Convocatories

Ta acabante d’entamar el plazu pa presentar trabayos al Premiu Federico González-Fierro Botas, galardón que la Conceyalía de Cultura Tradicional y Llingua Asturiana del Conceyu de Xixón organiza n’alcordanza de la figura de González-Fierro Botas y pa fomentar la investigación nos siguientes ámbitos: cultura asturiana, cultura rusa o eslava, memoria social y colectiva de los pueblos rusu y asturianu y memoria social y colectiva de Xixón.

Na presentación d’esta primer edición del premiu, que se cellebró’l pasáu vienres 29 de payares na Sala de Prensa del Ayuntamiento de Xixón participaren Xaime Fierro, sobrín de Federico González-Fierro Botas ya’l concejal de Cultura Tradicional y Llingua Asturiana de Xixón, Jesús Montes Estrada.

Güei xueves, día 22 d’avientu, na casa la cultura de La Felguera, va presentase la marcha pola oficialidá que va salir de Llangréu. L’actu va entamar a les 18 hores y va cuntar cola presencia de Fernando Ornosa. La manifestación va ser el próximu sábadu a les seis de la tarde.

El Conceyu Abiertu pola Oficialidá presentó ayeri nel Atenéu Obreru de Xixón, la manifestación pola oficialidá que va celebrase esti sábadu 24 de payares. Na presentación, Fernando Ornosa, voceru de la organización, enseñó’l petu que van llevar los xixoneses que vaigan de marcha hasta Uviéu, de color encarnáu.

La manifestación entama a les seis de la tarde y la marcha de Xixón sal de la gasolinera de Foro, na Avenida Constitución, a les nueve y media la mañana. Pa los que nun puedan caminar tanto, a les cuatro la tarde van poder xunise a la marcha en Llugones. Ornosa comentó na rueda de prensa qu’esperen alredor de 15.000 persones na manifestación d’esti sábadu n’Uviéu.

El teatru de La Felguera, en Llangréu, va acoyer a les ocho la tarde l’actuación del grupu folk-rock “Na Zona” dientro del ciclu “Música del sieglu XX”. El grupu va presentar nesta actuación el so segundu discu “Llucia”. El grupu fórmenlu Moisés Álvarez, Diego Santirso, José Carlos, Raquel Castro, Nano, Luis Miguel “Otis” y Daniel Alonso.

Como yá ta anunciao dende va delles selmanes, el Conceyu Abiertu pola Oficialidá, plataforma qu’axunta a más de doscientes entidaes culturales, sociales, polítiques y sindicales d’Asturies, entama pa esti sábadu 24 de payares una gran manifestación n’Uviéu y los organizadores tán faciendo por algamar un oxetivu claru, convertila “na mayor manifestación de la hestoria del movimientu de reivindicación llingüística n’Asturies”.

La manifestación d’esti añu va tar precedida pela mañana de seis marches a pie dende Xixón, Avilés, La Pola Siero, La Felguera, Mieres y Trubia. Toles marches van llegar a la plaza de la Estación del Norte d’Uviéu a les 18:00, que ye cuando entama la manifestación.

La reforma estatutaria qu’agora tán tratando les fuercies parllamentaries asturianes tien que ser, pa los organizadores “el momentu de reconocer d’una vez una reivindicación social pendiente n’Asturies dende va más de trenta años: la oficialidá de la llingua asturiana -y del gallego-asturianu nel so ámbitu- que garantice que naide sea discrimináu pola llingua qu’use”.

L’Ayuntamientu de Llangréu, al traviés del Área de Política Llingüística, ufierta dos cursos de llingua asturiana. Los cursos, ún d’aniciu y otru d’afondamientu, van empezar a dase’l día 12 de payares y acabarán pa mediaos d’avientu. Estos cursos de llingua asturiana qu’ufierta l’Ayuntamientu de Llangréu van ponese na Casa la Cultura de Sama y van tener llugar los llunes, martes y xueves n’horariu de 19:00 a 21:00 hores.

Los cursos son de baldre y tienen un llargor de 30 hores, les persones qu’asistan y superen los cursos recibirán el so correspondiente certificáu acreditativu. P’apuntate a los cursos o pa pidir más información sobre ellos pues facelos llamando al Serviciu de Normalización Llingüística del Ayuntamientu de Llangréu (tfnu: 985678158) o mandando un corréu electrónicu a llingua@ayto-langreo.es

L’asociación Escontra’l Raigañu festexa la seronda n’Avilés y failo dende’l 9 y hasta l’11 de payares, nuna carpa puesta en Les Meanes d’Avilés. Les Xornaes del Maíz, la Sidra y el Pote ye una de les actividaes principales y va entamar el vienres a les 19:00 hores con un amagüestu con música en vivu. Va haber tamién una muestra y taller de bailles a cargu d’Escontra’l Raigañu y Na Señardá. Pa rematar el día, a les 23:00 hores, actuación del grupu Merlín.

El sábadu va abrise a les 11:30 hores con oficios tradicionales, un puestu-chigre con productos de la seronda y música en vivu. A la una y media la tarde van dase IV Concursu de llambiotaes de Seronda. Dempués d’una xinta popular, a les 16:30 hores va haber una competición de xuegos tradicionales y un pasacáis de la Plaza’l Carbayedo a Les Meanes. Darréu, actuación de la banda de gaites ‘Villa d’Avilés’, la V Esfoyaza y, a les 22:00 hores, la Nueche de Danza na Seronda, con un conciertu de La Bandina.

El domingu a les doce y media la mañana, va celebrase’l IV Festival d’Asturianía n’Avilés cola tonada de Mariluz Cristóbal Caunedo y Horacio Huerta, los monólogos de Pandiella y la gaita de Fonsu Fernández. La V Seronda n’Avilés, inclúi, amás, la esposición ‘Formes de vistir, maneres de vivir’, abierta hasta’l 23 de payares.

La empresa editora d’Asturnews.com, Asturnet, y p’ayudar al espardimientu de la lliteratura infantil y xuvenil n’Astuires, convoca’l Premiu ‘Asturnews’ de Lliteratura Infantil y Xuvenil cola ayuda de la Conseyería de Cultura del Principáu d’Asturies. Al concursu lliterariu pueden presentase toles persones interesaes, soles o en grupu, ensin llímite d’edá, con obres curties de lliteratura infantil y xuvenil en llingua asturiana, yá seyan noveles, recopilaciones de cuentos, poemes o obres de teatru.

Los trabayos, nun siendo la poesía, nun pueden tener menos de trenta páxines DIN A-4 o foliu mecanografiaes a doble espaciu per una plana sola. Han ser inéditos y ensin premiar n’otros concursos. El premiu tien una dotación de 1.000 euros en conceptu de derechos d’autor pa caúna de les categoríes (1.000 euros pa la categoría de lliteratura infantil y 1.000 euros pa la categoría xuvenil) y la so publicación editorial. El xuráu pue partilu, conceder accésit, recomendar la publicación d’obres o dexalu desiertu según la calidá de los trabayos presentaos.

Les obres, firmaes o baxo plica, han mandase per corréu o presentase en mano por triplicao n’Asturnews, na cai Martínez Vigil (La Noceda) 15, baxu (Uviéu), enantes del 9 de payares de 2007. Pa más información, pue escribise a inaciu@asturnet.es

Ediciones Trabe ta acabante d’abrir el plazu pa presentar obrea al Premiu de Narraciones Trabe 2007. Un premiu que convoca cola ayuda de la Conseyería de Cultura del Principáu d’Asturies y que va alternando cada añu col Premiu Montesín de Lliteratura Xuvenil, que ganó na convocatoria de 2006 Adolfo Camilo Díaz, cola novela Khaos.

El Premiu de Narraciones Trabe tien yá un prestixu bien importante, magar de que per unos años nun se convocacra. Nel 2005 ganó Xandru Fernández cola novela La banda sonora del paraísu, yá publicada. El premiu d’esti añu ta nos 3.000 euros y pueden presentase noveles o volúmenes de cuentos hasta’l 30 de payares.

BASES:

Primera: puen participar toles persones interesaes, soles o en grupu, ensin límite d’edá, con obres de narrativa en llingua asturiana, yá seyan noveles, recopilaciones de cuentos o cualesquier otra forma posible de narración.
Segunda: los trabayos presentaos nun tendrán menos de sesenta páxines DIN A-4 o foliu mecanografiaes a doble espaciu per una sola llana (1.800 caracteres). Han ser ineditos y han tar ensin premiu n’otros concursos como conxuntu, quier dicise, puen presentase obres de les qu’apaecieren fragmentos publicaos, o recopilaciones de cuentos onde hebia dalgún editáu.
Tercera: el premiu tien una dotación de 3.000 euros en conceptu de drechos d’autor, la so publicación dientro de dalguna de les colecciones de la casa editorial y una escultura orixinal de María Jesús Rodríguez realizada a costafecha pal premiu. El xuráu pue partilu, conceder accesit, recomendar la publicación d’otres obres o dexalu desiertu según aconseye la calidá de los trabayos presentaos.
Cuarta: les obres han mandase, per correu o en mano, en cuatro copies a Ediciones Trabe, S. L., c/ Padre Buenaventura de Paredes, 4, 33001 d’Uvieu, enantes de les 24 hores del día 30 de payares de 2007, faciendo constar la siguiente lleenda: PREMIU DE NARRACIONES TRABE 2007. Puen presentase de dos xeitos: firmando col nome, dirección y telefonu o baxo plica, quier dicise, figurando dientro d’un sobre zarráu los datos del autor y fuera’l títulu de la obra presentada y l’alcuñu col que se presenta, d’habelu.
Quinta: el xuráu tará formáu por persones relacionaes col ámbitu de la lliteratura asturiana. Como secretariu o secretaria, con voz pero ensin votu, actuará un representante d’Ediciones Trabe.
Sexta: al fallu del xuráu nun se pue retrucar. Fairáse públicu enantes del día 31 de xineru de 2008. El xuráu queda autorizáu a abrir la plica de les obres premiaes y de les que recomiende pa publicar. Pal casu de les obres que nun reciban premiu económicu, Ediciones Trabe tien que se poner d’alcuerdu col autor o autores enantes d’entamar la so edición.
Setima: los trabayos que nun se premien volveránse a los autores, en pidiendolos estos, nos tres meses siguientes a que se dea conocencia del fallu. Desque pase esti plazu ensin que naide los reclame pasarán a formar parte del archivu editorial.
Octava: presentase al premiu supón tar d’alcuerdu coles bases. Les cuestiones que se plantexen y que nun tuvieren establecíes nestes bases podrá resolveles el xuráu.

Uvieu, 24 d’ochobre de 2007

El Xardín Botánicu Atlánticu acueye una llectura poética, una iniciativa que ta dientro del ciclu ‘Lleer el paisaxe’. Nesti casu los poetes convidaos van ser Herme G. Donis, Humberto Gonzali, Graciela Litvak, Pablo Rodríguez Medina, Pilar Sánchez García. Tolos visitantes van recibir un diariu y una consumición de baldre. L’actu va celebrase dende les 12:30 de la mañana.