Educación

L’Academia de la Llingua Asturiana convoca pal prósimu 31 de mayu de 2008 la prueba semestral de conocimientu de la llingua asturiana. El plazu de matrícula ye del 19 al 29 de mayu.

L’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fai dos convocatories añales onde puen evaluase diches conocencies y la de Mayu va tener llugar esti día 31.

A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución. Les persones que nun superen les pruebes del nivel 1 puen presentase a nueves convocatories toles vegaes que-yos pruya.

La prueba va tener dos partes, una escrita (dictáu, torna, exercicios gramaticales,redaición) y otra falada (conversación). Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2005, 6ª ed.; Gramática de la Llingua Asturiana, ALLA, Uviéu, 2001, 3ª ed.).

Asina mesmo, aconséyase la llectura de testos fechos acordies cola normativa, como los asoleyaos pola Academia.

El Centru Universitariu d’Idiomes a Distancia (CUID), perteneciente a la UNED, va entamar a impartir, nel cursu 2008-2009, la titulación d’asturianu, según anunciaó güei’l director del centru asociáu de la institución académica en Xixón, Mario Menéndez. L’asturianu súmase asina al inglés, francés, alemán, árabe, chinu, italianu, portugués, castellán, gallegu, vascu y catalán, que yá s’imparten a distancia na institución.

Nun primer momentu, la UNED va impartir namás el nivel básicu de llingua asturiana, frente a los cinco niveles del castellán, cuatro del inglés y trés del gallegu, catalán, vascu, francés, árabe o alemán.

Cada nivel de los cursos d’idiomes de la UNED tien una duración de 150 hores distribuyíes de payares a mayu. La UNED da 4 créditos de llibre configuración por Diploma (Básicu, Intermediu y Avanzáu), con un máximu d’8 créditos acumulables. El costu de cada cursu ye de 275 euros.

Páxina de la UNED

La totalidá de les organizaciones sindicales del sector de la Enseñanza Concertada (OTECAS, USO, FSIE, CC.OO y FETE-UXT) exixeron güei al Principáu la igualación de la media de profesores por unidá cola enseñanza pública, ya que según afirmen les diferencies actuales “son considerables” y repercuten nel rendimientu de los docentes.

Los representantes docentes responsabilicen al Principáu d’esta situación al non algamar el “acuerdu de plantiyes” colos centros concertaos que vienen demandando. “Tres ocho años de Gobiernu d’Areces, non sólo siguimos ensin acuerdu, sinón que los centros tienen menos plantiyes que nel 2001 y al tiempu tienen que satisfacer mayores necesidaes”, afirma’l comunicáu que ficieron públicu ayeri.

Según esplicó Juan Luis Barrera, voceru d’Otecas, nesti momentu les diferncies de ratio profesor/unidá ente la concertada y la pública son les siguientes: n’educación infantil un profesor por unidá na concerta y 1,33 na pública; en primaria, 1,17 na concerta y 1,5 aproximadamente na pública; y en secundaria 1,32 na concertada y 2,91 na pública.

Según los sindicatos, “esta situación repercute de manera direuta nes condiciones de trabayu, dificultando la reducción de la carga llectiva, y exixe a los y les trabayadores un esfuerzu munchu mayor p’algamar una enseñanza de calidá”.

Los sindicatos tamién criticaron al Gobiernu del Principáu porque, según informaron, decidió impugnar el conveniu de centros concertaos, firmáu poles centrales y les patronales a nivel estatal, no referente a la paga estraordinaria d’antigüedá. Trátase d’un abonu que reciben los profesores que cumplen 25 años na empresa y que suma la cuantía de cinco mensualidaes, aproximadamente 8.000 euros.

La Oficina Municipal de la Llingua del Ayuntamientu de Xixón presentó na mañana del miercoles el xuegu didáuticu ¿Que hai pa comer güeli?, ganador del II Concursu “Vas velo” (trabeyos pal aula). Los autores del trabayu, premiáu pola so orixinalidá y calidá, son Brenda Díaz Rodríguez, Noelia Expósito Marques, Jonatan Fernández Pendones, Manuel Ángel Fuertes Bernardo, Abel García Nicolás, Irene García Perez y Sandra González Rosado. Todos ellos son alumnos de cuartu de la ESO nel institutu Padre Feijoo.

El xuegu tien nel filu conductor del mundiu de la cocina’l so elementu principal y cumple col oxetivu de favorecer l’usu y afitamientu del pallabreru rellacionáu cola comida. A xuiciu del xuráu del premiu pue ser una perbona ferramienta pa trabayar nel terren de la espresión oral y de conociemintu del patrimoniu cultural y llingüísticu d’Asturies.

El premiu pa los autores ye la edición del xuegu per parte de la Oficina Municipal de la Llingua de Xixón y un viaxe d’intercambio pa tola clas a la llocalidá portuguesa de Miranda do Douro .

El sindicatu Suatea aseguró güei que “ún de los escasos aspeutos positivos, sinón l’últimu, de la propuesta de borrador del nuevu currículu de Bachilleratu p’Asturies, ye la contemplación de la docencia de relixón como materia optativa y fuera del horariu habitual”. Por ello llamentaron que “la presión del ‘lobby’ de les sotanes y los devotos ta siendo mui fuerte”, y exixeron la salida definitiva de l’asignatura del horariu del bachilleratu.

Al traviés d’un comunicáu, Suatea manifestó que “esi ‘lobby’ constituyíu pol conxuntu de sectores, instituciones y intereses católicos saltaron como un resorte, avezáu como ta a caltenese en situación de privilexu”, en cuanto se conoció la propuesta.

El 29 de mayu que vien, los miembros de la Universidá d’Uviéu escueyen representantes nel Claustru, l’órganu cimeru de representación de la Institución, que controla l’actividá del Rector, los cambios nos estatutos y una llarga llista de competencies y e Conceyu Universitariu pol Asturianu (CUPA), organización asturianista y universitaria na que participen alumnos, maestros, personal d’alministración y servicios y vieyos alumnos, va presentase “pa llevar la voz de los universitarios asturianistes al Claustru”, según comenten en nota de prensa.

Vidiu electoral del CUPA

Por ello, dende’l CUPA, piden el votu “col envís de que l’asturianismu garre pesu na nuesa universidá y l’asturianu s’afite y esparda’l so usu y enseñu”, amás añaden como oxetivu lluchar “polos drechos de los asturfalantes na Universidá, pola visibilidá y promoción del idioma, porque que se cree la filoloxía asturiana, pol estudiu y difusión de la cultura y la música tradicional asturianes nel ámbitu universitariu…”.

El Conceyu Universitariu pol Asturianu presenta candidatos a miembros del Claustru nos campus de Mieres, Uviéu y Xixón y según los sos responsables “agora ye’l momentu de facer visible qu’Asturies, la so cultura y la so llingua, son una prioridá pa los miembros de la comununidá universitaria”.

Los síndicatos de la enseñanza d’Asturies, SUATEA, FETE-UXT y la Federación d’Enseñanza de CCOO, anunciaron nun comunicáu el so sofitu a la manisfestación d’esti vienres n’Uvieu (Estación del Norte a les 19:00 hores), convocada pola Xunta Pola Defensa de la Llingua Asturiana pa pidir el reconocimientu de la oficialidá del asturianu nel prósimu estatu d’autonomía. Los sindicatos docentes quieren aprovechar la ocasión pa denunciar les carencies na escolarización de la llingua asturiana.

Otramanera y al empar del espíritu de la manifestación, los sindicatos de la docencia asturiana piden la incorporación de l’asignatura de Llingua y la Cultura Asturiana nel currículu d’Infantil, tres que la Conseyería la suprimiera del curriculu; que s’eliminen les ratio mínimes en tolos niveles pa la constitución de grupos de Llingua Asturiana y Gallego Asturiano. y la creación de la Especialidá de Llingua Asturiana y Gallego-Asturiano pa la carrera docente.

Vicente Gotor promete nun aforrar esfuercios p’algamar que la Universidá ocupe’l llugar que-y correspuende. El nuevi rector tomó posesión del cargu oficialmente nun actu nel que participaron el rector saliente Juan Vázquez y el Presidente del Principáu d’Asturies, Vicente Álvarez Areces, ente otres personalidaes academiques, polítiques y sociales de la rexón. “Sirvir a la universidá y non pa sirvime de la universidá”, con estes pallabres Gotor quisó dexar afitada la so intención de trabayar pola institución.

Gotor anunció que piensa mantener una collaboración lleal col Gobiernu d’Asturies. Amás volvió a mostrar la so intención, anunciada yá nel so programa, d’implantar nueves titulaciones pal cursu 2009-2010. El nuevu xestor remató la so intervención faciendo alcordanza del día nel que ñacío y del día nel qu’aprobó la oposición a profesor universitariu, curiosamente dos ochos de mayu de 1947 y 1981 respectivamente.

Vicente Gotor anunció la so intención d’implantar n’Asturies nueves títulaciones como Periodismo, Arquitectura, Agroalimentación, Traducción o Educación Física. El sucesor de Juan Vázquez al frente de la Universidá d’Uvieu desplico durante la la presentación del so equipu de Vicerectores nel paraninfu de la Universidá, les reformes que piensa llevar al cabu nesta etapa qu’entama agora. Gotor anticipó que la intención ye que los nuevos grados tean disponibles na mayor parte nel cursu 2009-2010.

Dedicándo-y una especial importancia a la formación n’otres llingues, primando l’estudiu del ingles como segundu idioma, Gotor destacó la importancia d’esta nueva etapa de gobiernu p’adaptar la Universidá a les esixencies del espaciu educativu europeu. Nesti sen, el rector anunció que va remocicar delles carreres como les de Filoloxía que se vienen impertiendo nel Cámpus del Milán.

L’equipu de trabayu del nuevu xestor ta formáu por tres muyeres y siete homes y va cuntar con asesores esternos non remuneraos como’l catedráticu de Química Orgánica Jose Manuel Concellón. El nuevu grupu ta formáu por Mari Paz Suárez Rendueles, (vicerrectora d’Ordenación Academica y Nueves Titulaciones), Julio Antonio González García (Profesoráu Departamentos y Centros), Santiago García Granda (Investigación), Susana López Ares (Estudiantes y Emplegu), Jose Antonio Cecchini Estrada (Estensión Universitaria, Cultura y Deporte), Ana María Fernández García (Internacionalización y Cooperación al Desarrollu), Víctor Guillermo García García (Informática y Comunicaciones), Jose Carlos Rico Fernández (Infraestructures, Campus y Sostenibilidá). Santiago Alvarez García va ocupar el cargu de secretariu xeneral.

Esti miercoles fina la XVI Selmana Cultural de la Facultá d’Hestoria y Xeografía con una xornada na que’l platu central ye la conferencia de Vicente Gotor, una de les primeres intervenciones del nuevo rector nel cargu, titulada “La Universidá d’Uvieu ente los próximos 400 años”. L’actu va tener llugar nel Salón d’actos de la Universidña a les 12:l00 hores.

Tres la conferencia del Rector, l’artista asturianu Anxel Nava espón una de les sos instalaciones nel espaciu al aire llibre del cámpus d’humanidaes a les 13:00 hores.