Conceyos

La Oficina Municipal de la Llingua de Xixón convoca dos beques de formación ya investigación especializao na llingua autóctona. Les bases recueyen que los diplomaos y llicenciaos que quieran optar a la ufierta, deben tener llograo’l títulu d’Espertu o Especialista en Filoloxía Asturiana nos últimos cuatro años.

Los seleccionaos habrán traducir y correxir documentos, y fadrán los trabayos d’estudiu y execución de mecanismos pa promover y normalizar l’asturianu per aciu los servicios públicos. Tamién collaborarán nel diseñu y desenrrollu de campañes de promoción.

Los beneficiarios de les begues recibirán una asignación de 5.010 euros esti añu y 500 mas durante’l 2010. El plazu pa presentar les solicitúes, que tán colgaes na web del Ayuntamientu, termina’l día 19 d’esti mes de xineru.

El Bloque por Asturies denunció esti miércoles 17 d’Avientu a la Conseyería de Cultura por nun comunicar a los conceyos que reciben sovenciones palos servicios de normalización si van seguir teniéndoles en 2009 y en qué cuantíes polo que podríen vese empobinaos a pesllar los servicios hasta recibir esa comunicación. Otros años ya recibieren les confirmaciones colo que la continuidá de los trabayadores venía calteniéndose dafechu. Amás, critica la desviación de los fondos pa servicios estremaos como vien asociediendo hai poco en Navia y Corvera.

El voceru del Bloque por Asturies, Pablo Fernández, ufrió esti día una rueda de prensa xunta’l secretariu xeneral de la organización, Roberto Colunga, na que denunció la “situación de precariedá” de los diferentes servicios de normalización llingüística d’Asturies que por primera vegada nun saben a quince díes de final d’añu si van seguir en 2009.

Pablo Fernández quiso amosar la “preocupación” del Bloque pola “llaceriosa situación” d’estos servicios, pero amás denunció lo qu’atalanta nun ye sinon la “modificación de la so finalidá”. Los exemplos más recientes de que se tan emplegando les sovenciones pala normalización notros servicios son los de Corvera y Navia, llugar esti últimu onde “en llugar de crear el serviciu de normalización ta emplegándose la financiación pal Parque Históricu, que ye un departamentu con un enfoque d’espardimientu en xeneral de la cultura asturiana y non un instrumentu de normalización llingüísticu”.

La Casa de la Llingua de Covera ye l’otru casu onde les sovenciones pales oficines de Normalización tan emplegándose pa “un depósitu filolóxicu”.

El Bloque camienta que destrá d’estos dos casos alcuéntrase una maniobra política de xestión del Gobiernu asturianu pa torgar l’espardimientu de los Servicios de Normalización pa camudalos nuna cosa bien estremada y facer que se desanicien los bonos resultaos algamaos hasta agora.

L’Asociación de Trabayadores de los Servicios de Normalización Llingüística d’Asturies nun comunicáu fechu públicu esti día critica fondamente les característiques de la convocatoria d’una plaza en Corvera de “responsable de la Casa de la Llingua del Conceyu Corvera” por basase únicamente nuna entrevista curricular.

L’Asociación diz nesi comunicáu que lleva tiempu asperando “ver cumplise les promeses que dende’l Principáu se fexeron pa crear un Serviciu de Normalización en Corvera. Vemos agora la convocatoria d’una plaza que se denomina “responsable de la Casa de la Llingua del Conceyu Corvera”. Si esto ye’l serviciu demandáu y anunciáu, mal empecipiamos. La mesma convocatoria pa la seleición de la persona que tien qu’ocupala ta lloñe de los mínimos que s’han desixir”.

Nel comunicáu, l’asociación destaca que “hai más nada qu’una valoración de méritos y una “entrevista curricular”. Polo tanto nada de los mínimos demandaos dende esta asociación y que se cumplieron na mayor parte de los procesos de seleición d’otros Servicios de Normalización: un esame escritu y un esame oral; arriendes de la valoración de méritos”.

Pero ye que, amás, nos méritos nun se permite namái qu’una de les titulaciones qu’anguaño hai n’Asturies pa demostrar dalgún tipu de formación académica en llingua asturiana: el títulu d’espertu de la Escuela de Maxisteriu. Otros títulos de mayor nivel como’l títulu d’especialista de la Facultá de Filoloxía o cursos de l’Academia de la Llingua Asturiana nun se contemplen na convocatoria. Según denuncia l’Asociación van valorase unos xenéricos “cursos de llingua asturiana, lliteratura o cultura asturiana” y nun hai temariu dalu, pero “sí se diz que na “entrevista curricular” va “profundizase sobre distintos aspeutos de la cultura asturiana y del procesu de normalización sociollingüística de la llingua asturiana”. Abúltamos qu’hai maneres más oxetives y contrastables pa valorar la capacidá d’una persona al respective de la normalización sociollingüística que la “entrevista curricular”. Volvemos a insistir nos conocíos y habituales esámenes orales y escritos sobre un temariu y la titulación académica”.

Finalmente, dende l’Asociación de Trabayadores de los Servicios de Normalización Llingüísitca sigueb “aguardando pola creación de la plaza pa un Serviciu de Normalización Llingüística en Corvera. Si con esta convocatoria se quier cubrir esi perfil de trabayador paezmos que se trabaya por dir nel sen contrariu d’afitar institucionalmente’l trabayu de la normalización de la llingua asturiana”.

El Ministeriu d’Alministraciones Públiques publicó esti martes pela tarde’l llistáu de les cantidaes máximes que van dir a parar a los conceyos españoles a cargu del Fondu Estatal d’Inversión Llocal de 8.000 millones, de los que 190.237.960 euros corresponden a Asturies. Xixón, por mor de la so población de 247.037 persones, va poder acceder a 48.501.33 euros, Uviéu, con 216.607 habitantes, va tener accesu a 38.336.987 euros, y Avilés, que tien anguaño 83.320 habitantes, va disponer de 14.746.662 euros.

El repartu incllúis tamién a los otros 75 conceyos del país que van poer recibir les cifres que vienen darréu: Allande (383.888 euros), Ayer (2.335.006), Amieva (149.909), Miranda (334.508), Bimenes (341.410), Bual (371.498), Cabrales (393.799), Cabranes (194.333), Candamu (395.569), Cangues d’Onís (1.167.946), Cangas del Narcea (2.677.301), Caravia (102.299), Carreño (1.916.074), Casu (342.649), Castrillón (4.030.377), Castropol (694.148), Cuaña (614.680), Colunga (691.670), Corvera (2.782.786), Cuideiru (1.043.169), Degaña (227.961), El Franco (710.608), Gozón (1.897.845), Grau (1.938.021), Grandas de Salime (195.926), Ibias (318.048), Eilao (90.618), Illas (179.112), Llangréu (8.082.700), Llaviana (2.533.056), L.lena (2.302.440), Llanera (2.368.457), Llanes (2.411.819), Mieres (7.963.056 euros), Morcín (530.257), Muros (351.676), Nava (975.382), Navia (1.600.682), Noreña (912.905), Onís (142.830), Parres (1.013.258), Peñamellera Alta (118.759), Peñamellera Baxa (251.500), Pezós (34.867), Piloña (1.458.914), Ponga (121.414), Pravia (1.613.779), Proaza (140.529), Quirós (248.669), Les Regueres (358.578), Ribedeva (333.977), Ribesella (1.112.548), La Ribera (353.977), Riosa (405.126), Salas (1.076.443), Samartín d’Ozcos (83.007), Samartín del Rei Aurelio (3.383.131), San Tirso d’Abres (101.945), Santaya d’Ozcos (98.051), Santu Adrianu (49.380), Sariegu (235.040), Siero (8.759.326), Sobrescobiu (154.511), Somiedu (264.420), Sotu’l Barcu (722.997), Tapia (752.908), Taramundi (137.166), Teberga (339.110), Tinéu (2.042.268), Valdés (2.449.164), A Veiga (768.483), Vilanova d’Ozcos (72.742), Villaviciosa (2.569.870), Villayón (293.093) y Tameza (37.699).

El Principáu va destinar esti añu 977.854 euros al patrimoniu arqueolóxicu del Occidente asturianu. La cantidá axunta obres de meyora nel Chao Samartín de Grandas de Salime, nel castro de Coaña, nel castro San Chus, en Allande y en dellos otros castros de la cuenca del Navia.

El Ministeriu de Cultura, la Federación Española de Municipios y Provincies (FEMP) y la Fundación Coca-Cola “Juan Manuel Sáinz de Vicuña”, escoyeron ente los premiaos d’esti añu al proyectu de dinamización llectora presentáu pola Biblioteca d’El Campu, en conceyu Casu, dientro del Plan de Fomentu de la Llectura.

El proyectu presentáu basase nes Actividaes Bibliotecaries d’integración social, con actuaciones como la Biblioteca Ambulante, distribución de conxuntos de llibros nos Centros Sociales, y l’aprosimación de los servicios bibliotecarios al través del Serviciu d’Ayuda a Domiciliu, formación de usuari@s, dinamización infantil y bibliopiscina, ente otres.