Educación

Nos últimos díes, espliquen dende la Xunta pola Defensa de la Llingua Asturiana, “tamos recibiendo munches quexes dende determinaos centros que tán intentando evitar la escolarización n’asignatura d’asturianu”. Ente estos centros alcuéntrase l’Institutu d’Enseñanza Secundaria Calderón de la Barca de Xixón, que con diferentes maniobres ta tratando que los alumnos de Bachilleratu queden ensin recibir les clases que quieren d’asturianu.

Dende la Xunta recuerden que la Llei 1/1998, de 23 de marzu, ye bien clara en, Artículu 10.1, que diz que l’asturianu tien que ser impartíu en tolos niveles y graos. Amás, pola Resolución de 16 de mayu de 2008, Artículu 5.1, que se refier a la ratio en Secundaria, anulóse por sentencia.

Dende la XDLA entienden que la Llei 1/1998 ye absolutamente clara: “garantizar el derechu del alumnáu en tolos niveles y graos educativos, independientemente del número de alumnos”, según cita de la propia sentencia.

Polo tanto esixen al centru educativu y a la Conseyería d’Educación “la solución inmediata d’esta situación, evitando facer dexación de funciones nesti periodu d’entamu de cursu”. La so inacción nestos casos supón una vulneración de los derechos llingüísticos de la ciudadanía asturiana recoyíos na llexislación vixente, recuerden.

L’anteproyectu de cambéu de la Llei Orgánica d’Educación que vieno acabante de presentar ayeri’l Ministru Wert ye pa SUATEA y la Confederación de STES-i una contrarreforma dafechu del actual sistema educativu, pretendiendo una educación segregadora, elitista, adoctrinadora, clasista, recentralizadora…, “buscando en definitiva un sistema educativu más propiu del franquismu que d’una sociedá moderna y plural que quier una enseñanza pública calidable, integradora, equitativa, laica, y pa toos y toes”.

Nun comunicáu adoleyáu pela mañana, SUATEA desplica que “menos profesoráu, más adoctrinamiento ideolóxicu y más segregación del alumnáu son les claves de la reforma educativa que se propón llevar alantre’l ministru d’Educación” enfotándose en poner en marcha “una autentica contrarreforma educativa que, per un sitiu, va suponer la llexitimación d’una política de retayos y, por otru, la reinstauración d’un modelu ideolóxicu d’escuela sesgado, clasista y segregador”.

Pa SUATEA “la contrarreforma propónse retayar les competencies de les Comunidaes autónomes en materia educativo al aumentar el porcentaxe de los conteníos mínimos qu’afita l’Estáu en tolos tramos educativos. Esti diseñu centralizador va na llínea recentralizadora del Estáu que promueven ciertos grupos de la derecha, tomando como escusa la crisis económica”. Amás, el sindicatu camienta que “el sistema educativu ponse al serviciu de les necesidaes de la empresa al promover la segregación temprana del alumnáu cola introducción d’itinerarios en función del so rendimientu académicu, y non de les necesidaes del alumnáu como persona y como ciudadanu”.

Los demás sindicatos mayoritarios de la educación n’Asturies como FETE-UXT y CCOO ya asolearon comunicaos estos díes nel mesmu sen de vuelta a la educación del franquismu.

La Universidá Popular de Xixón presenta una ufierta con 2.164 places y 6.089 hores formatives. Pa matriculase en cualesquier de los cursos ye imprescindible cuntar con tarxeta ciudadana -puede tramitase sobre la marcha- y númberu pin nos casos de matrícula en caxeros o Internet.

Puede facese hasta’l 5 d’ochobre n’horariu d’Oficines d’Atención Ciudadana de 9.00 a 17.00 h. Caxeros ciudadanos -n’horariu d’apertura del centru-. Internet 24 h.

Ente la ufierta, como cada añu, tará presente l’astrianu con un cursu básicu, de llunes a xueves, de 19:30 a 21:30, nel Vieyu Institutu Xovellanos.

Programa completu de cursos y talleres

El Rector de la Universidá d’Uviéu, la Presidenta de l’Academia de la Llingua Asturiana y l’Alcalde de Cangas del Narcea piesllen oficialmente’l programa d’actividaes de la Universidá Asturiana de Branu (UABRA). L’actu sedrá esti vienres 14 de setiembre, a les 19:00 hores, nel Paraninfu de la Universidá d’Uviéu, allugáu na cai San Francisco.

Nos cursos participaron más d’un centenar de persones nos niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, los Cursos d’Afondamientu Cultural y Llingüísticu Capacitación pa la Traducción al Asturianu, Internet y escuela. Nueves aplicaciones socioeducatives, Ecoloxía y Mediu Ambiente n’Asturies, Cantares, bailles ya instrumentos musicales asturianos y la segunda fase del Curso de Capacitación en Gallego-Asturiano.

A lo llargo del actu, que se fairá dafechu n’asturianu, intervendrán la Presidenta de l’Academia, Ana Mª Cano González, l’Alcalde de Cangas del Narcea, José Luis Fontaniella y el Rector de la Universidá d’Uviéu, Vicente Gotor.

El Rector de la Universidá d’Uviéu, la Presidenta de l’Academia de la Llingua Asturiana y l’Alcalde de Cangas del Narcea pesllaron oficialmente’l programa d’actividaes de la Universidá Asturiana de Branu (UABRA) con dellos discursos n’asturianu, nun actu nel que, nunos discursos dafechamente lleíos n’asturianu, quixeron dexar afitáu’l sofitu de les dos instituciones a la UABRA.

L’actu desenvolviose’l vienres 14 de setiembre, a les 19:20 hores, nel Paraninfu de la Universidá d’Uviéu, allugáu na cai San Francisco y entamó cola entraga diplomes de los cursos d’Esta Universidá de Branu, nos que participaron más d’un centenar de persones nos niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, los Cursos d’Afondamientu Cultural y Llingüísticu Capacitación pa la Traducción al Asturianu, Internet y escuela. Nueves aplicaciones socioeducatives, Ecoloxía y Mediu Ambiente n’Asturies, Cantares, bailles ya instrumentos musicales asturianos y la segunda fase del Curso de Capacitación en Gallego-Asturiano.

A lo llargo del actu, que se fizo dafechu n’asturianu, intervinieron la Presidenta de l’Academia, Ana Mª Cano González, l’Alcalde de Cangas del Narcea, José Luis Fontaniella y el Rector de la Universidá d’Uviéu, Vicente Gotor. Y tanto’l rector de la Universidá como l’alcalde dexaron bien nidiu’l sofitu de les dos instituciones que presiden a la UABRA nos años venideros

La Xunta pola Defensa de la Llingua Asturiana ta acabante anunciar el so pidimientu a la Conseyería d’Educación pa qu’esta informe a los centros educativos asturianos de la fin de la ratio mínima d’ocho alumnos pa formar grupu d’asturianu nes escueles ya institutos d’Asturies. Una midida forciada pola Tribunal Cimeru d’Asturies nel mes d’abril y pola que se reconoz la obligatoriedá de poner clas d’asturianu, anque seya namás un neñu quien lo pida.

Dende la Xunta espliquen que “Como yá critiquemos duramente nel so momentu, les autoridaes del Gobiernu asturianu, col per entós conseyeru Herminio Sastre a la cabeza, amosaron el so despreciu testerón pola llegalidá y les perres públiques cola presentación d’un recursu en casación que, como nun podía ser d’otra manera, acabó en confirmación de la sentencia y la condena a costes de l’Alministración asturiana”. La XDLA anuncia que tará sollerte al procesu de matriculación pa denunciar los casos nos que s’incumpla la llei.

La Conseyería d’Educación, Cultura y Deporte d’Asturies emitió la primer convocatoria d’aspirantes a interinidá de los cuerpos docentes. El númberu de places de personal eventual pal cursu 2013-2014 ye de 1.920. La ufierta pública puede consultase al traviés d’Internet dende la páxina web www.educastur.es.

Cola convocatoria d’esti, según pallabres de la Conseyería “significativu númberu de puestos”, la conseyera d’Educación, Ana González, asume la reivindicación sindical de sacar en primer convocatoria’l mayor númberu de places posibles.

El profesoráu tien la posibilidá de realizar los sos pidimientos al traviés d’Internet, en llugar d’utilizar el procedimientu tradicional de presentar l’impresu de solicitú nel rexistru habilitáu al efeuto. El plazu de pidimientos va enllargar hasta’l próximu 2 de setiembre.

Les places ufiertaes corresponder coles vacantes rexistraes nos centros educativos pal próximu cursu escolar, en función de los grupos esistentes.

Nun comunicáu fechu públicu esti día, SUATEA afita que “la convocatoria de places vacantes y non vacantes- ten de ser comparada con toles del pasáu cursu, siquier con toles que se realizaben davezu nel mes de setiembre”. Y darréu d’esto, “de les 1920 places qu’ayeri salieron publicaes, namái 1653 tienen calter de vacantes pa tol cursu. El restu respuenden a otru tipu de places que la so continuidá nun ta garantizada pa tol cursu”.

La Conseyería d’Educación, primida poles fuelgues, manifestaciones y movilizaciones del colectivu d’interinos y del profesoráu de la enseñanza pública, dio sigún SUATEA “nuna operación de maquillaxe, aplaudida por dalgunos, pola qu’apaecen na primer convocatoria les places correspondientes non yá a les vacantes esistentes nos centros educativos sinón tamién a places que nun son vacantes”.

Nes convocatories de principios del cursu pasáu convocáronse 2.377 places frente a les 1920 de l’actual convocatoria. La comparanza ye pertinente porque la Conseyería publicó nesta ocasión “toles places de toles enseñances y ella mesma reconoz que se sacaron la práctica totalidá de les places pal cursu próximu”.

Amás, sigún SUATEA, “apaecen nesta convocatoria les places correspondientes a Formación Profesional, Conservatorios, Escueles d’Idiomes, Centros de Persones Adultes, etc que davezu se convocaben mientres el mes de setiembre”.

SUATEA, n’analizando los datos de la convocatoria y considerando correctu que se convoque conxuntamente y al pirncipio de cursu’l mayor númberu de places de manera que tolos aspirantes puedan conocela, constata nesi comunicáu lo que vien darréu:

“N’educación infantil y primaria, el númberu de places convocáu ye de namá 933, de les cualos 240 son medies xornaes, de les cualos !!! 33 son itinerantes¡¡¡. El cursu pasáu convocárense nel mes de setiembre un total de 1026 places”.

“N’educación secundaria les places de les especialidaes comunes” sufrieron un retayu deriváu ensin dulda de l’ampliación de la xornada al conxuntu del profesoráu que les sos consecuencies van soportar tantu los IES como los demás centros d’Enseñances de Réxime Especial. Les medies xornaes algamen equí a 341, de les 987 places totales convocaes”.

El conceyu de Bimenes pondrá en marcha’l prósimu mes d’Ochobre un cursu de llingua asturiana, ufiertáu pola Fundación de Comarques Mineres (FUCOMI) dientro de la decimocuarta edición de la Universidá Popular de les Cuenques Mineres. Esti cursu va a llevase a cabu dende’l 9 d’ochobre, los martes de 16:30 a 19:30, con una duración total de 42 hores. De la mesma manera, el preciu d’inscripción ye de 74 euros.

El plazu d’inscripción entama’l 17 de Setiembre y va a allargase hasta’l día 28 del mesmu mes, n’horariu de 9:00 a 14:00 hores de llunes a vienres nel Ayuntamientu de Bimenes, En cuantes al llugar de realización del cursu, sedrá na casa de cultura de Santuyano.

La Conseyera d’Educación y Cultura, Ana González, comprometióse nel actu d’entamu d’inauguración oficial de la Universidá Asturiana de Branu (UABRA) a “regularizar al profesoráu d’asturianu, tanto de Primaria como de Secundaria” a lo llargo d’esta llexislatura, dempués d’una petición directa y pública de la Presidenta de l’Academia de la Llingua Asturiana, Ana Cano. Nun discursu que tuvo muncho de político y sentimental, al mesmu tiempu, la Conseyera recordó como llevara a los sos fíos a clases d’asturianu na escuela, y como ella mesma participare nos cursos de branu de l’ALLA nos años ochenta. La presidenta de l’Academia dixo “aguardar por meyores rellaciones” con esta nueva alministración, en comparanza col gobiernu saliente.

En cuantes a la regularización del profesoráu, la Conseyera esplico tar “convencida que l’añu qu’entra, que voi tar equí, taremos falando d’eso, porque igual tovía nun ta finao, pero podremos dicir que tamos dando los pasos necesarios pa regularizar al profesoráu d’asturianu, tanto de Primaria como de Secundaria”. La decisión ta nel gobiernu del estáu y tolos grupos parllamentarios amosaron la necesidá de que se dea esi cambiu, pero la decisión acumula un retrasu de décades.

Nel actu, celebráu nel Palaciu d’Omaña taben, amás de les citaes, el director de los cursos de la UABRA, Xosé Antón González Riaño; el vicerrector d’Estención Universitaria, Vicente Domínguez García; y l’alcalde de Cangas del Narcea, José Luis Fontaniella Fernández.