Convocatories

El Club la Rosca Surf & Skate de Ribeseya entama esta actividá pal 3 d’abril, dende les 16 hores. Consiste nun baxada llibre en skate y long skate (patín llargu), na Carretera del Faru de Ribeseya. Pa poder realizar la baxada, la carretera va permanecer cerrada al tráficu mientres tola baxada.

La organización esplica que “nun ye una prueba competitiva” y lo que se busca “ye poder esfrutar de la baxada nun llargu percorríu, alredor d’un quilómetru, ensin tráficu y con un paisaxe espectacular” amás de compartir el día con toles persones aficionaes a esti deporte.

Una vegada rematada la baxada ufiértase una espicha de baldre na Plaza d’Abastos de de la villa, siguida de conciertos, monólogos y “Dj”, tamien de baldre. El llugar de salida de l’actividáye l’aparcaderu asitiáu nel final de la Sablera de Santa Marina.

Pa participar hai que ser mayor d’edá o tener una autorización de los tutores llegales, amás de llevar equipu de protección personal (cascu, rodiyeres).

Más información nel Club La Rosca Surf & Skate, asitiáu na Plaza de la Ilesia 4, baxu; o nos teléfonos 699 283 443 (Susana) y 689 554 629 (Obama)

Hasta’l 5 d’abril pueden presentase tovía cuentos pa la sétima edición del concursu “Ello yera una vegada…”, nel que puen participar toa mocedá, d’ente 14 y 35 años. Los rellatos puen tar en castellán o n’asturianu y nun tienen que pasar de diez fueyes, con tema llibre, anque valorándose, la orixinalidá y el que tean venceyaos colos intereses de la mocedá.

El premiu tien dos categoríes: Pa mozos de 14 a 18 años, con 100 euros de premiu, y pa mozos de 19 a 35 años, con 250. Les obres han unviase a la Oficina d’Información a la Mocedá. Edificiu CIDAN. C/ Joaquín Iglesias s/n. 33980 La Pola Llaviana.

Bases de la convocatoria

L’asociación cultural Colectivo Misiva, de La Pola Siero, convoca’l V Concursu de Microrrellatos ‘Lleendes Urbanes’, nel que se pue participar con tema llibre d’un máximu de venticinco llínees, en castellán o n’asturianu. Pudiendo presentase hasta trés obres

Han mandase seis copies del testu, firmaes con nomatu, y pol sistema de pliques, incluyendo datos y copia’l DNI. Los orixinales han mandase al apartáu de Correos 113 de La Pola Siero, 33510 Asturies.

El plazu termina’l 10 de xunu. El certame va otorgar dos premios, de 700 y 300 euros, y éstos van sabese’l día 12 de xunu de 2010, entregándose’l 16 cola presencia del ganador. El xuráu va tar formáu por Juan Carlos Hevia, Sidoro Villa, Daniel García Granda y Javier Villanueva.

El Conceyu de Pravia convocó una edición nueva del Concursu de Microrrellatos del Baxo Nalón-Narcea, que busca los meyores testos basaos na pesca’l salmón. Con ésta, el certame llega a la so sesta edición, con dos categoríes, “esguín” pa neños, y “salmón” p’adultos.

Los testos van poder presentase nel rexistru’l conceyu hasta mediaos del mes d’abril, y la entrega, tendrá llugar en Cornellana nel desenrrollu de la Feria Asturpesca, el día 2 de mayu.

Bases completes

La editorial asturiana Espublizastur va tar, a lo llargo del mes de marzu, a la gueta de trabayos y propuestes pa publicar na collecha de 2010-2011. Dende la editorial aseguren que, de ser interesantes, “van asoleyase de xuru, tengan o nun tengan subvención”.

La editorial anunció tamién que ta preparando delles novedaes editoriales pa rematar la collecha de 2009-2010 y preparando los proyectos nuevos pa la de 2010-2011. Espublizastur anima a los autores qu’escribe n’asturianu a unviar les sos obres a la editorial, disponiendo pa ello del corréu lletrónicu espublizastur@hotmail.com

Espublizastur tien abiertes yá delles coleiciones d’Ensayu, Narrativa, Investigación o de tornes y va abrir proximamente la de poesía. Les colecciones lliteraries van tar coordinaes pol escritor Xuan Carlos Crespos y la d’ensayu pol hestoriador Antón Martínez.

El Club de Cómics de Grau celebra esti miércoles, 3 de marzu, una sesión Especial con Jorge Ivan Argiz. Va ser a les 19:30 hores y nel actu, abiertu a cualesquier persona interesada, va comentase’l cómic “Engurries” de Paco Roca (Premiu Nacional de Cómic de 2008), pero tamién, aprovechando la visita de Jorge, va falase del mundu del cómic en xeneral.

Jorge Iván Argiz (Monforte de Lemos, 1974) ye Coordinador d’Actividaes Culturales nel Conceyu d’Avilés y un referente nel mundu de los cómics n’España. Fundó nel so día, xuntu con Andrea Parissi, l’agora extinta editorial Dulde. Ye director de les Xornaes de Cómic d’Avilés y del Festival de Curtios de la mesma ciudá, coordinador lliterariu de la Selmana Negra de Xixón, arriendes de collaborar con otros festivales y salones como’l Salón del Cómic de Guetxo, el Unicomic d’Alicante o la Selmana de Cine Fantásticu y de Terror de Donosti. Foi amás codirector de la revista “Dentro de la Viñeta” y anguaño ye l’editor de la llínia Siurell de la editorial mallorquina Dolmen.

Güei, xueves 25, a les 19:30 hores, nel Foro Abierto de la llibreria Cervantes d’Uviéu (C/ Doctor Casal, 9), Miguel Ángel Fueyo Olmo va presentar el llibru “El cultivo de la Faba Granja Asturiana”, nel que l’ inxenieru técnicu agrícola da a conocer tolos detalles, problemes y soluciones del cultivu de la faba asturiana más conocida.

Hasta mañana, 29 de xineru ta abiertu’l plazu pa presentar les solicitúes a les dos beques de formación que convoca la Oficina de la Llingua de Xixón. Cola iniciativa quier facilitase la formación en traducción al asturianu y en llevar alantre actividaes de normalización llingüística.

Los llabores que van facer les persones escoyíes son la traducción y corrección de documentos; l’estudiu, la planificación y execución de mecanismos de promoción y espardimientu del asturianu nos servicios públicos; la collaboración nel diseñu y execución de programes y campañes de promoción del asturianu; y trabayos de campu y organización de talleres y actividaes infantiles.

Pa optar a les beques pídese tener una llicenciatura o una diplomatura y el títulu d’Especialista o Espertu en Filoloxía asturiana. Cada beca ta dotada con seis mil euros. Les instancies pueden presentase hasta’l 29 de xineru nel Rexistru Xeneral de la Fundación Municipal de Cultura, Educación y Universidá Popular de Xixón, nel Rexistru Xeneral del Conceyu de Xixón o nos auxiliares.

Bases completes de la convocatoria

La Fundación Asturies XXI ta acabante abrier el plazu pa presentar peticiones pa una Beca d’Investigación y Periodismu sidreru destinada a escritores asturianos, col envís de facer práctiques en redacciones de la revista La Sidra demientres un periodu máximu de 2 años con una asignación mensual de 800 euros.

L’oxetivu d’estes beques céntrase en fomentar la especialización práctica n’investigación y periodismu nel ámbitu de la sidra (producción, consumu, hestoria, cultura venceyada…). La solicitú ha d’unviase a la cai Decano Prendes Pando, 11, Xixón, embaxo les bases que puen consultase nesta páxina.

Bases completes de la convocatoria

L’asociación El Fueyu, que tien pur oxetivu’l fomentu y la difusión de la llingua lleonesa o asturiana entama un “Cursu de llingua Llïonés”, col sofitu del Conceyu de La Bañeza.

Les clases van entamar el llunes 25 d’esti mes, nel Centru Cultural Infanta Cristiana, cola presentación a las 19:00 hores. Pa más información ha llamase a los teléfonos 620 051 066 y 605 844 031.