Convocatories

Caxastur acaba convocar seis beques empobinaes a artistes asturianos que quieran ampliar los sos estudios, investigar o desarrollar proyectos rellacionaos cola so especialidá artística fuera d’Asturies. El plazu de presentación de les solicitúes termina’l sábadu 24 de xunu.

El trabayu a desarrollar va refirise a les distintes modalidaes de les artes: pintura, escultura, grabáu, fotografía, instalaciones, videu, cine, teatru, danza y música. La dotación económica de cada beca ye de 10000 euros, contratando Caxastur nel tiempu de duración de la beca, un seguru d’enfermedá y accidentes pa los becaos. El plazu de duración de la beca ye d’un añu natural dende que se conceda.

Bases de la convocatoria

L’Ayuntamientu de Bimenes ta acabante convocar el Concursu de Cuentos pola Oficialidá del Asturianu, qu’esti añu algama la so novena edición. La convocatoria del certame ta relacionada dende los sos oríxenes cola fiesta que conmemora el conceyu yerbatu la so declaración institucional pola reconocencia oficial de la llingua asturiana va diez años.

Nes bases de la convocatoria especifícase que les obres presentaes tienen de tar redactaos en llingua asturiana y ser inéditos. El plazu pa la presentación de trabayos fina’l xueves 1 de xunu y los premios afitaos son de 800 euros pal primer premiu, 500 pal segundu y 350 pal terceru. L’actu institucional d’entrega de premios sedrá’l vienres 30 de xunu, coincidiendo coles cellebraciones de la Fiesta de la Oficialidá de la Llingua Asturiana.

La Conseyería de Cultura publica esti viernes 10 nel BOPA la resolución y les bases pa solicitar subvenciones económiques destinaes a financiar actividaes creatives y de difusión cultural en llingua castellana. Les ayudes empobinaes a actividaes culturales n’asturiano o gallego-asturiano tienen una convocatoria específica que habrá conocese nos prósimos díes o nes prósimes selmanes.

La convocatoria que publica el BOPA na so edición d’esti viernes diríxese a particulares o empreses pa la realización d’obres cinematográfiques o en video; actividaes escéniques pa grupos profesionales y pa non profesionales; actividaes d’asociaciones culturales; obres de creación lliteraria: y formación y promoción artístiques.

L’asociación cultural El Portón, en collaboración col ensame xuvenil Tragaluz, convoca un premiu de narrativa en llingua asturiana empobináu a rapacinos y xóvenes. El certame, que cumple la so edición númberu trece ta estremáu en tres categoría: una dedicada a escolinos de Primaria, la segunda a alumnos de Secundaria y una tercera abierta a mozos y moces de diecinueve a trenta años.

La primera de les categoríes tien una compensa de 72 euros en llibros pal primer premiu y 36 pal segundu; la categoría empobinada pa estudiantes de Secundaria ta valorada con 150 euros en llibros pal primer premiu y 90 pal segundu; los premios destinaos a xóvenes de diecinueve a trenta años son de 210 euros pal primeru y de ciento venti euros pal segundu.

El plazu de recepción d’orixinales pieslla’l prósimu 24 d’abril y les obres han unviase a l’asociación cultural El Portón, apartáu postal 140 d’Uviéu.

L’agrupación local d’Izquierda Xunida de Siero acaba de convocar el primer concursu de relatos curtios “Valentín Palacio” que ta dotáu con seiscientos euros y va empobináu a premiar narraciones alrodiu d’asuntos sociales o políticos.

Nel certame convocáu por IU de Siero puen participar tolos autores que quieran facelo, con una o más obres escrites en castellanu o asturianu. Los rellatos tienen que ser orixinales ya inéditos y el tema debe tar rellacionaú con aspéutos sociales o políticos y el llargor de les obres nun podrá ser de más de dos fueyes DIN A4 mecanografiaes per una sola cara.

El plazu de presentación de los rellatos fina’l 15 de marzu de 2006 y los testos habrán unviase a Izquierda Xunida de Siero. Plaza Les Campes, 19 – baxu. 33510 La Pola Siero. El fallu va facese públicu’l prósimu 14 d’Abril, Día de la República.

L’Academia de la Llingua Asturiana caltién abiertu hasta’l prósimu 15 de xineru de 2006 el plazu d’acoyida d’orixinales pa los diversos concursos de creación ya investigación que convocó en mayu d’esti añu. El meyor dotáu económicamente ye’l premiu de cortometraxes, con 1.200 euros. Los trabayos ganadores d’otres categoríes van recibir diverses compenses económiques amás de la posibilidá de publicación.

Na estaya d’investigación tán convocaos un concursu de recoyida de material toponímico oral, ensin asoleyar, qu’abarque la totalidá d’una parroquia, grupu de parroquies o Conceyu, siguiendo’l modelu afitáu na coleición «Toponimia» asoleyada pola Academia y otru pa recoyida oral de léxicu asturianu ensin asoleyar, dotaos entrambos con 600 euros.Dotáu cola mesma cantidá hai otru premiu pa trabayos d’investigación llingüística ensin asoleyar que tenga aspeutos llingüísticos o sociollingüísticos d’Asturies como oxetu d’estudiu, dende una perspeutiva sincrónica o diacrónica. El trabayu pue cincar aspeutos xenerales o específicos. Tamién un trabayu d’investigación sobre lliteratura asturiana (oral o escrita).

Tocante a la estaya lliteraria tán dientro la convocatoria fecha pola Academia en mayu de 2005 les categoríes de Llectures pa rapazos, Teatru, Creación Lliteraria ‘Llorenzo Novo Mier’, Recoyida de Material Lliterario Escrito ‘Federico Fierro-Botas’ y Recoyida de Material Lliterario Oral, toos ellos dotaos con 600 euros, a nun ser el premiu de recoyida de material oral que lo ta con 300.

El premiu de curtios cinematográficos ta dotáu con 1.200 euros y empobínase a trabayos presentaos en formatu DVD que qu’a xuiciu del xuráu tenga más valir llingüísticu, teniendo siempre en cuenta, amás la calidá artística de los cortometraxes presentaos.

Les bases completes de la convocatoria del 04/05/05 pueden consultase na páxina institucional de l’Academia de la Llingua.

Bases de los concursos de l’Academia de la Llingua 2006

L’Ayuntamientu de Siero acaba de publicar oficialmente les bases pa la convocatoria d’una plaza de responsable del Serviciu de Normalizacion Llingüística. El puestu ye de calter temporal con posibilidá de que se convierta en permanente a la fin del contratu y los candidatos han tener el títulu d’Espertu o Especialista en Filoloxía Asturiana.

Los candidatos tamién pueden concurrir col títulu de Llingua Asturiana pa Enseñantes de la Conseyería de Cultura o los tres cursos de l’Academia de la Llingua. Nes bases especifícase que les funciones del futuru responsable de Normalización Llingüística de Siero van ser, ente otres, la traducción de los testos administrativos y propuestes polítiques al asturiano, asina como desarrollar actividaes de normalización llingüística nel ámbitu del conceyu.

El calter temporal de la plaza ta condicionáu pola financiación de la Oficina de Política Llingüística del Principáu y nel casu de qu’a la fin del contratu, s’entamare la provisión del puestu con calter permanente, había tar supeditáu a condicionada “a la efectiva esistencia de créitu presupuestariu pa facer frente a les obligaciones que del mesmo se derivaren”.

Les bases pueden consultase nel BOPA correspondiente al 03/12/2005 o nel tablón d’anuncies del Conceyu de Siero.

El xuráu del Premiu Juan Uría Ríu 2005 na so XXVI edición, depues d’analizar los trabayos presentaos a concursu decidió dexalu ermu, porque, sigún manifestó, “anque suponen una gran aportación a la cultura asturiana, nengún d’ellos algama la excelencia na investigación que caracteriza esti premiu”.

El xuráu, que se reunió na tarde d’ayeri na se de la Conseyería de Cultura, y que tuvo presidíu pol director xeneral de Promoción Cultural y Política Llingüística, Carlos Madera, taba compuestu por Julia Barroso Villar, Mª Josefa Sanz Fuentes y Serafina García García, actuando como secretaria Olga Casares Abella.

El premiu Juan Uría Ríu convoca a concursu tou tipu d’obres que afonden nel conocimientu de la cultura, la sociedá o la historia d’Asturies.

L’Ayuntamientu de Mieres convoca un añu más el so Premiu de Poesía Teodoro Cuesta dotáu con cuatro mil euros y la publicación de la obra ganadora. La edición númberu quince del certame coincide nesta ocasión col 176 aniversariu del nacimientu del escritor que da nome al premiu.

El plazu de pieslle pa l’acoyida d’orixinales coincide cola fecha del aniversariu de Teodoro Cuesta el prósimu 9 de payares. Hasta agora algamaron el premiu convocáu pol Area de Cultura de Mieres los nomes más representativos de la lliteratura asturiana actual, ente ellos Berta Piñán, Xuan Bello, Lourdes Álvarez, Antón García, Martín López-Vega, Pablo Antón Marín Estrada, Vanessa Gutiérrez o la última ganadora, l’académica Marta Mori d’Arriba.

El Centru de Cultura Antigu Institutu de Xixón va ser la sé d’un cursu d’Evaluación de Proyectos de Cooperación al Desarrollu patrocináu pola Axencia Asturiana de Cooperación y l’Ayuntamientu de Xixón. El ciclu formativu va empobináu a profesionales y voluntarios d’organismos encargaos de xeres d’ayuda a países en víes de desenvolvimientu.

El cursu ta programáu como parte del ciclu formativu sobre Proyectos de Cooperación al Desarrollu, la Coordinadora de ONGD del Principáu d’Asturies, y va celebrase los prósimos díes 11 y 12 de payares. HEGOA, l’Institutu de Estudios sobre Desarrollu y Cooperación Internacional de la Universidá del País Vascu va ser l’encargáu d’impartir el cursu que ta destináu al personal contratáu o voluntariu d’asociaciones, fundaciones, ONGD, administraciones públiques, etc. y persones interesaes na cooperación al desarrollu que pretendan adquirir conocimientos básicos sobre la evaluación de proyectos.