Convocatories

L’Ayuntamientu de Llangréu acaba de convocar el so III Premiu de Narrativa en llingua asturiana. El concursu ta dotáu con seiscientos euros y la publicación de la obra ganadora. El plazu pa la recepción d’orixinales fina’l prósimu 31 de payares.

Les bases del certame encamienten una estensión mínima de les narraciones de 50 fueyes, tamañu DIN-A4 Y escrites a doble espaciu, siendo condición indispensable que l’orixinal seya en llingua asturiana. El xuráu va aconceyase pa fallar el premiu a lo llargo del mes d’avientu y amás d’escoyer la obra ganadora, puede conceder entrambos accessit dotaos con 300 y 150 euros, respectivamente.

Les bases y la información completa del concursu pueden consultase na Casa de Cultura de Sama n’horariu de 8 a 3 de la mañana o llamar al teléfonu 985 67 81 58.

La Oficina d’Información Xuvenil de Cangas del Narcea convoca por cuartu añu consecutivu’l so Premiu de Relatos n’Asturianu. Dotáu con seiscientos euros, el certame establez dos categoríes: una pa cuentos escritos orixinalmente n’idioma estándar y otra pa les obres redactaes na variante occidental. El plazu pieslla’l prósimu 28 d’ochobre.

Amás de la cuantía empobinada al meyor relatu, el concursu reserva dos accessit dotaos de trescientos y doscientos euros pal segundu y tercer finalista. La estensión de les obres presentaes nun ha ser inferior a cinco fueyes nin pasar de les venti y la temática ye llibre.

El xuráu del premiu va tar compuestu pol responsable del Serviciu de Normalización Llingüística de Cangas del Narcea y maestros y profesores de llingua asturiana del conceyu. Les bases pueden consultase na Oficina d’Información Xuvenil municipal, el mesmu sitiu a onde tienen de remitise los orixinales.

Na edición anterior del Premiu de Relatos n’Asturianu de Cangas del Narcea algamól primer premiu Ezequiel Cala Arias (1976) pol so trabayu “M. E.”; como finalistes fueron escoyíos el relatu “Un día de mayu” de Pablo Rodríguez Alonso(1979) y “Branu eternu” del periodista de Radio Llangréu Naciu Varillas. Nel apartáu de meyor relatu n’asturianu occidental, el premiu fue parar a les manes del madrilanu de origen canguesu Diego Rodríguez Martínez pol so relatu “Pente neveiros”.

L’asociación de Llibreros d’Asturies y el grupu editorial Anaya convoquen el I Premiu de Lliteratura Infantil y Xuvenil “Libreros de Asturias”, empobináu a obres pa rapacinos de seis a doce años y dotáu con 9.000 euros. La Conseyería de Cultura del Principáu sofita económicamente esti certame al que pueden concurrir autores de cualaquier procedencia con noveles escrites en llingua castellana.

Les obres preentaes al premiu han tener una estensión mínima de 40 fueyes y ser orixinales. El plazu d’admisión fina’l prósimu 31 d’ochobre y el fallu del xuráu va dase a conocer n’Abril. La editorial Anaya comprométese a publicar la obra ganadora dientro la so colección “El Duende Verde”.

Bases

Les organizaciones polítiques d’ámbitu asturianu celebren esti xueves 8 el Día de la Nación Asturiana con cuatro convocatories distintes y estremaos actos cívicos. La reivindicación del autogobiernu y la oficialidá énte la prósima reforma l’Estatutu, la memoria hestórica del país y el futuru d’Asturies centren los mensaxes de los partíos nacionalistes.

Uviéu ye’l llugar escoyíu pal actu común de PAS con URAS na Plaza la Catedral y tamién por Andecha Astur pa la so manifestación en demanda d’un futuru p’Asturies, n’Asturies. En Xixón coinciden les estremaes convocatories de Izquierda Asturiana (IAS) y l’actu unitariu d’Izquierda Xunida, Bloque por Asturies y Lliberación.

El Partíu Asturianista de Xuan Xosé Sánchez Vicente y la Unión Renovadora Asturiana de Sergio Marqués van celebrar el “Día del País Asturiano” con una ufierta floral énte les estátues de los reis na Plaza la Catedral d’Uviéu y una xinta d’hermandá en Xixón.

Andecha Astur, pel so llau, entama una manifestación con salida nel Paséu los Álamos d’Uviéu a les 13,00 hores embaxo la llienda “Futuru p’Asturies, Futuru n’Asturies”. La convocatoria d’A.A. nun ta autorizada por Delegación de Gobiernu por presentar la documentación n’asturianu y nel momentu de redactar esta información la prohibición de la marcha calteníase. Después de la manifestación la organización moza Darréu tien convocada una espicha popular.

L’actu unitariu d’Izquierda Xunida, Bloque por Asturies y Lliberación va consistir nun mitin siguíu d’una espicha popular nel Parque los Pericones de Xixón. Nel mitin van intervenir los másimos cabezaleros de les organizaciones convocantes: Jesús Iglesias (Izquierda Xunida), Rafa Palacios (Bloque por Asturies) y Cheni Uria (Lliberación) y darréu va haber actuaciones musicales, ente elles la de la cantaora Mari Luz Cristobal Caunedo.

La cuarta convocatoria del 8 Setiembre va entamala IAS con una ufierta de lloréu na Plaza del Parchís nel edificiu que fuera la sé del Conseyu Soberanu d’Asturies siguida d’una intervención del líder d’esta organización, Faustino Zapico. Los militantes y simpatizantes d’Izquierda Asturiana van xuntase darréu del actu políticu nuna fartura de fraternidá.

El certamen Art Nalón recibió na edición d’esti añu el númberu más grande de participaciones nes modalidaes de teatru y cortometraxes. Un total de venticinco compañíes unviaron les sos propuestes al concursu escénicu y ciento venticinco trabayos fueron los que se presentaron na modalidá de realizaciones cinematográfiques.

La conceyal de Mocedá del Ayuntamientu de Llangréu -convocante del certame-, Laura Rodríguez espresó esta mañana el so contentu pola cifra alta de participantes nesti concursu empobináu a los creadores xóvenes. Pa la responsable de la estaya moza municipal esti aumentu de la participación que cifró nun cincuenta por cientu respective a la edición del añu pasáu, supón “un verdaderu ésitu del certame y la so consolidación”.

De les venticinco compañíes non profesionales presentaes al apartáu teatral, el xuráu d’Art Nalón seleccionó a diez pa que representen los sos montaxes dende’l prósimu domingu 11 de setiembre nel Nuevu Teatru de La Felguera. Nel apartáu cinemátograficu escoyéronse venticinco de los ciento cincuenta y cinco cortometraxes mandaos a concursu. Los cortometraxes van poder vese a lo llargo del mes de setiembre nel Nuevu Teatru de La Felguera.

Les dotaciones d’entrambes modalidaes del certame Art Nalón son de 1.500, 1.125 y 750 euros, a los qu’hai d’añadir la beca de 600 euros pa les compañíes de fuera d’Asturies, los 300 pa les asturianes y, nel casu de los cortometraxes, 600 euros.

La Fundación Juan Muñiz Zapico acaba de convocar por segundu añu el so Concursu de Microrrelatos “Manuel Nevado Madrid”. El certame busca premiar narraciones perbreves escrites n’asturianu o en castellanu y relacionaes temáticamente cola minería.

La brevedá ye xunto a la orixinalidá el requisitu fundamental del premiu convocáu pola fundación cultural de Comisiones Obreres d’Asturies. Asina nengún cuentu presentáu va poder pasar de les cuarenta llinies.

El primer premiu del concursu ta dotáu con 1.000 euros y hai diversos accesit: asturianu, de tema hestóricu y mozu. Les obres tienen d’unviase a la Fundación Juan Muñiz Zapico (II Concursu de Rellatos Mineros Curtios “Manuel Nevado Madrid”) c/ Santa Teresa 15, CP 33005 Uviéu enantes del prósimu 21 d’ochobre. El fallu va dase a conocer el 4 d’avientu, na celebración de Santa Bárbara, la Fiesta de la Minería.

Bases del concursu de microrrelatos “Manuel Nevado Madrid”

La Conseyería de Cultura acaba de facer pública la convocatoria de los premios Xosefa Xovellanos de novela, Xuan María Acebal de poesía y Enriqueta González Rubín de periodismu, tolos tres los meyor dotaos económicamente de los concursos lliterarios en llingua asturiana. El Xosefa Xovellanos y el Xuan María Acebal tan dotaos con un premiu de 6.000 euros y l’Enriqueta González Rubín con 2.000 euros pa la categoría de periodismu escritu y 4.000 na categoría de periodismu audiovisual.

El plazu de presentación de los tres premios fina’l 31 d’ochobre d’esti añu y amás de la cuantía económica, nel casu de les distinciones de novela y poesía, la Conseyería comprométese a la publicación de les obres ganadores, dando por pagos los drechos d’autor cola dotación del premiu.

El Xosefa Xovellanos de novela ta empobináu a obres inédites y orixinales con una estensión mínima de setenta y cinco folios, que nun fueran premiaes n’otros certámenes y han tar escrites n’asturianu, siguiendo les normes ortográfiques de l’Academia de la Llingua. Tocante al Xuan María Acebal de poesía, amás de les anteriores condiciones, los llibros presentaos tienen de tener un mínimu de quinientos versos.

El premiu empobináu a reconocer el llabor periodísticu en llingua asturiana tien esti añu una novedá respective a anteriores convocatories, ya que la categoría de periodismu audiovisual aumenta la so cuantía hasta 4.000 euros y la categoría de periodismu escritu baxa a los 2.000 (enantes entrambes categoríes taben dotaes con un premiu de 3.000 euros). Nel casu de la categoría de redacción escrita, puede presentase cualquier trabayu en xéneru d’artículu, reportaxe, crónica, opinión, entrevista…y tan escluíes les series, secciones o conxuntos d’artículos.Na categoría audiovisual podrá participase con emisiones radiofóniques o televisives de tema llibre y de cualquier xéneru (información, crónica, reportaxe, entrevista, documental, etc.), difundíes ente’l 1 de xineru de 2005 y la fecha de pieslle de la convocatoria.

Convocatoria premios

Caxastur convoca seis beques destinaes a artistes asturianos que deseen ampliar los sos estudios, investigar o llevar a cabu proyectos relacionados cola so especialidá artística, fuera d’Asturies.El trabayu a desarrollar referiráse a les diverses modalidaes de les artes: pintura, escultura, grabao, fotografía, instalaciones, arquitectura, vídeo, cine, teatro, danza, música y demás espresiones artístiques.

A estes ayudes van poder inscribise toes aquelles persones nacíes o residentes n’Asturies dende, al menos, el 31 d’avientu de 2004, ensin llende d’edá. En casu que la solicitú de la beca seya pal so disfrute nel estranxeru, conocimientu suficiente del idioma del país de destín o del utilizáu nel centru elexíu. La dotación económica de cada beca será de 10.000 euros, a pagar en dos partes: el 50% tres l’adxudicación y el 50% restante a los seis meses efectivos del períodu de disfrute de la beca. El plazo de duración de la beca será d’un añu natural, a partir de la concesión de la mesma.

Más información

El Conceyu de Cangas del Narcea acaba convocar una plaza de responsable del serviciu local de normalización llingüística con dedicación a tiempu parcial dirixida a universitarios que estean en posesión del títulu d’ Especialista o Espertu en Filoloxía Asturiana espedíu pola Universidá d’ Uviéu, del títulu de Llingua Asturiana pa Enseñantes de la Conseyería de Cultura o tener los cursos d’aniciu, mediu y superior de l’ Academia de la Llingua Asturiana. Los aspirantes habrán amosar nes pruebes una fonda conocencia llíngüístico de la variante occidental del asturianu.

Les bases de la convocatoria alcuéntrense disponibles nel área de Cultura y la Oficina d’Información Xuvenil del Ayuntamientu de Cangas del Narcea. El plazu pa la solicitú de participación fina a los diez díes naturales depués de la publicación del anunciu oficial d’ esta convocatoria na prensa. Con una retribución bruta mensual de 688,95 euros, la persona contratada acoyeráse al réximen de derechu llaboral na modalidá d’obra o serviciu determináu. La duración del contratu va tar en función de la subvención concedida al efectu pol Principáu,de mano hasta el 31 d’Avientu de 2005.

La prueba va consistir nuna fase d’oposición de calter eliminatoriu que inclúi un exerciciu de traducción y otru consistente nuna esposición oral. Na fase de concursu procederáse valorar los méritos de les persones que hubieren superao la fase anterior. Va puntuase la esperiencia profesional acreditada nel desarrollu de trabayos asemeyaos a los de la plaza que se convoca realizaos en cualquier administración o nel sector priváu. También se va puntuar l’asistencia a cursos de Llingua Asturiana relacionaos coles funciones de la plaza convocada, impartíos pola Administración Pública, la Universidá d’Uviéu o la Academia de la Llingua Asturiana.

El tribunal calificador va tar formáu pol Alcalde de Cangas del Narcea o la Conceyal de Cultura, un representante de la Oficina de Política Lingüística del Principáu, un representante de la Academia de la Llingua Asturiana, la Coordinadora Cultural del Ayuntamientu, un representante de los trabayadores, un representante del grupu municipal de Izquierda Xunida y otru del grupu municipal del Partíu Popular.

L’Academia de la Llingua Asturiana tien convocao la so preba de conocencia semestral correspondiente al mes de mayu. Nella los alumnos van ser evaluaos del so nivel de competencia llingüística y a los que superen l’esame la institución apurrirá-yos el certificáu correspondiente al nivel 1 o básicu, según el casu. La preba va cellebrase’l día 28 de mayu y el plazu de matrícula ábrese’l 16 de mayu pa toles persones interesaes n’algamar el certificáu de conocencia de l’Academia.

L’esame presencial va tener dos partes, una escrita (dictáu, torna, exercicios gramaticales, redaición) y otra falada (conversación.Pal bon resultáu d’estes pruebes l’Academia recomienda a los alumnos matriculaos presentase con un dominiu básicu de la realidá llingüística del asturianu en dos estayes. La primera, de conteníos propiamente filolóxicos ha incluir teoría gramatical: conocencia y dominiu del funcionamientu gramatical del asturianu y de la normativa académica;práutica escrita: emplegu amañosu de la llingua, puestu en práutica gracies a exercicios gramaticales y de composición escrita; práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador.La segunda estaya ye de conteníos sociollingüísticos y desixe la conocencia del allugamientu de la llingua dientro de la sociedá asturiana asina como del procesu de normalización en que ta inxerta.

La institución considera imprescindible pa super les prebes de conociencia conocer les xeneralidaes gramaticales de la llingua asturiana y los aspeutos básicos de la so normativa ortográfica (Gramática de la Llingua Asturiana, Academia de la Llingua Asturiana, Uviéu 2001, 3ª ed.). Asina mesmo, aconséyase la llectura de testos fechos acordies cola normativa, como los asoleyaos por esta Academia.

El plazu de matrícula pa la preba de conocencia ábrese’l 16 de mayu y piésllase’l 26 del mesmu més.

Más información