Convocatories

El Gobiernu d’Asturies convocó nel BOPA les sovenciones pa contratación per parte d’asociaciones. L’últimu día pa presentar los proyectos ye el 21 d’abril de 2012. El Conseyu de la Mocedá del Principáu d’Asturies ufre asesoramientu a les asociaciones.

Información completa de la convocatoria

El Conceyu de Bimenes ta acabante convocar el XV Concursu de Cuentos pola Oficialidá del Asturianu. Los cuentos que se presenten al certame han de tar redactaos en llingua asturiana y nun pasar de les diez fueyes, mecanografiaes a doble espaciu y per una sóla cara. El plazu de presentación de trabayos fina’l 30 de mayu. L’apertura pliques tendrá llugar el 26 de xunu y l’actu institucional d’entrega premios cellebraráse, como ye vezu, nos primeros díes del mes de xunetu.

L’importe económicu de los premios na presente edición son: 700 € pal primeru, 450 € pal segundu y 300 € pal terceru. Los cuentos, de los qu’hai que presentar l’orixinal, trés copies y una copia más en versión informática, han unviase a la direición que vien darréu: Ayuntamientu Bimenes. Martimporra, e/n. 33527 – Bimenes.

La Universidá d’Uviéu convoca l’III Premiu d’Investigación “Amparu de Drechos y Llibertaes”. El premiu, que va poder ser declaráu desiertu, ta dotáu cola cantidá de 4.000 euros y va otorgase a un trabayu d’investigación que tenga por oxetu l’estudiu, dende una perspectiva xurídica, sociolóxica o politolóxica, de la situación nel estáu español de los colectivos vulnerables en rellación a la protección de los sos drechos. Pueden presentase obres en toles llingües oficiales del estáu, y n’asturianu.

Los trabayos, han ser monografíes orixinales ya inédites, van tener una estensión mínima de 100 páxines y máxima de 150 páxines per una sola cara, entendida bibliografía, anexos y cuanta información adicional pueda acompañase, con interlliniáu 1,5 y tipu de lletra Arial 12 pal testu principal y 11 pa les notes a pie de páxina. Podrán redactase en castellán y n’otres llingües oficiales, distintes al castellán, acompañándose nesti casu de la correspondiente traducción. Va ser tamién almitible, de conformidá cola normativa d’aplicación, la presentación de los trabayos n’asturianu.

Nos trabayos namás va constar el títulu del mesmu, ensin referencia dalguna al so autor. van acompañar d’un sobre zarráu nel que figure’l títulu del trabayu y nel so interior los datos y señes del autor.

De los trabayos y nel so casu de la so traducción, van presentase cinco exemplares en papel y una versión del mesmu en soporte informáticu, formatu Word. Los trabayaos van presentar na sede de la Procuradora Xeneral del Principáu d’Asturies, na Plaza de Riego 6, 33003, Uviéu-Asturies. Nel sobre va constar el nome “Cátedra Amparu de Drechos y Llibertaes”, la denomación del Premiu y en nengún casu, la identidá del autor.

El plazu de presentación de los trabayos empieza’l día 3 de setiembre y remata’l día 3 d’ochobre de 2012.

El Xuráu ta compuestu pola Procuradora Xeneral del Principáu d’Asturies y los miembros del Conseyu de Dirección de la Cátedra d’Amparu de Drechos y Llibertaes. El premiu va otorgar al trabayu que llogre la mayoría de votos de los miembros (presentes) del Xuráu. En casu d’empate, va decidir el votu calidable de la Procuradora Xeneral. Correspuende al Xuráu la llibre interpretación de les presentes bases.

El fallu del xuráu, que va ser inapellable, va faese públicu na web de la Procuradora Xeneral enantes del día 15 de payares apurriéndose’l premiu nun actu públicu na sede d’esta institución.

Esti vienres, 16 de marzu, a les 20 hores va celebrase nel Centru Social L’Ayalga la presentación del númberu últimu de la revista de l’Asociación Cultural N’Ast. Esta nueva edición cunta coles firmes de Carlos Blanco, que presenta un artículu sobro Asturies vista a la lluz de los plantegamientos d’Oswald Spengler; de Xuan Porta, con un trabayu sobro l’osu na cultura asturiana; d’Inaciu Galán, nun analís del papel de les llingües indíxenes y del castellán nos procesos d’independencia d’América del Sur; de Xaviel Vilareyo, que torna tamién a les páxines de la revista con un trabayu toponímicu; d’Isaac G. de la Arada, que presenta un artículu nuevu de calter eminentemente científicu sobre los procesos d’almacenamientu d’hidróxenu; y d’Eduardo Abad, con un trabayu etnográficu sobro la fragua de Fonteta.

Amás de los artículos d’ensayu, recuéyense’l “Manifiestu pola documentación hestórica asturiana espoliada” y dos entrevistes: a Daniel Cueli, direutor de la revista, y a Javier Cubero, responsable d’organización de N’Ast, asoleyaes enantes n’Asturnews.

Pa zarrar la revista, inclúise’l testu del pregón XII Fiesta de la Oficialidá de la Llingua Asturiana en Bimenes (2008) escritu y lleíu por Xuanxo Mariño.

El CS L’Ayalya ta asitiáu nel baxu 11 de la cai Prendes Pando de Xixón.

La Xunta pola Defensa de la Llingua Asturiana organiza un cursu d’afondamientu llingüísticu pa persones adultes de 40 hores de duración, nel que los los alumnos y alumnes van poder afondar nel bon usu del idioma tanto a nivel escritu como oral, asina como nes relaciones …ente llingua y sociedá.

Les clases van escomenzar el martes 27 de marzu, nel local de la organización: Conceyu Abiertu, na cai La Gascona 12, baxu A, d’Uviéu, y n’horariu de 19’00 a 21’00 hores, los martes y xueves (horariu provisional hasta concretar y consensuar cola xente matriculao).

El preciu de la matrícula completa ye de 30 euros y pa inscribise nun ye necesaria nenguna titulación o profesión concreta. Sicasí, encamiéntase a les persones que se vayan matricular, que tengan una conocencia básica de la espresión escrita y oral del idioma.

Toles persones interesaes pueden apuntase llamando al 985 22 95 53 o al 679 65 09 98, o bien mandando un corréu a la direición: info@exunta.org

El 30 d’abril zarrará’l plazu de presentación de candidatures pa los Premios Timón 2012 entamaos por L’Arribada, y que puen presentales una persona o un colectivu nes señes de corréu lletrónicu de l’asociación: larribada@gmail.com

Pa esta edición, opten a los gallardones escritores que ñacieren nel añu 1962 o enantes. Trátase del VI Premiu Timón, p’autores en llingua asturiana y n’eonaviegu, y del III Premio Timón, p’autores asturianos en llingua castellana.

P’alcordar los gallardones, l’asociación convocará dos xuraos, ún por cada modalidá, formaos por persones venceyaes a la cultura del país. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse mientres la cellebración de L’Arribada 2012.

Les candidatures presentaes hasta agora son, según anuncia de la organización: Manuel Asur, Sabel de Fausta, Joaquín Fernández García, Antón García y Miguel Solís Santos; mientres que pa la versión en castrellán son candidatos esti añu: Fernando Menéndez, Carmen Gómez Ojea y Carmen Ruiz-Tilve.

Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010) y Vicente García Oliva (2011); y los del Premio Timón, Luis Fernández Roces (2010) y Juan Méjica (2011).

Esti miércoles 29 de febreru a les seis de la tarde, va celebrase la cabera xornada de los alderiques entamaos pola Xunta pola Defensa de la Llingua Asturiana (XDLA) pa celebrar los los 15 años de la espublización del “Llibru Blancu de la recuperación y normalización llingüística d’Asturies”. L’actu va centrase nesta ocasión na recuperación y normalización llingüística, celebrándose nel Salón d’Actos del Departamentu de Filoloxía Española de la Universidá d’Uviéu.

Van participar nesta ocasión Carlos Pulgar, voceru de la XDLA; Ramón d’Andrés, profesor de Filoloxía Asturiana na Universidá d’Uviéu; y David Guardado, filólogu. Va moderar el debate Llucía Menéndez Suárez, miembru de la organización convocante.

El centru social La Semiente, asitiáu en L’Entregu, va proyectar güei, miércoles 25 de xineru, el documental ‘La comida del futuru’. La cinta trata sobre los alimentos trésxenicos y va poder vese a partir de les ocho la tarde.

Les radios llibres asturianes convoquen una concentración en sofitu a la so continuidá pa esti vienres, 13 de xineru, a les 12 la mañana, delantre del Rexistru Xeneral del Edificiu de Servicios Múltiples, na cai Coronel Aranda, d’Uviéu. La Coordinadora de Radios Llibres d’Asturies quier denunciar con esti actu les acciones entamaes pol Gobiernu d’España pal so pieslle. Nel Rexistru van reclamar a la Dirección Xeneral de Tecnoloxíes de la Información y les Comunicaciones de la Conseyería d’Economía y Empléu que se-yos reconoza “como Serviciu de Comunicación Comunitariu, y que soliciten a l’Alministración Xeneral del Estáu’l dominiu públicu necesariu pa ufrir esti serviciu”.

El próximu 14 de xineru acaba’l plazu de presentación d’orixinales pa los concursos de l’Academia de la Llingua Asturiana na so convocatoria de 2012. Ente los convocaos tán: «Concursos d’Investigación (de recoyida de material toponímico y de léxicu asturianu)», «Concursu de llectures pa rapazos», «Concursu de creación lliteraria, premiu “Llorienzu Novo Mier”», «Concursu de material lliterario escrito, premiu “Federico González-Fierro Botas”» y «Concursu de Teatru».

Bases completes de los concursos