Conceyos

El conceyu de Llanera cunta tamién con dos cites. En Llugo, celébrase San Xuan con parriyada y la música del grupu folklóricu Picu Santufirme. A les once préndese la foguera y báillase la Danza Prima alredor.

En Posada, repiten el plan de los sos vecinos: parriyada, anque nesti casu amenizada pol grupu folklóricu La Madreña y foguera con Danza Prima, dende les once.

La foguera de San Xuan celébrase en Llugones con un conciertu qu’añalmente entama l’asociación cultural Beltain nesi llugar del conceyu de Siero. El Parque de la Paz ye’l llugar escoyíu p’actuar los daneses Kasir y los asturianos Dixebra.

L’Agrupación del Partíu Asturianista-PAS de Pravia ve con gran preocupación la “faraónica” obra que se ta faciendo na zona del ríu Aranguín; concretamente nel pueblu d’Agones; pol estrozu del ríu na zona que va dende la desembocadura, hasta l’altura del Mataderu, col envís de facer una sienda fluvial.

El PAS entrúgase “¿ónde ta la Conseyería de Mediu Ambiente, énte tal estrozu y cómo permite que s’arruine l’ecosistema?” La formación asturianista recuerda que “la parte baxa del pueblu d’Agones quedó ensin defensa y protección natural énte una riada”.

L’Agrupación del Partíu Asturianista-PAS de Pravia denuncia y llamenta la desastrosa xestión de los Recursos Publicos per parte del Gobiernu Autonomicu ( PSOE-IX)

Los próximos díes 25, 26 y 27 del mes de xunu, va celebrase, n’A Paicega (Pezós) y organizao pola Asociación Airsoft Occidente en collaboración col Conceyu de Pezós y la Fundación Parque Hestóricu del Navia, una partida d’airsoft denomada “Operación Ñeru d’Águiles” na que se va desenvolver un supuestu tácticu rellacionáu col control de los recursos hídricos.

Nel incomparable marcu d’A Paicega, antiguu pobláu ocupáu por trabayadores -a mediaos del sieglu XX- mientres la construcción del banzáu de Salime, el sábadu 26 de Xunu va tener llugar la competición, ente les 9:00 y les 17:00 h, na que van participar 50 xugadores asturianos y d’otres comunidaes autónomes (llindóse’l númberu de participantes por cuenta de les especiales característiques arquitectóniques y medioambientales del enclave).

Esta esperiencia, que se desenvuelve per primer vegada na nuesa contorna, entiende tamién actividaes complementaries, como la visita a dellos recursos turísticos que faciliten la integración de l’actividá nel Parque Hestóricu del Navia.

Airsoft Occidente

El próximu sábadu, 19 de xunu, a les 12:00 hores, va tener llugar la inauguración de la Temporada Estival de 2010 nel Centru de Recreu de Folgueiróu (Eilao), cola apertura de la Piscina Municipal y de la Oficina de Turismu. A les ocho la tarde va celebrase un conciertu de presentación del discu “Conceyo de Cantares”, onde se va poder escuchar al dúu “Mestura” , la Bandía “Os Altruaneiros” y al grupu folk “Tuenda”.

A les 22:30, nel área recreativa celebraráse una “churrascada” y, dende les doce la nueche, una verbena cola música del “Trío Nora”. Les actividaes prográmales el Conceyu d’Eilao y la Fundación Parque Histórico del Navia, cuntando con finaciación de la Conseyería de Cultura y Turismu.

Iván Iglesias “Cazarón” falónos del discu en febreru

En metá del alderique pol retrasu na inauguración del Auditoriu municipal de Siero, anunciáu pol equipu de gobiernu del Partíu Popular, l’agrupación d’Unidá Nacionalista Asturiana (UNA) nel conceyu fizo pública la so postura, denunciando que “tou esti discutiniu asoleyó lo que yá yera un secretu a voces: l’anterior equipu de gobiernu pretendía inaugurar un equipamientu d’esti tamañu ensin esmolecese de dotalu d’un programa d’actividaes culturales y lo que ye más grave, ensin enmarcalo dientro d’una planificación cultural”, amás UNA denuncia que tampoco l’equipu actual tien idea de qué facer col mesmu.

Pa los nacionalistes de Siero l’interés prioritariu del PSOE yera “la inauguración aforfugada de la obra con una fiesta populista en clave propagandística” y anque reconocen que’l nuevu equipu de gobiernu se decató d’ello, dicen “nun paez tener les coses muncho más clares tocantes a proyectos culturales pal auditoriu, porque yá ta falando d’esternalizar la xestión del mesmu y -cola xida del altu costu pa les arques municipales- dexar la programación cultural a una empresa privada”.

UNA de Siero calificó de “bochornosa” la que calificaron de “falta d’idees de tolos grupos municipales de la que reclamen una planificación cultural global pa tol conceyu, na que l’auditoriu sedría una pieza clave, pero una pieza más”.

Dende’l puntu de vista d’UNA Siero “podría y tendría que ser un motor d’actividaes culturales coordináu cola rodiada, con conceyos como Sariegu y Noreña, pero pa ello hai que tener un proyectu con oxetivos claros primero que dedicase a facer escurrimientos d’última hora o falar de privatizar nada”.

La Conceyalía de Cultura del Conceyu de Grau y l’Asociación La Veiga’l Cubia, de recién formación, van presentar esti vienres, 11 de xunu, a les 19:30 hores, una banda de gaites nueva, dirixda por Celso Díaz. Precisamente él, xunto con Miguel Ángel Martínez, son quien van ufrir un dúu musical a les ocho la tarde, y coincidiendo con esta presentación, que se celebra na sala polivalente de la Casa Cultura de Grau.

L’actu va sirvir igualmente pa presentar esta nueva Asociación La Veiga’l Cubia que ye la encargada, ente otres coses, de xestionar la Banda Gaitas Conceyu Grau.

La formación entama a crease va cuasi dos años, al traciés de clases y ensayos. La iniciativa de crear esta Banda foi de la Conceyalía de Cultura del Conceyu de Grau y l’Asociación de Vecinos de Veiga d’Anzu. Esti mesmu añu dellos integrantes de la banda constituyeron una nueva asociación cultural “La Veiga’l Cubia” pa xestionar la Banda col respaldu del Conceyu, y col enfotu de desenvolver “otres munches iniciatives, toes elles venceyaes cola recuperación d’actividaes tradicionales del ámbitu musical, cultural o deportivu”.

Tres el branu, van empezar a impartir clases de baille tradicional pa poner en marcha un grupu y realizaron delles xestiones tamién pa la construcción d’una bolera de la modalidá de batiente na villa moscona. La Banda de Gaites, que yá actuó en públicu en delles ocasiones, ta integrada anguaño por una docena de componentes, mientres que la escuela de la banda cunta con más de 25 alumnos de toles edaes.

Blogue de la Banda

Grau celebra la tercer edición del Premiu al Pueblu Exemplar del conceyu 2010. El plazu termina’l 1 de setiembre de 2010. Nos dos primeres ediciones les localidaes ganadores fueron respectivamente Sama de Grau y Vega d’Anzu. Les bases pueden consultase na web del Ayuntamientu.

El BOPA del 27 de mayu publicó’l Decretu 46/2010, de 18 de mayu, pol que se determinen los topónimos oficiales del conceyu Ribeseya, y el Decretu 47/2010, de 18 de mayu, pol que se determinen los topónimos oficiales del conceyu Teberga. Entrambos los dos decretos puen descargase na web de Política Llingüística.

Con estos decretos son yá 42 conceyos los d’oficializar la toponimia asturiana. De magar ábrese otru procesu al través del que, de manera progresiva y acordies cola disponibilidá presupuestaria, va dir renovándos la rotulación y documentación oficial al envís de que los topónimos autóctonos figuren a tolos efectos.

El Gobiernu del Principáu aprobó esti día nel Conseyu de la selmana los proyectos de Decretu polos que se determinen los topónimos oficiales de los conceyos de Ribeseya y Teverga.

Un total de 42 concejys finó ya la revisión de los sos topónimos tradicionales y otros 19 entamaron hai poco esti procesu impulsáu pola Conseyería de Cultura y Turismo col enfotu recuperar la toponimia popular ya incorporar progresivamente los nuevos topónimos oficiales a la señalización vial.

El procesu entmaó en 2004 cola constitución de la Xunta Asesora de Toponimia, que dende entós vien encargándose d’ello.