Convocatories

La FNAC de Parque Principáu (Siero) va acoyer la presentación de “Yoni y yo”, llibru de cuentos de Pablo X. Suárez nel qu’axunta un puñáu de rellatos protagonizaos, na so mayor parte, por xente mozo, de gustos y preocupaciones urbanes o periurbanes, y un auténticu desfile de fauna de polígonu y after, ensin cayer nunca nel tópicu y fuxendo tanto de l’apoloxía como de la condena moral. Un llibru sorprendente, d’estilu descaráu y directu, que yá se facía esperar. La presentación va celebrase’l viernes 2 de xunetu a les 19:30 hores.

Como ye vezu na colección mecánica popular, la fotografía de la cubierta ye obra de Jandro Llaneza, y el graffiti col que ta escritu’l títulu fíxolu pa la ocasión OCELT. Nel interior, cada cuentu va precedíu d’una ilustración ad hoc, por obra tamién de Jandro Llaneza.

Pablo X. Suárez ye escritor, filólogu y trabaya como responsable del Serviciu de Política Llingüística de la Comarca de la Sidra. Collaborador de revistes Lletres Asturianes o Formientu, tien espublizáu un poemariu tituláu “Asturiana Beat”.

L’Asociación Cultural Zamorana Furmientu ta acabante convocar esti concursu que tien por oxetivu la recoyida del máximu númberu de pallabres y espresiones característiques de los pueblos y contornes de la provincia lleonesa. Puede participar cualesquier persona, ensin distinción de nengún tipu, presentando caún un vocabulariu inéditu.

Los vocabularios tienen de contener polo menos 60 vocablos. Cada vocablu tien de tar definíu con una pallabra o frase, constando la fecha averada de recoyida del material. Los vocabularios participantes nes ediciones anteriores pueden allegar de nuevu nésta, siempres que’l material apurríu contenga delles aportaciones nueves.

Al par de cada pallabra tien d’indicase la llocalidá na que se recoyó, nel casu de que non tolos vocables vengan d’una mesma llocalidá. Si tol material vien de una única localidá, va bastar con indicar una sola vegada’l so nome.

El xuráu va valorar el númberu de vocablos recoyíos (al par d’otres cuestiones), y va tener en cuenta dichu númberu en rellación a la zona o zones nes que se recoyó’l material. Tamién se va valorar positivamente que’l vocabulariu contenga información complementaria de los vocablos o de la fala llocal polo xeneral, como, por casu, frases que exemplifiquen l’usu de los vocables, o información sobre la so vixencia, según la descripción d’estructures llingüístiques propies de la fala local.

Los vocabularios pueden ser apurríos escritos a mano, n’archivu informáticu de testu (preferiblemente) o impresos en papel. Los materiales presentaos tienen de contener el nome y apellíos del autor de la escoyeta, según el so llugar de residencia y un teléfonu de contactu. Pa concursar va bastar con ponese en contactu cola asociación cultural Furmientu al traviés de los teléfonos 669322834 o 695515386, o unviar per corréu ordinariu los vocabularios a l’Asociación Cultural Zamorana Furmientu, na cai Grijalva 6 2u A. 49021 Zamora.

El períodu de recepción de material d’esta quinta convocatoria entiende tol añu 2010. El ganador va recibir un premiu consistente nun llote de llibros. El fallu del xuráu, formáu por socios de l’asociación cultural “Furmientu” y por llingüistes especialistes na materia, va ser comunicáu por escritu a toos los participantes y va ser inapelable. Un fragmentu del vocabulariu ganador va ser publicáu na publicación trimestral de l’asociación: “El Llumbreiru”.

El director de la Semana Negra de Xixón, Paco Ignacio Taibo II, va dar una charra sobre la Semana Negra, esti miércoles, 23 de xunu, a les nueve la nueche n’El Cafetón d’Avilés.

La Universidá abre una bolsa d’empléu pa collaborar temporalmente nel desenvolvimientu d’actividaes docentes a impartir demientres el cursu académicu y el branu, o en cualesquier otra actividá qu’entame La Casa de les Llingües, como pueden ser xeres d’asesoramientu llingüísticu, cursos intensivos de formación llingüística especializada, o xeres de sofitu n’actividaes culturales.

Pídese tar en posesión d’un títulu de Llicenciáu en Filoloxía o equivalente. La bolsa va tener una vixencia de 24 meses, terminando’l plazu’l 10 de xunu, según la convocatoria publicada nel BOPA de 24 de mayu.

La entrega de premios de los concursos 2010, convocaos pola Academia de la Llingua Asturiana, va celebrase’l vienres, 4 de xunu, a les 12:00 nel hotel NH Principado, asitiáu na cai San Francisco, en frente del edificiu hestóricu de la Universidá d’Uviéu.

Ente los premios d’esti añu van tar los de los Concursos d’Investigación (de recoyida de material toponímico oral y d’investigación sobre lliteratura asturiana); Concursu de llectures pa rapazos; Concursu de creación lliteraria, premiu “Llorienzu Novo Mier”; Concursu de recoyida de material lliterario oral; Concursu de Teatru y Concursu de recoyida de material lliterario escrito, o’l premiu “Federico González-Fierro Botas” de recuperación de lliteratura asturiana “escaecida”.

Estos cursos intensivos tienen una duración mínima de dos selmanes y van celebrase tolos llunes a partir del 21 de xunu. L’horariu ye de mañana, mediudía y tarde, de llunes a xueves y d’hora y cuartu a lo menos. Van facese grupos pa tolos niveles y edaes.

Les llingües ufríes son francés, inglés, italianu, portugués y un nivel d’entamu al chinu, árabe y xaponés.

Los interesaos pueden averase hasta la sede de l’asociación, nel 10 de la cai Xeneral Zubillaga d’Uviéu, o llamar al teléfonu 985 237 770.

Les Mocedaes Socialistes d’Uviéu entamen dos concursos culturales colos que pretenden “fomentar la creación artística de les persones nueves”, son el II Premiu de Fotografía, col nome de Cultura Soterraña” y el II Premiu de Poesía.

Nel casu del II Premiu Jovetense de Fotografía pa trabayos fotográficos busquen la semeya “que meyor amuesen cuála ye la realidá cultural que permanez oculta a güeyos de gran parte de la sociedá”, mientres que’l de poesía, quier “fomentar ente la mocedá la poesía como mediu d’espresión personal y artística”. El premiu va cuntar con una categoría en castellán y otra en llingua asturiana.

El plazu de presentación de los trabayos remata’l 5 de xunetu.

Web coles bases completes

El Llar Animación precisa venti monitores de tiempu llibre pa eventu nel que se van llevar a cabo actividad lúdiques dirixíes a neños y families. El trabayu va desenvolvese de xueves a domingu, n’horariu de 10:00 a 14:30h. y de 16:30 a 22:00 h. los meses de xunu a agostu.

El contratu ye por obra o serviciu dende’l 18 de xunu aprosimao. Ente les sos funciones ta’l montaxe y desmontaxe de les zones de xuegu, materiales, atracciones. Información y atención al públicu. Supervisar les zones de xuegu y atender a los participantes.

Esíxese titulación de monitor de tiempu llibre, animador sociocultural o equivalente, según esperiencia previa na realización d’actividaes lúdiques y d’ociu dirixíes a neños, nuevos y adultos y/o atención al públicu.

Los interesaos han mandar currículum con semeya a l’asociación.

Los Conceyos de L.lena y Quirós, tienen abiertu’l plazu pal cartelu de la Fiesta del Corderu, declarada d’Interés Turísticu Nacional, con 600 euros de premiu. Caún de los concursantes presentará como muncho dos cartelos, que sedrán orixinales ya inéditos.

El formatu de presentación será en Din-A3. Almitiránse trabayos a color o en blanco y negro. Nun s’almitirán trabayos unviaos per corréu lléctricu, anque si valdrá la presentación al traviés de sistemes informáticos que valgan pa la obtención de fotolitos. El plazu d’entrega zarraráse’l vienres 11 de xunu. Pa más información pue llamase a los teléfono 985 768 160 y 985 491 157.

http://tematico.asturias.es/juventud/_contenidos/_docs/_pdf/8414_es.pdf

La escuela de tiempu llibre d’Abierto hasta el Amanecer ufierta un cursu pa consiguir el Titulo Oficial Principáu d’Asturies de Monitor de Tiempu Llibre que se va a impartir del 14 Xunu al 16 Xunetu, de llunes a vienres, de 16:00 a 21:00 hores. El ciclu ta formáu por 150 hores teóricu-práctiques y la parte de práctiques ye de 80 hores.

Nel mesmu va falase de pedagoxía del ociu y tiempu llibre, animación sociocultural, perfil del monitor y funciones, educación pa la igualdá, educación intercultural, educación sexual, educación pa la paz, educación medioambiental, prevención de drogues, talleres (de radio, de teatru, de malabares, títeres, de globoflexia), planificación y proyectos, dinámiques de grupu, xuegos y deportes, etc.

El plazu pa inscribise termina l’11 de xunu. Más información na web o nel teléfonu 985 311 211.

Asociación Xuvenil Abierto Hasta el Amanecer