Comunicación

Dempués de numberoses protestes dende’l ñacimientu de la RTPA, paez que la televisión pública asturiana entama a cumplir colos espedientes toponímicos aprobaos pol Gobiernu d’Asturies nos años últimos. Asina, esta selmana pudo vese como la TPA recitificaba y entamaba a usar el topónimu Torazu y non el castellanizáu “Torazo” pal ganador del Premiu Príncipe d’Asturies al Pueblu Exemplar.

Les novedaes llegaron tamién a “TPA Noticias”, qu’anque oralmente sigue usando los topónimos en castellán, usa nos rótulos la toponimia billingüe o n’asturianu namás, nel casu de los topónimos que la tienen oficializada de cualesquier de les dos formes. D’esta forma pudieron veses a lo llargo d’esta fin de selmana rótulos coles formes “Gijón/Xixón” ó “Langreo/Llangréu”.

Dellos d’estos cambios pudieron vese tamién na páxina web de la RTPA.

Yá ta nos puntos habituales de distribución el númberu d’ochobre de la revista xeneralista n’asturianu “Al debalu”, que con ésti fai 5 númberos espublizaos. La revista tien como tema central, nesti casu, un reportaxe alredor de los xuguetes y oxetos empobinaos al placer sexual. Amás la revista cuenta con artículos d’opinión, música, aventura, ecoloxismu…

Un artículu de Boni Ortiz abre’l númberu, qu’amás del reportaxe yá citáu tien otros nos que la revista divulga datos como los altos niveles de contaminación presentes n’Asturies, el movimientu “slow food” nel país, amás d’otros reportaxes sobre vinos europeos, una espedición asturiana al Mont Blanc, crítica teatral, cinematográfica y una entrevista a Luis Eduardo Aute.

Al debalu pieslla esti númberu con un reportaxe sobre l’últimu conciertu del grupu cántabru “La Fuga”, en Llugones y delles cuestiones musicales más, con una entrevista al músicu Arma X.

La editorial AsturtOOns presenta estos díes un nuevu sitiu web, totalmente reformáu col que quier estrechar el contactu colos sos llectores y con toes aquelles persones interesaes nes sos publicaciones y trabayos. Amás, axunta’l dominiu asturtoons.es, colo que, a partir d’agora, podrá llegase a esta web pelos dos dominios “.com” y “.es”. La nueva web complétase con un blogue agospiáu en “Blogger” embaxo’l títulu de AsturtOOns Noticies”.

AsturtOOns tamíén tien l’enfotu de poner en marcha, nos prósimos díes, nueves estayes empobinaes a los escolinos asturianos, cola apertura d’un nuevu canal onde ufiertar dalgunos de los cuentos audiovisuales nos que trabaya, y que puen valir pa desendolcar el trabayu educativu nos colexos.

Nes prósimes selmanes, la editorial también va dir dando anuncia de les sos novedaes pa esta temporada, incluyendo dos nueves coleiciones.

Nueva web de la editorial

El programa “Al aldu”, formáu poles seiciones “La risión”, “A galmiaes”, “Recetes con cuentu”, “Xente de casa” y “L’axenda” vuelve a cambiar d’horariu. N’esti casu la nueva hora d’emisió va tar ente les 8 y les 8 y media aproximadamente.

Amás, y como dende va unos mese, el programa repítese tolos díes dempués de TPA Noticie, alredor de les 14:45 hores.

Al aldu ta presentáu, de llunes a vienres y respctivamente, por Lluis Antón González, Carlos Suari, Milio’l del Nido, Inaciu Galán y Mercedes Menéndez, y producíu por Saltadera Ediciones.

La Cadena Ser de Xixón, asitiada nel 96.5 del FM va entrevistar a Xune Elipe, llíder de Dixebra en directu y dende’l Liet Lavlut de Laponia, onde representen a Asturies nel festival musical de llingües minorizaes más importante d’Europa.

La entrevista va facela, a partir de la una la tarde, Inaciu Galán dientro del espaciu “Falando d’Asturies”, que s’emite los sábados nel programa “A vivir que son dos días”, dirixíu por Begoña Natal.

Radio Sele, 106.1 del FM, va emitir esti sábadu en directu el festival Liet-Lavlut, onde participa’l grupu asturianu Dixebra col tema “Indios” a partir de les siete la tarde.

Amás, pue escuchase’l festival poniendo la dirección mms://mms.omropfryslan.nl/tv en programes como Real Player, Winamp o Windows Media Player.

Sobre la falta d’atención mediática del Ente Públicu de Comunicación d’Asturies presentó estos díes una protesta’l Bloque por Asturies, “que considera un despreciu’l tratamientu dau pol Gobiernu d’Asturies a un acontecimientu de tanta importancia p’Asturies”.

La Xunta pola Defensa de la Llingua Asturiana denunciaba esti vienres públicamente l’incumplimientu sistemáticu que la Radiotelevisión del Principáu d’Asturies (RTPA) “fai de los decretos de toponimia oficial cuando, como ente públicu que ye, tenía que ser un mediu fundamental pa llevar a la práctica tolos alcuerdos y normatives aprobaes pol Gobiernu asturianu”. Sigún la Xunta “ye vergonzoso ver cómo, depués de que 32 conceyos tengan la so toponimia oficializada y publicada nel BOPA, l’ente públicu de comunicación nun faiga casu d’ello y siga usando topónimos que yá nun tienen validez llegal”.

La xunta fai alcordanza de que los decretos de toponimia son bien claros: «el so usu ye d’obligáu cumplimientu por parte de l’alministración pública». Y darréu d’esto camienta que “nun hai más vueltes que-y dar. Tanto la RTPA como’l Gobiernu asturianu tán actuando illegalmente no tocante a la toponimia oficializada. Asturies ye la única comunidá con llingua propia onde los medios de comunicación públicos nun emiten nel so idioma, con tolo qu’ello podía valir pa normalizar una llingua que ta a puntu de desapaecer si nun se tomen midíes urxentes y bien planificaes”.

Pala Xunta “ta claro que los intereses del Gobiernu asturianu van per otru llau: el de marxinar la llingua asturiana. Bon exemplu tenémoslu cola toponimia: apruébense los decretos pa depués nun los cumplir. La radio y la televisión que paguen tolos asturianos y asturianes tien que respetar la llei y usar les formes toponímiques que son oficiales en tola so programación, tanto nel so usu oral como escritu. Nun lo facer, amás d’incurrir na illegalidá, demuestra una irresponsabilidá bien grave que nun lleva más qu’empeorar, conscientemente, la situación que vive la llingua asturiana”.

Darréu de tolo mentao, la Xunta pola Defensa de la Llingua Asturiana “esíxe-y al Gobiernu asturianu que cumpla la llei y que faiga cumplir los decretos de toponimia tanto na RTPA como en tola alministración del Principáu d’Asturies”.

Europa Press de Cataluña entamó güei la tresmisión del ‘Servei en Aranés’, un nuevu canal de noticies en llingua occitana que tien por oxetivu, según amuesa la edición n’asturianu de l’axencia “l’oxetivu de contribuyir al espardimientu y promoción d’esta llingua propia de la Val d’Aran nos medios de comunicación y nos distintos ámbitos de la sociedá”.

Al traviés del serviciu, que cuenta con apoyu de la Conseyería de Cultura de la Generalitat, van tresmitise “les principales noticies de l’actualidá diaria, non sólo catalana, sinón tamién estatal y internacional, asina como de les diferentes árees temátiques, n’horariu de 9 a 21 hores de llunes a vienres. Va calcase nes noticies xeneraes nel Valle d’Arán, onde Europa Press dispón de corresponsalía”.

El nuevu canal ponse amás “a diposición d’aquellos medios de comunicación, instituciones y empreses que yá seyan abonaes al Serviciu Autonómicu Catalán d’Europa Press ensin costu adicional”.

Páxina web del “Servei de noticies” n’Aranés

L’equipu de la serie de TVE “La señora” viaxa otra vuelta a Asturies pa grabar los esteriores correspondientes a la segunda temporada. La serie de TVE, ambientada nos años 20, recueye la difícil relación amorosa entre Ángel y Victoria, dos xóvenes de oríxenes estremaos.z

“La Señora” ye un apueste de Televisión Española poles series históriques de calidá, que ta producida por Diagonal TV y narra les peripecies de la familia Márquez, ricos burgueses propietarios d’unes mines de fierro y de fábricas de tabaco.

Dende esti llunes 29 de septiembre al vienres 3 d’ochobre, un grupu importante de los principales actores de “La Señora” viaxa a Asturies pa rodar los cuatro primeros capítulos de la segunda temporada.

Adriana Ugarte (Victoria), Rodolfo Sancho (Ángel), Roberto Enríquez (Gonzalo), Alberto Ferreiro (Pablo), Lucía Jiménez (Encarna), Teresa Hurtado (Visitación), Raúl Prieto (Salvador), Pepo Oliva (Justo), Ana Wagener (Vicenta), Fernando Cayo (Ventura), Berta Ojea (Adela), Inma Cuevas (Rosalia), Carolina La Pausa (Isabelita), Nieve de Medina (Consuelo), Pedro Miguel Martínez (Don Enrique) y Raúl Peña (Hugo de Viana) protagonicen estos nuevos capítulos que se van grabar en dellos pueblos de la costa asturiana. Les localizaciones na cornisa cantábrica van ser na Casa Roja de Colombres(el martes 30 de septiembre y el miércoles 1 d’ochobrte); nos acantilaos de Ribesella (el miércoles 1 y el vienres 3), y na ermita de Cadavéu, ente L.luarca y Cuideiru (el xueves 2 d’ochobre).

Rafael Rodríguez Valdés (Uviéu, 1978) llicenciáu n’Hestoria pola Universidá d’Uviéu y autor, d’ente otros trabayos, de “Llingua Asturiana y Movimientu Obreru. 1899-1937” faló esti sábadu na Cadena Ser del númberu dos de la revista d’hestoria contemporanea d’Asturies, Erada, que dirixe y qu’espubliza Trabe.

Na entrevista, Rodríguez Valdés adelantó dellos de los conteníos de la mesma.

La entrevista encuádrase dientro del espaciu “Falando d’Asturies”, que s’emite tolos sábados p’hacia la una la tarde. Un espaciu d’entrevistes venceyaes cola cultura d’Asturies que presenta Inaciu Galán dientro del programa “A vivir que son dos días” nel 96.5 del FM.