Educación

Esti xueves 18 d’abril la Universidá d’Uviéu abre’l plazu pa preinscribise nel Máster de Profesoráu pa secundaria, bachilleratu y FP. Nel mesmu pue acceder cualerquier persona que tengan un títulu universitariu oficial de graduáu o llicenciáu. Amás, ha demostrase dominiu d’una llingua estranxera nel nivel B1 del Marcu Común Européu de Referencia de les Llingües. Nel casu de que’l títulu nun se correspuenda cola especialidá deseada, l’estudiante tendrá de superar una prueba d’accesu al Máster o acreditar superar 60 creitos de conteníos propios de la especialidá a la que quier aportase. La especialidá d’asturianu convócase esti añu con cinco places.

El Máster va impartise nel cursu 2013-2014, n’horariu de tarde, incluyendo práctiques n’institutos nes mañanes del segundu semestre, en 2014. Ente los profesores de les asignatures de la especialidá d’asturianu tán Ramón d’Andrés y Xosé Antón González Riaño.

El Máster capacita y da cumplimientu a lo establecío na Llei Orgánica 2/2006, de 3 de mayu, d’Educación (APONDERE) qu’esixe, pa impartir la enseñanza nos niveles y etapes d’educación secundaria, amás de la titulación de Llicenciáu, Inxenieru o Arquiteutu o títulu de grau equivalente, la formación pedagóxica y didáctica de nivel de posgráu.

Esti máster constitúi un requisitu pal accesu a la función docente nos niveles de secundaria obligatoria, bachilleratu y formación profesional. Asina, la realización d’esti Máster ye la vía única p’aportar a ser profesor de secundaria y de bachilleratu tantu en centros públicos como privaos.

El plazu de la preinscripción tará abiertu hasta’l 14 de xunu.

Información completa del máster

Un representante d’Iniciativa pol Asturianu entregó’l pasáu mes de febreru una carta nel llar del Ministeriu d’Educación en Madrid. El Ministru Wert unvia agora una carta a la organización asturiana na que confirma que cola disposición adicional trixésima octava de la cabera versión del antreproyectu de la LOMCE, la conocida como “Llei Wert”, “la situación de la llingua asturiana nos centros educativos queda en manes del Gobiernu d’Asturies”.

Esta ye la redacción del mesmu:

“6. Aquellas Comunidades Autónomas en las que existan lenguas no oficiales que gocen de protección legal las ofertarán, en su caso, en el bloque de asignaturas de libre configuración autonómica, en los términos gue determine su normativa reguladora. “

Iniciativa pol Asturianu vuelve a recordar al Gobiernu d’Asturies “la necesidá de siguir avanzando na presencia del asturianu nes escueles ya institutos”. La solución ideal ye pa esta organizción “la oficialidá del asturianu y la correspondiente normativa”, pero espliquen que mientres “ye necesario avanzar y que s’introduza l’asturianu como llingua vehicular nes escueles, pelo menos en dalgunes asignatures, asina como facer de l’asignatura d’asturianu, una asignatura xeneral, normal, que compartan tolos alumnos asturianos, y non una asignatura que vive n’absoluta precariedá, como hasta agora”.

En cuantes a la solicitú fecha por Iniciativa de que la páxina del Ministeriu d’Eduación use l’asturianu, como usa les llingües oficiales del estáu, el Gabinete del Ministru nun descartó la posibilidá que dexa agora en manes de la Subsecretaría del Ministeriu. Pa Iniciativa pol Asturianu ye importante “esti tipu de presencia del idioma, que supón da-y cierta normalidá na aliministración, yá qu’agora la llingua asturiana ta marxinada con respectu al restu de llingües del estáu”, recuerden.

Carta completa del Ministeriu

Dempués de la denuncia fecha pol CUPA ayeri, la organización universitaria esplica nuna nota que “tres conversaciones de representantes del Conceyu Universitariu pol Asturianu (CUPA) col Rector, Vicente Gotor Santamaría, y el Vicerrector d’Informática, Víctor Guillermo García, el problema cola páxina web paez solucionáu”, yá que’l Recto dixo que namás se debía a “un retrasu na torna de los testos al asturianu”. El CUPA espresó’l so maltar al ver que la páxina web nueva de la Universidá d’Uviéu nun incluyía yá versión n’asturianu, y anque ve como una bona noticia saber qu’esto ye namás frutu d’un retrasu de la traducción, según les esplicaciones del propiu equipu rectoral, entienden que “nun ye escusa pa una institución de tal tamañu y recursos, pues la versión n’inglés, por exemplu, ta yá dende’l primer día”.

Sicasí, entienden que ye una bona noticia saber que la nueva web tamién va incluyir versión n’asturianu, “daqué perimportante pa la visibilidá del idioma na Universidá y na sociedá asturiana”. Un pasu alantre que se consiguió por fin nel añu 2010 y qu’aguarden qu’en pocos díes pueda tener continuidá na páxina actual.

El CUPA pidió yá aconceyar col equipu rectoral pa siguir avanzando n’otres midíes de muncha importancia pal futuru de la llingua asturiana na institución, como la rotulación billingüe de los edificios universitarios o la creación d’un logotipu col nome de la Universidá nes dos llingües, castellán y asturianu.

El Conceyu Universitariu pol Asturianu (CUPA) amosó al traviés d’una nota de prensa’l so descontentu pola apaición d’una nueva páxina web de la Universidá d’Uviéu (www.uniovi.es) con versión namás en castellán ya inglés, “cuando dende l’añu 2010 la páxina de la universidá asturiana tenía una versión na llingua propia d’Asturies, que foi mui bien recibida pola comunidá universitaria”, según afirmen dende’l CUPA. Represenantes del CUPA yá solicitaron esplicaciones y esperen respuesta del Rector Vicente Gotor y del Vicerrector d’Informática, Víctor Guillermo García.

“Aguardamos que se trate d’una situación temporal y que la páxina cunte con versión n’asturianu en pocu tiempu”, espliquen dende la organización, que tamién denuncia que “lo contrario sedría dar un pasu atrás mui importante y contrariu a los alcuerdos algamaos pol Rector nes pasaes elecciones, onde se comprometió a afondar na normalización y usu del asturianu dientro de la institución”.

El CUPA aprovechó pa recordar qu’entá “queden munchos compromisos por cumplir, ente los que tán el dotar a la Universidá d’Uviéu d’un logotipu billingüe (castellán/asturianu) y redactar un reglamentu que disponga la rotulación n’asturianu de toles instalaciones, ente otres cuestiones de vital importancia pal idioma na Universidá” y que según espliquen “el Rector Vicente Gotor robló col CUPA nel Alcuerdu Programáticu de Política Llingüística na Universidá d’Uviéu, pal periodu actual”.

Francisco Fernández-Guisasola ye médicu y homeópata, pero tola vida tuvo mui interesáu pol campu de les humanidaes. Ye por ello que ta tituláu en gaita, fala unes cuantes llingües amás de la de so, l’asturianu, y tien participao en congresos y estudiando la medicina popular asturiana y como la llingua asturiana define esti campu. Ye collaborador habitual de Lletres Asturianes, la revista de l’Academia de la Llingua Asturiana.

Esti vienres 22 de marzu a les 12 la mañana, l’Aula Magna de la Facultá d’Odontoloxía, asitiada n’El Cristo, na cai Catedráticu José Serrano e/n, Uviéu -detrás de la Facultá de Medicina, va acoyer la defensa de la so tesis “La Medicina Popular a través de la Lengua Asturiana”.

Amás, esti trabayu lleva arreyaos un Diccionariu Mélicu Alfabéticu Asturianu-Castellanu, un Diccionariu Mélicu Temáticu Asturianu-Castellanu y un Diccionariu Mélicu Paremiolóxicu Asturianu.

Esti xueves 14 de marzu celebróse un conceyu que l’Asamblea de Docentes de Llingua Asturiana y Gallego-Asturiano “pidiere cuantayá” a la conseyera d’Educación Ana González. Al conceyu asistieron cinco persones en nome de l’asamblea y per parte de la Conseyería, amás de la propia conseyera, l’asesor en materia de Llingua Asturiana. L’asambel diz que “foron too bones palabres”. Comenten que la conseyera entamó reconociendo que, “depués del tercer anteproyectu de la llamada Llei Wert, la pelota ta en teyáu del Gobiernu del Principáu d’Asturies”. La voluntá de la so conseyería, afirmó, ye dexar l’asturianu “polo menos como taba hasta agora”, y cumpliendo la Llei d’Usu.

Dende l’Asamblea, amás de sorrayar que la situación actual “ye frutu de l’ausencia d’oficialidá del asturianu”, cosa qu’afirmen, la Conseyera “almitió pero diciendo tamién que d’eso nada”. Los docentes ficiéron-y llegar les reivindicaciones que yá plantegaren nel so momentu na asamblea. A llargo’l conceyu “tomó nota de tolo que-y diximos, y comprometer, comprometióse a poco, anque concretóse más nel tema d’Educación Infantil, no que toca a la so xeneralización”, espliquen. Amás reiteró’l compromisu nesta llexislatura en sacar alantre la especialidá. Sobre’l problema de les ratios que se apliquen nos institutos “quedó en dexalo reflexao na circular d’iniciu de cursu, clarificando que nun se puen aplicar nel casu del asturianu”.

De coses como l’asturianu como llingua vehicular, la criación de departamentos didácticos nos IES, la non segregación del alumnáu, la presencia na PAU, etc. los docentes espliquen que “tomó nota pero nun concretó nada, anque de la segregación del alumnáu sí desplicó que nun conocía esi datu y que-y paecía interesante, yá que ta mui sensibilizada con esi tema”.

Faló tamién de cómo la LOMCE diba suponer un “revolcón curricular” y qu’había que ver en qué midida diba afectar al currículu asturianu, que, según ella, “ye bien curiosu”. De toes maneres, comentó tamién que diba ser el propiu desendolque de la futura llei a nivel autonómicu el que podría valir pa fixar el profesoráu, tanto d’asturianu como de les demás materies.

En definitiva, pa l’Asamblea fueron too “bones pallabres qu’habrá que ver en qué se concreten”. Tamién-yos dixo a los docentes que “nun esperaren “una revolución” nesi tema”. L’Asamble tien claro que “la so capacidá de presión y movilización la que sirva pa obligar a l’alministración a mover ficha nesti tema, como en tantos otros”.

Documentu entregáu a la Conseyera

Dende’l Conceyu Universitariu pol Asturianu (CUPA), ficieron llegar “l’apoyu más firme al coleutivu de docentes d’asturianu énte la delicada situación que tán atravesando nestos momentos a causa del proyeutu de reforma de la llei educativa (LOMCE)”, plantegáu pol gobiernu estatal a traviés del ministru Wert, que, afirmen “podría suponer un ataque a la llingua asturiana, yá que dexa en manes de la voluntá política la situación del idioma nes escueles”.

Entienden que ye necesario también que la Universidá d’Uviéu “muestre’l so apoyu decidíu a esti coleutivu y defenda’l futuru profesional de los docentes que forma, si tenemos en cuenta el perxuiciu llaboral que supondría la desapaición del asturianu de la enseñanza, fechu qu’afeutaría a unos 230 docentes que, amás, atópense nuna situación de precariedá o interinidá”. Tamién insten al actual gobiernu autonómicu a que “s’esmolezca en facer suyes les demandes d’esti coleutivu y de tolos asturianos en xeneral, ya qu’entendemos que munchos mecanismos pa tratar de da-y igua a esti conflictu, defender la aplicación de la Llei d’Usu y Promoción del asturianu, y avanzar hacia’l so reconocimientu como llingua oficial pueden dase dende Asturies”.

Finalmente, tamién dende l’ámbitu universitariu remarquen que, “en primer llugar, l’asturianu ha ser una asignatura pa tolos alumnos, una asignatura normal, non una optativa, nin voluntaria, non enfrentada a otres materies”. Y en segundu llugar, “que ye necesario que se dean pasos pa que l’asturianu se convierta nel idioma vehicular d’otres asignatures, buscando un modelu afayadizu p’Asturies que permita que l’asturianu seya llingua d’usu habitual nes aules, amás de poder ufiertase como oxetu d’estudiu particular ya individualizáu na universidá mediante les preceptives ferramientes académiques”. Pa ello, recuerden, “ye bien importante la reconocencia de la especialidá del profesoráu d’asturianu, agora que los estudios tán homologaos dafechu nel marcu européu”.

El CUPA pidió al Rector un posicionamientu claru de la Universidá d’Uviéu, recordándo-y al traviés d’una carta los sos compromisos adquiríos dientro del Alcuerdu Programáticu pa la Política Llingüística (2012-2016) firmáu pol Rector Vicente Gotor na última campaña, nel que se comprometía “a facer llegar al Gobiernu d’España la reclamación de la reconocencia de la especialidá”. El CUPA ta acabante solicita-y que cumpla con esti puntu “agora que ye más necesario que nunca defender la situación de los profesores d’asturianu formaos na Universidá d’Uviéu”.

Güei, xueves 7 de febreru, dende les 18:30 horas, va facese na Plaza de La Escandalera d’Uviéu una concentración pa desixir un tratu llegal que dignifique la llingua asturiana dientro del sistema educativu asturianu. La nueva redacción del anteproyectu de llei d’educación (LOMCE) “dexa la pelota nel teyáu del gobiernu del Principáu”, esplica la plataforma de docentes, que recuerda que “ye ésti quien tien agora la responsabilidá y la competencia p’articular un nuevu marcu llegal pa l’asignatura”.

Dende esta asamblea siguen reivindicando “una ufierta non discriminatoria, que nun suponga una competición con otres asignatures convirtiéndola nuna optativa de tercer orde na etapa de Primaria, pasando a sufrir lo qu’agora conocemos na ESO o en Bachilleratu”.

Camienten amás que “nesti contestu de cambios normativos preséntasenos d’una vez la oportunidá de criar la especialidá de l’asignatura, tantu tiempo retrasada, la xeneralización de la ufierta en toles etapes, incluyendo la educación infantil, la inclusión del asturianu y del gallego-asturianu como lllingües vehiculares, la dignificación de los docentes, en fin, la normalización de la presencia de la llingua propia d’Asturies nel so sistema educativo”.

Por too ello siguen creyendo qu’hai razones abondes “pa facer la concentración, que va tener un calter eminentemente participativu cola celebración de xuegos, ellaboración d’un rompecabeces a gran escala y la colocación de pancartes de tou tipu feches por docentes y alumnos”.

La concentración recibió’l sofitu de SUATEA, Xunta pola Defensa de la Llingua Asturiana, Iniciativa pol Asturianu, EQUO o Darréu, ente otres organizaciones.

La Plaza de La Escandalera d’Uviéu ye l’espaciu escoyíu esti xueves 7 de marzu a les siete la tarde pol profesoráu d’asturianu, que convoca’l Claustru de docentes d’asturianu y gallego-asturianu, cuntando col sofitu d’organizaciones como SUATEA, la Xunta pola Defensa de la Llingua Asturiana o Iniciativa pol Asturianu. La concentración celébrase pocos díes dempués de conocer que l’asturianu tendrá espaciu na nueva llei y que la so posición va quedar en manes del gobiernu autonómicu.

La Xunta pola Defensa de la Llingua Asturiana (XDLA) que fizo un llamáu “a tola xente militante y simpatizante del movimientu de recuperación llingüística d’Asturies a secundar esta convocatoria”, al mesmu tiempu que denuncien que “entá se dan práctiques illegales pa impedir la llibertá a la hora d’escoyela”. La Xunta recuerda qu’agora, col nuevu borrador de la Llei LOMCE “l’encaxe de la llingua asturiana nel sistema educativu queda pendiente de lo que diga’l futuru decretu autonómicu que desenvuelva n’Asturies l’aspectu curricular de la llei”.

Iniciativa pol Asturianu, que vien sumándose a toles acciones entamaes polos docentes d’asturianu dende la so Vocalía d’enseñu, súmose tamién animando a la participación y recordando los oxetivos de la organización nesti campu, que pasen, darréu de solucionar problemes urxentes como la situación del asturianu na Llei Wert y la reconocencia de la especialidá d’asturiau pal profesoráu, “que l’asturianu seya una asignatura pa tolos alumnos, una asignatura normal, non una “optativa” nin “voluntaria”, non enfrentada a otres materies. Y en segundu llugar, dar pasos pa que l’asturianu se convierta na llingua vehicular d’otres asignatures”.

Na tarde de güei, martes 4 de marzu, va inaugurase la primer edición del Cursu d’Asturianu n’Uviéu, d’Iniciativa pol Asturianu. Representantes de la organización y del Conseyu de la Mocedá del Principáu d’Asturies, onde se celebra’l cursu, van participar xunto a los alumnos de la presentación del cursu.

Sedrá a partir de les 5 la tarde nel Centru de Recursos p’Asociaciones d’esta entidá, nel 10 de la cai Fuertes Acevedo. Con una duración total de 35 hores, el cursu va desendolcase, de manera intensiva, los llunes, miércoles y vienres, de 17 a 19 hores, parando’l correspondiente día de fiesta de Selmana Santa. Sicasí, cola debida xustificación, podría facese’l cursu de manera en llinia.