Comunicación

L’espaciu “Falando d’Asturies”, la Cadena Ser, va acoyer güei sábadu dende la una la tarde un especial nel que va conocese la opinión de delles persones implicaes nel conflictu de la Facultá de Filoloxía cola titulación de llingua asturiana. Ente les persones que van intervenir ta’l profesor y coordinador del Seminariu de Filoloxía Asturiana, Ramón d’Andrés y representantes d’organizaciones estudiantiles.

Amás, va conectase en directu colo alumnos de la Universidá enzarraos nel Edificiu Hestóricu de la institucion.

“Falando d’Asturies”, que s’emite tolos sábados p’hacia la una la tarde, ye un espaciu d’entrevistes venceyaes cola cultura d’Asturies. Émitese dientro del programa “A vivir que son dos días”, de Begoña Natal. Los domingos, en “Xixón de cerca”, Inaciu Galán treslládase a dalgún puntu de Xixón pa conectar en directu y comentar los eventos y asocedíos del momentu.

La Oficina Municipal de la Llingua de Xixón ye la impulsora principal de la campaña qu’ayutnamientu y Sociedá Mista de Turismu van entamar en xixón repartiendo 12.000 postales, afitando que l’asturianu ye una marca de calidá reconocible.

Los modelos de postales son cuatro y empobinense a ponder la Universidá Llaboral, la Playa de San Lorenzo, el Xardín Botánicu y un “chigre” típicu asturianu. Un “pallabreru” completa cada postal pa averanos a la realidá llingüistica de lo que s’amuesa.

La campaña presentóse nun actu nel que participaron la Responsable de la oficina Municipal de la LLingua, María Xosé Rodríguez López, el Xerente de la Sociedá Mista de Turismu, Joaquín Miranda, y el conceyal de Cultura Tradicional y Política Llingüística del Conceyu, Jesús Montes Estrada.

Güei xueves 26 de xunu, a les siete la tarde, va presentase la revista asturiana d’información xeneral “Al debalu”. Dempués del actu va tener llugar una preba de productos ecolóxicos del Conseyu Regulador de la Producción Ecolóxico. Nel actu de presentación va contase cola intervención de Dulce Gallego Canteli, conceyala de Mediu Ambiente, amás de Fonsu Fernandi, director d’«Al Debalu», y Marcos Abel Fernández, director de la mesma. Asina mesmo, va contase cola actuación del grupu xixonés W.A.N.D.A.

La editorial Espublizastur ta acabante asoleyar el segundu númberu de la revista xeneralista n’asturianu “Al debalu”. La revista tien periodicidá mensual ya inclúi entrevistes, reportaxes y opinión, ente otres cuestiones, que van dende la fotografía a, como nesti casu, les pasareles de moda.

Y ye qu’esti segundu númberu inclúi reportaxes d’agricultura ecolóxico, lleendes urbanes, un reportaxe gráficu tituláu “con vistes a la mar”, de fotografia surfera y los reportaxes “una tardi na bolera”, “llenzos de pasarela”, “Alcuentru de fotoperiodistes en Mieres”, “Viaxe: Nuea York” y entrevistes a dellos grupos de música, ente otres coses.

La revista va presentase públicamente esti xueves nel Xardín Botánicu de Xixón onde, tres l’actu de presentación, va haber una degutación de dellos productos ecolóxicos asturianos.

Los puntos de difusión de la revista xorrecen con cada númberu y según cuenten dende la dirección de la mesma “tuvo una perbona acoyida pola calidá fotográfica y los novedosos conteníos en llingua asturiana”.

La editorial abre la posibilidá de soscribise o poner publicidá mandando un corréu lletrónicu a al_debalu@hotmail.com

Descarga’l númberu dos de la revista, de baldre

Una encuesta ellaborada pola Unión de Consumidores d’Asturies, UCE, destaca qu’al 71% de los televidentes encuestaos la programación de la Televisón del Principáu d’Asturies, TPA, présta-yos “bastante o muncho”, mientres qu’un 29% declara que-y presta “poco o nada”. Según la edá, ye’l grupu de 61 a 75 años el que paez más satisfechu cola programación de la televisión pública autonómica.

La encuesta, según informó la Unión de Consumidores d’Asturies, foi realizada ente los díes 19 y 22 de mayu a 479 persones seleicionaes al azar de 18 conceyos d’Asturies. Les entrugues ficiéronse al traviés d’un cuestionariu telefónicu.

Según esta encuesta, el 78% de los entrevistaos afirmaron ver TPA en dalguna ocasión nel últimu añu, siendo mayor el númberu d’homes que la vieron que’l de muyeres. Por edaes, la mayor parte de l’audiencia concéntrase nos grupos d’edá de 16 a 29 años, 84% que dicen ver la televisión pública autonómica, y nel grupu de 46 a 60, col 83% d’audiencia, cinco puntos más que la media de tolos entrevistaos que declararon formar parte de l’audiencia.

Por conceyos y comarques, la mayor audiencia constátase nes Cuenques del Nalón y el Caudal, 84% de les persones entrevistaes en dambos casos, siguíu del Oriente (82%) y el Noroccidente (80%).

Per otra parte, la encuesta entrugaba tamién sobre’l grau d’acuerdu cola existnacia d’una televisón pública autonómica. Nesti apartáu’l 80% de les persones entrevistaes declaren tar mui d’acuerdu, frente al 20% que manifiesten tar poco o nada d’acuerdu.

Por grupos d’edá, ye nel grupu de 30 a 45 años nel que se manifiesta un porcentaxe más eleváu d’apoyu a la existencia de la TPA (85% bastante o mui d’acuerdu); mientres que nel grupu de 16 a 29 años nel que se manifiesta un menor grau d’acuerdu (78% bastante o mui d’acuerdu).

Si s’atiende a los conceyos o comarques, vuelve ser la comarca del Oriente onde con más contundencia se manifeista l’acuerdu cola existencia de la TPA (95% bastante o mui d’acuerdu), siguíu de Noroccidente (91%), Siero (90%) y la Cuenca del Caudal (88% bastante o mui d’acuerdu).

El programa de TPA ‘Después del mar’ foi galardonáu pol Conseyu de l’Academia de la Televisión (ATV) como Meyor Programa Autonómicu del 2007 na categoría d’espaciu documental. Nel apartáu de televisiones autonómiques, ‘Después del mar’ foi ún de los programes más votaos xunto con Telenoticiss Sin Fronteras (Telemadrid), Vaya Semanita (ETB-2), Ventdelplà (TV3) y La Banda (Canal Sur). El premiu va entregase’l próximu 2 de xunetu demientres la Gala de los X Premios Añales de l’Academia de Televisón que va tar presentada por Carlos Sobera, según informó l’ente de comunicación al taviés d’una nota prensa.

‘Después del mar’ ye una crónica de la emigración asturiana n’América dirixida pol periodista asturianu Rafael Lorenzo, qu’entamó a emitise en TPA’l 8 de payares del 2007. ‘Después del mar’ lleva como subtítulu ‘Asturianos en América’, porque recueye’l testimoniu de más de 70 emigrantes asturianos que residen nesi continente y que relaten en primer persona cómo foi la so emigración y cómo ye la so vida nel país d’acoyida.

La televisión pública asturiana algamó yá un 7,23% de share, cuando fai dos años del entamu de les sos emisiones. La canal autonómica llega al 98,82% del territoriu d’Asturies y consiguió nel mes de mayu un 7,23% de share, colo que se pon per delante del conxuntu de toles televisiones locales, que tienen el 3%, de la Sexta col 4,9%, la 2 col 5,2% y Cuatro que consiguió un 7,22% n’Asturies.

La cadena lleva emitíes dende’l primer día d’emisiones regulares 11.595 hores de programación, de las que 3.270 foron n’asturianu. Anguaño trabayen pa la radiotelevisión autonómica 711 trabayadores y 44 empreses, de les que 26 son productores de programes y, 24 d’elles asturianes, siempres según datos de la RTPA.

N’estes bones audiencies tuvieron muncho que ver les hores emitíes n’asturianu, que doblaron n’audiencia a les de los programes en castellán.

El buscador Google algamó esta mañana’l Premiu Príncipe d’Asturies de Comunicación y Humanidaes, fallu que se fizo públicu al meudía nel Hotel Reconquista d’Uviéu. El xuráu destacó la so “contribución decisiva al pogresu de los pueblos, penriba de fronteres ideolóxiques, económiques, llingüístiques o raciales”.

Nel acta, que foi lleíu pol presidente del xuráu Manuel Olivencia, se resalta de la mesma manera “la revolución cultural” que supunxo Google en malpenes una década al poner de manera instantánea y selectiva al algame de centenares de millones de persones el gran caudal d’información d’Internet favoreciendo “l’accesu xeneralizáu a la conocencia”.

La candidatura de Google, consideráu’l meyor buscador de la historia, foi propuesta por José Luis Pardos, embaxador d’España y miembru del xuráu. Tien amás l’apoyu d’Al Gore, premiu Príncipe d’Asturies de Cooperación Internacional 2007 y Vinton G. Cerf (Investigación Científica y Téunica 2001).

Nesta edición presentáronse un total de 25 candidatures procedentes d’Albania, Alemaña, Bulgaria, Canadá, Estaos Uníos, Finlancia, Irán, México, Polonia, Reinu Uníu, Venezuela y España. Al tramu final llegó también l’axencia Magnum Photos.

El xuráu tuvo integráu por José Antonio Álvarez Gundín; Ignacio Bayón Mariné; Emilio Casinello; Alejandro Echevarría; Javier Gómez Cuesta; Javier González Ferrari; Álex Grijelmo; José Luis Gutiérrez; Miguel Ángel Liso; Manuel Lombardero; Ramón López Vilas; Catalina Luca de Tena; Hans Meinke; Ana Rosa Migoya; Jaime Montalvo Correa; Rosa Montero; Beatriz de Moura; Manuel Olivencia; Pedro Páramo; José Luis Pardos; Alberto Pico; José Antonio Sánchez; Ricardo Senabre; Jesús de la Serna; Enrique Ybarra y Juan Luis Iglesias Prada.

Los programes emitíos pela TPA “Camín de cantares” y “Pieces”, de la productora Ámbitu, estrenaron temporada esti sábadu pasáu y nel casu de “Pieces”, cola presencia d’una importante novedá, Vanessa Gutiérrez como presentadora.

Y como vien siendo vezu nos programes n’asturianu l’audiencia acompañó les emisiones con mui bonos resultaos, algamando un 13,3% nel casu de Pieces, cuasi’l doble de la media de TPA esi mesmu día, que foi d’un 7,8%. Esta cifra colocólu como’l tercer espaciu de mayor audiencia del día.

Sicasí, “Camín de cantares”, con Xosé Ambás, siguió lliderando la programación n’asturianu con un 18,8% de cuota de pantalla, la mayor de tola parrilla de TPA el sábadu.

Estrenóse la temporada nueva de Pieces, con Vanessa Gutiérrez como presentadora

Televisión del Principáu d’Asturies (TPA) celebró’l llunes 9 de xunu’l so segundu aniversariu dende que, el mesmu día de 2006 empezaren les emisiones regulares con TPA Noticias, TPA Deportes y el cine. La programación de la cadena autonómica llega al 98,82% del territoriu d’Asturies y algamó’l mes de mayu pasáu un 7,23% de share, una cuota de mercáu n’Asturies cola que se coloca per delante del conxuntu de toles televisiones locales (3%), la Sexta (4,9%), la 2 (5,2%) y Cuatro (7,22%).

La cadena lleva emitíes dende’l primer día d’emisiones regulares un total de 11.595 hores de programación a parrilla vista (de 8:00 a 1:30 hores, aproximadamente), de las que 3.270 foron n’asturianu. Anguaño trabayen pa la radiotelevisión autonómica 711 trabayadores y 44 empreses, de les que 26 son productores de programes y, 24 d’elles (el 92,3%), asturianes.

TPA tien ente los sos oxetivos la consolidación de la programación, dedicada casi totalmente a Asturias, si nun se cuenten los espacios de ficción, y contribuir a la cohesión social y la vertebración territorial del país, amás de reforzar l’impulsu al sector audiovisual asturianu.

Noticia del share de la TPA na estayadasturianu