Educación

Estos cursos, de nivel A1 d’asturianu cunten con venti places y van celebrase en Xixón, Uviéu y Avilés. Empobinaos a mayores de 17 años, tienen un preciu de 320 euros.

N’Uviéu los cursos van celebrase los llunes y miércoles, de 16:30 a 18:00 hores; en Xixón, dientro de la Cátedra Xovellano, los martes y xueves, de 19:30 a 21:00 hores, y n’Avilés, llunes y miércoles, de 18:00 a 19:30 hores. Toos ellos van entamar na selmana del 3 d’ochobre, rematando’l 31 de mayu de 2012, cuntando con 90 hores de docencia. La matricula tará abierta del 4 de xunetu al 16 de setiembre .

Yera una de les promeses que se ficieren nel momentu de crear la Casa de les Llingües de la Universidá d’Uviéu, en 2008, cola llegada del rector Vicente Gotor al gobiernu universitariu. Pero nun foi hasta agora, y dempués de delles protestes del Conceyu Universitariu pol Asturianu, cuando la nueva institución convocó cursos d’asturianu dientro de la so ufierta, qu’inclúi otres diez llingües pal cursu 2011-2012.

Más información sobre los cursos

La Conseyería d’Educación y la RTPA editen a comuña un llibru con dvd sobre’l programa de radio-teatru de la RPA “Nomes d’Asturies” destináu a les clases d’asturianu. Nesti dvd inclúinse nueve programes, seis pieces d’otros programes con actividaes de comprensión oral, una antoloxía poética y una biblioteca d’efectos sonoros. La obra ta coordinada por Chechu García, director del programa y maestru.

Xunto a él participó na realización del llibru un equipu de profesores de Secundaria formáu por Pablo Rodríguez Medina, Mercedes Tarano Fondón, Monserrat Fueyo, Xermán Fierro y Azucena Álvarez. L’equipu d’ilustradores ta formáu por Alfonso Zapico, David Fernández, Xulio Arbesú, David Fernán, Carolina Calleja y Miguel Angel Chayán. El montaxe sonoru ye de Lucía Menéndez Díaz-Palacio y el propiu Chechu García.

La presentación celebróse’l pasáu miércoles 29 de xunu, a les 18:00 nel palaciu de Toreno, na Plaza Porlier, cuntando cola presencia del Conseyeru d’Educación y dellos directivos de la RTPA.

El resultáu d’estes unidaes didáctiques ye frutu d’un análisis del espaciu radiofónicu “Nomes d’Asturies”, un programa de la RPA qu’usa la fórmula de radio-teatru. Dellos capítulos de “Nomes d’Asturies”, esbillaos pol so valir pedagóxicu y educativu, van ser la base pa crear les unidaes didáctiques qu’agora asoleyamos.

El llibru permite averar al alumnu al trabayu sobre una antoloxía poética, al estudiu de guiones de radio o al propiu mundu técnicu d’esti mediu, ente otres xeres.

Según Chechu García “estes unidaes didáctiques tenten de ser una ferramienta moderna, útil y prestosa cola qu’estudiantes y profesores puedan trabayar la llingua asturiana dende un mediu de comunicación de mases como ye la radio”.

El sindicatu SUATEA fizo llegar a los medios la denuncia de l’asociación de padres y madres del Colexu d’Educación Infantil y Primaria Tremañes, en Xixón. Esti centru escolarizó l’asignatura de Llingua Asturiana nel Segundu Ciclu d’Educación Infantil polo menos dende’l cursu 2002-2003 fasta’l cursu 2007-2008, incluyíos. Según espliquen los padres d’esti colexu “nos cursos 2008-2009 y 2009-2010 el Colexu caltuvo esta asignatura namás en Primaria, porque la Conseyería nun reconoció l’horariu suficiente pa que’l mayestru la materia la impartiese tamién n’Infantil”. Esti situación solucionárse nel cursu 2009-2010, “por fin, el Colexu pudo recuperar la normalidá nesti aspeutu, tornando impartirse Llingua Asturiana en toles estayes educatives; pa ello cuntó con una mayestra que compartía’l so horariu de trabayu col CEIP de Xove”.

El problema vien cola plantía anunciada pola Conseyería d’Educación pal cursu 2011-2012 que según espliquen “contempla un solu mayestru p’atender la escolarización d’asturianu en tres Colexos: Tremañes, Xove y Honesto Batalón”. De facese realidá esti endurecimientu les condiciones, los padres anuncien “qu’obligaría a qu’otra vuelta les families d’Educación Infantil de Tremañes nun puedan exercer el so drechu estatutariu a que los sos fíos cursen esta materia”.

Según estos mesmos padres “la Conseyería sabe perbién que la escolarización de la Llingua Asturiana en tola ufierta educativa del Centru (Infantil y Primaria) figura nos sos documentos oficiales (PEC, PXA) y que cunta col sofitu de tolos sos muérganos de gobiernu”, amás recuerden qu’esta escolarización “cuntó siempres col decidíu sofitu de tola Comunidá educativa y, cimeramente, col de les families, como amuesa’l fechu de que cuasi’l 100% del escolináu d’Educación Infantil curse davezu esta materia”.

Pa la organización de padres y madres d’esti colexu “los cambeos previstos na plantía pal prósimu cursu asitíense ñidiamente fora’l marcu llegal afitáu pa la escolarización de la nuesa llingua” yá que, recuerden, “la Llei 1/1998, de 23 de marzu, d’usu y promoción del Bable/Asturianu, nel so artículu 9, afita que’l Gobiernu asturianu “asegurará la enseñancia’l bable/asturianu y promoverá’l so usu nel sistema educativu”, mentres que l’artículu 10 diz que’l Gobiernu d’Asturies “garantizará l’enseñu’l bable/asturianu en toles estaes y graos”.

Amás ponen como exemplu la sentencia 1770/09 dictada, n’avientu de 2009, pol Tribunal Superior de Xusticia d’Asturies, que reconoció dafechamente que les enseñancies de Llingua Asturiana tán recoyíes nel currículu’l Segundu Ciclu d’Educación Infantil, reguláu pel vixente Decretu 85/2008, de 3 de setiembre (BOPA nu 212, del 11 de setiembre de 2008).

Dende l’asociación de padres y madres reconocen que’l CEIP Tremañes “cumplió cola so obligación d’ufrir a toles families d’Educación Infantil la opción de cursar estudios de Llingua Asturiana nesta estaya” y recuerden l’ésitu de la convocatoria “cuasi’l 100 % de les families optan voluntariamente por esa ufierta formativa”, polo que son munchos padres los que se ven “agravaos pol fechu de qu’unos años los sos fíos pueden estudiar esta materia y otros años la Conseyería d’Educación tórga-yos esi drechu, al ñega-yos el profesoráu necesariu”.

Califiquen esta situación de “grave” y piden a la Conseyería d’Educación que proceda a garantizar “el drechu que les nueses families tienen a que les sos fíes y fíos estudien asturianu en toles estayes educatives del CEIP Tremañes”. Pa garantizalo, afirmen “a l’Alministración abasta-y con asegurar un mayestru qu’imparta esta materia nos Colexos Tremañes y Xove”.

El Conceyu Universitariu pol Asturianu (CUPA) celebró la puesta en marcha de los cursos d’asturianu dientro de la Casa de les Llingües de la Universidá d’Uviéu. L’acción supón pa la organización universitaria “el cumplimientu d’unu de los puntos importantes de los alcuerdos ente l’equipu rectoral y el CUPA”.

El CUPA felicitó yá a la Directora de la Casa de les Llingües, Marta Mateo Martínez-Bartolomé y al propiu Rector pola puesta en marcha de la iniciativa y anima a tolos alumnos de la Universidá y al públicu en xeneral (al que tán abiertos estos cursos) a participar d’ellos.

Reglamentu de Doctoráu

En cuantes a otra de les reivindicaciones que tán nesti momentu en procesu, la cuestión del Reglamentu de Doctoráu, el CUPA anunció que va aconceyar col Rector a lo llargo de los próximos díes “pa conocer la solución definitiva que va dase al Reglamentu de Doctoráu, pa que permita la realización y presentación de tesis n’asturianu, lo que col borrador actual nun sedría posible”.

El Conceyu recuerda que “son cientos les persones que se sumaron a esta reclamación del Conceyu Universitariu pol Asturianu nos últimos díes, incluyendo a l’Academia de la Llingua Asturiana, partíos políticios, asociaciones…” y por ello tán seguros “de qu’hai un verdaderu consensu na sociedá asturiana pa que cambie esta situación de marxinalidá pa la llingua asturiana”. Una negativa que nos últimos años provocó enfretamientos ente la Universidá y los sos alumnos nos tribunales.

Yera una de les promeses que se ficieren nel momentu de crear la Casa de les Llingües de la Universidá d’Uviéu, en 2008, cola llegada del rector Vicente Gotor al gobiernu universitariu. Pero nun foi hasta agora, y dempués de delles protestes del Conceyu Universitariu pol Asturianu, cuando la nueva institución convocó cursos d’asturianu dientro de la so ufierta, qu’inclúi otres diez llingües pal cursu 2011-2012.

Estos cursos, de nivel A1 d’asturianu cunten con venti places y van celebrase en Xixón, Uviéu y Avilés. Empobinaos a mayores de 17 años, tienen un preciu de 320 euros.

N’Uviéu los cursos van celebrase los llunes y miércoles, de 16:30 a 18:00 hores; en Xixón, dientro de la Cátedra Xovellano, los martes y xueves, de 19:30 a 21:00 hores, y n’Avilés, llunes y miércoles, de 18:00 a 19:30 hores. Toos ellos van entamar na selmana del 3 d’ochobre, rematando’l 31 de mayu de 2012, cuntando con 90 hores de docencia. La matricula tará abierta del 4 de xunetu al 16 de setiembre .

Más información sobre los cursos

Esti xueves día 30 a les 20:00 hores tendrá llugar la conferencia Educación Llibre, a cargu de responsables de los proyectos La Escuelina y La Arboleda. Nella van dar a conocer qué ye la educación Llibre, les distintes formes d’educar y conocer los proyectos qu’anguaño tan furrulando n’Asturies n’esi sen. L’actividá sedrá nel Centru Social La Semeinte, na cai Eladio Jove de L’Entregu.

Ana Cano, presidenta de l’Academia de la Llingua Asturiana fadrá llegar a Vicente Gotor, Rector de la Universidá d’Uviéu, la posición de l’Academia de la Llingua Asturiana, nel sen d’afitar la posibilidá de que l’asturianu pueda emplegase con normalidá na redaición de tesis doctorales y qu’ello s’inxerte dientro del Reglamentu d’Estudios de Doctoráu, agora mesmo en discutiniu polos muérganos universitarios. La reivindicación de l’ALLA faise nel contestu de la petición fecha pol Conceyu Universitariu pol Asturianu pa que se camude la redacción d’esta normativa, nestos momentos en fase de cosulta pública.

Encontándose nel Artículu 6.2. de los Estatutos de la Universidá d’Uviéu que dicen que “La llingua asturiana sedrá oxetu d’estudiu, enseñanza ya investigación nos ámbitos que correspuendan. Asina mesmo, el so emplegu tendrá’l tratamientu qu’afiten l’Estatutu d’Autonomía y la llexislación complementaria, dándose seguranza de la non discriminación del que la emplegue”, l’ ALLA reclama que “l’asturianu s’allugue como llingua de redaición de tesis doctorales n’igualdá de condiciones que’l restu d’idiomes contemplaos”.

El CUPA reclama a la Universidá d’Uviéu una solución definitiva pa la presentación de tesis n’asturianu

La Universidá d’Uviéu prepara un nuevu Reglamentu d’Estudios de Doctoráu. Nel so borrador namás se recueye la posibilidá de presentar tesis en castellán y n’otres llingües oficiales de la Unión Europea, nesi casu con un permisu especial. El Conceyu Universitariu pol Asturianu (CUPA) acaba de presentar una reclamación formal pa que se camude la redacción del puntu 2.A del Artículu númberu 23 y el puntu 4 del Artículu númberu 27 d’esi Reglamentu, y que seya “llegal y normal” presentar tesis n’asturianu.

Dende’l Conceyu Universitariu pol Asturianu esixen al Rector de la Universidá d’Uviéu y al Vicerrector al que-y correspuende esta responsabilidiá que camude esta situación de marxinalidá que se crea pa la llingua asturiana y que vien causando dellos casos qu’enfrentaron a la Universidá d’Uviéu colos sos alumnos nos xulgaos, en llargos procesos llegales que podríen superase con una redacción afayadiza d’esti reglamentu.

Dende’l CUPA recuerden que si se camuda esta redacción “daráse solución definitiva” a la presentación de tesis n’asturianu. “D’esta forma tolos alumnos podrán escoyer ente presentar la so tesis n’asturianu o en castellán, ensin provocar perxuicios a nadie y permitiendo que se cumpla la llexislación vixente na Universidá d’Uviéu”, afirmen.

El CUPA basó la so reivindicación no afitao nos propios Estatutos de la Universidá d’Uviéu, que nel so Artículu 6.2 dicen que “La Llingua Asturiana va ser oxetu d’estudiu,enseñanza ya investigación nos ámbitos que correspuendan. Asinamesmu’l so usu va tener el tratamientu qu’establezan l’Estatutu d’Autonomía y la llexislación complementaria, garantizándose la non discriminación de quien la emplegue” Amás, recordaron el necesariu cumplimientu de la Llei d’Usu del Asturianu del añu 1998, que fai referencia a dellos drechos llingüísticos de los ciudadanos asturianos, diz que “Tolos ciudadanos tienen derechu a emplegar el bable/asturianu y a espresase nél, de pallabra y por escrito”.

Son munches les tesis que se vienen presentando n’asturianu a lo llargo de los venti años últimos y pal CUPA “ye’l momentu de recoyer esta posibilidá de forma llegal y normal”.

El CUPA pregúntase delles cuestiones: “¿Cómo puede ser llingua d’investigación si nun se permite’l so usu na ferramienta por escelencia d’investigación dientro d’una universidá, les tesis doctorales?, ¿cómo puede garantizase la non discriminación de quien emplegue l’asturianu si nun pueden usar l’asturianu pa redactar la so tesis?, ¿cómo puede quedar en manes d’un tribunal un derechu elemental ciudadanu a usar la llingua propia?” y pide a la Universidá d’Uviéu que’l Regalmentu s’espublice tamién en versión n’asturianu, “como se fizo col máximu reglamentu d’esta Universidá, los sos Estatutos”, recuerden, “de forma que los alumnos qu’usen l’asturianu pueden acceder al testu n’igualdá de condiciones”.

Reglamentu que reclama’l Conceyu Universitariu pol Asturianu:

El maestru de llingua asturiana del Colexu San Llorienzu de Xixón, Xesús Rodríguez Martínez, espublizó apocayá un llibru dixital de fiches didáctiques titulau “Ciencia y Filosofía n’asturianu” na revista @bareque (Conseyería d’Eduación/MEC/web educastur). La obra consiste nuna serie de testos espositivos escritos por él, gracies a los que’l so alumnáu de quintu y sestu de Primaria va familiarizándose con conceptos científicos y corrientes de pensamientu, n’asturianu.

La obra encuádrase dientro de lo que güei día se conoz como DICLE, esto ye, Deprendimientu Integráu de Conteníu a traviés de Llingües, magar que nesti casu nun seya estranxera. Amás de deprender vocabulariu específicu sobre estes cuestiones, l’alumnáu pue establecer un diálogu, un alderique, al rodiu diversos temes, deprender a exemplificar lleis, realizar esperimentos cenciellos, sacar conclusiones y comunicales, ye dicir, actuar d’alcuerdu al métodu científicu pa meyorar el so conocimientu del mediu que lu arrodia. Esta esbilla de testos formen parte del Plan de Llectura, Escritura ya Investigación del Área de Llingua Asturiana del centru del profesor que lu creó, al tiempu que pueden valir de sofitu pal trabayu en delles asignatures del curriculum del enseñu obligatoriu.

Xesús Rodríguez Martínez (Xixón, 1965) ye maestru de Llingua Asturiana n’Educación Primaria nel Colexu Concertáu San Llorienzu de Xixón dende l’añu 2006. Llicenciáu en Filosofía pola UNED, trabaya en procesos d’inmersión llingüística na aula dándo-y muncha importancia al desendolcu de xeres, adaptaes pa la etapa d’Educación Primaria, sobre la hestoria y la filosofía de la ciencia.

Pimer parte del llibru de fiches

El sindicuatu asturianu de la enseñanza, SUATEA dio anuncia güei de la so participación nel plenu del Conseyu Escolar del Estáu al traviés de la confederación STEs-Intersindical y la so conseyera Beatriz Quirós, el pasáu 2 de xunu, onde defenderon el patrimoniu llingüísticu asturianu “como en tolos foros onde participa SUATEA”, recuerden. Nesta ocasión el sindicatu consiguió que nel Informe sobre l’estáu y situación del sistema educativu del añu anterior, se faiga referencia y analís del enseñu de la llingua asturiana.

Como tolos años per estes feches el Conseyu Escolar del Estáu ellabora, aprueba y fai públicu esti informe nel que se dan datos sobre la situación de les llingües del estáu nel sistema educativu y datos d’escolarización nun separtáu que dende va años se nomaba “IV.2.10. Las lenguas oficiales en el sistema educativo” y onde se clasifiquen los datos d’escolarización que se dan de caúna d’elles en cuatro modelos llingüísticos según s’empleguen les llingües como instrumentu d’enseñanza y deprendimientu. Gracies a una enmienda de SUATEA aquel separtáu pasa a nomase “IV.2.10. Las lenguas oficiales y propias de las comunidades autónomas en el sistema educativo”, lo que supón, según SUATEA “un pasu alantre nel reconocimientu del nuestru patrimoniu llingüísticu qu’enantes nun se vía reflexáu nel epígrafe y agora algama’l mesmu estatus llingüísticu que les otres llingües”.

Anque nel informe yá se reconocía la esistencia del asturianu, nun se daba nengún datu sobre la so escolarización nin del tipu de modelu d’enseñu que se sigue n’Asturies. Agora inxértense los datos del usu del asturianu nel enseñu, qu’amuesen que’l 0% de los alumnos asturianos pueden estudiar materies distintes del asturianu na so propia llingua, yá que n’Asturies nun esiste un modelu billingüe d’enseñu. Amás, no que cinca a l’asignatura, los datos amuesen que’l 70’64% de los neños estudiaben asturianu en primaria y la ESO nel cursu 2009-2010, cuasi trés puntos menos que nel cursu anterior.

Suatea aprovecha estos datos pa denunciar lo que califiquen de “ruindᔠde la escolarización depués de más de 30 años de “promoción” obligada de la nuestra llingua pol Estatutu d’Autonomía. Amás, y énte la falta de datos oficiales globales en Bachiller y Educación Infantil recuerden que “s’alleguen al 0%”.