Convocatories

L’Asociación Cultural Zamorana Furmientu ta acabante convocar esti concursu que tien por oxetivu la recoyida del máximu númberu de pallabres y espresiones característiques de los pueblos y contornes de la provincia lleonesa. Puede participar cualesquier persona, ensin distinción de nengún tipu, presentando caún un vocabulariu inéditu.

Los vocabularios tienen de contener polo menos 60 vocablos. Cada vocablu tien de tar definíu con una pallabra o frase, constando la fecha averada de recoyida del material. Los vocabularios participantes nes ediciones anteriores pueden allegar de nuevu nésta, siempres que’l material apurríu contenga delles aportaciones nueves.

Al par de cada pallabra tien d’indicase la llocalidá na que se recoyó, nel casu de que non tolos vocables vengan d’una mesma llocalidá. Si tol material vien de una única localidá, va bastar con indicar una sola vegada’l so nome.

El xuráu va valorar el númberu de vocablos recoyíos (al par d’otres cuestiones), y va tener en cuenta dichu númberu en rellación a la zona o zones nes que se recoyó’l material. Tamién se va valorar positivamente que’l vocabulariu contenga información complementaria de los vocablos o de la fala llocal polo xeneral, como, por casu, frases que exemplifiquen l’usu de los vocables, o información sobre la so vixencia, según la descripción d’estructures llingüístiques propies de la fala local.

Los vocabularios pueden ser apurríos escritos a mano, n’archivu informáticu de testu (preferiblemente) o impresos en papel. Los materiales presentaos tienen de contener el nome y apellíos del autor de la escoyeta, según el so llugar de residencia y un teléfonu de contactu. Pa concursar va bastar con ponese en contactu cola asociación cultural Furmientu al traviés de los teléfonos 669322834 o 695515386, o unviar per corréu ordinariu los vocabularios a l’Asociación Cultural Zamorana Furmientu, na cai Grijalva 6 2u A. 49021 Zamora.

El períodu de recepción de material d’esta sesta convocatoria entiende tol añu 2011. El ganador va recibir un premiu consistente nun llote de llibros. El fallu del xuráu, formáu por socios de l’asociación cultural “Furmientu” y por llingüistes especialistes na materia, va ser comunicáu por escritu a toos los participantes y va ser inapelable. Un fragmentu del vocabulariu ganador va ser publicáu na publicación trimestral de l’asociación: “El Llumbreiru”.

Sigue abiertu’l plazu de presentación d’orixinales a la V edición del Concursu Semeyes La Sidra, pa obres rellacionaes cola sidra, la mazana y los sos derivaos. Trátase d’un concurus abiertu a profesionales y aficionaos, que nesta quinta edición perfila daqué más les sos bases al oxetu de meyorar la convocatoria. El plazu del concursu tará abiertu hasta’l próximu 1 de payares de 2011.

Como na edición anterior presentárense más de 166 fotógrafos con alredr de 744 semeyes, lo que supón tou un ésitu. Los premios tán dotaos con 600 € pa la semeya ganadora (500 € en metálicu y 100 € en llibros), 350 € pal segundu premiu (300 € en metálicu y 50 € en llibros) y 150 € (125 € en metálicu y 25 en llibros) pal terceru.

Arriendes d’ello esti añu habrá un accesit p’aquelles semeyes que tean comu oxetu la Sidra J.R, patrocinador del Concursu y que consistirá en 2 caxes de botelles de sidre d’esti llagar.

El Club de Prensa de La Nueva España en Xixón, allugáu nel salón d’actos del Centru San Eutiquio, a seis metros de la ilesia de San Pedro, nel barriu Cimavilla, va acoyer el próximu xueves 30 de xunu de 2011, a les 20 hores, la conferencia: “Rexonalismu, federalismu y asturianismu, 1876-1936”, a cargu de Javier Cubero de Vicente. Presentando al autor va participar nel actu’l periodista y escritor Inaciu Galán.

La Tertulia Pachín de Melás retoma la so actividá con un alderique al rodiu d’un de los temes que más se ta cuestionando nos últimos meses, la presente Llei Electoral. El profesor de Drechu Constitucional de la Universidá d’Uviéu, Miguel Presno; l’hestoriador y analista políticu, Faustino Zapico y l’investigador nel Departamentu de Psicoloxía (Psicoloxía Social) de la Universidá d’Uviéu y participante de l’Acampada d’Uviéu, Daniel Ripa; van aldericar sobre les deficiencies y posibilidaes de reforma que presenta esta Llei.

La Tertulia va tener llugar esti martes 21 de xunu a partir de les 20.00 hores nel Bar Cantábrico (Cai Muelle d’Oriente, 3, énte los Xardinos de la Reina).

El Club de Prensa de La Nueva España en Xixón, allugáu nel salón d’actos del Centru San Eutiquio, a seis metros de la ilesia de San Pedro, nel barriu Cimavilla, va acoyer el próximu xueves 30 de xunu de 2011, a les 20 hores, la conferencia: “Rexonalismu, federalismu y asturianismu, 1876-1936”, a cargu de Javier Cubero de Vicente. Presentando al autor va participar nel actu’l periodista y escritor Inaciu Galán.

Esti miércoles 15 de xunu, a les 19:30 hores nel Centru Cultura Vieyu Institutu de Xixón, presentaráse’l llibru “Recorriendo las montañas de Asturias II” del caderalgu del IES Rosario Acuña, Lorenzo Sánchez Velázquez. Na presentación van participar Juan Rionda, presidente de la Federación de Montaña y Amador Fernández, expresidente de la Asociación de Montaña Torrecerredo.

Acaba convocase la V edición del Concursu Semeyes La Sidra, pa obres rellacionaes cola sidra, la mazana y los sos derivaos. Trátase d’un concurus abiertu a profesionales y aficionaos, que nesta quinta edición perfila daqué más les sos bases al oxetu de meyorar la convocatoria. El plazu del concursu tará abiertu hasta’l próximu 1 de payares de 2011.

Como na edición anterior presentárense más de 166 fotógrafos con alredr de 744 semeyes, lo que supón tou un ésitu. Los premios tán dotaos con 600 € pa la semeya ganadora (500 € en metálicu y 100 € en llibros), 350 € pal segundu premiu (300 € en metálicu y 50 € en llibros) y 150 € (125 € en metálicu y 25 en llibros) pal terceru.

Arriendes d’ello esti añu habrá un accesit p’aquelles semeyes que tean comu oxetu la Sidra J.R, patrocinador del Concursu y que consistirá en 2 caxes de botelles de sidre d’esti llagar.

Per docenu añu consecutivu, l’Asociación XEGA, colectivu de lesbianes, gais, transexuales y bisexuales d’Asturies, convoca’l so concursu añal de cartelos con motivu del Día Internacional de Lesbianes, Gais, Transexuales y Bisexuales, “Día del Arguyu LGTB”. La tema del cartelu tendrá de faer referencia a la celebración del Arguyu y al lema oficial de la convocatoria asturiana d’anguaño «Nin un pasu atrás nos nuesos derechos».

Los cartelos presentaos van ser trabayos orixinales ya inéditos. Cada concursante va poder presentar cuantos trabayos desee. Va haber un únicu premiu de 300 euros pal cartelu ganador. El concursu va poder declarase ermu.

L’autor o autora del cartelu ganador cederá tolos sos derechos -sacante’l d’autoría- sobre’l cartelu a l’Asociación XEGA, que va editar el trabayu premiáu como cartelu anunciador del Arguyu LGTB 2010 y nel que va incluyir el so propiu logotipu y los logotipos de les instituciones que collaboren con XEGA.

El tamañu del cartelu va ser a lo menos DIN A4 y a lo más DIN A1 y va poder presentase en cuantu colores-y peten al autor. El plazu de presentación de cartelos va rematar el nueve de xunu de 2011, a les 20:00 hores. Los trabayos van unviase o apurrise na sede de XEGA n’Uviéu, Cai Gascona, 12 – 3u, 33001.

Bases completes

Caxastur convoca ocho beques empobinaes a artistes asturianos o residentes que deseen ampliar estudios, dientro de la so especialidá artística, fuera d’Asturies. La dotación de la beca ye de 10.000 euros caúna, y la duración ye d’un añu.

Los estudios a realizar van referise a les distintes modalidaes de les artes: música, artes plástiques y/o visuales, artes escéniques, cine, lliteratura, arquitectura, y demás espresiones artístiques.

El plazu de presentación de la documentación remata’l vienres 10 de xunu.

Bases completes

Nel BOPA de 29 d’abril publícase la convocatoria de sovenciones en visu a fomentar l’usu del asturianu y del gallego-asturianu n’iniciatives particulares, empresariales o asociatives, y en xeneral como vehículu d’espresión cultural. Ente elles alcuéntrense ayudes dirixíes a estudios que, tratando de dalgún tema d’interés, tean redactaos n’asturianu o en gallego-asturianu, o que traten d’estos idiomes nes sos dimensiones llingüística, lliteraria, sociollingüística, musical o cultural en xeneral, independientemente de la llingua en que tean redactaos; ayudes económiques pal desarrollu d’actividaes específiques d’asociaciones y otres entidaes ensin ánimu de lucru que faigan y promuevan actividaes en defensa, promoción y fomentu del asturianu y, nel so ámbitu, del gallego-asturianu; ayudes pa les actividaes d’empreses privaes pa la normalización social del asturianu; ayudes dirixíes a la realización d’actividaes cinematográfiques y de videu de tipu creativu qu’apareyen la normalización y dignificación social del asturianu y, nel so ámbitu, del gallego-asturianu, posibilitando coles mesmes la creación d’un fondu audiovisual n’entrambos los dos idiomes; ayudes a empreses fonográfiques cola fin de promocionar la música n’asturianu o en gallego-asturianu que se faiga en distintos soportes y onde estes llingües tienen que ser l’idioma normal y vehicular de los cantares y de tolos testos impresos o dixitales qu’acompañen a la obra musical; y ayudes a medios de comunicación pa la producción d’espacios onde s’use l’asturianu, o’l gallego-asturianu nel so ámbitu, siempre que l’emplegu contribuya a la normalización y dignificación del usu social de la llingua y seyan espacios configuraos como propios del mediu de comunicación y asumíos por él. L’últimu día pa presentar proyectos ye’l 30 de mayu de 2011.

Bases completes espublizaes nel BOPA