes y testos ilustraos nel centru municipal d’El Natahoyo; van poder ver un conciertu de Xentiquina; facer talleres de cocina tradicional asturiana y de vistimenta tradicional; asina como sendes de percorríu rural pel conceyu xixones.

Les diez escueles que formen parte d’esta iniciativa son l’Atalía, Xove, Tremañes, Martínez Torner, Cervantes, García Lorca, Montiana, Principe de Asturias, Santa Olaya, Lloreu y Martínez Torner.

La xornada entamará a les 9,30 la mañana na Facultá de Filoloxía cola presentación de la mesma pol Vicerrector de Relaciones Institucionales, Coordinación y comunicación y la Decana de Filoloxía y cuntará cola participación d’especialistes de ámbitos llaborales alternativos pa los filólogos que van del periodismu al mundu dixital, pasando pol empleu asociáu o la llabor de “consulting”.

Los obxetivos cimeros de la Xornada pasen por trabayar porque camude l’actitú del alumnáu de Filoloxía y enanchar les sos perspectives, de mou y manera qu’aprovechen les oportunidaes y habilidaes que faigan posible’l desendolque profesional de los filólogos nun entornu llaboral camudable, al mesmu tiempu qu’averalos aestayes llaborales y empresariales onde los sos conocimientos resulten prestamosos y onde, pela cueta, nun ye corriente que tengan información nin espeutatives personales.