Convocatories

El 2 de marzu va celebrase en Vitoria-Gasteiz la “Topaketa/Alcuentru Asturies-Euskal Herria”, una xornada nel Gaztetxe de Gasteiz que va recoyer distintes actividaes sociales y culturales rellacionaes con Asturies. Pa facilitar la participación de la xente asturiano nesti alcuentru, ta entamáu un viaxe de dir y tornar del que yá ta abiertu’l plazu d’inscripción. La “Topaketa/Alcuentru Asturies-Euskal Herria”, ye una xornada sociocultural entamada ente Ixuxú Asturies-Euskal Herria elkartea, el Centru Social La Semiente y el Gaztetxe de Gasteiz. Nella, va haber actos dende pela mañana hasta la madrugada coles mires de dar a conocer distintos aspectos de la realidá asturiana en Euskal Herria y estrechar llazos ente persones y colectivos sociales y culturales de los dos países.

Pasucais, xinta popular, mercadín de colectivos asturianos, una mesa redonda entitulada “Asturies existe y resiste: luchas y movimientos sociales en Asturies” -que va abarcar el movimientu sindical, el de reivindicación llingüística, y el del nacionalismu y la izquierda soberanista-, un conciertu ska del grupu asturianu La Tarrancha y de los donostiarras Skakeitan y una folixa internacionalista, van ser les actividaes del día.

Pa fomentar la participación de les persones d’Asturies nesta xornada, el Centru Social La Semiente entama un viaxe n’autobús. El plazu d’inscripción va tar abiertu hasta’l próximu 24 de febreru –anque los organizadores piden a los y les interesaes que s’apunten cuanto antes pa saber si va facer falta más d’un autobús-, y por un preciu de 20 euros inclúise’l viaxe, la xinta y el conciertu.

L’autobús va salir de L’Entregu a les siete de la mañana del 2 de marzu y va tornar de Vitoria-Gasteiz a les cuatro la madrugada. Pel mediu, van facese paraes en La Felguera, El Berrón –parada na que se deberíen xubir los y les uvieínes interesaes- y Xixón.

P’acutar plaza hai qu’unviar un corréu a lasemiente@hotmail.com y ha pagase per adelantao en La Semiente los miércoles y xueves de 17.30 a 19.30 o nel Centru Social Sestaferia de Xixón.

“Amor pola llingua” ye un concursu nel qu’ha pensase nuna frase, eslogan o microrellatu centráu nel apreciu pol idioma. La mesma habrá mandase al corréu amorpolallingua@gmail.com, o al traviés de Twitter usando’l hastag #amorpolallingua; pel facebook.com/xuntamoza; o bien per vía postal a Xunta Moza. Cai La Gascona 12, 3u. 33001, Uviéu. La obra premiada va dase a conocer nun actu cultural que se va celebrar el día 22 de febreru, a les 21 hores, nel CSOA La Madreña d’Uviéu; por ello ye necesario que tolos participantes asistan a esta entrega de premios.

Institúise un premiu únicu dotáu con un llote de productos de la Xunta pola Defensa de la Llingua Asturiana y Xunta Moza, amás, el trabayu que resulte gallardonáu pue ser imaxe de campañes de sensibilización y/o reivindicación de dambes organizaciones.

El tema ye «demuestra’l to amor… pola llingua» y tien de tar vinculáu con cualquier aspectu llingüísticu o sociollingüísticu d’Asturies. Pue tar escritu en prosa o versu. Los trabayos han ser inéditos y orixinales. Cada participante pue presentar tantes obres como considere oportuno.

Les obres, manuscrites o mecanografiaes, han tener una estensión máxima de 140 caracteres (124 pa quien participe al traviés de Twitter). El plazu de presentación de trabayos termina’l 21 de febreru, día internacional de la llingua materna, de 2013, a les 00:21 hores.

La Estaya de la Llingua del Conceyu d’Avilés tien abiertu’l plazu p’apuntase al cursu de llingua asturiana p’adultos mayores de 16 años, en nivel d’aniciu. La duración ye de trenta hores, dende’l llunes 4 de febreru hasta’l llunes 25 de marzu; llunes y miércoles de 19:00 a 21:00 hores nel Centru d’Estudios Universitarios d’Avilés, asitiáu na cai La Ferrería 7-9.

Les inscripciones han facese hasta’l día 1 de febreru nel llar de la Estaya, allugáu na Casa Municipal de Cultura d’Avilés, nel 2 de la Plaza Domingo Álvarez Acebal, per corréu lletrónicu, en estayallingua@ayto-aviles.es y tamién per teléfonu, llamando al númberu 985 545 508. La inscripción y el cursu son de baldre.

L’I.E.S. “Rosario Acuña” de Xixón convoca’l decimoquintu premiu d’investigación y divulgación, pal que pueden presentase trabayos hasta’l 15 de marzu de 2013, qu’han ser apurríos o unviaos per corréu (en papel, discu o CDROM) a la Secretaría del Centru: IES “Rosario d’Acuña”, Cai Puertu Vegarada e/n, 33207, Xixón. Pal premiu esisten trés categoríes, una p’alumnos del centru, y dos pa investigadores en xeneral, con categoría temática sobre Xixón y sobre Asturies, y con premios de 2.000 euros.

Los premios van poder ser declaraos desiertos o concedese “ex-aequo” a pidimientu del Xuráu. Aparte del testu, cada trabayu va acompañar de la documentación gráfica (semeyes, ilustraciones y gráficos) que cada participante considere oportunu. Tolos trabayos van quedar a disposición del IES “Rosario Acuña” que s’acuta tolos drechos de publicación de los premiaos, pudiendo editalos y comercializalos pola so cuenta o por aciu conveniu con otra entidá o editorial. Nel casu de que finalmente se realice la edición, l’importe del premiu va considerase como pagu a tantu alzáu de los drechos d’autor correspondientes.

El fallu del Xuráu va faese públicu’l 2 de mayu de 2013 y va ser inapellable.

Bases completes del premiu

La Prueba de conocencia de la llingua asturiana organizada dos vegaes al añu pola Academia de la Llingua Asturiana abrió yá’l plazu pa inscribise. La prueba va celebrase’l 26 de xineru n’Uviéu. El plazu de matrícula ye del 14 al 24 de xineru. L’horariu de matrícula, de llunes a xueves de 9:00 h. a 15:00 h. y de 16:00 h. a 19:00 h. y los vienres de 9:00 h. a 14:00 h. nel llar de l’Academia, na Cai l’Águila d’Uviéu.

La prueba va tener dos partes, una escrita (dictáu, torna, exercicios gramaticales, redaición) y otra falada (conversación). A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución. Les persones que nun superen les pruebes del nivel 1 podrán presentase a nueves convocatories toles vegaes que-yos pruya.

Bases completes de la Prueba

La Estaya de la Llingua del Conceyu d’Avilés entama un cursu de llingua asturiana p’adultos mayores de 16 años, en nivel d’aniciu. La duración ye de trenta hores, dende’l llunes 4 de febreru hasta’l llunes 25 de marzu; llunes y miércoles de 19:00 a 21:00 hores nel Centru d’Estudios Universitarios d’Avilés, asitiáu na cai La Ferrería 7-9.

Les inscripciones han facese hasta’l día 1 de febreru nel llar de la Estaya, allugáu na Casa Municipal de Cultura d’Avilés, nel 2 de la Plaza Domingo Álvarez Acebal, per corréu lletrónicu, en estayallingua@ayto-aviles.es y tamién per teléfonu, llamando al númberu 985 545 508. La inscripción y el cursu son de baldre.

La Prueba de conocencia de la llingua asturiana organizada dos vegaes al añu pola Academia de la Llingua Asturiana abrió yá’l plazu pa inscribise. La prueba va celebrase’l 26 de xineru n’Uviéu. El plazu de matrícula ye del 14 al 24 de xineru. L’horariu de matrícula, de llunes a xueves de 9:00 h. a 15:00 h. y de 16:00 h. a 19:00 h. y los vienres de 9:00 h. a 14:00 h. nel llar de l’Academia, na Cai l’Águila d’Uviéu.

La prueba va tener dos partes, una escrita (dictáu, torna, exercicios gramaticales, redaición) y otra falada (conversación). A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución. Les persones que nun superen les pruebes del nivel 1 podrán presentase a nueves convocatories toles vegaes que-yos pruya.

Bases completes de la Prueba

La Sociedá d’Amantes del País de Cangas «Tous pa tous» convocó la primer edición del so Premiu Xoven col que busquen “afalar la conocencia ya interés de los mozos pol conceyu de Cangas y poner a la so disposición un mediu nel que puedan espresar la so visión sobre él, mesmo del pasáu que del presente”. El trabayu pue presentase utilizando cualesquier formatu de manera que l’autor va poder valise de la escritura (novela, poema, ensayu), la fotografía, los medios audiovisuales tecnolóxicos, el dibuxu, el cómic o lo que tengan a bien como mediu de creación. Coles mesmes, podrá usase tantu’l castellán como l’asturianu na so variedá occidental.

El premiu con dos secciones, una pa los mozos de 13 a 17 años, con un premiu de seiscientos euros, y otra pa los mozos de 18 a 22 años, con mil doscientos euros.

Los trabayos hai que los facer llegar en papel, y con copia en formatu dixital a Tous pa Tous. Sociedá Canguesa d’Amantes del País, Apartáu de Correos 12. 33800 Cangas del Narcea (Asturies) o en formatu word o pdf a la dirección lletrónica touspatous@touspatous.es

Bases completes del concursu

Tolos mayores de 16 años pueden participar nesti concursu y presentar una obra namás, n’asturianu estándar o na so variedá occidental. Va premiase aquella obra inédita qu’a xuiciu del xuráu seya d’un valir lliterariu mayor. La temática ye llibre y el rellatu ha tener una estensión de cinco fueyes como mínimu y venti a lo máximo, con una presentación en DIN A4 a espaciu doble y con cuatro copies.

Les obres nun se van volver a los autores, y el ganador va premiase con 400 euros pa cada categoría, la escrita colos rasgos de la variedá llocal y la escrita al mou estándar.

Los trabayos han presentase nel Serviciu de Normalización L.lingüística (La Plaza la Oliva, e/n, 33800, Cangas de Narcea), yá seya presencialmente o per corréu certificáu na mesma dirección, nun sobre ensin remite o embaxo nomatu, qu’axunte dientro la plica na que se dean a conocer los datos reales del autor, too ello enantes del 10 d’avientu.

El xuráu tará formáu por representantes de la Conceyalía de Cultura, un representante de la Rede de Normalización Llingüística nos Conceyos, maestros y escritores en llingua asturiana.

Les XI Xornaes de Cultura Tradicional de Zamora, entamaes pola Asociación Cultural Zamorana “Furmientu”, van celebrase ente los díes 13 y 20 d’avientu na Casa de la Cultura de Zamora, Plaza Claudio Moyano e/n, Zamora. La hora d’empiezu de les conferencies ye les 19:30.

El xueves, 13 d’avientu va poder sentise la charra “Más allá de llingües y dialectos” al cargu de Juan Carlos González Ferrero, caderalgu de Llingua y Lliteratura del I.E.S. “Pardo Tavera” de Toru. El martes, 18 d’avientu habrá un “Coloquiu-Filandar: Aliste al trasluz” al cargu de Miguel Martínez García (“Miguel Rostán”), autor de Cuentos de la Villa y Aliste al trasluz.

El xueves, 20 d’avientu va presentase’l llibru “Onde la palabra pousa: un repasu a la lliteratura n’asturllionés occidental” al cargu de María Cueto Fernández, de la Universidá d’Uviéu.