Comunicación

La Semana del Aula Popular José Luis García Rúa escomienza esti viernes 3 en Xixón embaxo’l títulu de “La utopía aplazada”. L’alcordanza y pervivencia de los ideales llibertarios ye un de los asuntos alrodiu de los que van xirar les actividaes programaes nesta Selmana polos colectivos culturales y sociales qu’organicen les xornaes.

L’Atenéu Obreru, la Sociedá Cultural Xixonesa, Radio Krass, el centru social Sextaferia y l’Equipu de Teatru La Máscara son los colectivos organizadores de los actos qu’escomiencen esti viernes cola so presentación y siguen el domingu 5 cola proyección a les 19.00 hores de la película “Sacco & Vanzzeti” nel centru social Sextaferia. El llunes 6 Pilar Sampedro ufierta una conferencia titulada “El mito del amor” nel salón d’actos del Antigu Institutu. El colectivu teatral La Máscara representa el martes 7 nel Teatru Xovellanos la obra “Las abarcas de Miguel Hernández”.

Les actividaes d’esta selmana cultural siguen el miércoles 8 con una conferencia de Manel Aissa titulada “El anarquismo hoy” nel Antigu Institutu y el xueves 9 nel mesmu sitiu Gregorio Morán va falar sobre “Rafael Barret o la invención del anarquismo”. La última conferencia va pronunciala el filósofu del que cueyen el nome estes xornaes, José Luis García Rúa, que va esplayase el vienres 10 sobre “Los cortos veranos del anarquismo”. Les xornaes rematen el sàbadu con una cena de confraternización nel Hotel Tryp Pelayo.

El cambiu d’horariu de la teleserieVientos de aguaa la madrugada fechu pola cadena Telecinco ta siendo retrucáu por una iniciativa de recoyida de firmes na que se pide a la canal privada que restituya la producción del arxentín Juan José Campanella a la so emisión n’hora de prime time. Alrodiu de dos mil firmes avalen esta solicitú de siguidores de la serie.

La producción na que se narra la hestoria d’una saga d’emigrantes orixinarios d’Asturies y rodada en parte n’esteriores del nuestru país tuvo nes sos primeres emisiones unos índices d’audiencia que Telecinco nun consideró bastantes pa caltener ‘Vientos de agua’ nel so horariu orixinal, a les 22.00 hores.

Aurora Vergara, una avilesina afinancada en A Coruña, ye l’autora de la iniciativa qu’al través de la páxina web www.petitiononline.com pide al equipu directivu de la cadena española la reposición de la serie de Juan José Campanella al horariu nel qu’escomenzó emitise porque a xuiciu de los firmantes “la serie, tanto pola so calidá como pola so temática de gran interés, nun ha ser relegada a la madrugada de los viernes, como ocurrió el día 20 de xinero”. La solicitú ta recibiendo alrodiu de dos mil solicitúes que l’apoyen.

Más información

La Fundación Príncipe d’Asturies acaba d’entamar la convocatoria pal premiu Pueblu Exemplar correspondiente a esti añu y que va tar abierta hasta’l prósimu 18 d’agostu. Al empar la esposición fotográfica “Impresiones.XV años de los Premios Príncipe d’Asturies” recibió na so primer selmana más de 6.000 visites y va poder vese na Plaza Trescorrales d’Uviéu hasta’l prósimu 10 de marzu.

El reglamentu de la convocatoria pal premiu Pueblu Exemplar establez que van poder presentar candidatures al mesmu instituciones, centros culturales, asociaciones de vecinos, entidaes, empreses asina como los ciudadanos que lo deseen. Amás de la documentación y los apoyos que cada candidatura presente nel so favor, la Fundación y los propios miembros del Xuráu pueden solicitar o realizar ocasionalmente los informes precisos a fin de complementar cada propuesta.

a Fundación Príncipe d’Asturies escomenzó la distribución de casi 3.000 exemplares del folletu que contién les bases pal premiu Pueblu Exemplar d’Asturies 2006, na so decimoséptima edición. Esta información ta disponible tamién nel portal d’Internet de la FPA (www.fundacionprincipedeasturias.org). La Fundación convoca esti galardón dende 1990 y na so dotación económica, de veinticinco mil euros, colabora al cincuenta por cientu’l Gobiernu del Principáu.

Fundación Príncipe d’Asturies

La organización nacionalista moza Darréu acaba d’asoleyar el so Anuariu correspondiente a les actividaes desenvueltes a lo llargo de 2005. Los conteníos íntegros del trabayu pueden consultase na páxina web de la organización en versión dixital y van distribuise como documentos de papel en centros sociales y d’ociu.

L’Anuariu 2005 de Darréu tien 60 fueyes y dixébrase en tres partes: per un llau les memories d’actividaes y actos onde participó o que desendolcó la organización amás de materiales y campañes feches, per otra una seición dedicada a la nuesa páxina web y per último la seición de prensa, onde se recueyen los comunicaos asoleyaos asina como tamién un dossier de prensa nel tan toles noticies de los medios de comunicación escrita y dixital onde se menciona a Darréu.

Darréu

Asturnews, diariu cultural asturianu, estrena una nueva estaya d’opinión abierta a los comentarios de los propios usuarios y llectores. La participación de los visitantes de la sección y l’actualización de los artículos van ser les característiques cimeres d’esti nuevu espaciu empobináu al análisis críticu de la realidá. Los primeros blogs publicaos fírmenlos Vanessa Gutiérrez y Pablo Antón Marín Estrada.

El director d’Asturnews, Próspero Morán va ser otru de los articulistes de la estaya d’opinión xunta un garrapiellu diversu de colaboradores que van dir publicando los sos artículos personales abiertos al comentariu de los llectores.

Con esta nueva sección Asturnews quier ufiertar a los sos usuarios un espaciu de reflexón y pensamientu críticos a propósitu de l’actualidá pública d’Asturies y del mundu que nos arrodia. Esta estaya d’opinión vien arriquecer los conteníos informativos diarios del nuestru periódicu dixital y el restu de les estayes que lu componen. Esperamos que tenga una bona acoyida y una prestosa respuesta por parte de los nuestros llectores.

Una weblog gráfica dedicada a recoyer semeyes de cartelos de toa clase en llingua asturiana tenta atropar el númberu más ampliu d’estes fotografíes. Anuncios, rótulos d’empreses privaes ya instituciones, señalizaciones, plaques col únicu elementu en común de tar escrites nel nuestru idioma aparecen nesta páxina.

La weblog ta dividida n’estremaes secciones: rótulos de comercios, instituciones, publicidá d’empreses y comercios, campañes públiques, vehículos, plaques de cais, señales de tráficu y un apartáu heteroxéneu dedicáu a “otres coses”. El proyectu ta abiertu a la colaboración de los usuarios y quier amosar que l’idioma asturianu pasín ente pasu va abriéndose camín na visualización pública de la so presencia tanto nel ámbitu de lo privao como de les instituciones.

Proyeutu Cartelos

El gobiernu del Principáu y el del estáu van firmar un conveniu nos prósimos díes pa consiguir oficines integraes de les distintes administraciones n’Asturies. L’oxetivu que se persigue con esta iniciativa ye eliminar la multiplicidá de trámites ufiertando una mesma ventaniella pa centralizar les xestiones.

El Conseyeru d’Economía y Administración Pública, Jaime Rabanal, anunció que l’executivu asturianu va poner en marcha la iniciativa que permita integrar les oficines estatales y autonómiques col oxetivu de dar una atención completa al ciudadanu. Esti oxetivu, señaló’l conseyeru, “respuende a una demanda cada vez más incesante na sociedá de la información: la interoperabilidá ente administraciones públiques”.

El proyectu prevee ofrecer de manera gradual una atención con varios niveles de serviciu que van dende’l rexistru telemáticu a la consulta d’información particular y d’información pública como convocatories d’empléu, hasta llegar al puntu d’una xestión integrada de determinaos procedimientos.

La Fundación Príncipe d’Asturies ye la organizadora de l’amuesa fotográfica “Impresiones” que puede visitase n’Uviéu dende esta mesma selmana. La esposición recueye la hestoria de los Premios de la institución dende que fueron creaos en 1980 hasta los nuestros díes.

Embaxo’l títulu “Impresiones. XXV años de los Premios Príncipe d’Asturies”, la plaza de Trescorrales d’Uviéu acueye una esposición fotográfica que recuerre la historia de los galardones al través de les imáxenes captaes polos reporteros gráficos a lo llargo d’estos años, y que va tar abierta al públicu ente’l 19 de xineru y el 10 de marzu n’horariu de 11,00 a 14,00 y de 17,00 a 22,00 hores de llunes a viernes y de 11,00 a 15,00 y de 17,00 a 21,00 horas los fines de selmana.

El conteníu d’esta esposición reflexa una crónica gráfica de los 25 años d’hestoria de los Premios, al través del trabayu fechu polos fotoperiodistes que cubrieron les ceremonies d’ entrega de los galardones pa diversos medios informativos y amuesa una visión retrospectiva de la mesma realidá asturiana ya internacional de les dos últimes décades.

La televisión autonómica asturiana retresmite esti fin de selmana los partíos que los dos principales equipos de fútbol asturianu, Real Sporting de Xixón y Real Uviéu, disputen en Murcia y Uviéu, respectivamente. Pa la emisión del alcuentru ente’l Sporting y el Murcia, la TPA va desplazar hasta l’estadiu de la Condomina una unidá móvil con un equipu formáu por dieciséis persones.

La tresmisión del partíu Sporting-Murcia va escomenzar a les 18,20 hores d’esti sábadu 21 y va cuntar colos comentarios del periodista José Carlos Cuesta y del ex xugador del club playu José Manuel. Darréu del partíu, la televisión autonómica, tien programada pa les 20,30 la película “Ruby Cairo”.

L’alcuentru ente’l Real Uviéu y el Racing B. va retresmitise’l domingu 22 a les 18,00 hores dende l’estadiu Carlos Tartiere. Tamién pa después del partíu tien programao TPA la emisión d’una película, nesti casu “Oliver Twist” de David Lean.

Los escritores Claudio Magris y Günter Grass van debatir esti sábadu n’Uviéu alrodiu de les llendes de la llibertá d’información y el poder de los medios nel mundu actual. L’actu, organizáu pola Fundación Príncipe d’Asturies dientro la conmemoranza del so venticinco aniversariu, fai volver a Asturies a los dos escritores galardonaos col Premiu de les Lletres pa falar d’un tema sobre’l que tienen afondao abondo na so obra.

La cita va ser esti sábadu 21 nel Salón Covadonga del Hotel Reconquista d’Uviéu a les 19,00 hores. Magris ta previsto que llegue a Asturies el viernes 20 y Grass el mesmu sábadu del debate. Pa l’asistencia al actu ye necesaria una invitación que la FPA facilita al través del númberu de teléfonu 985 96 27 10 y l’accesu al sitiu del debate puede limitase por razones d’aforu.