Educación

El garapiellu d’estudiantes y militantes de la Xunta Pola Defensa de la Llingua que tan encerraos dende les 17 hores d’esti vienres 27 de Xunu nel edificiu del rectoráu de la Universidá d’Uviéu, caltienen la so actitú y tres de reunise con Vicente Gotor nun se pue contatutar con ellos hasta les ocho de la mañana d’esti llunes por mor de los horarios del edificiu. La Xunta quier amosar con esti encierru la so fonda esmolición pol pasu atrás nos derechos de los falantes d’asturianu cola supresión del asturianu como materia d’estudiu nos nuevos Graos de Filoloxía apautada esta selmana na Xunta que celebrare la Facultá de Filoloxía.

Esti encierru, de carácter indefiníu, pretende facer un llamáu a la comunidá universitaria, encabezada pol nuevu Rector Vicente Gotor, asina como al gobiernu asturianu pa que pongan igua a esta situación crítica que dinamita tol sistema educativu, dexando a Asturies ensin la ferramienta básica pa la formación de profesionales y profesores de llingua asturiana”.

La organización, presente nel Claustru de la Universidá, apoya a los y les estudiantes enzarraos nuna acción coordinada pola Xunta pola Defensa de la Llingua Asturiana en protesta pol conflictu abiertu na Universidá.

Depués de lo asocedío na última Xunta de Facultá de Filoloxía “y de la inoperancia posterior del Rector y el Principáu na xestión de la exclusión de la llingua asturiana del grau en llingües modernes, decenes de persones alcuéntrense enzarraes nel Rectoráu de la institución, desixendo la intervención inmediata del altu estamentu universatariu y gubernamental d’Asturies na salvaguarda de los derechos llingüísticos de los asturianos y de la dignidá científica y académica del idioma asturianu”.

Fai!, que yá anunciara la so intención de siguir trabayando dende y pa la comunidá universitaria nesti sentíu, “sofita y aplaude l’encierru reivindicativu d’estudiantes coordináu pola Xunta pola Defensa de la Llingua Asturiana y Xunta Moza. Les persones enzarraes nel recintu cuenten caltener la midida de presión hasta que s’asuman dafechu les responsabilidaes d’esti intentu orquestáu de marxinación llingüística y s’apurra la solución pa que l’asturianu vuelva a tar nel proyectu de les enseñances renovaes en Filoloxía propuestes pa la Universidá asturiana”.

Según denunciaba esti día el SUATEA, en vísperes de vacaciones, “la Conseyería de Educación acaba dictar unes instrucciones (dicen que provisionales, pero coles que los Equipos directivos tán trabayando dafechu pa organizar el próximu cursu escolar) de les que’l profesoráu nun tien conocimientu y coles que van atopase cuando s’incorporen a los centros”.

Estes instrucciones, nun tan negociaes colos sindicatos, como asocede davezu según el SUATEA y “suponen importantes cambios na xornada llaboral del profesoráu, pasando los istitutos de tener seis periodos llectivos diarios a siete, prolongando la xornada llaboral del alumnáu y del profesoráu de manera gratuita”.

Un garapiellu de militantes de la Xuntaq Pola Defensa de la Llingua tan encerraos dende les 17 hores d’esti vienres 27 de Xunu nel edificiu del rectoráu de la Universidá d’Uviéu. La Xunta quier amosar con esti encierru la so fonda esmolición pol pasu atrás nos derechos de los falantes d’asturianu cola supresión del asturianu como materia d’estudiu nos nuevos Graos de Filoloxía apautada esta selmana na Xunta que celebrare la Facultá de Filoloxía.

Segùn despliquen nun comunicáu fechu públicu polos encerraos darréu d’entamar l’aición, énte los fechos asocedíos na Xunta de Facultá de Filoloxía, onde una propuesta del profesor Félix Fernández de Castro y la posterior votación, que salió ganadora con mayoría relativa, aparta a la llingua asturiana nel nuevu plan de titulaciones universitaries, un grupu d’estudiantes de la Universidá d’Uviéu vieno acabante d’encerrase nes dependencies del Rectoráu na cai san Francisco. El comunicáu afita que “los estudiantes, en coordinación cola Xunta pola Defensa de la Llingua Asturiana y Xunta Moza, quieren, asina, denunciar la esclusión que per parte de los sectores más retrógrados de la Universidá se ta faciendo, que conderga al idioma a quedar al marxe de la institución académica más importante d’Asturies. Esti encierru, de carácter indefiníu, pretende facer un llamáu a la comunidá universitaria, encabezada pol nuevu Rector Vicente Gotor, asina como al gobiernu asturianu pa que pongan igua a esta situación crítica que dinamita tol sistema educativu, dexando a Asturies ensin la ferramienta básica pa la formación de profesionales y profesores de llingua asturiana”.

Dende la Xunta pola Defensa de la Llingua Asturiana faise un llamáu pa que la comunidá universitaria y la sociedá asturiana tome parte d’esta iniciativa y se movilice pa preservar los derechos llingüísticos d’Asturies, brutalmente conculcaos tres el determín acientíficu y demagóxicu tomáu na Xunta de Facultá de Filoloxía.

El Bloque por Asturies, ante la “decisión incomprensible y ensin precedentes de la Xunta de la Facultáu de Filoloxía d’asesinar y lliquidar la Llingua Asturiana de la Universidá d’Uviéu”, exixó güei al “presidente del Gobiernu asturianu, Vicente Álvarez Areces, y al rector de la Universidá, Vicente Gotor, que-y devuelvan darréu la dignidá a la Facultá de Filoloxía”.

COmo tantes organizaciones polítiques y culturales d’Asturies alo llargo del día d’ayeri, la organizaicón refirióse nun comunicáu a la decisión de la Xunta de la Facultá de Filoloxía de suprimir la especialidá d’asturianu dientro del ‘maior’ de Llingües Modernes, que compondría la futura titulación de grau, según la propuesta del Decanatu.

Pal Bloque “el Gobiernu d’Asturies y el rector de la Universidá, nun puen permitir qu’un ‘grupúsculu’ de falsos científicos utilicen la Universidá d’Uviéu pa facer política de la manera más miserable y torguen por puru prexuiciu l’estudiu na Universidá Pública de la Llingua propia d’Asturies”.

“Si se niega a la Universidá, si se niega a la Facultá de Filoloxía, si se niega a la comunidá científica y universitaria, si se niega a los asturianos y asturianes la posibilidá de conocer, estudiar, investigar y afondar na realidá llingüística d’Asturies ta abriéndose la puerta a l intolerancia, l’incumplimientu de los derechos humanos, civiles y democráticos y asitia a Asturies a la puerta d’un conflictu de consecuencies imprevisibles”, señaló’l comunicáu.

El Bloque por Asturies amosó “tol so apoyu a la ex decana de la Facultá de Filoloxía, Ana Cano, al so equipu y a tolos profesores que dende la coherencia y la dignidá, defendieron el carácter científicu y el llabor investigador de la Universidá d’Uviéu y supieron poner a la máxima institución académica d’Asturies per delantre de los intereses políticos y personales”.

El Bloque anunció tamién que “va movilizase, apoyar y participar en tolos actos de condena y refugu a esta clara violación de derechos, a esti ataque a la dignidá de la Universidá Asturiana”, y fai responsable al Gobiernu d’Asturies y al rector “de les conscuencies de la decisión de la Xunta de la Facultá de Filoloxía”.

El so comunicáu finaba afitando que “sólo la oficialidá de la llingua asturiana pue resolver la situación d’incumplimientu de los derechos humanos, civiles y democráticos que sufren los asturianos y asturianes”. “Somos los ciudadanos y ciudadanes los que tenemos derechos llingúísticos, non los territorios o les propies llingües, y equí n’Asturies, en plenu sieglu XXI, tolos nuesos derechos llingüísticos tán pisaos y atacaos”.

El colexu Nta. Señora de Covadonga de Noreña nun ufierta matriculaciones n’asturianu, como ye obligatorio por llei, según una nueva denuncia de la Xunta pola Defensa de la Llingua Asturiana no que yer “un casu nuevu d’ataque a la llingua asturiana nel sistema educativu, que vuelvi evidenciar la precariedá llamentable y la situación d’allegalidá na que s’atopen los derechos llingüísticos y educativos n’Asturies”.

Según delles denuncies feches por dalgunos padres a la Xunta pola Defensa de la Llingua Asturiana, nel colexu Nuestra Señora de Covadonga, conceyu de Noreña tán negándo-yos el derechu de matricular a los fíos na asignatura d’asturianu. Esti casu, otru d’una llarga llista que vien denunciando la Xunta estes selmanes, ye especialmente grave porque nesa escuela nin siquiera s’ufierta la asignatura. Tampocu nun se tán poniendo los materiales fechos pola Conseyería pa anunciar la matriculación n’asturianu. Amás hai qu’amestar les respuestes daes a dellos neños qu’habiendo entrugao pola asignatura respondiose-yos, según la Xunta, “que pa que la hubiera teníen que querer la mitá d’una clase estudiar asturianu. Esti tipu de mentires y de torgues tán siendo habituales a la hora d’oragnizar les matriculaciones esti añu”.

La Xunta pola Defensa de la Llingua va facer llegar bien llueu esta denuncia a la Conseyería d’Educación pa que tome cartes nel asuntu y s’igue esti casu tan grave de violación de derechos llingüísticos y educativos. Amás, ye preocupante’l papel que desempeña la inspección de la Conseyería porque ye raru’l día que nun llega a la Xunta pola Defensa de la Llingua dalguna denuncia o quexa por parte de los padres nel periodu de matriculación. Añu tres añu venimos teniendo que denunciar situaciones como esta, que se repiten sistemática y xeneralizadamente ensin que la Conseyería d’Educación faga nada por garantizar el cumplimientu de lallei.

Nel mes de febreru pasáu la Xunta pola Defensa de la Llingua Asturiana convocaba una movilización pa denunciar la precaridá de l’asignatura que cuntó col apoyu unánime de tolos sindicatos d’enseñanza y que, por desgracia, volvió chocar cola indiferencia absoluta de la Conseyería d’Educación.

Agora, tres la presentación d’una campaña gubernamental p’afalar a la matriculación na asignatura d’asturianu, la Xunta pola Defensa de la Llingua Asturiana “quier recordar que la primer campaña que habíen facer ye la del cumplimientu de la llei, garantizando que toos aquellos que quieran cursar l’asignatura d’asturianu puedan facelo ensin llimitaciones nin coacciones: que s’ufierte l’asignatura en tolos centros, en tolos niveles y pa tolos escolinos y escolines”.

Pala Xunta, tampoco “nun ye tolerable que na Asturies del sieglu XXI se siga prohibiendo estudiar y conocer la llingua propia a miles d’estudiantes de toles etapes que lo piden voluntariamente”.

El colectivu universitariu FAI! pidió güei la invervención del rector de la Universidá d’Uviéu, Vicente Gotor, “na marxinación del asturianu en filoloxía”, refiriéndose a la supresión de la especialidá d’asturianu de la propuesta de títulu de grau de la Facultá de Filoloxía.

FAI! pidiía ayer que “Vicente Gotor esclarie si conoz los procesos d’estudiu ya implantación de los nuevos planes d’estudiu tres de la so negativa a pronunciase fai malpenes dos díes”.

L’asociación tamién solicitó que Vicente Gotor “actúe de forma decidida nel conflictu abiertu na Facultá de Filoloxía, respondiendo polos derechos y les realidaes científiques penriba de los intereses personales de los docentes qu’enxamás escondieron les sos postures antiasturianes”.

FAI! mostró tamién “la so conderga total a la marxinación pal asturianu qu’aprobó la Xunta de Facultá de Filoloxía de la Universidá d’Uviéu”, y espresó “l’apoyu públicu a Ana Cano, ex decana de la mesma, pola so defensa de la dignidá académica de la llingua asturiana, y pola so decisión de dimitir nel so cargu”.

L’Asociación de Trabayadores pola Normalización Llingüística tamién mostró esti miércoles la so “enritación” polos fechos, y la so solidaridá “con Ana Cano y el so equipu direutivu”. Sigún un comunicáu fechu públicu ayeri la decisíon “ye ún de los ataques más graves nos munchos que vien soportando la llingua asturiana”.

L’asociación dixo que “nun ye quién a tender qué clase de filólogos son los que nun tienen más esmolición qu’enzancar l’enanchamientu de los conocimientos llingúísticos de los sos alumnos, quitándo-yos la posibilidá d’estudiar una llingua que ye patrimoniu de tolos asturianos”. “El que la enmienda ccuayara nun ye otra cosa que la confirmación de que los criterios llingüísticos son los que menos pesen na cuestión del asturinau, dexándose guiar por zunes personeles y cuestiones que nada tienen que ver cola filoloxía”.

El profesor Ramón d’Andrés intervino na Xunta de Facultá de Filoloxía qu’esta selmana decidió por una estrencha mayoría sacar al asturianu de los futuros Graos que se van crear na mesma dientro del sistema européu d’enseñanza.

D’Andrés recordó na so intervención la yá relativamente llarga trayectoria del asturianu na enseñanza universitaria y la importancia de que la Universidá d’Uviéu asuma “l’actividá científica, investigadora y docente del asturianu”.

Ufrimos la intervención completa orixinal nun documentu que pueden descargar.

El colectivu “Aconceyamientu de Xuristes pol Asturianu” quixo amosar al traviés d’un comunicáu el so llamentu énte “lo asocedío na Facultá de Filoloxía de la Universidá d’Uviéu” y solidarizase cola decana dimisionaria.

P’AXA “la cabera responsabilidá’l Rectoráu y el Gobiernu d’Asturies, porque siendo asina que la Xunta de Facultá aprobó, hai bien d’años, la Especialidá de Filoloxía Asturiana, desdexaron les sos obligaciones pa ponela en marcha, facilitando con ello’l boicotéu sosteníu y foín d’un grupu d’antiasturianistes que tres d’abondos intentos fallíos, al cabu, dieron un golpe efeutivu escontra la llingua asturiana, oxetu de les sos rensíes”.

Los xuristes albidren amás que con esti determín “evidénciase’l despreciu que los profesores golpistes, el Rectoráu de la Universidá d’Uviéu y el Gobiernu del Principáu d’Asturies, amuesen pol conteníu de la Carta Europea de les Llingües Rexonales o Minoritaries”, un tratáu internacional, que recuerden, “ta ratificáu por España y parte del denomáu bloque de constitucionalidá na materia, que nel so artículu 8.e) desixe, a tolos poderes públicos, la garantía de que la llingua asturiana pueda ser estudiada na nuesa universidá”.