Educación

La dirección de la Escuela Universitaria de Maxisteriu perdió por un gran marxe la votación del so proyectu d’adaptación al plan de Bolonia col que pretendía imperdir una titulación reglada d’asturianu na carrera. Durante la mañana una concetración entamada pola Xunta Moza y a la qu’asistieron más de cien persones, ente les que taben representantes de FETE-UXT, CCOO, SUATEA, USO, amás de profesoráu y alumnáu de la Escuela reclamó la necesidá de contar con una titulación reglada d’asturianu.

Los planes de la dirección de la Escuela Universitaria de Maxisteriu viéronse rechazaos por mayoría amplia. El programa presentáu imcumplía tolos mandaos llegales que desixen l’enseñu d’asturianu. Nel conceyu de la Xunta d’Escuela varies intervenciones, feches por profesores y por representantes d’alumnos, amosaron el profundu malestar xeneráu pola dirección del centru y la so achaplante intención de dexar a la llingua asturiana fuera de los planes d’estudios al nun incluyir una mención específica.

El fechu de presentar un programa diseñáu pa da-y gustu a los sectores más retrógrados y nostálxicos del búnker universitariu quedó nidiamente destináu al fracasu porque la sociedá asturiana superó fai bien de tiempu, como amosaba la Xunta Pola Defensa de la LLingua nuna nota de prensa esta tarde estos prexuicios y como demostraron l’alumnáu de la Escuela, el profesoráu y los sindicatos d’enseñanza que tuvieron presentes na concentración qu’entamó a les 11:30.

Dende la Xunta pola Defensa de la Llingua faise “un llamáu a tolos axentes implicaos n’iguar esta situación. Rector, Conseyeru d’Educación y Gobiernu del Principáu tienen la obligación d’intervenir na defensa de les lleis poles que se rixen los derechos educativos de los asturianos que tuvieron a piques de ser conculcaes pola dirección d’una Escuela Universitaria que piensa colos preceptos del franquismu sociolóxicu”

.

La xunta va siguir de cerca tou esti procesu, y nos prósimos díes falará colos másimos representantes del Gobiernu Universitariu y siguirá faciendo la campaña que tien entamada en collaboración colos estudiantes de la escuela y colos sindicatos d’enseñanza.

La Xunta Moza y la Xunta pola Defensa de la llingua asturiana convoquen una concentración delantre de la Escuela Universitaria de Maxisteriu esti xueves a les 11.30, ante l’ataque a la llegalidá que se plantega facer dende instancies universitaries.

Esti xueves día 29 a les 11.30, va facese una concentración delantre de la Escuela Universitaria de Maxisteriu en protesta pola votación que se quier llevar alantre, na que la dirección del centru pretende que l’asturianu quede fuera de los estudios reglaos, incumpliendo con ello tolos mandaos llegales que piden espresamente una titulación na carrera.

Esti xueves 29 de xineru, a les 12 del mediudía, ta convocada la xunta na que se va facer la primer votación de les menciones que van inxertase dientru los nuevos estudios del grau de maxisteriu adautaos a Bolonia na Xunta de la Escuela de Maxisteriu y nun apaecen ente elles nin Estudios Musicales nin Llingua Asturiana.

Les menciones que tán enriba la mesa son: Lengua Española, Matemátiques, Conocimientu del Mediu, Educación Física, Educación Especial y Educación Artística. Amás de l’ausencia de llingua asturiana, que depués del apautamientu adoptáu como Minor de Filoloxía tendría de vese espeyáu nun Minor en Maxisteriu, pa cumplir la Llei qu’encarga a la Universida la preparación de los profesores de Primaria y Secundaria, la sorpresa na Escuela Maxisteriu ye que nun apaeza per dengún lláu Educación Musical, cuando esisten especialistes de música en toles escueles.

El Conseyeru d’Educación y Ciencia, José Luis Iglesias Riopedre, presentó esta selmana la iniciativa “Yes o no yes?”, una campaña informativa p’animar a los xóvenes de 18 a 30 años a matriculase nos cursos d’inglés de baldre que se van impartir nes Escueles Oficiales d’Idiomes de la comunidá autónoma dende’l mes de febreru próximu a xunetu.

Los cursos van diseñase a la carta, a la midida de les necesidaes de los alumnos que se matriculen, y van tratar d’afondar nos aspectos que más interesen a los estudiantes, favorecer la conversación y afondar nel llinguaxe técnicu d’ámbitos como’l científicu, llegal, alministrativu, médicu, educativu…

El plazu d’inscripción ta abiertu hasta finales de xineru nes Escueles Oficiales d’Idiomes d’Avilés, Cangas del Narcea, Xixón, Llangréu, Llanes, L.luarca, Mieres y Uviéu y les persones interesaes n’algamar información sobre los cursos puen alcontrar tolos detalles na web www.yesonoyes.com.

Esta iniciativa enmárcase nel conveniu de collaboración soscritu pol Ministeriu d’Educación, Política Social y Deporte y el Gobiernu del Principáu d’Asturies p’aumentar la ufierta de places nes Escueles Oficiales d’Idiomes ya impulsar actuaciones qu’ayuden a ampliar el conocimientu del inglés ente la mocedá. En virtú del mentáu alcuerdu, el cursu pasáu desendolcáronse n’Asturies 52 cursos nos que participaron 669 alumnos. Los grupos creaos trabayaron especialmente la espresión oral y el refuerciu de la comprensión. Amás, programáronse cursos de llinguaxe técnicu pa mozos/ces rellacionaos col sector turísticu, el sanitariu, la comunicación, los negocios, la electrónica o l’alministración.

La Conseyería d’Educación prevé qu’esti añu se matriculen nos cursos de baldre unos 2.000 alumnos y que se constituyan alredor de 90 grupos.

Una de les novedaes principales que s’introducen esti añu nel programa son los cursos d’inmersión llingüística de fin de selmana “Swimming in English”, que se van cerebrar en Garaña de Pría . Esta iniciativa va dexar a los participantes somorguiase per trés díes na llingua inglesa y ameyorar la so competencia comunicativa ensin necesidá de viaxar al estranxero. En total, van organizase ocho cursos de fin de selmana ente marzu y xunu nos que puen matriculase unos 480 estudiantes.

Na presentación de la campaña “Yes o no yes?”, el Conseyeru d’Educación y Ciencia refirióse tamién a la marcha del Programa Billingüe nel Principáu d’Asturies y recordó qu’esti añu funciona en 130 centros educativos de la comunidá autónoma (113 públicos y 17 concertaos), algama a unos 8.500 alumnos ya implica a más de 430 profesores.

En concreto, el programa desendólcase en 67 centros públicos de Primaria, con 143 profesores y 4.900 alumnos. Nel casu de Secundaria, el proyectu estiéndese a 46 centros, con 255 profesores y 2.600 alumnos. En total, según indicó’l Conseyeru , el Programa Billingüe algama a un 20% del alumnáu de Primaria y Secundaria de la rede pública.

Los centros concertaos incorporáronse al programa esti cursu y anguaño 17 d’ellos cuenten con secciones billingües nes que tán implicaos 36 profesores y 1.000 alumnos.

La Casa Municipal de Cultura va acoyer dende esti próximu 2 de febreru’l tercer taller de ‘xíriga’, la fala de los teyeros llaniscos qu’axunta una base asturiana con bien de pallabres gremiales. La iniciativa, que yá se punxere en marcha per primera vegada nel 2007, forma parte del programa ‘Cursos municipales 2009’ convocaos pol Ayuntamientu de Llanes en collaboración cola Obra Social y Cultural de Caxastur.

El cursu va tener ocho hores de duración con partes teóriques y práutiques y va desenrrollase demientres los cuatro llunes del mes de febreru, n’horariu de 19 a 21 hores.

Según informó esti día la conceyalía de cultura del Ayuntamientu van tomar parte nesta actividá dellos antiguos teyeros o tamargos que dan testimoniu en cada sesión de la so esperiencia personal nesti oficiu. El taller inclúi comentariu de testos, dictaos, redaiciones y tornes.

La VI edición del ´Concursu de Cómic n´asturianu´ pesllóse esti pasáu viernes 23 de xineru nel Teatru Riera de La Villa col Actu d’entrega de Premios, nel que participaron un numberosu grupu d’autoridaes, amás de los ganadores de les distintes modalidaes.

Al actu asistieron l’alcalde de Villaviciosa, Manuel Busto, el Conceyal de Cultura, Juan Basilio González, los alcaldes de Nava, Bimenes, Colunga y Cabranes, Alejandro Vega Riego, que ye tamién Presidente de la Mancomunidá Comarca de la Sidra, la Directora de Política Llingüística, Consuelo Vega, ya Ismael Bayón, esti últimu en representación de Caxastur.

Manuel García Iglesias, autor de ´La Misión´, tamién acudió a recoyer el so premio y el diploma que lu acredita como ganador del Concursu de Cómic n´asturiano 2008.

Escolinos de los distintos centros educativos de la Comarca, como ganadores del Concursu de Tires Cómiques, foron tamién los protagonistes de la xornada.

L xunta que celebró esti xueves la Comisión d’Estatutos de la Universidad de Oviedo supuxso la presentación d 106 enmiendas, ente les que s’alcontraba una propuesta d’enmienda pal emplegu del asturianu como llingua propia de la Universidá d’Uviéu n’igualdá de condiciones y garantizándo la non discriminación.

La enmienda foi plantegada por un grupu de claustrales ente los que figura la profesora Paz Andrés, principal referencia de la oposición universitaria n’Uviéu.

La Conseyería d’Educación recibió esti cursu ocho solicitudes d’oxeción de conciencia a les materies d’Educación pa la Ciudadanía y Educación Ético-Cívica.

El Gobiernu asturianu asoleyó esti datu como contestación a la información que fizo pública ayeri la Plataforma de pás oxetores que presentaron esti día mediu centenar de nueves oxeciones nel rexistru de la Conseyería y falen de que’l númberu alcuéntrase penrriba les 600.

Como ye vezu, la Xunta pola Defensa de la Llingua Asturiana pon clase d’asturianu un añu más. El cursu entama’l llunes 2 de febreru, nel local uvieín de la organización, el Llar Solidariu, na cai La Gascona 12, 3u.

El cursu tien 60 hores de duración ónde los y les alumnos y alumnes van poder deprender el bon usu del idioma tanto a nivel escritu como oral.

L’horariu va ser de 18’00 a 19’30 hores, los llunes y vienres (horariu provisional hasta concretar cola xente matriculao). El preciu de la matrícula completa ye de 30 €.

Toles persones interesaes pueden apuntase llamando al 985 229 553 o pasando pel local (a partir de les 15’30, hasta les 20’00).

El sindicatu CC.OO alvirtió güei de que la Universidá dexa en suspensu la evaluación de los complementos d’investigación d’Asociaos, Ayudantes, Ayundantes Doctores y TU interinos, colo que dexa a los docentes non funcionarios nuna dificil situación económica.

“Cuando l’actual equipu rectoral insistía en que yera la so intención potenciar la investigación, dende CC.OO celebrábemoslo, pues ye ésta una de les funciones del profesoráu y ún de los aspeutos polos que s’evalúa la so carrera en caún de los sos pasos. Ye obvio que facilitar y puxar pola investigación ye positivo, malo ye cuando queda en pallabres y cuando directamente se castiga o s’anulen les motivaciones pa la investigación con postures que muestren la total indiferencia hacia ún de los colectivos de profesoráu, el de los contrataos”, apunta’l sindicatu nun escritu unciáu esti día a los medios de comunicación.