Educación

El Baille y la pandereta protagonicen los cursos de branu del Muséu del Pueblu d’Asturies que van desendolcase nel mes de xunetu. “La pandereta asturiana, téuniques y estilos” y “Introducción al baille asturianu: bailles de panderu y pandereta” son los dos cursos que tien programaos el Muséu pa esti verano y que van celebrase a lo llargo de dellos díes de xunetu.

“la pandereta asturiana, téuniques y estilos” (códigu 213) ye un cursu que va impartir la profesora Marta Elola y que va desendolcase en 12 hores espardíe nun h0rariu de 10,30 a 14,30 hores los díes 11, 12 y 13 de xunetu de 2008.

“Introducción al baille asturianu: bailles de panderu y pandereta” (códigu 214) ye l’otru cursu qu’ufre’l Muséu y del que ye profesora Maribel Parrondo. Con 20 hores de duración va impartise de 11 a 13,30 hores los díes 1, 2, 3, 4, 8, 9, 10 y 11 de xunetu de 2008.

Pa matriculase los interesaos puen facelo n’internet, caxeros ciudadanos y oficines d’atención al ciudadanu.

El Conceyu Universitariu pol Asturianu (CUPA) y el sindicatu d’enseñanza SUATEA , tán acabantes de mandar sendes reclamaciones a la dirección de la Universidá Nacional d’Educación a Distancia (UNED) y al so Centru Universitariu d’Idiomes a Distancia (CUID) por mor de la retirada de l’asignatura d’asturianu de la ufierta prevista pal cursu 2008-2009 na UNED.

Dende’l CUPA, quixeron “esixir que se recupere la iniciativa y el cursu que vien l’asturianu tea presente na UNED, pa que la llingua asturiana s’afite y esparda’l so usu y enseñu dientro del ámbitu universitariu, tamién a distancia”, una propuesta que como recuerda SUATEA, ”un principiu taba aceutada y agora de bones a primeres nun la aprueben, por mor de problemes teúnicos”.Dambes organiciones coinciden en ver nesta retirada problemes provenientes de la falta d’oficialidá de la llingua asturiana, amás de “les torgues que’l Gobiernu d’Asturies pon a toa iniciativa que suponga un avance pa la normalización de la llingua asturiana”, según comenten dende’l CUPA nun comunicáu.

Amás, recuerden les dos organizaciones, la importancia tanto del aumentu de la ufierta d’enseñu del asturianu, pa formar a los maestros y profesionales del campu llingüísticu, como d’afitar nel nuevu Estatutu d’Autonomía “la oficialidá de la llingua asturiana”.

Recuerda tamién el CUPA “la importancia que tien pal futuru de la llingua d’Asturies la implantación de la titulación de llingua asturiana nel futuru sistema européu de graos, al mesmu nivel que les demás llingües europees (castellán, inglés, catalán, francés…)”.

La UNED va impartir cursos d’asturianu dende’l cursu que vien

La Xunta pola Defensa de la Llingua Asturiana vieno acabante de denunciar “un nuevu casu de coación a los alumnos d’un centru pa que nun se matriculen en llingua asturiana”. El casu denunciáu prodúxose nel colexu San Miguel de Xixón, onde “ta mintiéndose a les families diciendo que los qu’escueyan l’asignatura de llingua asturiana van perder, como contrapartida, una hora de llingua castellana”.

Esto, sigún la Xunta, vien a dexar afitada “la precariedá llamentable y la situación d’allegalidá na que s’atopen los derechos llingüísticos y educativos n’Asturies”, y más cuando “esti tipu d’actuaciones respuenden davezu a intereses personales de tutores o maestros que, aprovechándose de la indefensión de los maestros d’asturianu que son na mayor parte interinos, faen por eliminar l’asignatura d’asturianu pa meyorar les condiciones del so horariu personal”.

Los trabayadores de los centros d’enseñanza concertada salieron güei a la cai n’Asturies convocaos polos sindicatos Otecas, USO, FSIE, CC.OO y FETE-UXT pa denunciar l’incumplimientu de los acuerdos per parte de l’Alministración y la “discriminación” a la que se ven sometíos. La so principal reivindiación pasa por homologase colos trabayadores de “la enseñanza pública ya que pertenecen al serviciu públicu educativu”.

Según esplicó’l secretariu xeneral d’Otecas, Joaquín González, el principáu decidió impugnar el conveniu quince meses dempués de publicase, dalgo que nun pasó en nenguna comunidá autónoma y añadió qu’hai acuerdos que nun s’asumen. “Hai acuerdos de financiación que nun recibimos porque’l Principáu niégase a negociar”, dixo González a europa Press.

De la mesma manera los trabyadores de la concerta denuncien que nun se negocia’l complementu pa los maestros de la ESO, cuando nos presupuestos, tanto del 2006 como del 2008, se recueye’l compromisu de financiación complementaria pa esti conceutu y nun acepten tornar les xubilaciones parciales incentivaes nun derechu de tolos trabayadores.

Esti martes pela mañana, con motivu de la presentación de la xornada “Meyorar la calidá educativa dende l’autoevaluación” presentada pol Conseyeru Riopedre nel Auditoriu “Príncipe Felipe” d’Uviéu, una veintena de delegaes y delegaos de los sindicatos SUATEA, CC.OO de la Enseñanza y CSI-CSIF (nel marcu de la campaña contra “el cheque en blancu” y contra la discriminación salarial nel pagu del complementu que sig´`un los sindicatos inventare l’alministración, “productividá”, que se paga sólo a parte del profesoráu), celebrose una concentración delantre l’auditoriu, faciéndose entrega al Conseyeru y a toles persones asistentes al actu d’un escrito desplicativo de les razones de la protesta.

La prósima semana continuará la campaña con un acto más delantre’l Rexistru alministrativu n’Uviéu.

Esti llunes día 2 de xunu finaba’l plazu pa comunicar al Vicerrectoráu d’Ordenación académica les Titulaciones de Gráu que cada Centru proponía pa la so implantación na Universidá d’Uviéu. La iniciativa de propuesta de Títulos de Grado podía partir de los Centros, Institutos Universitarios o Departamentos, pero tenía de concretase al través de un Centro de la Universidá.

Les propuestes teníen d’incluyir obligatoriamente la ­Denomación del Títulu y la titulación a la que sostituía, el Centru responsable de la propuesta, los Departamentos implicaoos y la rRama de conocimientu na que se diba inxertar el Títulu.

El Bloque por Asturies recordó esti xueves a la Conseyería d’Educación, coincidiendo col periodu de matriculación n’educación primaria, secundaria y bachilleratu, que “tolos centros tienen la obligación d’ufiertar les asignatures de Llingua Asturiana y Gallegu-Asturianu”.

Nuna nota prensa, el Bloque por Asturies espresó la so incomprensión a que siga habiendo ratios que “incumplen el derechu individual de cualquier alumnu a estudiar Llingua Asturiana o Gallegu-Asturianu”. Tampoco comprende que “el derechu a estudiar una asignatura dependa de qu’otros compañeros la escueyan o de los impedimentos que se pongan dende determinaos equipos de direición, cola complicidá de la inspeición educativa”.

El Bloque Por Asturies llamenta que la Conseyería d’Educación nun asuma la so responsabilidá, realizando un siguimientu “seriu” de la situación nos centros privaos y concertaos, onde “s’incumple’l derechu democráticu de los estudiantes a cursar Llingua Asturiana y Gallegu-Asturianu”.

L’asturianismu universitariu algamó dellos representantes nes elecciones celebraes ayeri xueves na Universidá d’Uvieú. El Conceyu Universitariu pol Asturianu y la organización Fai!, de recién creación, sumen trés representates electos pal Claustru de la universidá asturiana.

Nunes votaciones marcaes pola escasa participación de los alumnos el Conceyu Universitariu pol Asturianu “celebra los resultaos consiguíos pola formación, pesie a les acciones de manipulación feches dende delles candidatures”, que fueron denunciaes pol CUPA y reconocíes pola Xunta Electoral esta mesma selmana.

Rubén Rodríguez Quiñones, estudiante na Escuela d’Inxenieríes Técniques de Mieres, convirtióse dempués de les elecciones d’esti xueves en miembru del Claustru de la Universidá d’Uviéu pol Conceyu Universitariu pol Asturianu, mientres que Rodrigo Fernández Joglar foi escoyíu miembru del Claustru, dende la candidatura de Fai! en Pedagoxía, pa los próximos dos años.

Per otru llau, Iyán González Castro, de Fai! foi escoyíu yá va díes como representate nel Claustru de la Universidá d’Uviéu, como únicu miembru presentáu na Facultá de Xeoloxía, colo que la suma de les candidatures asturianistes na Universidá d’Uviéu algama los trés representantes.

Dambes organizaciones celebraron los resultaos, de los que van facer “un balance más fondu nos próximos díes” y quixeron dar les gracies a los estudiantes que-yos dieron la so confianza n’estos comicios.

Destaca tamién la presencia, ente los miembros electos na estaya de profesores, de Ramón d’Andrés, destacáu defensor del asturianu, que foi escoyíu na Facultá de Filoloxía.

L’Asociación de Llibreros del Principáu aseguró esti martres que cuenten col compromisu de l’Alministración autonómica pa crear un nuevu sistema y cambiar les ayudes direutes a llibros de testu por una tarxeta sustituible. D’esta manera, garantizarase’l destín de les ayudes direutes pa la compra de llibros de testu.

Esti novedosu sistema consiste en repartir unes tarxetes a los beneficiarios de les sovenciones, tarxetes que los pas puen cambiar por llibros de testu nes llibreríes asturianes, según desplicó’l presidente de l’asocaición, Pedro García, demientres la presentación del informe ‘Evaluación del sistema d’accesu de baldre a los llibros de testu n’Asturies’ ellaboráu pola Universidá de Santiago.

La páxina web de la Universidá d’Uviéu amuesa dende ayeri un cambiu estéticu recién decidíu pol nuevu equipu rectoral, encabezáu por Vicente Gotor. El llogotipu de la Universidá, que de va dellos años cambiare nun diseñu más modernu dempués de cuasi 300 años, torna agora, nel añu del cuatrocientos aniversariu, a llucir el diseñu orixinal.

Manual d’Identidá Coorporativa vixente hasta agora na Universidá