Educación

El sindicato SUATEA viejo acaban esto día d’asoleyar un comunicáu bel que amuesa la indignación nos centros públicos colos nuevos retayos de profesoráu y propón movilizaciones al profesoráu.

La Conseyería de Educación sigue recortando profesoráu nos centros públicos asturianos. La Conseyería remitió a lo primero del mes de xunu una nueva propuesta de plantiya docente pal próximu cursu 14-15 onde en munchos centros tanto de primaria como de secundaria ven minorada la so plantiya. Incluso dase’l casu de qu’hebia menos profesoráu que l’otru cursu con un grupu más en funcionamiento.

Los recortes cébense cola atención a la diversidá y cola eliminación de places de profesoráu de la especialidá de Primaria.

SUATEA denunció esta situación na última reunión qu’hubo esta mesma mañana pola Xunta de Personal docente onde desixó tratar los casos d’estos recortes y que s’atendieren les alegaciones de los centros.

Les direcciones de les Escueles y Institutos que vieron recortada la so plantiya tán recibiendo esta selmana la comunicación de que les sos propuestes- razonaes y basaes nes necesidaes reales- tán desestimándoles per aciu d’un corréu electrónicu ensin tener en cuenta la complexidá de la organización de los centros.

Depués de la negociación de la plantiya docente- recordemos que fuera oxetu de refugu per parte de toles organizaciones sindicales de la Mesa Sectorial- la Conseyería comprometióse a dotar les places que nun apaecieren na plantiya oficial de cara al cursu que vien.

Esta promesa ta incumpliéndose y ta constatándose cómo l’alministración sigue amortizando places de persones que se xubilen o vaiganxubilase d’equí a poco, la conversión de munches places completes en places a media xornada y la desapaición de munchos apoyos y puestos venceyaos a l’atención a la diversidá.

SUATEA augura una medría brutal de les medies xornaes y de la carga llectiva del profesoráu. Tamién va ser un vezu común que l’alumnáu d’Infantil y Primaria vea multiplicáu’l númberu de docentes que pasen diariamente pela so aula, yá que ca vez s’obligue a más profesoráu especialista a compartir el so trabayu cola tutoría y ca vez se cuenta con menos profesoráu d’apoyu p’atender a la diversidá del alumnáu.

La indignación medra nos centros, yá qu’esto vien a sumase a polítiques errátiques, improvisaes y con criterios mercantilistes (programa billingüe, normativa sobre actividaes estraescolares, llibros de testu, implantación de la LOMCE ensin consultar a la comunidá educativa…) y que lo que faen ye cargar de trabayu al profesoráu y los equipos directivos a los que se-yos recorta personal faciendo insostenible la situación de munchos centros educativos.

Si la Conseyería nun rectifica, SUATEA propondrá la convocatoria de movilizaciones dende l’aniciu de cursu contra una alministración qu’abandona a la escuela pública a la so suerte convirtiéndose en discípulos ca vez más aventaxaos del Ministru Wert.

El Conceyu Universitariu pol Asturianu (CUPA), al traviés del so vocal de rellaciones institucionales, Inaciu Galán, vieno acabante solicitar a la Universidá d’Uviéu un cambiu nel artículu 25.2 apartáu A) del Regalmentu de Doctoráu, onde se diz: “La memoria que recoge la labor realizada en la tesis doctoral se redactará en español”, solicitándose qu’apaeza’l siguiente epígrafe: “La memoria que recoge la labor realizada en la tesis doctoral se redactará en español o asturiano”.

Con esti cambiu eliminariénse les condiciones especiales que s’esixen pa presentar la memoria de la tesis n’asturianu, que ponen a la llingua asturiana al nivel de llingües estranxeres, en llugar de como llingua propia de la Universidá d’Uviéu, yá que tal como se recueye nos sos estatutos nun pue discriminase a naide pol usu de la mesma:

«Artículu 6.2: La Llingua Asturiana va ser oxetu d’estudiu, enseñanza ya investigación nos ámbitos que correspuendan. Asinamesmu’l so usu va tener el tratamientu qu’establezan l’Estatutu d’Autonomía y la llexislación complementaria, garantizándose la non discriminación de quien la empegue».

Acordies con esta normativa, y a xuciu del CUPA, l’actual reglamentu incumple dafechu les condiciones d’usu normal del asturianu afitaes nos Estatutos de la Universidá d’Uviéu, asina como na Llei d’Usu del Asturianu de 3 de marzu de 1998, dambos testos llegales de rangu superior al citáu en primer llugar.

La solicitú faise nesti momentu aprovechando l’actual periodu de consultes a la comunidá universitaria por mor de delles modificaciones que se proponen dende l’equipu rectoral. Yá nel añu 2011 una reclamación del CUPA sobre esti mesmu Reglamentu, puestu en marcha esi añu, permitió que per primer vegada l’asturianu apaeciera ente les llingües nes que podía presentase la tesis doctoral dientro d’un reglamentu, anque dende los años 80 del sieglu pasáu veníen faciéndose tesis n’asturianu.

L’equipu rectoral de Vicente Gotor tien agora la oportunidá d’enmendar una situación que ta a les clares contra la normativa legal d’anguaño, sigún el CUPA.

Con motivu de la iniciativa presentada pol grupu parlamentariu del PP na Xunta Xeneral pretendiendo que la Conseyería d’Educación modifique la ufierta d’asignatures de llibre configuración nel nuevu Currículu d’Educación Primaria, pa que l’asignatura de Llingua Asturiana entre a competir con otres materies, SUATEA rizo esto miércoles una denuncia escontra’l PP que na so opinión “pretende arrequexar más tovía la llingua asturiana nel sistema educativu”.

Nesti sen, SUATEA quería, nun comunicáu asoleyáu esto día, manifestar que’l nuevu currículu “ye una consecuencia de l’aprobación en Madrid de la nueva llei d’educación, la LOMCE, qu’obliga a modificar los currículos de toles etapes educatives non universitaries”.

Amás,na opinión del sindicato “nun ta de más recordar que nel primer borrador de la LOMCE desapaecía materialmente la posibilidá d’estudiar Llingua Asturiana, dao que namás apaecíen les llingües cooficiales. Foi la presión ciudadana, y mui especialmente la d’esti sindicatu, la que fexo posible que na versión definitiva siga la puerta abierta pal so estudiu.

SUATEA camienta q’hasta agora, el currículu d’Educación Primaria incluyía, en cumplimientu de la Llei d’Usu del Bable/Asturianu de 1998, fecha a iniciativa del propiu PP, la voluntariedá de l’asignatura de Llingua Asturiana (o Gallego-Asturiano nel so ámbitu): “los escolinos podíen escoyer ente dar la materia o una alternativa a la mesma, qu’en nengún casu suponía avance curricular. Pero la nueva versión del currículu ellaboráu pola Conseyería d’Educación mete nel apartáu d’asignatures de llibre configuración a la Llingua Asturiana y, como alternativa a la mesma, Cultura Asturiana. Nun supón una meyora pa la Llingua Asturiana respecto a la situación anterior. Sí, en cambio, introduz un mínimu de seriedá en tanto que se pon como alternativa a la mesma una asignatura reglada, Cultura Asturiana, que valdrá pa meter conteníos de la nuestra comunidá nun currículu onde Asturies ta ausente dafechu, dao que’l ministeriu nun dexa meter talos conteníos nes materias troncales”.

La pretensión del PP d’enanchar esi abanicu d’optatividá, supuestamente faciéndose eco d’un clamor social que la realidá desmiente, queriendo meter llingües estranxeres nun currículu sobresaturáu de les meses amuesa, na opinión de SUATEA, “un desconocimientu absolutu de la realidá educativa asturiana, amás de dexar bien claro que la so pretensión ye que los escolinos estudien cualesquier otra materia anantes de conocer la llingua y/o la cultura d’Asturies”.

El sindicatu asturianu cela enseñanza atalanta que nun ye sinon “un exerciciu d’hipocresía escandalosu falar del “derechu a la llibre elección” pa intentar arrequexar a la llingua asturiana del sistema educativu mientres s’apoya una llei que sigue obligando a ufiertar la Relixón Católica non una sinón dos veces en toles etapes obligatories precisamente pa que los estudiantes puean estudiar si quieren la so alternativa, Valores Sociales. Asignatura esta de Relixón, por cierto, que n’Asturies va cuntar con más carga horaria que la prevista na propia LOMCE”.

Pa finar, SUATEA diz qu’esta iniciativa ye, en definitiva, “un nuevu intentu por espulsar del sistema educativu a la llingua asturiana, o nel so defectu mantenela nel modelu de precariedá permanente que lleva teniendo dende va trenta años con toos y caún de los gobiernos que se fueron sucediendo nel Principáu. La responsabilidá d’esta situación ye de tolos partíos que tuvieron o tienen responsabilidaes de gobiernu, polo que dende SUATEA encamentamos a tolos grupos parlamentarios a qu’igüen d’una vez esta situación y aprueben en definitiva’l marcu llegal amañosu pa torgar estos ataques, que nun ye otru que la oficialidá”.

L’estudiu ‘El costu de la plaza escolar na enseñanza pública y na alcordada’, detalláu nun actu nel Congresu de los Diputaos, foi ellaboráu pel Área Federal d’Educación d’IX y na so presentación Cayo Lara asegura que ye un apueste pola igualdá, la calidá, la equidad y el futuru” del sector educativu nel nuesu país.

Izquierda Xunida, al traviés de la so Área Federal d’Educación y del so grupu parlamentariu, presentó ayeri nel Congresu l’informe ‘El costu de la plaza escolar na enseñanza pública y na alcordada’. El trabayu, ellaboráu pol Observatoriu pola Educación Pública (OxEP) perteneciente a IX “desmonta’l mitu’ de que lo privao ye más eficiente que lo público”, talo que señaló’l coordinador federal, Cayo Lara, encargáu de presentar l’actu na Cámara Baxa, xuntu al coordinador de la Área d’Educación d’IX, Enrique Díez.

Ello ye que una de les principales conclusiones del informe señala que’l costu de la plaza pública y el de la escuela privada alcordada namái s’estremen nun euru, yá que nos centros públicos xube a los 4.185 euros añales, ente que nos centros privaos alcordaos algama los 4.184 euros. Estos datos llogrense del analís y l’aplicación de ciertes variables realizaes polos y poles responsables del informe d’IX a partir de distintos datos facilitaos de forma incompleta pol Ministeriu d’Educación y el INE referíos al añu 2011.

L’Área Federal d’Educación d’Izquierda Xunida denuncia nel trabayu les dificultaes atopaes a la d’ellaboralu, ente elles la falta de tresparencia” per parte del ministeriu que dirixe José Ignacio Wert na aportación de los datos.

Cayo Lara, demientres la so presentación, destacó que l’informe ye “un apueste pola igualdá, la calidá, la equidá y el futuru” del sector educativu, “nun país que se ta desmoronando en munchos sectores de la nuesa economía y, tamién, na política educativa”.

Aportunó tamién en que dichu estudiu representa “un apueste polo público que forma parte de les nueses señes d’identidá”, como “garante del exerciciu de los derechos sociales”. Cuntó que l’oxetivu d’esos mitos y falacies construyíos en redol a la mayor eficiencia del sector priváu, como pasa coles informaciones relatives al sector de la educación, ye’l de tener “más mercáu, más mercantilización, más negociu y más beneficios pa les empreses”, porque “lo privao ye, primero de too, negociu”.

Lara detalló que nes próximes cuentes del Estáu la partida destinada a Educación pue vese amenorgada del 4,2% actual al 3,5%, unos datos qu’oldeen col enfotu de IX d’alzalo hasta’l 7%, pa superar asina a la media na Unión Europea.

Esti vienres 13 de xunu, a les 12.30 hores, nel Salón d’Actos del Muséu Arqueolóxicu d’Asturies (Calle San Vicente, 5, 33003. Uviéu) tuvo llugar un Actu de Reconocencia al Caderalgu de la Universidá d’Uviéu Mario de Miguel Díaz pol so compromisu cola educación pública n’Asturies. L’actu, organizáu dende la sociedá educativa asturiano cuntó cola participación de la Conseyera d’Educación y Cultura ente otres autoridaes polítiques y académiques.

L’actu entamó con un Cortexu Musical al cargu de los gaiteros Andrea Fernández y Rodrigo Fernández Joglar y cuntó cola presencia d’una numberosa presencia de la sociedá civil asturiana y de la comunidá educativa del Principáu. Nel actu intervino Ana González Rodríguez, Conseyera d’Educación del Principáu d’Asturies, pero foi abiertu, tres del cortexu musical, por una glosa de José Luis San Fabián Maroto, Caderalgu de la Universidá d’Uviéu y finó con unes palabres del homnaxeáu, Mario de Miguel Díaz.

L’actu tuvo momentos de muncha emoción, con un salón del Muséu Arqueolóxicu enllenu de profesores universitarios, mayestros y xente que quixo reconocer los 50 años de xera profesional de Mario de Miguel.

Na so glosa, José Luis San Fabián Maroto refiriose a que Mario de Miguel, “por decisión propia, quiso desempeñar el so trabayu n’Asturies y caltuvo esi compromisu col país hasta’l momentu del retiru. Nomolu delles vegaes como mayestru “títulu que ye’l mejor que pue dase a una persona que dedicara más de 50 años a la educación nes so estremaes etapes” y glosó darréu la “llarga ya intensa trayectoria de Mario de Miguel”.

“La Semiente” va tratar otru añu más d’ayudar a les families de la cuenca a enfrentase de la meyor manera posible al gastu qu’esto supón. Pa ello, ta arrancando cola que será la III CAMPAÑA D’INTERCAMBIU DE LLIBROS Y MATERIAL ESCOLAR PAL CURSU 2014-2015.

Recoyeran los llibros y el material escolar que-yos quieran dar dend’agora hasta setiembre pa repartir lo que vayan acumulando a principios del cursu que vien. Como nes ocasiones anteriores, cada quien pué dexar lo que quiera y, en setiembre llevar lo que tope de lo que necesite, sin que seya necesariu por parte les families aportar pa poder dir a recoyer, nin posible por parte “La Semiente” asegurar que quien aporte vaya topar tolo que busque.

Pola experiencia de les anteriores campañes, sabese vque munches families, precisen más ayuda pa facese col material escolar que pa los propios llibros de testu, asina qu’esti añu van prestar especial atención a esto, y pa ello van dexar pelos chigres del conceyu unes huches pa recoyer alguna perruca. Toles perres que se recueyan gastaranse en material escolar nes llibreríes y papeleríes del pequeñu comerciu de les cuenques.

Esti vienres 13 de xunu, a les 12.30 hores, nel Salón d’Actos del Muséu Arqueolóxicu d’Asturies (Calle San Vicente, 5, 33003. Uviéu) va tener llugar un Actu de Reconocencia al Caderalgu de la Universidá d’Uviéu Mario de Miguel Díaz pol so compromisu cola educación pública n’Asturies. L’actu, organizáu dende la sociedá educativa asturiano va cuntar cola participación de la Conseyera d’Educación y Cultura ente otres autoridaes polítiques y académiques.

L’actu entamará cola intervención de Dª Ana González Rodríguez, Ilma. Sra. Conseyera d’Educación del Principáu d’Asturies, pa siguir con una glosa de José Luis San Fabián Maroto, Caderalgu de la Universidá d’Uviéu y finar con unes palabres de Mario de Miguel Díaz. L’actu tendrá un Cortexu Musical al cargu de los gaiteros Andrea Fernández y Rodrigo Fernández Joglar.

El grupu parlamentariu d’IX na Xunta Xeneral va llevar al plenu d’esta selmana tres asuntos: la situación de la FP básica, les consecuencies de la reforma de l’alministración local y los plazos de la llegada de l’Ave a Asturies. Aurelio Martín, voceru parlamentariu d’IX na Xunta Xeneral, aseguró esti llunes nuna rueda de prensa que la coalición va entrugar na sesión del xueves sobre l’aplicación n’Asturies del Decretu de la FP Básica yá que ta xenerando una grave alarma social desde que’l Gobiernu del Estáu promulgara una norma con tan escasu marxe temporal pala so adaptación y aplicación.

Na mesma tarde, la diputada Marta Pulgar, va preguntar al Gobiernu por qué nun aprobó inda nenguna norma pa garantizar la continuidá de los servicios públicos derivada de la entrada a valir de la Llei de Racionalización y Sostenibilidá de l’Alministración local, tal que fixeron otres comunidaes autónomes, a pesar del perxuiciu qu’esa ausencia normativa ta causando tantu a los conceyos como, especialmente, a les entidaes prestadores de servicios del tercer sector.

L’Institutu Asturianu d’Alministración Pública Adolfo Posada (IAAP) vieno acabante d’incorpora al so programa de Formación abierta a la ciudadanía los materiales didácticos del cursu «Falar y más falar. Llingua asturiana I».

D’esta miente, les persones interesaes pueden matriculase de manera gratuita y acceder a los conteníos del cursu, que recueye los rudimentos y normes básiques de la escritura correcta del asturianu, faciendo posible un acercamientu prácticu al so usu n’ámbitos cotidianos: el trabayu, el mediu urbanu, la comida, el mercáu, los viaxes, les tecnoloxíes nueves…

Los interesaos en saber más sobre les característiques d’esti programa formativu, equí upen descargar la Guía de Formación Abierta de la web del Institutu.

Web de Formación Abierta del Institutu Adolfo Posada

L’Institutu Asturianu d’Alministración Pública Adolfo Posada (IAAP) vieno acabante d’incorpora al so programa de Formación abierta a la ciudadanía los materiales didácticos del cursu «Falar y más falar. Llingua asturiana I».

D’esta miente, les persones interesaes pueden matriculase de manera gratuita y acceder a los conteníos del cursu, que recueye los rudimentos y normes básiques de la escritura correcta del asturianu, faciendo posible un acercamientu prácticu al so usu n’ámbitos cotidianos: el trabayu, el mediu urbanu, la comida, el mercáu, los viaxes, les tecnoloxíes nueves…

Los interesaos en saber más sobre les característiques d’esti programa formativu, equí upen descargar la Guía de Formación Abierta de la web del Institutu.

Web de Formación Abierta del Institutu Adolfo Posada