Educación

Según informaciones unviaes pol sindicatu SUATEA la nueva versión de la LOMCE, la Llei Wert, tien en cuenta la esistencia de la Llingua Asturiana. Les llingües non oficiales pero con reconocimientu xurídicu y presencia nel sistema educativu van poder siguir ufiertándose al alumnáu. Sicasi, dende SUATEA espliquen que “la nueva versión del anteproyectu de la llei d’educación nun especifica la forma en qu’esta ufierta pue llevase a cabo” y camienten que “agora ye competencia de la Conseyería asturiana configurar una presencia digna de la llingua en toles etapes educatives”. Reclamen otra vegada la oficialidá del asturianu y camientes que ye’l momentu “de llevar a cabu una promoción real del asturianu aplicando la llei d’usu, una llei que, por cierto, apenas establez un mínimu dignu pa un patrimoniu d’esta importancia”.

Dende’l sindicatu asturianu recuerden que “necesitamos siguir reivindicando una ufierta non discriminatoria, que nun suponga una competición con otres asignatures convirtiéndola nuna optativa de tercer orde na etapa de Primaria, pasando a sufrir lo que agora conocemos na ESO o nel Bachilleratu” ya insisten “tampoco podemos escaecenos de la criación de la especialidá, prometida dende fai munchu tiempu y que nun s’acaba d’establecer”.

Pa SUATEA ye necesario colocar al asturianu “onde-y correspuende dentro del sistema educativu, que la so presencia se faiga “oficial” tamién n’Infantil y que caminemos hacia’l so establecimiento como llingua vehicular na enseñanza”. Esto ye lo que califiquen como “una llucha pola dignidá de un pueblu que sufre a unos políticos ignorantes incapaces de valorar el tesoru llingüísticu que poseemos, trátase de facer ver que sí esiste una sociedá que reivindica la oficialidá de la que disfruten otres llingues del Estáu, y que ésta ye la única garantía de futuru pal Asturianu”.

Amás, la nueva versión de la LOMCE unviada pol Ministeriu d’Educación al Conseyu d’Estáu la selmana pasada introduz ente los principios básicos de la educación la llibertá d’enseñanza y de creación de centru docente. Pa SUATEA esta respuende a la esixencia “de los sectores más conservadores del PP y les patronales educatives ye una de les novedaes d’esti anteproyectu que s’incluyeron nel testu xunto con otres procedentes de les conversaciones coles distintes Conseyeríes d’Educación y de delles enmiendes aprobaes nel Conseyu Escolar del Estáu”.

SUATEA, al traviés de los STEs-i, personámonos ante’l Conseyu d’Estáu, constatando qu’el MEC “nun unviara’l votu particular de la nuestra organización nin los del restu d’organizaciones emitíos nel Conseyu Escolar”. Entiendes que se trata “d’un intentu d’ocultar al Conseyu d’Estáu’l refugu mayoritariu de la comunidá educativa a una Llei segregadora, discriminadora, qu’instaura la xestión empresarial nos centros y que concibe la educación como un negociu nel que les patronales son llibres pa escoyer al so alumnáu a la par que se depaupera y definancia la enseñanza pública”. Por ello dende SUATEA siguen cola campaña informativa y la propuesta de incrementar les movilizaciones a tola comunidá educativa.

El día 31 de xineru pasáu Ástura presentó en rexistru de Llamaquique d’Uvieu un escritu solicitando l’aplicación, na Conseyería d’Educación, de los decretos de toponimia publicaos hasta la fecha. Dende la organización afirmen que “ye constatable qu’esta y otres conseyeríes nun empleen los nomes oficializaos y utilicen sistemáticamente los anteriores yá derogaos”.

Nel documentu presentáu manifesten “que ye inaceptable l’incumplimientu de la llegalidá vixente per parte de la Alministración que la afitó”, y soliciten “qu’escomiecen, de forma inmediata, a usar la toponimia na so forma correcta”.

Gaspar Llamazares, diputáu d’IX d’Asturies, entruga per escritu al Gobiernu de Rajoy si piensa incorporar les asignatures d’especialidá nel casu de les comunidaes autónomes como Asturies, con llingua propia non cooficial pero con reconocencia xurídica ya implantación curricular, la llingua asturiana o cultura asturiana. Esta entruga, rexistrada’l pasáu 25 de xineru, enmarcar nel discutiniu LOMCE o la Llei Wert que “non yá supon un retrocesu en cuanto al oxetivu d’una enseñanza pública, laica y calidable, sinón qu’amuesa un prexuiciu frente a les llingües cooficiales o ignora a aquelles, como l’asturianu, oxetu d’especial protección y promoción estatutaries y lexislatives (Llei d’Usu del asturianu de 1998).

Llamazares considera qu’incorporar la llingua asturiana a les asignatures d’especialidá nel casu d’Asturies, garantizaría la protección de la situación actual de l’asignatura de llingua asturiana, al par que la continuidá na organización de les árees y asignatures.

La Conseyería d’Educación, Cultura y Deporte, al traviés de la Dirección Xeneral de Política Llingüística, organiza, en collaboración cola Asesoría d’Enseñances de Llingua Asturiana y siguiendo coles iniciatives d’usu, promoción llingüística y apoyu al llabor educativu, l’Axenda Didáctica Escolar.

L’oxetivu ye averar la lliteratura, el teatru y la música asturiana al públicu más mozu de la mano d’escritores, actores y músicos de l’actualidá asturiana. Toes estes actividaes, unes n’asturianu y otres en gallego-asturianu, van dirixíes a los alumnos y alumnes de los centros educativos d’Educación Primaria, Secundaria y Bachiller nos que simparte Llingua Asturiana o Gallego-Asturianu.

Pa la participación de les entidaes y de los centros educativos establécense unes normes que pueden consultase na web de la Conseyería.

Documentos pa participar y ufierta

El Movimientu Social pola Escuela Pública y la Marea Asturverde organiza una concentración contra los conciertos educativos esti miércoles 6 de febreru a les cinco la tarde na Plaza Porlier d’Uviéu. Dende estes organizaciones ven la situación actual como “inadmisible” y ven necesario eliminar los conciertos n’educación infantil y facer lo mesmos con aquellos que dixebren a los alumnos por mor del sexu, amás de facer una progresiva eliminación d’unidaes concertaes, amás de reducir les asignaciones económiques a estos centros.

El sindicatu del enseñu SUATEA presentó una serie d’enmiendes nel Conseyu Escolar d’Asturies nel sentíu de que la nueva normativa asturiana de conciertos acute totalmente los conciertos n’infantil, yá que la planificación educativa depende tovía del gobiernu asturianu. Pal sindicatu “tien d’aprovechase esi requexu de la LOE pa esaniciar esi marafundiu públicu y criar places abondes nes Escueles Públiques”.

Tocante a los conciertos nos centros que segreguen al alumnáu por xéneru, pa esti sindicatu asturianau “tienen de ser evitaos de toes toes na normativa asturiana”. Por ello, nes enmiendes presentaes desixen que se menten esplícitamente les sentencies que sofitaríen esti resolvimientu de nun concertar los centros segregadores, “de manera que nun hebia posibilidaes pa dichos centros de recurrir esti ResolvimientuW, espliquen.

Señalen que na propuesta de plantilles pal próximu cursu, qu’estos díes unvióse a los centros educativos públicos, contempla –denuncien- “un nuevu amenorgamientu de puestos de trabayu y un amenorgamientu, polo tanto, del empléu na enseñanza pública asturiana”. Pa SUATEA “esto ye inaceptable mientres se caltien la subvención a los centros privaos per aciu de los conciertos educativos”.

Iniciativa pol Asturianu súmase esti xueves a la manifestación convocada polos sindicatos del enseñu contra la LOMCE, nomada Llei Wert. La organización amuesa la so postura contraria a esta llei que podría acabar cola presencia del asturianu nel sistema educativu. Dende la Vocalía d’Enseñu d’Iniciativa pol Asturianu la organización vien sumándose a les movilizaciones organizaes polos docentes de llingua asturiana pa lluchar contra la desapaición de l’asignatura del sistema educativu y esti xueves 7 de febreru, n’Uviéu, volverá a sumase a los actos reivindicativos.

La organización fai un llamáu a los sos asociaos y a tola sociedá a sumase a la manifestación y a toles campañes entamaes na defensa de la llingua asturiana nes escueles. Pa Iniciativa pol Asturianu hai dos coses clares nesti ámbitu: “en primer lluguar, l’asturianu ha ser una asignatura pa tolos alumnos, una asignatura normal, non una optativa, nin voluntaria, non enfrentada a otres materies”. Y en segundu llugar, creen necesario “dar pasos pa que l’asturianu se convierta na llingua vehicular d’otres asignatures, buscando un modelu afayadizu p’Asturies que permita que l’asturianu seya llingua d’usu habitual nes aules”.

Espliquen que la Llei en cuestión vien del estáu central, pero afirmen que tampoco tán contentos cola postura del Gobiernu d’Asturies,”que pa solucionar daveres esti problema namás tendría d’oficilizar l’asturianu, pero niégase”.

Esti xueves los docentes de l’asignatura d’asturianu y gallego-astruianu tuvieron nel Rexistru del Gobiernu d’Asturies, n’Uviéu, pa entregar les más de 2.100 cartes que los neños que cursen esta asignatura escribieron per tola país pa pidir a la Conseyera d’Educación y Cultura, Ana González, que l’asturianu siga teniendo’l so espaciu nel programa d’estudios. Amás, entregáronse diez resolucione de claustros escolares que s’amosaron a favor d’esta reivindicación que lleva más de 2.500 apoyos na páxina web onde se recueyen.

Nes cartes, los neños amuesen el so amor pol asturianu y piden que a la Conseyera que defienda l’asturianu frente a la Llei Wert, que podría sacar al asturianu de les aules.

Xunta a les cartes de los neños, los docentes, que tuvieron a les puertes del Rexistru concentraos, entregaron un documentu nel qu’esplicaben les razones d’esta campaña.

Mañana xueves 31 de xineru a les 18:00 hores, el profesoráu de l’asignatura de Llingua Asturiana va presentar de forma conxunta un escritu énte’l Rexistru Xeneral del Gobiernu d’Asturies nel que se solicita a la Conseyera d’Educación que ponga la especialidá de la Llingua Asturiana y promueva la declaración d’oficialidá de la mesma. Dende esti colectivu considérase que ye “l’únicu mediu que garantizaría la presencia del asturianu nel sistema educativu depués de la reforma de la LOMCE y qu’acabaría col estatus de segundu orde que padez”.

Esti escritu lleva con él cientos de cartes feches pol alumnáu nes que manifiesten la so esmolición y la so opinión sobre l’asturianu y el so futuru. Según espliquen dende’l colectivu de profesores “preténdese con elles amosar un exemplu del sentir de parte de la sociedá asturiana que nun ve reconocíos dalgunos de los sos drechos fundamentales”. Col actu de mañana aguarden que toles persones esmolecíes por esta situación los acompañen a les puertes del Rexistru Xeneral, nos edificiones de Llamaquique, n’Uviéu.

El pasáu xueves 17 de xineru, la Conseyera d’Educación, Ana González, manifestaba que llegare a un alcuerdu col Ministeriu d’Educación pol que na LOMCE figurará la llingua asturiana como asignatura d’obligada ufierta. Dende la Corriente Sindical d’Izquierda recuerden que l’asignatura de Llingua asturiana y Gallego-asturianu “yá ye d’obligada ufierta nos centros escolares asturianos, acordies colo dispuesto na Llei d’usu y promoción del asturianu” y denuncien que “les pallabres de la conseyera nun esclarien nada sobre’l futuru de l’asignatura”, al nun concretar cómo se va a inxertar ésta na reforma educativa.

Pa la CSI “les espectatives son preocupantes” y camiente que se pue tar “énte un empeoramientu grave de les condiciones: convertiéndose nuna asignatura optativa (ensin alternativa), compitiendo en condiciones d’inferioridá cola Educación Artística y una segunda llingua estranxera, ye dicir, a como ta anguaño en Secundaira, mientres qu’en Secundaria podría dase’l casu de que l’asturianu compitiese con munches más asignatures de que lo fai agora; el pesu curricular podría amenorgase con una carga horaria entá menor que l’actual”.

Critiquen tamién que la conseyera “tampoco fai nenguna referencia a la situación llaboral de los docentes d’asturianu y gallego-asturianu, nin a la creación de la especialidá”, recordando que los docentes que lleven “trenta años de precariedá absoluta” y denunciando qu’agora “nun cuenten con nengún tipu d’información sobre esti procesu de reforma por parte de la Conseyería y muncho menos foron consultaos sobre’l mesmu”.

Dende la Corriente esixen que la Conseyería d’Educación “subsane les actuales deficiencies que sufre la enseñanza de la llingua asturiana y que garantice’l derechu a la conocencia del asturianu qu’establez l’Estatutu d’Autonomía d’Asturies, y que la Llei d’Usu y Promoción del Asturianu desenrrolla garantizando la voluntariedá de la mesma, ensin tener que competir con nenguna otra asignatura”.

Amuesen tamién el so sofitu a l’Asamblea de docentes de llingua asturiana y gallego-asturianu y a les campañes que tienen en marcha, recorando a les alministraciones que la meyor solución pa resolver esta cuestión de la manera más cenciella y lóxica “ye la declaración d’oficialidá del asturianu”.