Educación

Dende’l sindicatu asturianu d’enseñu SUATEA quieren solidarizase cola situación del profesoráu d’asturianu y apoyar les iniciativas entamaes pola Academia de la Llingua Asturiana pa lo que convoquen al profesoráu de llingua asturiana a una asamblea que va facese el 15 de xineru a les 18:00 hores nel IES Aramo d’Uviéu, y onde, espliquen, “va informase de la nueva situación y van proponese midíes de llucha pa defender la nuestra Llingua y refugar dafechu la LOMCE”. Esti sindicatu yá manifestó la so oposición frontal énte una llei que consideren “retrógrada, segregadora, machista y privatizadora, que namás favorez a les patronales de la enseñanza privada y a la Ilesia Católica”.

Nel conceyu qu’hubo sobre la LOMCE, SUATEA manifestó-y a la Conseyera d’Educación “la urxencia de llantar la Especialidá de Llingua Asturiana, pa lo que cuenta con informes favorables tanto del Conseyu Escolar del Estáu como de la Universidá d’Uviéu como de la mayoría de los grupos parlamentarios de la Xunta Xeneral”.

“Esta midida nun garantizaría ella sola la pervivencia del asturianu y el gallego-asturianu nel enseñu de la nuesa comunidá autónoma, pero diba ser un reblagu de xigante nel so afitamientu y amosaría’l verdaderu interés del gobiernu asturianu en echar p’alantre esta demanda de la inmensa mayoría de la sociedá asturiana”, espliquen, al mesmu tiempu qu’añaden que “los incumplimientos reiteraos de la Llei d’Usu y les torgues a la enseñanza del asturianu y el gallego-asturiano fueron nefastos pal avance y l’afitamientu de la nuestra llingua”, añadiendo que “la única midida que pue blindar la enseñanza de la llingua ye la declaración d’oficialidá del asturianu”.

El día 19 aconceya otra vuelta nuevamente la Conferencia Sectorial de Educación y según SUATEA “habrá probablemente dalguna novedá nel Anteproyectu de Llei de la LOMCE”. Tamién el día 19 celébrense actos en defensa de les llingües del estáu énte l’ataque al so status y a los avances n’inmersión llingüística algamaos neses comunidaes.

Una rueda de prensa de la presidenta de l’Academia de la Llingua Asturiana (ALLA), Ana Cano, y l’encargáu de la estaya d’enseñu na mesma, Xosé Antón González Riaño, sirvió p’afitar la postura de la institución no que cinca a la nueva llei d’educación que prepara’l ministru José Ignacio Wert. Según denuncien dende l’ALLA, “tal y como ta redactada, l’asignatura d’asturianu quedaría nuna situación de total marxinación y en compentencia con llingües estranxares tamién en primaria”, fechu que yá asocede agora en secundaria, pesie a dir “en contra de la Llei de Promoción y Usu”, como esplicó Riaño.

Cano esplicó como nos dos bloques que se recueyen nel proyectu de llei, el d’asignatures troncales y el de específiques, caún d’ellos tendrá un 50% del horariu, pero “en nengún d’ellos se contempla l’enseñanu de llingua asturiana”. El problema ye que l’asturianu quedaría “a la voluntá de l’Alministración, y ensin nengún rangu de llei”, lo que supón un peligrosu pasu atrás pal futuru d’una asignatura que tien yá problemes a embute na so situación.

L’ALLA pide al Gobiernu d’Asturies y a tolos grupos políticos de la Xunta Xeneral “una defensa de los drechos llingüísticos de los asturianos”, daqué a lo que según esplicó Ana Cano “yá se comprometió” la conseyera d’Educación, Ana González pa próximes xuntes nel Ministeriu d’Educación.

Ana Cano va pidió yá un conceyu cola responsable del PP d’Asturies, Mercerdes Fernández, pa buscar la mediación d’esta énte’l gobiernu del so mesmu color, yá que según la presidenta de l’ALLA, los populares asturianos “son sensibles a esti asuntu”.

Llámase Daniel Prisacar tien siete años y lleva viviendo en Navelgas, Tinéu, dende va cuatro años y mediu, cuando la so familia vieno a vivir a Asturies dende Moldavia. Agora fala usa tan bien l’asturianu que ta acabante facese col primer premiu del concursu Cesar Feito qu’organiza’l Conceyu de Tinéu pa los escolinos de les sos escueles, al qu’esti añu los neños y neñes del conceyu presentaron 131 cuentos n’asturianu.

Amás recibieron premios los cuentos «Xuan, Pedro ya’l xeniu», de Daniel Peláez Rodríguez, de 12 años y «L’homín de coloráu», de Marta Fernández González, de 16 años. Entregaron los llotes de llibros colos que ta dotáu’l gallardón, la directora xeneral de Política Llingüística, Ana Fueyo Llaneza, l’alcalde de Tinéu, José Ramón Feito, y la Conceyala de Cultura ya Igualdá, Purificación Pla.

Esti xueves 22, a les 20:00 hores, la Casa los Alberti de Ciañu va recibir a la doctora en filoloxía románica y presidenta de l’Academia de la Llingua Asturiana Ana María Cano González que va poner la charra La Universidá d’Uviéu y la llingua asturiana. Esta charra enmárcase dientro de les III Xornaes Culturales De Castilletes y Carbón qu’organicen la Fundación Nuberu y l’Ayuntamientu de Llangréu. Trátase de la tercer edición d’una actividá de dinamización cultural qu’estes dos entidaes ponen en marcha como consecuencia del conveniu de collaboración firmáu ente elles. Esti xueves tamién va valir pa presentar la esposición Nuberu 30 años, yá llovió que, yá de forma permanente, va ponese tamién na Casa los Alberti de Ciañu.

De Castilletes y carbón, son unes xornaes culturales que xiren alredor de les interrellaciones ente mina, música, lliteratura, economía, gastronomía… que vienen desenvolviéndose los xueves d’esti mes de payares en Ciañu y van rematar col recital lliterariu Compañeru dame tira que, con guión y dirección de Chechu García, van poner los escritores Manuel Asur, Xurde Álvarez, Pablo Texón, Lurdes Álvarez, Henrique Facuriella, Xosé Ramón Martín Ardines y Roberto Corte. Va ponese’l ramu a estes xornaes con un conciertu de Nuberu nel Teatru L’Entregu’l 4 d’avientu, día de Santa Bárbara, patrona de la minería.

El Conceyu Universitariu pol Asturianu (CUPA) celebró esti martes 13 de payares nel Conseyu de Mocedá de Xixón, el so Ier Congresu, dempués de seis años d’actividá reinvindicativa na universidá asturiana. Nel congresu escoyóse una directiva nueva, encabezada pol nuevu Presidente, l’estudiante Borja González Cantora. Amás, entra a formar parte de la mesma, Eduardo Abad García, estudiante d’Hestoria na Universidá d’Uviéu, que va convertise en Vicepresidente de la organización. Nesti primer Congresu del CUPA, tomáronse amás decisiones estratéxiques de cara a los próximos años d’actividá de la organización. Ente les cuestiones más urxentes, “siguir medrando como organización, abrise a la collaboración con otres organizaciones del ámbitu de la reivindicación llingüística y trabayar pal cumplientu del Alcuerdu Programáticu pa la Política Llingüística na Universidá d’Uviéu (2012-2016), firmáu pol actual Rector, Vicente Gotor y pola so oponente Paz Andrés, na campaña”, y que, según espliquen “va permitir, en llevándose alantre, importantes avances pa la llingua asturiana na Universidá d’Uviéu, como la creación d’un llogotipu billingüe o d’un reglamentu de rotulación billingüe d’instalaciones”.

El periodista Inaciu Galán dexa la presidencia d’esta organización dempués de dirixila dende la fundación del colectivu en 2006 y de compatibilizala a lo llargo d’unos meses cola presidencia del colectivu Iniciativa pol Asturianu, pa la que foi escoyíu en febreru de 2012. Sicasí, va siguir venceyáu a esta organización siendo Vocal de rellaciones institucionales.

L’estudiante ya investigador Javier Cubero, hasta agora Vicepresidente del CUPA, va encargase agora de l’Ayalguería, cargu que na anterior directiva ocupada Isaac de la Arada, que dexa les sos responsabilidaes.

Ex Presidente y ex Vicepresidente esplicaron nel Congresu como queríen “que la so salida de los cargos sirviera pa permitir una anovación de la organización”. Sicasí, la so continuidá na directiva con cargos de menor responsabilidá correspuende según s’esplica na nota unviada pol CUPA a la so intención de “tresmitir la so esperiencia y collaborar col trespasu de responsabilidaes a nueves xeneraciones”.

El Conceyu Universitariu pol Asturianu (CUPA) ye una asociación abierta a los alumnos, personal docente y d’alministración y servicios de la Universidá d’Uviéu. Nun ta venceyada a nenguna corriente nin partíu políticu y tien como oxetivu afalar, al traviés del diálogu y los alcuerdos, la realización de polítiques progresives de normalización llingüística y cultural que permitan dignificar y promover la presencia de la llingua asturiana y la cultura d’Asturies en tolos ámbitos de la vida diaria de la universidá asturiana. El CUPA organiza amás cursos d’asturianu en collaboración cola Academia de la Llingua Asturiana y organizaciones como Iniciativa pol Asturianu.

El Conceyu Universitariu pol Asturianu (CUPA), Iniciativa pol Asturianu y l’Academia de la Llingua Asturiana (ALLA) van inaugurar la tercer edición del Cursu d’Asturianu en Xixón na tarde güei, martes 13 de payares, a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llanez 68, baxu), cola participación de los alumnos, el profesor del cursu, representantes del CUPA ya Iniciativa pol Asturianu, y un representante de l’Academia de la Llingua Asturiana, Pablo Xuan Manzano.

Dambes organizaciones valoren mui positivamente esta esperiencia formativa que s’entama per tercer ocasión en collaboración cola Academia de la Llingua Asturiana y que tuvo una perbona acoyida, con 27 alumnos inscritos, ente universitarios y ciudadanos de dellos conceyos d’Asturies, amás de persones de fuera del país. Xente interesao pol asturianu de Méxicu, Uruguái, Suiza o Xapón, ente otros llugares.

El cursu cunta con 35 hores llectives y va celebrase los martes y xueves, de 19 a 21 hores, parando pa les fiestes navidiegues y tornando en xineru. Pensáu pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, trabayando tamién cuestiones rellacionaes cola sociollingüística y la cultura d’Asturies.

Yá pue sentise’l quintu programa de radio “Iniciativa pol Asturianu nes ondes”, col que se difunden les actividaes de la organización y onde cada mes pueden sentise entrevistes con miembros d’Iniciativa pol Asturianu y persones d’otros colectivos pa conocer y aldericar alredor del asturianu y la so situación. Nesta ocasión, Samuel Gradín, director del programa, entrevista a María Díaz Suárez, maestra d’asturianu y Vocal d’Enseñu d’Iniciativa pol Asturianu.

Amás inclúise nesta ocasión la segunda parte de la entrevista cola Asociación de Trabayadores de Normalización Llingüística, con Penelope Miranda, del Serviciu de Normalización Llingüística de L.lena, y Arancha Prado, del SNL de la Mancomunidá del Cabu Peñes. Dambes dos formen parte de l’Asociación de Trabayadores de Normalización Llingüística, y fálennos nesta segunda parte de la entrevista del so llabor y de los problemes qu’atopen. La primer parte sintióse’l mes pasáu nel programa. María Díaz Suárez fala nesta entrevista del llabor d’Iniciativa pol Asturianu nel campu del enseñu, de la situación del asturianu nel sistema educativu asturianu y d’otres cuestiones venceyaes a esta cuestión de la que ye responsable na directiva de la organización.

Iniciativa pol Asturianu nes ondes ye un programa radiofónicu mensual que da anuncia de les actividaes de la organización. Dirixíu por Samuel Gradín, llocutor con llargos años d’esperiencia en medios como La Voz de Galicia o la RPA. A lo llargo de los alredor de sesenta minutos que dura caúna de les emisiones hai tiempu pa conocer les noticies del movimientu de reivindicación llingüística, entrevistes, música y hasta un pequeñu espaciu pa deprender asturianu.

El programa emítese en Radio Sele, Radio Ujo, AllerFM, Radio L.lena, Radio Kras, Radio Noreña, Radio Nava, Radio Alma (Bruseles)… y puede sentise tamién nes canales d’Iniciativa pol Asturianu n’Ivoox y YouTube.

Sentir el quintu programa d’Iniciativa pol Asturianu nes ondes

La Xunta pola Defensa de la Llingua Asturiana (XDLA) refuga dafechu los planes del ministru d’Educación, Cultura y Deporte, José Ignacio Wert, pa la futura Llei Orgánica que nel Gobiernu del PP llamen «de Meyora de la Calidá Educativa», que según la organización “va suponer tamién un ataque al enseñu de la llingua asturiana”. Nel anteproyectu, presentáu hai unes selmanes pol Ministeriu, cuéntase menguar la diversidá curricular n’enseñu primariu, quitar la optatividá na enseñanza secundaria obligatoria y facer desapaecer itinerarios formativos.

Esos recortes, amestaos a la mengua de l’autonomía de l’alministración educativa asturiana, que va pasar de poder decidir el 35% del currículum a namás el 25%, “puen ser la sida pal Gobiernu d’Asturies pa consumar un ataque más al enseñu del asturianu, si acasu’l más grave, porque vien de quien tenía que tar pa defendelu”, espliquen dende la XDLA.

“Ta en peligru’l futuru de la enseñanza de la llingua asturiana” porque, -espliquen- “nun hai que lo escaecer, l’asturianu nun cuenta cola protección que-y daría l’estatus d’oficialidá”. Y, pa enriba, amiesten “n’Asturies nin siquiera hai un Gobiernu qu’apueste pola promoción del usu y la tresmisión xeneracional del nuestru idioma”.

“La situación actual de la enseñanza del asturianu ta bien lloñe de ser ideal”, denuncien dende la Xunta, que recurda qu'”El PSOE fai gala de tar en contra de la oficialidá de la nuestra llingua, inorando que ye la protección llegal que necesita pa sobrevivir y pa reconocer los derechos llingüísticos de los y les falantes”.

Recuerden amás que la Conseyería d’Educación, Cultura y Deporte ta dirixida por Ana González, “que presume de nun falar nin escribir asturianu, fiel a los mandaos del so partíu”. “Y, anque se-yos enllena la boca prometiendo potenciar les posibilidaes de la llei d’usu y promoción del asturianu, siguen incumpliéndola sistemáticamente tamién en cuantes a educación: l’asturianu nun ta presente en tolos niveles educativos; nun se respeta la voluntá d’estudiar asturianu de tol alumnáu y de toles families que lo demanden; nun se reconoz la especialidá del profesoráu d’asturianu…”. En definitiva, espliquen dende la Xunta “tiense a la llingua asturiana nun situación de caos permanente y con un estatus d’inferioridá en comparanza con otres árees y asignatures”.

La Xunta esplica que “nun puen aprobar una llei que valga de ferramienta p’afondar nesa situación discriminatoria de la llingua asturiana na enseñanza”. Por eso, dicen “non a los recortes na educación y non a la llei Wert”.

La Universidá Pompeu Fabra de Barcelona, la Universidá de Xaén, la Universidá de Santiago de Compostela y la de Les Palmes son les qu’ufierten una información más tresparente nes sos web, según l’informe sobre les páxines web de les 50 principales universidaes públiques españoles, publicáu pola Fundación Compromisu y Tresparencia.

Esti “Exame de tresparencia” amuesa resultaos polo xeneral positivos, yá que más de la metá de les universidaes analizaes (66%) aprueben la evaluación. Anque se percibe un ampliu marxe de meyora n’árees relatives al claustru, a les resultancies o a la información económica.

Toles universidaes publiquen la so ufierta de títulos, el 98% la información sobre ayudes y beques y el 96% establez na web sistemes de comunicación col alumnáu. Na área de personal un 82% ufierta información sobre les distintes categoríes del personal contratáu. Sicasí, tan solo 17 (34%) dan información sobre les bandes salariales, solo’l 12% de les universidades lo fain sobre la formación y méritos del claustru, y nada mas qu’un 4% fai referencia a la nacionalidá de los sos docentes y denguna publica’l númberu de solicitúes de matrícules que se recibieron.

Informe completu del “Examen de Tresparencia” a les webs Universitaries

Un grupu de profesores de cuatro universidaes serbies visiten estos díes la Universidá d’Uviéu nel marcu d’unu de los programes Tempus nos que collabora la institución académica asturiana.

Los docentes, procedentes de les universidaes de Belgráu, Novi Sad, Kragujevac y Nis, van estudiar mientres esta selmana los itinerarios curriculares del Grau de Maestru n’Educación Primaria y tamién del Máster Universitariu en Formación del Profesoráu d’Educación Secundaria Obligatoria, Bachilleratu y Formación Profesional.

El programa TEMPUS nel que s’enmarca la visita, Harmonization and Modernization of the Curriculum for Primary Teacher Education, cuenta con un total de 13 universidaes ya instituciones educatives participantes.

El Rector de la Universidá d’Uviéu, Vicente Gotor, recibió a los docentes nel so despachu oficial y dio-yos la bienvenida. Gotor aprovechó la ocasión pa remarcar la importancia d’estrechar venceyos con universidaes europees p’ameyorar la proyección internacional de la institución académica asturiana.

Acompañaos pol vicerrector d’Estudiantes, Luis Rodríguez Muñiz, el profesores serbios visitaron la Facultá de Formación del Profesoráu y Educación y tamién les dependencies del Edificiu Hestóricu.