Comunicación

La compañía aérea de baxu coste Air Berlín va ufiertar vuelos intercontinentales dende l’aeropuertu d’Asturies vía Palma Mallorca o Dusseldorf. Asturies va conectase asina con Nueva York, Los Anxeles, Miami, Pekín y Shangay, ente otros.

Pa facer estos vuelos intercontinentales dende Asturies va haber que pasar una nueche en Palma Mallorca. El director de ventes de la compañía pa España y Portugal, Pablo Caspers, informó ayeri durante la rueda de prensa de qu’estos vuelos sólo van poer reservase por axencies de viaxes nun pudiendo emplegase la páxina web de Air Berlín.

N’Asturies, la empresa aeronáutica cuenta algamar enantes de finar l’añu los 80.000 pasaxeros tresportaos.

Los montaxes d’imáxenes de videoxuegos al estilu Machinima con soníu rial de los cronistes deportivos de Telecinco enllenen la rede nos díes previos a la cabera carrera del Mundial de Fórmula 1 que tien de celebrase esta fin de selmana en Brasil.

Un nuevu canal de TV en catalán, Sies TV, entamó n’Internet les sos emisiones el pasáu 26 de setiembre pa cubrir a tolos posibles falantes d’esta llingua y ufiertar una programación mayoritariamente cultural.

El nuevu canal basa los sos conteníos na cultura y les tendencies del territoriu de fala catalana. Los temes qu’aborda van de les artes plástiques, el cine, la economia, o los escenarios (teatru, música, ect…), a la gastronomia y el turismu, la innovación, o les lletres y la sociedá.

Páxina web de SiesTV

Dende’l 13 d’ochobre hasta’l sábadu 15 d’avientu os estudios de la RTPA na Universidá Llaboral de Xixón van acoyer un taller de Radio empoionáu a escolinos de tercer ciclu de primaria y primeru d’ESO. L’oxetivu cimeru d’esti taller ye averar a los más xóvenes el funcionamientu de la producción radiofónica al travies d’un programa prácticu y d’análisis de la actualidá.

El taller va durar 32 hores y ta pensáu pa un total d’ente 10 y 15 miembros que van ellaborar un programa semanal de dos hores en falsu directu, colo meyor de les práctiques, que se va emitir na Radio del Principáu d’Asturies.

La páxina ‘RTPA n’asturianu’, un blogue creáu por siguidores de los programes n’asturianu de la radio y televisión pública d’Asturies ta acabante d’escoyer con una encuesta los programes que más-yos presten. Esto coincide colos seis meses d’emisiones en llingua asturiana de la TPA.

Y dempués de cuasi dos meses de votaciones el programa escoyíu como’l que más presta a los telespectadores ye ‘Camín de cantares’, presentáu por Xosé Ambás, col 52% de los votos, en segundu llugar quedó ‘Al Aldu’, presentáu por Carlos Suari, Lluis Antón González, Inaciu Galán, Milio’l del Nido y Mercedes Menéndez, que sacó un 19% de los votos y en tercer llugar y col 16% quedó la seición del late night ‘Terapia de grupo’, ‘El Chigre’.

En cuartu lllugar quedó ‘Nós’, presentáu pol direutor d’Asturnews.com, Próspero Morán, que sacó’l 9% de los votos y n’últimu llugar apaez el programa dirixíu por Ramón Lluís Bande, que sacó’l 2% de los votos. La páxina entama agora una encuesta pa escoyer el programa preferíu d’ente los de la Radio del Principáu d’Asturies.

Blogue de los siguidores de los programes n’asturianu de la RTPA

La Conseyería de Cultura y Turismu del Principáu d’Asturies ta acabante de poner a disposición de los llectores un catálogu de les publicaciones n’asturianu y gallego-asturianu asoleyaes nel pasáu añu 2006.

Con esta publicación la Conseyería da continuidá a un llabor que vien realizándose ininterrumpidamente dende 1992. Esti catálogu va unviase de baldre a tol que lo solicite na dirección opll@princast.es. Asina mesmo, próximamente va poder consultase esti catálogu na so versión dixital na páxina web www.politicallinguistica.org.

Web de la Oficina de Política Llingüística

Esti sábadu la programación en llingua asturiana de la TPA cumplía seis meses d’emisiones y facíalo cola estrena d’una nueva temporada de Camín de Cantares, que va siguir emitiéndose cada sábadu a la una la tarde. Pero amás, otros programes van tener cambios d’horariu y Al Aldu cambia de productora, pasando a manes de ‘Saltadera’ la nueva empresa audiovisual d’Antón García.

El primer mediu añu d’emisiones n’asturianu zárrase con un bon balance d’audiencies y col afitamientu de los programes en parrilla: Nós, Al Aldu, Camín de Cantares y Pieces, qu’anque paez que tuvo peores resultaos d’audiencia, va siguir na programación de la TPA.

El programa Al Aldu, qu’inclúi los espacios ‘La risión’ con Lluis Antón González, ‘A galmiaes’ con Carlos Suari, ‘Recetes con cuentu’ de Milio’l del Nido, ‘Xente de casa’ con Inaciu Galán y l’‘Axenda d’Asturies” con Mercedes Menéndez, paez que pue sufrir cambios d’horariu, pero pel momentu paez que van siguir emiténdose, unu a unu, de llunes a vienres a les nueve la mañana.

”Col envís d’enanchar la variedá de conteníos n’asturianu na rede” ta acabante de ñacer ‘Series n’ast’, un nuevu proyeutu nel que conviden a toos a participar y que “tien como finxu cimeru l’ofrecimientu de series sotitulaes al asturianu pal esfrute de toos”. La primer serie sotitulada ye ‘Heroes’, concretamente’l primer capítulu de la segunda temporada, que tovía nun foi emitíu en castellán.

La serie Heroes emitió la so primer temporada pela TPA con doblaxe en castellán y pa los responsables de la páxina “ye un lluxu poder esfrutar d’una serie n’asturianu ensin tener qu’esperar a que la doblen, obviamente, al castellán”. Pero nun queden ehí los enfotos de los responsables, “nun futuru tamién podríemos entamar con series yá doblaes o inclusu atrevenos con dalguna película, too depende del nivel de participación qu’alquiera’l blogue”.

Páxina web ‘Series n’ast’

Esti sábadu caberu de setiembre, a les 12:45, el programa “Nós” de la TPA dedicóse al Grupu San Felix de Candás, faciendo una visita a ún de los sos ensayos, na villa candansina, y percorriendo la so hestoria de la mán de los componentes d’esti pernomáu grupu d’investigación folklórica. ‘Nós’ ye un microespaciu de TPA producíu en collaboración con Zebrastur y dirixíu pol periodista asturiano, y direutor d’Asturnews, Próspero Morán.

Dende va unos díes la TPA ta dando anuncia del entamu de la nueva temporada de Camín de Cantares, l’esitosu programa presentáu por Xosé Antón ‘Ambás’, que percorre los pueblos d’asturies conociendo la música tradicional de más raigañu. Mañana sábadu a la una la tarde entama la segunda temporada.

Serie documental inspirada nel Archivu de la Tradición Oral na que Xoxé Ambás, investigador de la cultura tradicional asturiana ye conductor del espaciu y fai una entrevista en cada capítulu. El programa fai tamién un retratu de la vida de les muyeres asturianes del mundiu rural nel sieglu XX. Con elles rescata lleendes, cuentos o rellatos que cuerren peligru de desapaecer. La serie percuerre Asturies d’oriente a occidente p’amosar la diversidá y riqueza llingüística del asturianu.