Educación

Como cada añu, el Vicerrectorado d’Estensión Universitaria y Comunicación publica la so ufierta de Cursos de Branu, coles mires de proxectar la conocencia a la sociedá asturiana y dientro d’ellos los cursos de la Universidá Asturiana de Branu de l’Academia de la Llingua (UABRA) que se celebren en Cangas del 28 de xunetu al 8 d’agostu. Esti añu hai convocaos, amás de los cursos elemental y avanzáu, el cursu de capacitación pala traducción, unu d’ecoloxía, sobre l’emplegu didáuticu d’Interne, un cuartu sobre cantares y bailes y la segunda fase del Curso de Gallego-Asturiano.

La matrícula abrese esti llunes 26 de mayu y va desenvolviese hasta’l 6 de xunu nel llar de l’Academia de la LLingua Asturiana. Los cursos de la UABRA tan empobinaos pol profesor y académicu Xosé Antón González Riaño y la secretaría corresponde al académico Pablo XUán Manzano Rodríguez como ye vezu desde jai tiempo.

El curus básicu de llingua asturiana inclúi, con 60 hores llectives, un repás peles Normes ortografiques, la sociollingüística aplicada al casu asturianu, exercicios escritos, situaciones comunicatives escrites y orales, y un averamientu a la Lliteratura Asturiana.

Pela so parte, l’Avanzáu, col mesmu númberu d’hores, adiéntrase nel estudiu de la llingua asturiana estándar y la so presencia na sociedá de l’Asturies de güei, plantegando tamién situaciones comunicatives escrites y orales, más complexes, aspeutos de la cultura asturiana y de la Historia d’Asturies, un repás a la Lliteratura asturiana contemporánea y un pequeñu cursu de téuniques de creatividá lliteraria.

Los cursos principales finen col de Gallego-Asturiano, que nesta segunda fase ufre 40 horas llectives (35 presenciales y 5 de trabayu personal) teniendo como obxetivu cimera afondar nos aspectos teórico-prácticos que ya enramara la primer fase de les tres que completen el cursi-

Cursos d’Afondamientu

No que cinca a los Cursos d’Afondamientu Cultural y Llingüísticu, como cada añu va celebrase un cursu de Capacitación pa la Traducción al Asturianu, de 35 hores, del 28 de xunetu al 2 d’agostu, y que va tener lugar ente’l 28 de xunetu y el 2 d’agostu, embaxo la dirección de la decana de Filosofía y Lletres de la Universidá d’Uviéu, Cristina Valdés, y la collaboración de los profesores Xosé Lluis García Arias, Ana Mª Cano y Xosé Antón González Riaño. Nel cursu preséntense davezu los presupuestos teóricos que rixen la traducción a una llingua minoritaria, teniendo en cuenta, de mou especial, l’exerciciu de tornes de testos lliterarios y periodísticos y de testos llegales y científicos. Y a esto xúnese una sesión monográfica sobre estratexes de traducción ingles-asturianu.

El cursu dedicáu a les nueves tecnoloxíes va ser esti añu nes mesmes feches que’l de traducción y va titulase “Internet como recursu educativu y cultural” y va desenvolviese del 28 de xunetu al 2 d’agostu. Nes sos 35 hores va sirvir pa ufiertar nueves y prestoses posibilidaes pa que’l profesoráu de Llingua Asturiana d’Educación Primaria y Secundaria pueda acceder a los recursos qu’ufre la rede y pueda diseñar, llueu, xeres y actividaes d’aula pal deprendizax oral y escritu de la Llingua Asturiana. El so coordinador ye David Melendi y tendrá profesores como Xulio Berros y Xabiel García Pañeda.

Los otros dos cursos d’agfondamientu van celebrase del 4 al 8 d’agostu, entapando pol de “cantares, bailes ya instrumentos musicales asturianos” de 30 horas llectives que va completase con 15 práctiques. Embaxo la dirección de José Antonio Gómez, va afondar nel conocimiento de los cantalles, bailes ya instrumentos populares asturianos desde la perspectiva de la so presencia na escuela.

El caberu de los cursos d’afondamientu lleva por títulu “Ecoloxía y Mediu ambiente y desenvolverase embaxo la dirección de Carlos Lastra.

Los Cursos tán abiertos a toes aquelles persones interesaes nes materies que s’imparten, independientemente de si se trata o non d’universitarios y la matrícula fadráse na Universidá, magar los cursos de la UABRA tendrán inscribise na see de l’Academia de la LLingua.

Énte’l refugu sindical y la convocatoria de movilizaciones, l’Alministración arrenunciaba esto día a imponer al profesoráu interín les axudicaciones “a palpu” pal cursu 14-15 dando marcha atrás na so propuesta de pidimientu a palpu sigún facía anuncia SUATEA, tres de la xunta de personal docente cola Conseyería aconceyada esti día.

Nesta Xunta, SUATEA pidió que nun entrara a valir la FP Básica, al entender que nun se ta en condiciones pa ello. Amás, nel casu de Primaria pide la eliminación del horariu d’enseñanza de les relixones o’l so amenorgamientu al mínimu llegal posible na nuestra comunidá, al tiempu que reclamó l’aumentu del horariu destináu a Llingua Asturiana y Gallego-asturianu. Va dase a conocer el borrador de curriculum de primaria esta mesma selmana, cola espresión del horariu destináu a cada cursu. Tamién se pidió la non realización de la prueba correspondiente a 3º de primaria, yá que ye potestá de la Conseyería la so realización.

Depués d’una llarga esplicación de la Directora Xeneral, l’Alministración repite la so intención de facer sumir la “7ª hora” pal alumnáu qu’empiece 1º d’ESO nel programa billingüe pesie al refugu del colectivu.

N’entrando perriba nel tema de les oposiciones y n’acabando la reunión confírmase que’l miércoles 28 va publicase’l llistáu de persones almitíes y escluyíes y les pruebes van empezar el 20 de xunu. N’otru orde de coses, dende SUATEA “repitimos la nuestra esmolición pola situación xenerada en Cangas cola dimisión d’un equipu directivu y la propuesta de reestructuración d’espacios docentes públicos que lu xeneró. Tamién mos interesemos pola forma de provisión de puestos pal Conservatorio Superior pal próximu cursu, nel que va haber un nuevu equipu directivu que va tomar posesión en xunetu”.

La Universidá d’Uviéu saca la so ufierta d’estudios a la cai pa dar a conocer toles sos titulaciones de grau y posgráu y arreglar les duldes d’estudiantes y families. La I Feria Académica de la Universidá d’Uviéu celebrarase’l próximu xueves, 22 de mayu, nel patiu del Edificiu Históricu n’horariu de 17:00 a 20:00 hores.

El públicu asistente va tener oportunidá d’atopar tola información sobre’l completu catálogu d’estudios que se va impartir el próximu cursu: 51 graos afechos al Espaciu Européu d’Educación Cimera (EEES), qu’inclúin trés dobles graos y 15 titulaciones con itinerarios billingües impulsaos dende’l Campus d’Excelencia Internacional.

Como novedá dientro del catálogu d’estudios de grau, l’añu que vien va empezar a impartise’l Doble Grau n’Inxeniería Civil ya Inxeniería de los Recursos Mineru y Enerxéticu na Escuela Politécnica de Mieres. Tratase de la tercera doble titulación ufiertada pola Universidá d’Uviéu, xuntu al Doble Grau n’Alministración y Dirección d’Empreses (ADE) y Derechu, y el Doble Grau en Física y Matemátiques.

Nel so apueste pola internacionalización, la institución académica tamién estiende la so ufierta d’itinerarios billingües a la titulación de Química, colo que los estudiantes pueden escoyer ente una quincena de graos con docencia n’inglés que-yos abrirá la puerta a cuntar con un certificáu que se va incorporar al Suplementu Européu al Títulu.

Esti martes 13 de mayu a les 7 de la tarde, nel Centru Social de Les Vegues (Corvera, Plaza la Llibertá), va celebrase un Alcuentru col Seminariu de Filoloxía Asturiana (SFA). Los profesores Xulio Viejo y Ramón d’Andrés fadrán una presentación del SFA, con información y anunciu de variaes iniciatives y actividaes como grupu d’investigación de la Universidá d’Uviéu. Entama esti Alcuentru la Casa de la Llingua – Serviciu de Normalización Llingüística del Conceyu del Conceyu de Corvera, dientro les actividaes de la Folixa del Llibru.

Web del SFA: http://grupos.uniovi.es/web/sfa Páxina en Facebook: https://www.facebook.com/pages/Seminariu-de-Filolox%C3%ADa-Asturiana/554729991309903
Páxina en Facebook del SFA

L’escritor y profesor titular de Teoría de la Lliteratura y Lliteratura Comparada de la Universidá d’Uviéu Javier García Rodríguez asume dende esti mes la dirección de la Cátedra Leonard Cohen, un cargu ensin remuneración, sigún asoleyaba esti día la oficina de prensa de la Universidá d’Uviéu. La Cátedra Leonard Cohen Premiu Príncipe d’Asturies de les Lletres 2011 naz auspiciada pol artista canadiense, que donó la dotación del galardón pa reconocer y estimar l’acoyida que siempres -y espachó’l públicu español.

El rector de la Universidá d’Uviéu, Vicente Gotor, designó a García Rodríguez, un autor con dilatada esperiencia nel ámbitu cultural, pa faese cargu d’esti proyectu, en que la so creación foi decisivu’l sofitu de la Fundación Príncipe d’Asturies. L’oxetivu d’esta cátedra ye contribuyir a la conocencia y espardimientu de la obra del músicu y poeta canadiense, y “fomentar la creatividá poética y musical na nuesa sociedá”, tantu dende’l puntu de vista divulgativu como dende’l formativu.

Javier García Rodríguez (Valladolid, 1965) ye llicenciáu en Filoloxía Hispánica y doctor en Teoría de la Lliteratura y Lliteratura Comparada. Empezó la so carrera docente en 1989 na Universidá de Iowa y en 1991 treslladar a la Universidá de Valladolid, onde llogró la plaza de profesor titular en 2002. Foi nesta última universidá onde destacaron les sos aportaciones na implantación de la Escritura Creativo como materia universitario al traviés de les asignatures de Técniques de creación lliteraria y de Composición lliteraria. Foi Professeur Convidé na Universidá de Montreal (Canadá) y dende 2011 ye profesor titular na Área de Teoría de la Lliteratura y Lliteratura Comparada na Universidá d’Uviéu. Ye autor de numberosos trabayos académicos y divulgativos sobre lliteratura y cine, les relaciones ente poesía contemporanea y tradición clásica, la poesía del Sieglu d’Oru y les aportaciones de los poetes actuales.

Como poeta escribió los llibros “Los mapes falsos” (1996), “Estaciones” (KRK, 2007) y “Qué ves na nueche” (Ediciones del 4 d’agostu, 2010), y como narrador, “Mutatis mutandis” (Clisaos, 2009) y el llibru de relatos Barra americana (DVD Edición, 2011).

Del 8 al 20 de mayu na Casa de la Mocedá de Sotrondiu, podrá visitase la esposición “Colgad@ X ti”. Tratase d’una esposición d’homenaxe al llibru realizada polos alumnos del Colexu San José de Sotrondiu. L’amuesa consiste nuna composición artística na que cada alumnu crea una percha decorada orixinalmente de la cuala cuelga’l so llibru favoritu. Cada alumnu del Colexu San José iguó la so propia composición percha-llibru, polo que puede contemplase una colorida colección de llibros pa toles edaes y gustos (noveles, cuentos, cómics..), caúna d’elles col calquier personal del so alumnu,

Anguaño’l colexu San José ta celebrando’l so 90 aniversariu y ta realizando diverses actividaes rellacionaes cola cultura y el gustu pola llectura, ente les que destaca “Colgad@ X ti”. L’horariu de visites ye de llunes a vienres de 10 a 13 y de 17 a 21 hores.

El XIII Foru d’Emplegu de la Universidá d’Uviéu vieno acabante d’abrir esti martes, 6 de mayu, les sos puertes nel Recintu Ferial Luis Adaro de Xixón cola participación y collaboración d’un total de 88 instituciones y empreses. El foru, entamáu pola Fundación Universidá d’Uviéu (FUO), tien como oxetivu averar a los estudiantes y titulaos universitarios al mundu llaboral y sirvir como un primer contactu con empreses pa los estudiantes d’últimu cursu y los acabante titular.

L’actu oficial d’inauguración tuvo llugar a les 12:30 hores presidíu pol rector, Vicente Gotor, quien vino acompañáu pol conseyeru d’Economía y Emplegu del Principáu, Graciano Torre, el presidente del Conseyu Social de la Universidá d’Uviéu, Ladislao Azcona, el conceyal d’Emplegu y Desenvolvimientu Económicu del Conceyu de Xixón, Fernando Couto, y el presidente de FADE, Pedro Luis Fernández.

El foru va caltener abiertes les sos puertes los díes 6 y 7 de mayu y l’accesu va ser llibre. El programa del alcuentru, que l’añu pasáu cuntó con más de 6.500 visitantes, inclúi presentaciones d’empreses de distintos sectores y meses redondes que van plantegar los principales retos y dificultaes en materia d’empléu xuvenil. Cabo destacar la mesa tres la inauguración sol títulu “Tu encaxes nel nuevu escenariu” cola participación del presidente del Conseyu Social, Ladislao Azcona, el director xeneral de CSC España, Jesús Daniel Salas, y el presidente de FADE, Pedro Luis Fernández.

El Foru d’Emplegu de la Universidá d’Uviéu constitúi un referente nel ámbitu de la empleabilidá, ufiertando información sobre la ufierta d’empléu esistente pa persones con titulación universitaria, según sobre aquellos recursos útiles pa la busca d’empléu.

Web del Foru d’Emplegu

L’anuncia de la Conseyería d’Educación de que va solicitar al Ministeriu d’Educación la especialidá docente de Llingua Asturiana contrasta col so maltratu permanente a la materia na opinión de SUATEA qu’esta selmana asoleyaba un duru comunicáu criticando l’anuncia: “Tando acabante d’anunciar que ta iguando la documentación pa solicita-y al Ministeriu d’Educación y Cultura el reconocimientu de la especialidá docente de Llingua Asturiana, pervieya reivindicación dende va trenta años, tantos como hai de presencia del asturianu na enseñanza, la Conseyería y el gobiernu asturianu pretenden agora mangase la medalla de grandes defensores de la llingua del país, cuando la rialidá ye que la política de l’actual Conseyería d’Educación ye la del maltratu permanente a la materia, a quien la imparte y a quien la recibe”.

Pal SUATEA ye abondo “llarga la llucha que los docentes d’asturianu y gallego-asturiano lleven faciendo p’algamar un reconocimientu asemeyáu al del restu del colectivu docente, polo demás bien maltratáu por esti gobiernu. Xeneralización de les medies xornaes, horarios antipedagóxicos, males artes pa desincentivar la matriculación de los estudiantes, desamparu permanente… Bona parte d’esta situación achacábase y achácase a l’ausencia d’una especialidá docente tanto en Primaria como en Secundaria que dignificara la materia y estabilizara’l so profesoráu al traviés d’un procesu de concursu-oposición, yá que’l 95% del mesmu ye personal interín”. La rialidá ye que, na opibión de SUATEA “siendo la especialidá imprescindible p’avanzar na dignificación, la Conseyería d’Educación pudo y puede facer muncho más pola escolarización de la llingua asturiana. De fechu, abulta paradóxico, por nun dicir hipócrita, que pretendan agora dir de defensores del idioma cuando hubo que llevalos a los tribunales pa facelos cumplir la Llei d’Usu de 1998”.

Ente lo que considera autobombu SUATEA, “ente tanta recatafila de coses presuntamente feches como actu de propaganda de cara a la Selmana de les Lletres d’esti añu, la Conseyería escaeció cómo’l so gobiernu ta afogando económicamente a la institución cimera de les lletres asturianes, l’Academia de la Llingua, cola falsa sida de la crisis”.

Dende SUATEA dicen ser conscientes de que la igua rial al problema de la llingua asturiana y del gallego-asturiano, tanto dientro como fuera de la educación, pasa inevitablemente pela so oficialidá, que, de pasu, “serviría pa cumplir el mandáu de la Constitución de 1978, o de la Carta Europea de les Llingües Minorizaes de la que’l Reinu d’España ye firmante. Mentanto, la dignificación de la llingua ha facese dando milenta pasos, de los que la especialidá ye unu d’ellos. Esti y tolos demás siguen siendo obligación de la Conseyería”.

Iniciativa pol Asturianu, en collaboración col Conceyu Universitariu pol Asturianu (CUPA) vieno acabante d’abrir plazu p’apuntase a la que ye yá la cuarta edición de los Cursos d’Asturianu en Xixón, una esperiencia formativa qu’entama dende va tiempu esta asociación en collaboración cola Academia de la Llingua Asturiana y el Conseyu de la Mocedá de Xixón. Los cursos van desembolvese na sede del Conseyu de la Mocedá de Xixón (Avda. Manuel Llaneza, 68), entamando a partir del 12 de mayu y cuntando con 36 hores llectives cada nivel.

Los cursos van celebrase los martes y xueves, de 19 a 21 hores nel casu del nivel d’aniciu, y de 17 a 19 hores pal nivel mediu, acabando pa finales de xunu. Nel nivel id’aniciu les clases van empobinaes a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu.

El nivel mediiu ta empobináu a persones con una conocencia más fonda del idioma, que yá ficieren dalgún cursu enantes. El preciu de la inscripción ye de 60 euros (50 pa los socios d’Iniciativa pol Asturianu), incluyendo los materiales necesarios pa llevar alantre’l cursu.

Les inscripciones pueden facese nel corréu lletrónicu conceyuasturianuarrobagmail.com o nel teléfonu 615 982 816, yá seya llamando o al traviés de Whatsapp o Telegram, hasta’l 11 de mayu.

Dende Iniciativa pol Asturianu animen a participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies.

La Universidá percuerre la hestoria, milagros y lleendes del Camín de Santiago nun ciclu de conferencies que se va desenvolver ente’l 5 y el 13 de mayu na Aula Magna de LAUDEO y que va mirar a la ruta de pelegrinos dende la óptica del cine y la música. El IV Ciclu Camino de Santiago va empecipiar el próximu llunes, 5 de mayu, con cinco conferencies dedicaes nesta ocasión a les hestories, milagros, lleendes y música nos Caminos.

La Universidá d’Uviéu celebró esta mañana la presentación d’una nueva edición d’estes xornaes, entamaes conxuntamente por distintes instituciones y organismos, ente ellos, el Conceyu d’Uviéu, l’Arzobispáu, les asociaciones d’Amigos del Camín de Santiago y l’asociación Alumni Universidá de Navarra.

Les conferencies van eaverase al Camín de Santiago dende distintes perspectives, tantu relixoses como culturales. Si n’anteriores ediciones, el patrimoniu y l’arte foi unu de les temes centrales del ciclu, anguaño, los espertos van averar al públicu los mitos y lleendes en redol a les pelegrinaciones, y los milagros y sucesos históricos venceyaos a la ruta xacobea. Les sesiones van celebrase na Aula Magna del Centru Cultural LAUDEO (Edificiu Históricu) a les 19 hores y la entrada va ser llibre hasta completar aforu.

El ciclu va ufiertar, amás, un viaxe musical pel Camín de Santiago, al cargu de la profesora de la Universidá d’Uviéu María Sanhuesa, y un percorríu en Fotogrames de la mano de Juan Bonifacio Lorenzo, director de la Filmoteca d’Asturies, al traviés del cine venceyáu al Camín de Santiago.