Educación

Con esta celebración dase fin a un total de 124 actividaes escolares organizaes dende la Conseyería de Cultura y Turismu, pente medies de la Direición Xeneral de Política Llingüística, y cola collaboración de la Conseyería d’Educación. Les mentaes actividaes llegaron nesta edición a 194 centros públicos y concertaos (142 de primaria, 52 de secundaria y bachilleratu) del Principáu d’Asturies nos que se da l’asignatura de Llingua Asturiana y Gallego-Asturianu y nelles participaron cerca de 20.000 alumnos.

Nesti cursu la ufierta consistió nun total de 23 talleres (lliterarios, conciertos didáuticos, teatru). Con un presupuestu de 120.000 euros, zarróse una programación que tien como oxetivu sofitar el llabor docente del profesoráu de llingua asturiana siguiendo coles iniciatives d’usu y promoción llingüística. La Conseyería trabayó colos centros nel diseñu del programa ufiertáu, que tuvo una valoración mui positiva. Dende la Direición Xeneral de Política Llingüística zárrase esta “Axenda” dando pasu a la preparación de la “Axenda Didáutico-Escolar 2010-2011” ya invitando a participar na so ellaboración a cuantes persones, grupos y compañíes de l’actualidá musical, lliteraria, o teatral asina lo deseen (más información en www.politicallinguistica.org, Seición Educación).

La Conseyería de Cultura y Turismu (al traviés de la Dirección Xeneral de Política Llingüística) y cola collaboración de la Conseyería de Educación del Principáu d’Asturies, yá entama l’«Axenda Didáctico-Escolar» pal cursu 2010-2011, invitando a toles persones, grupos y compañíes de la nuestra actualidá musical, lliteraria y teatral interesaes en participar na mesma a que presenten los sos proyectos detallaos de l’actividá.

El plazu de presentación llega hasta’l 15 de xunetu. Los proyectos tienen que se presentar nel Serviciu de Política Llingüística del Principáu d’Asturies. Ente tolos presentaos va facese una selección d’aquellos que meyor s’axusten a les iniciatives d’usu, promoción llingüística y apoyu al trabayu educativu.

El sindicatu SUATEA vuelve s recordar a la Conseyería d’Educación, a les families, la Inspección educativa y la dirección de los centros que “l’asignatura o conteníos de Llingua Asturiana y Gallego-Asturianu son d’ufierta obligada en tolos niveles educativos, inclusive nel d’Infantil” y encamienten a la Inspección a mirar “pol accesu al estudiu y el conocimientu de la nuestra llingua, lo mesmo que mira pol cumplimientu d’otres lleis educatives”.

Y ye que segùn SUATEA “ye chocante que na etapa d’Educación Infantil namás un 13% del alumnáu reciba enseñanza nel nuestru idioma en comparanza col 55,4% del total de Primaria que la recibe, cuando normalmente la etapa d’Infantil ta integrada nel mesmu centru que la Primaria y xestionada alministrativamente polos mesmos equipos directivos”.

Dende SUATEA creen que “pa evitar malos entendíos y que nun se cumplan les intrucciones de principiu de cursu, esperamos que nengún equipu directivu, nin nengún maestru o maestra escaeza que l’alumnáu pue escoyer Llingua Asturiana y Gallego-Asturianu al empecipiar cualesquier cursu educativu independientemente de la escoyeta del cursu anterior”, de tal manera que “nun topemos los mesmos problemes de tolos años por cuenta de nun ufiertar esta asignatura y nun respetar la Llei d’Usu”.

Esti miércoles 9 de xunu fízose na Sala de Receiciones de la Casa Conceyu de Xixón la presentación del material didáutico ganador del cuartu concursu Vas velo, trebeyos pal aula, organizáu pola Oficina Municipal de la Llingua de Xixón, nel que participaron los Institutos d’Enseñanza Secundaria del conceyu.

Nel actu tuvieron presentes el conceyal de Cooperación Internacional, Cultura Tradicional y Política Llingüística, Jesús Montes Estrada, les profesores de llingua asturiana del IES Calderón de la Barca, Sonia Mora González y del IES Fernández Vallín, Mª Ángeles García Rodríguez, asina como dellos respresentantes del alumnáu d’entrambos institutos y la Responsable de la Oficina Muncipal de la Llingua Mª Xosé Rodríguez López.

Esti ye’l cuartu añu que se fai’l concursu, que consiste na preparación de materiales escolares pa trabayar la llingua asturiana nel aula. Presentáronse mozos y moces de dellos institutos de la ciudá y el premiu consistió nun viaxe a Miranda do Douro pa la clase de los/es ganadores y la publicación de los trabayos ganadores.

Los trabayos ganadores d’esti añu fueron: “ASTURIES, PARAÍSU MITOLÓXICU” del que son autores: Iván Batalla Tuero, Iyán Caldevilla Rodríguez, Alberto Hilario Díaz, Arturo Paraja Ruiz, Rudney Weslley Santos de Souza Lima, Adrían Vélez Fernández y Laura González García, de 3u de la ESO del I.E.S. Calderón de la Barca; y el trabayu “LA QUINTA DEL TÍU VALLÍN” del que son autores: Francisco José Franco Díaz, Érika Marcela Guevara Solorzano, Juha Peón Díaz, Noemí Pérez Alves, Santiago Raposo Moreno, Jairo Segurola Cano, Jossy Briones Iglesias, Tatiana Elizabeth Curimilma Guamán, Mario Martínez Fernández, Pilsy Pérez Terrero, Johana Paola Pesántez Velín, Adriana Mariel Vargas Cadima, de 3u de la ESO del I.E.S. Fernánez Vallín.

El xuráu valoró positivamente la presentación mui ellaborada y orixinal d’entrambos trabayos, los temes variaos de los conteníos y centros d’interés que planteguen, que van dende la lliteratura hasta la gramática, pasando pela xeografía, los refranes, la mitoloxía y la historia d’Asturies en xeneral. El xuráu entendió tamién que son mui entreteníos y didáuticos colo que pue ser una bona ferramienta pa les clases de los caberos cursos d’Educación Primaria, pa la E.S.O. y pal Bachiller. Ufierten la posibilidá de trabayar la espresión oral en distintes situaciones de comunicación, xueguen tamién col pallabreru y planteguen cuestiones que posibiliten el conocimientu del patrimoniu cultural asturianu.

La II Sestaferia del Profesoráu de Llingua Asturiana celebrose nel CPR d’Uviéu esti vienres día 4 de 9,30 a 14 hores y de 16,30 a 20 hores, cuntando con más de 120 profesores n’activo d’Educación Primaria y d’Educación Secundaria qu’imparten Llingua asturiana y que siguieron un completu programa nel que les aplicaciones didáutiques que se vienen desendolcan nel aula d’asturianu foron les protagonistes.

Los obxetivos d’esta Sestaferia del Profesoráu de Llingua Asturiana diben dende analizar la contribución de la Llingua asturiana al llogru de la competencia en comunicación llingüística hasta l’emplegu de les Nueves Tecnoloxíes nes clases de Llingua y los conteníos empobínábenese cola presentación de ponencies a primera hora de la mañana y de la tarde, pa facer darréu talleres simultáneos relacionaos colos conteníos propuestos.

La Xunta de Personal Docente vieno acabante facer un llamamientu a la movilización escontra les midíes de Zapatero, al tempu que piden aconceyase col Conseyeru, Iglesias Riopedre pa, tratar la situación del asturianu nel enseñu.

a decisión tomosé nel plenu de la Xunta de Personal Docente Non Universitariu celebráu esta selmana onde les cinco organizaciones sindicales del sector (SUATEA, FETE-UXT, FE CCOO, ANPE y CSI-CSIF) pidieron una entrevista urxente col Conseyeru d’Educación pa falar de la enseñanza de la llingua asturiana y del gallego-asturianu n’Educación Infantil. Los sindicatos quieren falar tamién sobre l’aprobación de resoluciones rellacionaes coles fusiones de centros, la remodelación de Centros y la situación de les comisiones de servicios.

Hasta’l 30 d’esti mes de Mayu hai plazu pa inscribise na II Sestaferia del Profesoráu de Llingua Asturiana que va celebrase nel CPR d’Uviéu na primer selmana de Xunu. El día 4 de 9,30 a 14 hores y de 16,30 a 20 hores, un máximu de 120 profesores n’activo d’Educación Primaria y d’Educación Secundaria qu’imparta Llingua asturiana van poer seguir un completu programa nel que les aplicaciones didáutiques que se vienen desendolcan nel aula d’asturianu van ser les protagonistes.

Los obxetivos d’esta Sestaferia del Profesoráu de Llingua Asturiana van dende analizar la contribución de la Llingua asturiana al llogru de la competencia en comunicación llingüística hasta l’emplegu de les Nueves Tecnoloxíes nes clases de Llingua y los conteníos empobínenese cola presentación de ponencies a primera hora de la mañana y de la tarde, pa facer darréu talleres simultáneos relacionaos colos conteníos propuestos.

Nesti sen, el programa va ser el que vien darréu:

MAÑANA 9:15 h. Entrega documentación 9:30 h. Inauguración 10:15 a 11:30 h. Ponencia: Contribución de l´asignatura “Llingua asturiana” a la competencia en comunicación lingüística. Marta Mori de Arriba. 11:30 a 12:00 h. Descansu 12:00 a 14:00 h. Talleres simultanios: – Llingua oral. Ponente: Paz Fonticiella Gutiérrez – Llingua escrita. Ponente: Berto Cobreros – Cómo trabayar la competencia en comunicación llingüistica en Primaria. Ponente: José Luis Remis García – Proyectu de centru. Ponente: María José Fernández Fernández – Xeres pa trabayar la competencia en comunicación llingüistica en Secundaria. Ponente: Xurde Fernández Fernández y Mercedes Calzada Redondo TARDE 16.30 a 17.45 h. Ponencia: Aplicación de les NNTT nes clases de “Llingua asturiana”. Xandru Martino Ruz. 17:45 a 18:00 h. Descansu. 18:00 a 19:30 h. Talleres simultanius: – Utilización del blog como recursu didácticu. Ponente: Xulio Berros. – Nueves aplicacines didáctiques de la prensa dixital nel aula de Llingua asturiana. Ponente: Próspero Morán. – Utilización de la radio como ferramienta didáctica. Ponente: Chechu García Fernández. – NNTT y lliteratura infantil. Ponente: Iris Díaz Trancho – La pizarra dixital nes clases de Llingua. Ponente: Xandru Armesto.

Más información sobre la Sestaferia na páxina web del CPR d’Uviéu

La Xunta pola Defensa de la Llingua Asturiana (XDLA) entamó va unes selmanes una campaña per Internet pa pidir a los miembros de la dirección de la RTPA más programación n’asturianu, con meyores horarios y más amplitú temática, y el respetu a la toponimia oficial na programación en castellanu. Ofrecimos un modelu de carta y les señes de corréu electrónicu de la dirección de la RTPA a les que la mandar. Gracies al corréu testigu de la iniciativa tamos pudiendo ver cómo, hasta’l día de güei, son más de 3.150 los mails qu’aportaron a les diferentes cuentes de los dirixentes del serviciu públicu de televisión d’Asturies. La XDLA quier agradecer l’ésitu d’esta campaña a toles persones que participaron nella.

De la mesma manera la Xunta pola Defensa de la Llingua Asturiana fai anuncia qu’esta campaña va siguir activa pa toles persones que quieran sumase y, amás, va completase cola presentación d’una quexa énte la Procuradora Xeneral d’Asturies, qu’habría tener ente les sos funciones la defensa de los derechos de la ciudadanía asturiana y el cumplimientu de les disposiciones llegales d’ámbitu autonómicu, estatal y européu.

La Universidá d’Uviéu alcuéntrase nel puestu 31 del ranking global de productividá na investigación de les 48 universidaes públiques españoles, según un estudiu del grupu de la Universidá de Granada qu’investiga estos aspeutos y qu’asoleya la revista Psicothema nel so caberu volume. Llama l’atención que la Universidá algama’l puestu 13 en beques FPU pero baxa al 31 en proyeutos d’I+D y al 31 en publicaciones ISI, lo qu’amuesa qu’hai bona cantera pero que se desperdicia.

Les universidaes Pompeu Fabra y Autónoma de Barcelona y la Pablo de Olavide de Sevilla son, por esti orde, les tres universidaes públiques españoles con mayor productividá n’investigación, según esti estudiu. La clasificación de 2009 n’investigación, inclúi les ciencies sociales y les humanidaes, de les universidaes públiques españoles y foi dirixìu por Gualberto Buela-Casal, profesor de la facultá de Psicoloxía de la Universidá de Granada, universidá qu’ocupa’l puestu númberu 14. L’último llugar ocupalu la universidá de Las Palmas de Gran Canaria.

Artículu espublizáu na revista Psicothema

El Conseyeru d’Educación y Ciencia, José Luis Iglesias Riopedre, afirmó estos díes qu’un total de 22.466 alumnos estudien esti cursu 2009-10 l’asignatura de Llingua Asturiana, de los que 21.560 reciben les clases en centros de la rede pública y 906 na rede concertada La mayor parte de los escolinos tán cursando esta materia na etapa de Primaria, en total 17.763 (son 17.053 na pública y 710 na concertada), mientres que’l restu, 4.703 ta en Secundaria (son 4.507 na pública y 196 na concertada).

Na so intervención, el Conseyeru d’Educación y Ciencia fixo balance de la evolución que tevo la escolarización d’asturianu dende l’añu 2000 hasta anguaño, al cumplise’l décimu aniversariu de l’asunción de les competencies educatives, tamién nesta materia.

Nel últimu deceniu, la matriculación de Llingua Asturiana esperimentó un crecimientu de 9.763 estudiantes. En concreto, aumentó en 5.000 alumnos la impartición d’esta materia en Primaria (en cifres globales pasó de 13.000 a 17.000) y aumentó en 3.700 en Secundaria (pasó de 750 a 4.500) na enseñanza pública. El porcentaxe de centros de Primaria que la imparten pasó del 70% al 91% y en Secundaria entamó nel 14% de los institutos hasta algamar el 88% anguaño. No que cinca al profesoráu, aumentó nun 63% el númberu de docentes que dan la materia.

Na enseñanza concertada nun s’impartía esta asignatura nel añu 2.000, mientres qu’agora ye d’ufierta obligada en tolos centros y ta dándose en doce colexos a 906 alumnos (710 en Primaria y 196 en Secundaria).

Pero amás de la evolución que reflexen les estadístiques el Gobiernu del Principáu afaló la enseñanza del asturianu aplicando les siguientes midíes nesti deceniu:

• Desendolcu de la Llei d’Usu, garantizando la ufierta de l’asignatura en tolos centros educativos asturianos. • Publicación de los currículos de l’asignatura en toles etapes educatives d’Infantil, Primaria, ESO, Bachilleratu y Adultos. • Planes de formación permanente del profesoráu y xornaes d’estudiu de la Llingua Asturiana dirixíes a los docentes. • Planes de supervisión per parte del Serviciu de la Inspeición Educativa. • Subvención a la edición de llibros de testu, cubriendo tolos cursos de la enseñanza obligatoria, dende 1u de Primaria, llegando inclusive a la postobligatoria con llibros pa 2u de Bachilleratu, amás de manuales pal profesoráu d’Infantil y d’Adultos. • Los centros, profesoráu y alumnáu, disponen de distintos materiales pedagóxicos como llibros de lliteratura infantil y xuvenil, llibros de sofitu didáuticu y metodolóxicu, diccionarios, páxines web y materiales multimedia. • Ampliación de los fondos bibliográficos d’asturianu nes biblioteques escolares. • Actividaes de sofitu a la enseñanza: conciertos didáuticos, teatru, conferencies.