Comunicación

Un coleutivu d’abogaos de Granollers, Barcelona, Girona, Lleida, Granada, Palencia, Baleares y Les Palmes de Gran Canaria, reclamó esti día que se reconoza’l derechu de tolos españoles a ver n’abierto cualquier cadena autonómica. Nun comunicáu, la plataforma, xunta la Federación Catalana de Cases Rexonales y los Ayuntamientos de Montmeló, Caldes de Montbuí Fogars de Montclús (Barcelona), desplicó que la llei prohíbe anguaño la emisión de les televisiones autonómiques fuera del so ámbitu autonómicu, a nun ser que seya un territoriu cercanu y al traviés d’un acuerdu ente dambos gobiernos.

La TPA va emitir el llunes 8 de setiembre, a les 10:15 de la mañana y como parte de la programación dedicada al Día d’Asturies un programa especial de “Camín de cantares”, que se grabó’l 26 d’agostu pasáu nel Teatru Toreno de Cangas.

Igual que nos otros capítulos de la serie, Amás fai de presentador, anque nesta ocasión ta acompañáu por Vanessa Gutiérrez, presentadora de “Pieces”, l’otru programa qu’Ámbitu Audiovisual tien na programación de la TPA.

Cola xente qu’asistió a la grabación presente al fondu del planu, los dos presentadores van dir dando pasu a tolos convidaos pa entrevistalos y dexar que dean a conocer el so repertoriu. En total, van ser siete cangueses y un cangués (Amparo y Lulo de Val.láu, Binita Xuacu de Vidal, María L’Acebu, Eufrasia de Ridera, Irene y Concha de Tresmonte y Dulia de La Pacharina) que van dir pasando pel escenariu del Toreno a lo llargo de más d’una hora y que van tar apoyaos pola presencia de dellos músicos bien conocíos de la escena asturiana que tamién participaron en dalguna de les tres temporaes de «Camín de cantares», como Anabel Santiago, Héctor Braga y Tuenda.

El númberu trés de la revista xeneralista n’asturianu “Al debalu” ta yá nos puntos de distribución habituales. La entrega de branu de la revista asoleyada por Espublizastur inclúi un artículu de Boni Ortiz, reportaxes sobre la presentación pública d’Al debalu, les fiestes del branu asturianu, la esperiencia okupa entamada nel barriu de La Calzada en Xixón, el PXOU de Llanes y los sos problemes, les nueves pintures prerromániques normaes padremuñu de la humanidá o un reportaxe sobre la fiesta de la oficialidá de Bimenes.

La revista inclúi amás un reportaxe fotográficu de paisaxes asturianos, otru sobre les nueches máxiques del Xardín Botánicu Atlánticu de Xixón, un reportaxe sobre aromaterapía con flores de Bach y otros sobre Hamburgu y Navelgas.

El númberu trés entrevista a Cálico Electrónico, Felpeyu, que fala del so discu nuevu y el grupu W.A.N.D.A.

La revista piésllase con delles cróniques de conciertos y una crítica lliteraria.

El programa “Rockmería”, que dirixe y presenta Xune Elipe na radio pública d’Asturies, RPA, cambia de formatu y estrena collaboraciones mensuales, con Miguel Fernandi, Vito Álvarez, Henrique G. Facuriella y Xandru Fernández. El programa emítese tolos miércoles a les once y media la nueche y en redifusión los sábados.

Publicaciones Ámbitu ta acabante sacar a la cai de baldre, un númberu nuevu de la publicación trimestral “El Súmmum”, que tien más de seis años de vida y qu’apocayá cambió de formatu, pasando a editase a tou color, dedicáu como siempres a les nueves tendencies artísques y lliteraries.

N’esti númberu 29 apaecen entrevistes al psiquiatra Guillermo Rendueles, a la periodista y escritora Slavenka Drakulic y al grupu Tuenda, qu’estos díes presentaba discu nuevu: “Tuenda 2”. Ente otros conteníos, tamién s’inclúi una amuesa del trabayu fotográficu de Roberto Pato, una crítica estensa de “La mirada aliella” d’Antón García y testos inéditos de Agustín Vidaller, Vanessa Gutiérrez, Chus Fernández y Henrique G. Facuriella.

Damián Barreiro (Pontevedra, 1984), estudiante de Periodismu conocíu pol so blogue “El Trasgu d’Areces” y delles collaboraciones lliteraries en Formientu o Lletres Asturianes entamó la selmana pasada secciones informatives n’asturianu dientro de la programación de Televisión Local Xixón.

L’espaciu tituláu “L’axenda cultural”, un pequeñu programa n’asturianu que s’emite tolos díes dempués de los informativos de la canal llocal, a les 14.55 y 20.25 de llunes a vienres.

Amás presenta tamién un espaciu d’unos cinco minutos les fines de selmana, dempués de los informativos y faciendo una esbilla de les actividaes culturales que pasen per Asturies.

Estos programes son parte de la programación n’asturianu d’esta cadena a la que se suma tamién el programa “El maravayu”, de Berto Peña.

La crisis publicitaria entama a cobrase víctimes ente los medios de comunicación impresos y les revistes entamen como siempre siendo les más perxudicaes. “La Clave”, que dirixe l’asturianu José Luis Balbín verá apaecer nestos díes el so últimu númberu.

El selmanariu La Clave, pieslla col próximu númberu que sal a la cai, según-y comunicare a la la redacción el so direutor y creador, l’asturianu José Luis Balbín, qu’albidraba emular col selmanariu impresu l’esitu qu’algamare col programa televisivu del mesmu nome.

L’editorial del Grupu ZETA, que s’espubliza en delles cabeceres distintes del grupu, ente les que ta La Voz de Asturias, foi , pa Unión Asturianista “víctima del famosu trasgu de la llinotipia, pero única y misteriosamente n’Asturies”.

Y ye que según amuesa la formación nacionalista La Voz de Asturias tendría eliminada una parte del editorial del grupu, eliminando la parte na que se falaba de la la defensa de les llingües minoritaries del PSOE estatal.

Documentu nel qu’UAS amuesa’l cambiu na editorial de La Voz

La canal privada autonómica ta acabante xubir a youtube.com la serie de dibuxos animos “El fara d’Illán”, que se dobló por actores asturianos en Madrid y que foi emitida pela canal asturiana nel añu 2002. La serien tien un total de venti capítulos. L’Academia de la Llingua Asturiana collaboró nel so día na grabación d’esta serie que taba titulada na so versión orixinal, n’inglés, col nome de “Salty’s Lighthouse”.

La RTPA vive novedaes no que cinca a la presencia del asturianu. La primera d’elles ye’l cambiu d’horarios del programa diariu “Al aldu”, que venía emitiéndose a les 10:15 hores y que pasa a les 8:45, con repetición dempués del telediariu d’al meudía, p’hacia les trés de la tarde.

Nel casu de la RPA, les novedaes vienen por dos nuevos espacios, que se tán estrenando estes selmanes dientro de programes yá esistentes.

El primeru de los espacios lleva más d’un mes emitiéndose dientro del programa “Radiolandia”. L’espaciu ye “l’asturianu d’otru xeitu” y ta presentáu por Samuel Grandín. Na sección trátense temes de tou tipu, que van dende la hestoria del ochobre de 1934 a la vida de Bob Marley.

L’espaciu, d’unos quince minutos, emítese tolos martes a les 11:30 cuntando con una tema que se desenrrolla con charra, un cantar rellacionáu col mesmu y la sección “Güei deprendemos una pallabra n’asturianu”.

D’otra banda, y dientro del programa “Paraísu Natural” d’Antón García, estrénase esti xueves a les 16:30 hores la sección “A pincelaes”, presentada por Iris Díaz Trancho.

“Pincelaes” ye un espaciu na que la escritora busca “alcontrar esos llugares del mundu que tienen la capacidá de respiganos”. Nun ye, diz l’aturoa “una guía de viaxe, nin siquier un cuadru que tenga que pintase enteru; namás qu’una suxerencia que dexo enriba la mesa”. Esta selmana estrénase col templu zoroastra de Chok Chak, n’Irán.