Educación

El centru cultural de Ruenes, en Peñamellera Alta, ufierta un programa cultural abiertu a tolos interesaos. Tán programaos dellos cursinos, dedicaos a la Música Tradicional, col maestru músicu Eliseo Parra; Dirección de Cine p’actores y directores cola directora de cine María Ripoll; Fotografía dixital col maestru fotógrafu José María Esmorniáu y Novela y guión de teatru cola escritora Sara Rosemberg. Los detalles de los talleres pueden consultase na web http://tresendinarte.blogspot.com/

Tolos nicios apunten a que’l conseyeru d’Educación del Principáu, Herminio Sastre, va anunciar güei l’apertura d’una ufierta pública d’empléu docente na rexón de la que ya adelantare que pdoría ser de 120 places en declaraciones a los medios enantes de participar na sede de la Presidencia nun alcuentru colos trés alumnos ganadores de la fase autonómica de la XLVII Olimpiada Matemática Española de Bachilleratu. Sastre ya caltuviera ayeri en Mieres una postura non definitiva y dixo ser consciente de que la situación anterior camudó dafechu depués de que kles otres Comunidaes ficieran l’anuncia d’oposiciones.

La conseyera d’Alministraciones Públiques y vocera del gobiernu, Ana Rosa Migoya, tamién dizo esti miércoles pela mañana que l’Executivu asturianu ta estudiando la posibilidá de convocar les oposiciones de maestros d’infantil y primaria siempre que s’enmarque nun contestu xeneral nel que la mayoría de comunidaes convoquen oposiciones y que se cumpla la llei sobro la tasa de reposición.

Queda por saber si la convocatoria n’Asturies va céntrase namái en Primaria o tamién se va abrir la ufierta pública pa Secundaria, al ser ésti l’últimu añu del períodu transitoriu de APONDERAR, lo que ufre ciertes ventayes d’accesu a la plaza de funcionariu pa los profesores que yá exercen como interinos.

Coincidiendo cola celebración del Día internacional de la Llingua Materna, el sindicatu del asturianu del enseñu, SUATEA, denuncia que’l pasáu 4 de febreru tuvo llugar en Madrid, nel Ministeriu d’Educación, una de les últimes meses de negociación sectoriales d’Educación onde se trató’l proyectu de Real Decretu d’Especialidaes de Maestros, onde’l sindicatu propunxo un artículu njel que les llingües non oficiales, pero con especial protección, pudieren tener “reconocencia como especialidá docente”. A la fin esti articuláu nun s’aprobó pola mor de la opinión pidida al Gobiernu d’Asturies dende’l Ministeriu.

Según comenten dende SUATEA el representante del Ministeriu comentó a los presentes na mesa que depués de preguntar a Asturies (Gobiernu Asturianu), “esti nun quier la redacción propuesta por SUATEA; poro, quedará como proponía’l Ministeriu: ”Tendrán la consideración de especialidades del Cuerpo de Maestros, las propias de la lengua cooficial en aquellas Comunidades Autónomas que así lo tuvieran regulado”.

Anque esta redacción nun torgue que les llingües propies non cooficiales puean tener accesu a la Especialidá docente, SUATEA camienta que la so propuesta sedría “amañosa y facilmente la puerta a la reconocencia de la Especialidá de la Llingua Asturiana ensin nengún esfuerzu cooficializador, que tanto-y repuna y resquema al Gobiernu asturianu”. A esta ferramienta normativa amañosa que-yos apurrieron al Gobiernu asturianu compuestu por PSOE-IX, respuenden arrefundiándola. Pa sindicatu, que califica l’acción de “villana”, esta decisión demuestra dos coses: “- Que la responsabilidá de que nun haya Especialida de Llingua, por muncho que quieran engañar a la ciudadanía, ye del Gobiernu asturianu compuestu por PSÓE-IU; La falta de respetetu que-y tienen tanto a los derechos llaborales del profesoráu como a los derechos llingüísticos de la ciudadanía asturiano reconocíos na llexislación mundial, europea, española y asturiana”.

Posición de l’ALLA ente’l procesu de tramitación del Decretu d’Especialidaes de Maestros del Ministeriu d’Educación Como sabe la opinión pública asturiana y les fuerces polítiques parllamentaries de la Xunta Xeneral del Principáu d’Asturies, l’Academia de la Llingua Asturiana vien calteniendo cuantayá la necesidá de que’l profesoráu de Llingua Asturiana exerciente en centros públicos d’Educación Primaria y Secundaria cunte cola Especialidá Docente de Llingua Asturiana.

Nel comunicáu asoleyáu esti día, l’Academia diz que “tal especialidá ye la única garantía de qu’esti profesoráu pueda acceder, n’igualdá de condiciones que’l restu, a una estabilidá profesional pente medies de los pertinentes concursos d’oposición y treslláu. Ello significaría, al empar, un importante reblagu nel asitiamientu alministrativu del área de Llingua Asturiana dende’l puntu de vista organizativu y, mesmamente, dende la perspeutiva de la rentabilidá y axuste económicu nun momentu de crisis fonda como l’actual. Nun hai qu’escaecer, amás, que’l nivel de formación universitaria esixíu a esti profesoráu ye, agora y darréu de la puesta en práutica na Universidá de les directrices del Espaciu Européu d’Educación Superior (EEES), plenamente homologable al del restu de los coleutivos docentes”.

L’Academia desplica pormenorizadamente na so nota de prensa’l fechu de que’l Ministeriu d’Educación ta a puntu d’espublizar un nuevu Decretu d’Especialidaes pa Maestros nel que s’afita que “tendrán la consideranza d’especialidaes del cuerpu de Maestros les propies de la llingua co-oficial naquelles comunidaes autónomes qu’asina lo tuvieron reglao” y que “magar esti enunciáu nun torga les posibidaes llegales de la llingua asturiana (nada se diz a la escontra de les llingües non oficiales), el sindicatu de profesores STES (representáu en Madrid por Vicent Esteve) plantegó apocayá al ME na mesa sectorial d’Educación una enmienda al articuláu pa que les llingües non oficiales, pero con especial proteición y presencia curricular oficial, pudieren ser, tamién, reconocíes como “especialidá docente”. A lo que paez, la respuesta del Miguel Soler García (Direutor Xeneral de Formación Profesional del Ministeriu d’Educación) foi qu’ello nun yera necesario porque, puestos en contautu col Principáu d’Asturies, les autoridaes autonómiques asturianes refugaben esa especialidá”.

L’Academia de la Llingua Asturiana quería güei dexar perafitao que “de ser ello cierto, sedría un fechu gravísimu, non solo porque’l Gobiernu del Principáu d’Asturies taría faciendo una dexación ensin precedentes de les posibilidaes llegales de la enseñanza del asturianu, sinón tamién dende’l puntu de vista de les implicaciones que cinquen a la credibilidá del executivu asturianu, darréu que son xustamente los responsables educativos d’Asturies los qu’apregonen que tal especialidá nun pue facese porque “Madrid nun dexa”. L’Academia, nesti sen y como muérganu tutelar de los derechos llingüísticos de los asturianos, da anuncia de que solicitará un aconceyamientu urxente cola Conseyería d’Educación del Gobiernu del Principáu y treslladará la so posición a toles fuerces polítiques parllamentaries, entamando pola FSA-PSOE, encamentando a toes elles qu’estes cuestiones seyan teníes en cuenta a la hora d’ellaborar los respeutivos programes eleutorales col envís de qu’esta llamentable situación alcuentre definitiva solución con marcu llegal y alministrativu estable y non discriminatoriu.

El Bloque por Asturies quier güei 21 de febreru, coincidiendo col Día de la llingua materna declaráu nel añu 1999 pola UNESCO denunciar, que “por tercera Vez rechazóse na Xunta de Portavoces la propuesta pa que se discuta la creación de la Especialidá de Llingua Asturiana nesti Parlamentu. Esta ye otra demostración más del pactu que tienen amagostao’l Partido Popular, el PSOE y izquierda Unida-Los Verdes pa nun discutir nesta cámara d’ello, precisamente onde ta representada la soberanía popular de los asturianos y les asturianes”.

El tema de la Especialidá de Llingua Asturiana ye un puntu del pactu de gobiernu que se firmó nel 2009 y que, sigún afita el Bloque por Asturies, “visto lo visto’l PSOE y Izquierda Unida nun quieren cumplir cola ayuda cómpliz y fiel del Partido Popular cuando se trata d’atacar a la llingua asturiana”.

L’Asociación Asturiana de Pedagoxía (ASPE) organiza estos díes les III Xornaes sobre los ámbitos profesionales de la Pedagoxía, col fin de mostrar el trabayu que los titulaos y titulaes en pedagoxía tán faciendo en diferentes ámbitos.

Esti martes, 8 de febreru la sesión de la mañana empezará con trés “Talleres simultáneos” de diferentes temátiques y concluirá cola mesa de esperiencies “La Pedagogía en la Intervención Social”. Darréu tendrá llugar una “Comida Pedagógica” nel comedor de la Facultá na que cada persona que tea interesada en participar llevará dalgo pa compartir colos demás (la comida pue dexase nel comedor dende primer hora). Na sesión de la tarde tendrá llugar la tercera de les meses, “La Pedagogía en los Escenarios Virtuales” y una conferencia impartida por José Manuel Suárez, presidente de la Asociación Profesional de Pedagogos y Psicopedagogos de Galicia (APEGA).

Les xornaes organízales l’Asociación Asturiana de Pedagoxía (ASPE), cola collaboración de la Universidá d’Uviéu, el Departamentu de Ciencies de la Educación, la Facultá de Formación del Profesoráu y Educación y l’Asociación Llibre d’Estudiantes d’Educación.

El Conceyu Universitariu pol Asturianu (CUPA) abre’l plazu p’apuntase al so I Cursu Básicu d’Asturianu del CUPA, una esperiencia formativa qu’entama en collaboración cola Academia de la Llingua Asturiana y Caxa Rural y que va celebrase nel conceyu de Xixón ente marzu y mayu.

El cursu, que se va facer na sede del Conseyu de la Mocedá de Xixón (Avda. Manuel Llaneza 68), va entamar en marzu y va cuntar con 35 hores llectives. L’horariu que se plantega, a falta de apautalo colos alumnos, ye los llunes y miércoles de 19 a 21 hores.

El preciu de la inscripción ye de 25 euros, incluyendo los materiales necesarios pa llevar alantre’l cursu, como’l manual “Xeitu”, que va sirvir de guía pal cursu y qu’asoleyó l’Academia de la Llingua Asturiana.

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, hasta’l 27 de febreru de 2011.

Dende’l CUPA animen a participar nesti cursu “que va sirvir pa dar una conocencia básica y adaptada al nivel del alumnáu de la llingua asturiana”, deprendiendo les normes ortográfiques, vocabulariu y otres cuestiones, con unes clases “amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura asturianes”.

Asturies, “Centru Asturianu d’Educación Ambiental”, informa sobre los Cursos de Formación que, de xineru a mayu de 2011, ufierta nos sos equipamientos en Les Regueres.

El Programa Formativu va desenrrollase alredor de les siguientes árees d’estudiu: Naturaleza y Mediu Ambiente, Educación Ambiental y Sostenibilidá, Educación Física y Deporte, Ociu y Tiempu Llibre. Asina mesmu, informen de los Campamentos de Branu CEAM 2011. Los interesaos pueden llamar al teléfonu 651 839 149, al 985 799 046 o unviar un corréu a formacion@ceamasturias.com

Información de los cursos y campamentos

La Conseyería d’Educación y Ciencia convoca ayudes pa la financiación parcial d’un cursu de llingua inglesa nel estranxeru, destinaes a estudiantes matriculaos n’enseñances medies y universitaries.

El destín d’estes ayudes ye complementar la formación de los estudiantes na conocencia de la llingua inglesa por aciu l’asistencia a un cursu d’inglés intensivu nun país angloparlante.

La distribución de les places ye la siguiente: -14 places pa estudiantes matriculaos en 2.º cursu de Bachilleratu, Enseñances Artístiques Cimeres, 2.º cursu de Ciclos Formativos de grau cimeru de la Formación Profesional Inicial; y -60 places pa estudiantes matriculaos n’enseñances universitaries.

El plazu de presentación de solicitúes remata’l próximu 7 de febreru.

Bases completes de les ayudes

La Xunta pola Defensa de la Llingua Asturiana pon clas d’asturianu un añu más. El cursu entama’l xueves 27 de xineru, nel llocal uvieín de la organización, el Llar Solidariu, na cai La Gascona 12, baxu A. El cursu tien 60 hores de duración ónde los alumnos van poder deprender el bon usu del idioma tanto a nivel escritu como oral.

L’horariu va ser de 19:00 a 21:00 hores, los martes y xueves (horariu provisional hasta concretar cola xente matriculao). El preciu de la matrícula completa ye de 30 euros.

Les persones interesaes n’apuntase o consiguir más información pueden facelo nel llocal de la Xunta, n’horariu de tarde, o nel chigre de la Xunta, La Casa Posafuelles, asitiáu en La Cuesta la Vega 10, Uviéu. Tamién pel corréu: uvieu@exunta.org o llamando al 985 20 31 22 / 679 65 09 98 peles tardes.