Conceyos

Dende Iniciativa pol Asturianu reiteren el so maltar polo que califiquen como “continuu incumplimientu per parte de los Conceyos de los decretos de toponimia aprobaos”. Nesti casu trátase del Conceyu de La Ribera, con decretu aprobáu de 2006, quien ficiera cambeos na so web institucional tres denuncies del vicepresidente de la organizaión, Vítor Suárez, mesmo al Conceyu como a los grupos municipales.

Agora, esti Conceyu vien d’estrenar web turística en castellán, “escaeciendo unu de los patrimonios más importantes d’Asturies y un valor añadíu no qu’a promoción de la diversidá y del calter estremáu de les cualidaes culturales del conceyu”. D’otra miente, esta ausencia, denuncien tamién “vien a sumase a la falta d’una versión n’asturianu de la web municipal y a la nula promoción del idioma por parte d’esti conceyu que contó con una gran inversión del Gobiernu d’Asturies n’equipamientos culturales por mor de la candidatura a los Premios Príncipe d’Asturies de Güeñu y qu’en tola cartelería de los mesmos fai usu únicu del castellán”.

Per otru llau, recuerden “incúmplese tamién el Decretu de 2006 qu’establez la toponimia oficial y que yá tendría que tar más qu’asumíu, nos bandos municipales, señalización de carreteres y demás medios de comunicación municipales”. “Nesti casu apaecen toles formes deturpaes: Soto de Ribera, Fuejos, Palomar, Labarejos… y únicamente un topónimu en forma asturiana Soto Rei, anque con un fallu d’ortografía al poné-y tilde na ‘i’”, espliquen.

Dende la organización anuncien que van ponese en contautu col Ayuntamientu y colos responsables de la web “pa qu’igüen estes cuestiones lo primero posible”.

Esti vienres, 11 de xineru, de magar les seis de la tarde, nel Atenéu Obreru de Villaviciosa, va celebrase un conceyu informativu col profesor d’asturianu, Pablo Suárez Fernández, técnicu responsable del Serviciu de Normalización Llingüística de la Comarca la Sidra, onde va esplicase’l temariu y horarios del cursu que va entamar esti mes y que ye de baldre.

Dende va unes selmanes los autobuses de Xixón vuelven a llevar la toponimia oficial na so cartelería, mesmo nos vehículos que nos indicadores dixitales de les paraes, dempués de dellos meses nos que, ensin dar nengún tipu d’esplicación, EMTUSA dexó d’usar la toponimia asturiana tradicional, oficial en Xixón dende 2006 col alcuerdu de tolos grupos políticos del plenu. Pa Iniciativa pol Asturianu “el cambiu ye positivu, recuperar la llegalidá no que cinca al usu de la toponimia nos buses xixoneses”. La rectificación del Conceyu de Xixón llega dempués de dellos meses de xestiones per parte de la organización, qu’entamó a detectar l’incumplimientu nos meses del branu. Sicasí entá hai dellos topónimos que nun apaecen de forma correcta al 100%, casu d’El Cerilleru, qu’apaez namás como “Cerilleru”, L’Infanzón, onde falta l’apóstrofu y apaez asina “L INFANZÓN” o otros billingües como Nuevo Gijón/La Peral, qu’apaecen namás na so forma castellanizada.

Dende Iniciativa pol Asturianu espliquen como “yá nel aconceyamientu del Conseyu Asesor de Normalización Llingüística de Xixón, celebráu’l 26 de setiembre baxo la presidencia del conceyal Carlos Rubiera, solicitóse-y a esti que como responsable de les competencies en materia de Política Llingüística en Xixón, falara con EMTUSA y cola conceyalía correspondiente pa que se camudara esti pasu atrás na toponimia”. El conceyal, comenten, “respondió con bones pallabres pero nun tomó nengún compromisu concretu”, polo qu’Iniciativa pol Asturianu presentó una quexa formal nel Rexistru del Conceyu de Xixón, faciéndo-y llegar copia al conceyal Rubiera y a la Oficina de Normalización Llingüística pa que ficieron por iguar el problema, “al mesmu tiempu que falábemos con responsables d’EMTUSA pa tratar d’igual la situación, ensin ésitu”.

La quexa presentóse’l 3 d’ochobre de 2012 y el 22 d’esi mesmu mes recibíen respuesta d’Alcaldía. Diba “procedese a revisar les posibles variaciones que puedan detectase” yá que según l’alministración xixonesa la política de toponimia d’EMTUSA nun sufriera nengún cambiu. Con esta promesa per parte del Conceyu de Xixón, decidieron esperar “un tiempu prudencial pa ver si se producíen los cambios solitiaos acordies cola llegalidá vixente”.

Al ver que nun yera asina, el 10 d’avientu, 50 díes dempués de la promesa de solución del equipu de gobiernu y d’EMTUSA, Iniciativa pol Asturianu fizo pública la non solución al problema y asoleyóse na prensa xixonesa la noticia. Trés díes más tarde, el 13/12/2012, EMTUSA anunciaba con nota informativa a los sos conductores el cambiu topónimicu y los autobuses y paraes volvíen a llucir los cartelos de forma correcta.

Pa Iniciativa pol Asturianu ye llamentable que lo que más funcione “seya salir nel periódicu, cuando fincimos tolos intentos al traviés de los responsables políticos y de xestión pa que se corrixera’l problema”. Camentamos que’l Conceyu habría meyorar la so respuesta a los problemes que surdan en cuestiones llingüístiques y que’l Conseyu Asesor “valga pa más que pa vese les cares mui de cuando en cuando”, según esplica’l presidente d’Iniciativa pol Asturianu, Inaciu Galán.

Agora que Iniciativa pol Asturianu consiguió recuperar esti pasu atrás, “esperamos trabayar pa que se dean pasos alantre, porque la mayoría les conceyalíes nun usen la toponimia oficial en toles ocasiones, y amás l’usu del asturianu ye anecdóticu en toes elles”. Pa la organización “tenemos que trabayar porque se cumpla la normativa afitada al traviés d’una Ordenanza Municipal d’Usu del Asturianu nel ámbitu del Conceyu de Xixón, que lleva yá unos años aprobada y sigue ensin cumplise”.

Iniciativa pol Asturianu espera qu’esta rectificación nel casu de la toponimia nos autobuses “seya l’entamu d’un camín nuevu na política llingüística en Xixón, y que se trabaye pa dar pasos alantre”, afirmando qu’ellos van esixilo.

L’Alcaldía del Conceyu de Xixón, púnxose en contactu al traviés de carta (de 25/10/2012) pa responder a la reclamación presentada por Iniciativa pol Asturianu énte’l rexistru del Conceyu dempués de que los autobuses de Xixón, de la compañía pública EMTUSA, dexaren d’usar en paraes y nos indicativos de los vehículos la toponimia oficial nel conceyu dende l’añu 2006, con casos como “Les Mestes”, que volvió al derogáu topónimu “Las Mestas” o “El Cerilleru”, que pasó a ser “Cerillero”. Na carta comunicóse a Iniciativa pol Asturianu que “va procedese a revisar les posibles variaciones que puedan detectase” yá que según l’alministración xixonesa “la política de toponimia d’EMTUSA nun sufrió nengún cambiu”, polo que paez que’l cambiu nun foi autorizáu dende Alcaldía, sinón que respuende al criteriu de la dirección d’EMTUSA. Sicasí, esti cambiu entá nun se produzo.

Dende Iniciativa pol Asturianu espliquen qu’esperaron “un tiempu prudencial pa comprobar que se facíen los cambios”, pero dempués de cuasi dos meses, los autobuses de la ciudá siguen ensin cumplir la llegalidá toponímica. Iniciativa pol Asturianu aguarda que’l cambiu se produza d’inmediato nos autobuses y paraes d’EMTUSA, “pues l’usu de la toponimia oficial nun ye opcional pa les alministraciones públiques, que tienen la obligación de respetar el decretu topónimicu de Xixón, aprobáu col consensu de toles fuercies polítiques del Conceyu de Xixón en 2006”.

Amás, Iniciativa pol Asturianu recordó, al traviés de nota de prensa, al restu de departamentos del Conceyu de Xixón qu’entá nun cumplen col usu de la toponimia oficial, que “siguirá denunciando los casos d’incumplimientu, al mesmu tiempu que la organización se pon a disposición de los sos responsables p’asesoralos nestes cuestiones”.

Amás la organización recuerda a los conceyales de tolos departamentos “qu’usar l’asturianu na publicidá d’actividaes, cartelería d’instalaciones, anuncios en prensa, xunto al castellán si se quier, nun supón nengún gastu estra, yá que’l Conceyu de Xixón cunta con una Oficina de Normalización Llingüística na so estructura, polo que nun usalu ye namás frutu d’una intencionalidá y nunca pue echase la culpa a la falta de recursos”. Ye por ello qu’Iniciativa pol Asturianu afaló al Conceyu de Xixón a usar l’asturianu “en toles actividaes, de forma tresversal, lo que supondría una importante promoción pa la llingua de los xixoneses y los asturianos, que tantes carencies sufre na so visibilización pública”.

Dende Conceyu Abiertu por Samartín, amuesen el so refugu “a que se derribe’l famosu ya hestóricu edificiu d’“El Cafetón” asitiáu en L’Entregu”. Amás, critiquen y ponen en cuestión esta decisión y lo qu’albridren “una actitú hipócrita del gobiernu municipal, llideráu pol PSOE, yá que nun tien sentíu esbarrumbar los edificios hestóricos del conceyu”, cuando al mesmu tiempu, recuerden “se predica la identidá de les comarques mineres”. >

“Tirar esti edificiu llevaríanos a perder un poco más del patrimoniu hestóricu del conceyu y, sobremanera, del pueblu de L´Entregu”, denuncien dende Conceyu Abiertu, destancando qu’El Cafetón “ye un inmueble protexíu por presentar un estilu arquitectónicu propiu d’Asturies, de la época de principios del sieglu XX, el denomáu estilu “rexonalista”. Por ello, si l’Ayuntamientu tanto diz de “preservar y promocionar la identidá de Samartín”, píden-y “que cuide un poco de les coses que n’elli hai”.

Pa CA “los gobiernos intelixentes lo que faen ye cuidar los edificios propios del pasáu, y esponelos como reclamu turísticu y, dalgo perimportante, pa que sigan presentes ente toos nosotros y nun escaezamos d’ónde venimos y hacia ónde vamos”.

Ente les midíes propuestes pola formación, que camienta que tamos énte un casu d’especulación, “que se restaure y conserve “El Cafetón” como bien d’interés conceyil y que se someta a votación popular o, lo que ye lo mesmo, que se-yos entrugue a los vecinos qué serviciu se-y quier dar al inmueble una vez que tea restauráu”.

El BOPA asoleyó yá la resolución de les sovenciones a los Conceyos pa la realización d’actividaes de normalización llingüística, tales como actos culturales, rotulación d’edificios y carreteres y otres campañes de normalización, ente les qu’esti añu destaca una conxunta ente los SNL de gran parte de los conceyos pal cambiu de nome y apellíos al asturianu.

Resolución d’ayudes nel BOPA

Dempués de que se diera a conocer que pal 2013, el Gobiernu asturianu va recurtiar nun 20% el presupuestu que destina al traviés de tresferencies directes pal mantenimientu de los Servicios de Normalización Lliguïstica (SNL), la Xunta pola Defensa de la Llingua Asturiana (XDLA) pide a los Conceyos que cuenten con un serviciu d’estes característiques “que muestren el so compromisu con estes entidaes y colos puestos de trabayu que xeneren”. Por eso, la organización cultural esixe a les alministraciones llocales “que collaboren cola alministración autonómica pa permitir el mantenimientu de los 14 SNL que actualmente hai n’Asturies”, dalgo que, amás, espliquen “xenera puestos de trabayu directos -alredor d’una ventena- y indirectos -al traviés de la elaboración de materiales pa les campañes de normalización- y permite ayudar a salvar un patrimoniu inmaterial del que ye dueñu tola ciudadanía d’esti país”.

Dende la XDLA, dicen saber “que son tiempos difíciles y que los recortes de les Alministraciones tán afectando a toles estayes, pero ye que lloñe de ser proporcionables, estos recortes tán cebándose con too aquello que tien l’asturianu como llingua d’usu”. Asina, nel 2012, les ayudes del Gobiernu asturianu pa les editoriales, discográfiques, medios de comunicación o asociaciones qu’utilicen el nuestru idioma sufrieron un recorte de más del 60%. “Nun queremos ver nengún intentu d’acabar coles empreses que trabayen en y en beneficiu de l’asturianu, empreses que dende hai dos décades tán faciendo un trabayu de normalización que desdexo’l mesmu Gobiernu asturianu”, protestes. Amás, na so nota de prensa espliquen “Preferimos más pensar que ye un desconocimientu dafechu de la realidá -anque triste ye una Alministración que nun conoz la realidá del territoriu que gobierna- y que nel Gobiernu nun saben que la industria cultural n’asturianu xenera cientos d’empleos directos y indirectos”.

Dirixéndose a los “señores políticos”, recuerden que “l’asturianu nun ye un caprichu culturalista d’unos pocos”, sinón “amás d’una llingua con falantes -polo tanto, persones con drechos-, l’asturianu ye un sector económicu que da de comer a un bon númberu de persones”. Pa la Xunta “nun se pue entender la defensa que faen con una mano d’otros sectores productivos, mentes afueguen cola otra a la industria cultural d’esti país, cuando según tolos estudios, el de la cultura ye ún de los sectores económicos con más proyección de futuru”.

Por too ello, dende la XDLA piden al Gobiernu asturianu “un mayor compromisu y una mayor atención al funcionamientu y estabilidá d’estos servicios, pero sobre too, un mayor compromisu a les entidaes locales, que na mayoría de los casos, a lo llargo d’estos años, nun se comprometieron colos SNL y colos sos trabayadores, importándo-yos bien poco les sos condiciones llaborales y el dotar a los servicios d’un presupuestu propiu”. A la fin, la normalización del nuestru idioma, les campañes a realizar y los puestos de trabayu xeneraos pol SNL, dependíen namás y esclusivamente de les perres que daba’l Gobiernu asturianu y de lo qu’estes durasen, porque una vez acabaes, l’asturianu y los puestos de trabayu, en munchos de los casos, nun importaben a nengún conceyal nin a nengún alcalde, recuerden dende la Xunta.

Otra manera, dempués d’una década desque empezaran a funcionar los primeros SNL, pa la XDLA “sería menester que dende la Dirección Xeneral de Política Llingüística iguaran una figura xurídica que diera estabilidá a estes entidaes, dalgo qu’amás diba permitir una mayor coordinación pa entamar campañes y que diba abaratar los costes de les mesmes”. Y ye que dende hai una década son continuos los zarros a metá del añu de los SNL porque’l Conceyu quedó ensin perres o ye noticia la mesma inestabilidá de los trabayadores, que namás son contrataos hasta final d’añu y que nun saben cuánto tiempu van tar nel so puestu de trabayu, dalgo que tamién impide facer un proyectu normalizador a plazu llargu y con garantíes de ser evaluable.

Ignacio Prieto Sarro (Lleón, 1967) ye’l ganador del I Concursu de recoyida toponímica ‘Concha de Lama’ del Club Xeitu, pol trabayu de recoyida oral “Toponimia de La Majúa” onde se recueyen les formes tradicionales del pueblu La Maxuga (Babia), llugar col que l’autor ta venceyáu por raigaños familiares, según informen dende’l Club Xeitu.

El Concursu de Toponimia ‘Concha de Lama’ convocóse la primavera pasada pol Club Xeitu en collaboración col Institutu Lleonés de Cultura, pa obres de toponimia de los conceyos de Viḷḷablinu, Murias de Paredes, Riello, Palacios del Sil, Santu Michanu y Cabriḷḷanes, cola fin de rescatar los nomes tradicionales d’estos llugares.

El premiu, dotáu con 300 euros decidiólu un xuráu compuestu por Roberto González-Quevedo, Jesús Álvarez Courel y Víctor del Reguero, que sorrayaron amás “la cantidá y la calidá de los trabayos presentaos”.

El Serviciu de Normalización Llingüística del Conceyu de Corvera, entama del 5 de payares al 9 d’avientu, los llunes y miércoles, n’horariu de 18 a 20 hores, un cursu que busca introducir a la xente inscrito na hestoria y socioloxía de la llingua asturiana y les sos falantes, centrándose en cuestiones hestóriques, sociolóxiques y socioculturales del idioma, mirando pa temes como la identidá, el poder social, los prexuicios, los derechos llingüísticos, los nuevos espacios d’usu de la llingua, la última lliteratura asturiana, etc.

Ente los conteníos va tar la formación hestórica de la llingua asturiana, espaciu simbólicu, material y territorial: trés variables; aproximación sociolóxica a la población asturianofalante: idioma y poder social; toponimia: orixe y importancia; ciencia n’asturianu: l’ámbitu desconocíu; la llingua na rede: recursos, diversidá y posibilidaes; lliteratura escrita y oral: una puesta al día.

La inscripción pue facese nel Centru Sociocultural de Les Vegues dende’l llunes 29 d’ochobre. El cursu ye gratuitu. A la xente inscrito entregaráse-yos diploma acreditativu d’asistencia n’acabando’l cursu.

Eventu onde apuntase en Facebook

La formación política Conceyu Abiertu por Mieres pidió estos díes que la páxina web del Ayuntamientu “tea tamién n’asturianu”. Denuncien que la páxina web del Conceyu de Mieres, muérganu dixital oficial de la institución municipal, “nun ufre a los usuarios de la rede la posibilidá de visualizar la mesma na llingua asturiana”. Espliquen que “dexaron dalgo de tiempu al nuevu executivu llocal pa que tornara esta situación”, pero agora esixen “que se nos dea la posibilidá d’una opción de visualización d’esta páxina tamién na llingua propia d’Asturies y del Conceyu de Mieres”.

Ente los argumentos defendíos pola formación ta’l de que Mieres ye “claramente asturfalante”, polo que “que la páxina www.ayto-mieres.es nun tea una versión de visualización n’asturianu tresmite una imaxe de pasotismu pa col ciudadanu, alloñando ainda más la institución municipal del pueblu”. Conceyu Abiertu por Mieres entiende que “la realidá llingüística que se vive nes cais del conceyu nun se correspuende col diseñu monollingüe d’esti mediu dixital”.

En segundu llugar, dende la plataforma Conceyu Abiertu por Mieres, atalanten que “la situación del asturianu ye pergrave y yá son dellos muerganismos internacionales los que señalen que con esti camín de falsa normalización l’idioma d’Asturies ta nel camín de desapaecer dafechu”. Pa camudar esa situación entienden qu’ésta sedría “una bona midida de normalización sedría ufrir una versión n’asturianu de la páxina web municipal y asina contribuyir a caltener viva la nuesa llingua”, cosa que, recuerden “yá ficieron dellos conceyos de la redolada de Mieres”.

Amás recuerden que “l’alministración, dempués de munchos escándalos y de xenerar situaciones discriminatories, yá foi avisada y llama a orde con esti tema, con resoluciones xudiciales inclusive, que llamaben a fomentar l’emplegu y usu l’idioma dende l’alministración pública”. Nesti sen, esixen “al gobiernu llocal y a los responsables de la web se punxeren manes a la obra y normalizar y fomentaren l’emplegu del asturianu na páxina web, que ye un muerganu de la alministración mierense na rede”.

Amás, faise un llamáu a Izquierda Xunida-Los Verdes, grupu que gobierna en Mieres, que “lleva nel so programa eleutoral, el compromisu de dignificar y normalizar la posición del idioma propiu del país”. Pa CA “ye una irresponsabilidá qu’enantes de ganar les eleiciones prometieran afondar nesa normalización llingüística y qu’entá nun ficieran nada”.