Convocatories

Los alcaldes de los seis conceyos de la mancomunidá “Comarca la Sidra” van asistir mañana martes a la presentación de dos campañes de promoción del asturianu nel comerciu y la hostelería de la so mancomunidá.

La presentación va facese a les once la mañana na so sede de Paraes 47, en Nava. Amás de los alcaldes, van tar presentes, Xermán Fierro, responsable del serviciu de normalización de la comarca, la Xefa de la Oficina de Política Llingüística del Gobiernu d’Asturies y un representante de l’Academia de la Llingua Asturiana.

Poemes n’asturianu o castellanu, d’autores con non más de 16 años, que sían escolinos en dalgún institutu o escuela de los conceyos d’Ayer, Casu, Llangreu, Llaviana, L.lena, Mieres, Morcín, La Ribera, Riosa, Samartín del Rei Aurelio y Sobrescobiu. Estes son les premises que tienen que cumplir tolos interesaos n’apuntase al la IX edición del Premiu Alberto Vega de Poesía.

Les obres tienen d’entregase nel Centru Cultural y Recreativu Belarmina García (La Nava, 40, 33939 Llangreu), encargaos d’organizar el concursu, embaxo’l sistema de plica y axuntando tres copies enantes del 10 de mayu.

El ganador va recibir 600 euros y los dos finalistes 300. Amás, la escuela o institutu onde estudie’l poeta premiáu va recibir 200 euros en material didácticu y llibros

La conferencia del filólogu y profesor de la Universidá d’Uvieú va celebrase dientro del marcu del XXVI Congresu de l’Asociación Española de Llingüística Aplicada (AESLA), qu’organiza la Universidá d’Almería y que tuvo ayeri como primer convidáu asturianu al filólogu Xulio Viejo.

La comunicación de D’Andrés títulase “La oficialización de la toponimia tradicional d’Asturies: una peculiar experiencia en política llingüística”, y nella va poder falar en primer persona d’un tema que conoz bien de la so anterior etapa como director de la Oficina de Política Llingüística d’Asturies.

Les Mocedaes Socialistes d’Uviéu convoquen el premiu de poesía “Joventense” Ángel González, na alcordanza del poeta asturianu. Col envís d’afalar la creatividá de la xente mozo entamen dende esta organización moza un concursu de poesía nel que cada autor d’ente 14 y 35 años pue presentar un poema por persona, ensin llímite d’estensión y escritu en castellán o n’asturianu.

Los trabayos han mandase a la Casa’l Pueblu, asitiada na cai Xovellanos 19 d’Uviéu o pel corréu lletrónicu a la dirección info@jsoviedo.org

Los dos premios van ser dos cheques regalos de 60 y 30 euros respectivamente pal consumu na FNAC. El fallu va facese’l 5 de mayu.

Ta acabante d’entamar el plazu pa presentase al “XV Concursu de Cuentos pa rapacinos y mozos d’Asturies”. Esti concursu, empobináu a fomentar la creación lliteraria ente los escritores xóvenes, ta organizáu pola asociación cultural “El Portón” xunto cola asociación xuvenil “El Tragaluz” y la Fundación Docente de Mineros Asturianos. Los organizadores marcaron el llunes 28 d’abril como fecha topa pa la entrega d’obres.

Tolos participante habran de presentar escritos ineditos y en llingua asturiana. La temática llibre y van poder participar con toles obres que consideren oportunes. No que cinca a los premios va haber 100 euros en llibros pal ganador na categoria de primaria, 150 euros en llibros pa la de secundaria, módulos y bachilleratu y 300 euros na modalidá de 19a 30 años.

Los trabayos han d’unviase a nome de l´asociación cultural “El Portón ” al apartáu 140 d´Uvieu, indicando´l nome del concursu y la categoría que se quier participar. El trabayu tien que mandase firmáu col nomatu, xunto con una plica n´un sobre zarráu onde apaezan los datos personales del escritor: nome, apellíos, edá y dirección (cai, númberu, códigu postal, localidá).

Mocedaes Socialistes d’Uvieu acaba d’abrir el plazu pa presentase a un nuevu concursu lliterariu, que naz col enfotu de fomentar el talentu creativu nun municipiu onde nun sobren esti tipu d’iniciatives, según informaren los responsables d’organización nuna nota de prensa. El concursu ta dedicáu a la creación poetica y lleva’l nome del poeta Ángel González, nun homenaxe tres la reciente muerte del escritor ovetense.

Van admitise a concursu, obres de persones d’ente 14 y 35 años, que se presenten enentes del de mayu, inclusive. El poema que se presente pue tar escritu n’asturianu o en castellanu y nun va importar la extensión que tenga. Les obras habrán d’unviase per correu postal a C/ Jovellanos 19, 33003, Uvieu, o por e-mail a info@jsoviedo.org. Esta primer edición del concursu va repartir un vale regalu de la FNAC de 60€ pal ganador, y un de 30€ pal segundu.Los ganadores van conocese’l 5 de mayu y la entrega de premios va tener llugar el día 9 del mesmu mes.

El Muséu Antón de Candás va esponer la muestra “La muyer y l’aurelianismu”. La esposición va celebrae nel mes de xunu y va dedicase a la obra del artista xixonés dedicada a la muyer. Amás, esta esposición va incluyir una novedá, la primer escultura del artista xixonés que s’exhibe públicamente.

La escultura ye una pequeña figura femenina de 34,3x8x6,5 centímetros, fabricada en madera de castañal y encerada. Una esculta que l’autor fizo alredor de 1955.

Otru de los atractivos de la esposición van ser unes 35 obres, ente óleos, gouaches y bocetos, ente los que tán la pieza que servirá como cartelu anunciador, una obra de 1938.

La esposición va completase con una conferencia al rodiu de la tema de la muestra, que va impartila l’11 de xunetu l’especialista asturianu Javier Barón Thaidigsmann, responsable del departamentu de pintura del sieglu XIX nel Muséu del Prado.

El Centru Asturianu de Madrid, un de los más activos del Estáu, ta acabante de convocar una nueva edición del concursu de rellatos curtios en llingua asturiana “Xose Álvarez”. El plazu pa presentar los trabayos, que tamien puen tar escritos en gallego-asturiano, fina’l 30 de setiembre. El fallu del xuráu va facese públicu’l 30 d’ochobre, durante les cellebraciones del día de les Lletres Asturianes.

Condición fundamental pa presentase al concursu ye que’l trabayy presentáu recueya temática rellacionada con Asturies o cola emigración asturiana y que tenga ente diez y venti fueyes d’estensión. El premiu pal ganador ye de 1.500 euros, amás de la espublización de la obra pol Conseyu de Comunidaes Asturianes. Los volúmenes tienen de unviase al Centru Asturianu de Madrid (C/Farmacia númberu 2; 28004), apuntando nel sobre la referencia del concursu de rellatos.

El Conceyu de Bimenes ta acabante d’abrir el plazu pa presentar obres a la undecima edición del Concursu de Cuentos pola Oficialidá del Asturianu. Hasta’l vienres 6 de xune van poder presentase los trabayos (tiene que tar escritos n’asturianu, nun pasar de 10 folios y ser orixinales) na Casa la Cultura de Bimenes (Santuyano, s/n. CP 33527 – Bimenes).

El ganador va recibir 800 euros, el segundu clasificáu 500 y 350 el terceru. El xuráu va fallar el ganador y entregar los premios el vienres 4 de xunetu coincidiendo cola cellebración de la Fiesta de la Oficialidá de la Llingua Asturiana.

Dientro de los ciclos d’esposiciones abiertu por mor del centenariu cuartu de la Universidá d’Uviéu va abrise mañana una esposición que va repasar los cuatrocientos años de la institución educativa asturiana.

La inauguración va ser a les 19:00 hores nel Edificiu Hestóricu de la Universidá d’Uviéu, asitiáu na capital asturiana.