Comunicación

Los cambios na programación que vivió nestes selmanes la televisión pública d’Asturies caltuvo dos selmanes de programación ensin l’únicu programa diariu n’asturianu d’esta canal, “Al Aldu”. Esti llunes, a les 9:30 hores, según la programación qu’asoleya na so web la TPA, va entamar a emitise otra vuelta esti programa que ta cerca yá de cumplir dos años n’antena.

“Al Aldu” ye un programa de la productora asturiana “Saltadera” qu’acuta los llunes pal humor con ‘La risión’, un espaciu coordináu por Lluis Antón González y onde apaecen dalgunos de los meyores monologuistes del país. Los martes Carlos Suari ta al frente de la estaya deportiva ‘A galmiaes’, que percorre l’actualidá de los deportes n’Asturies. Milio’l del Nido lleva a los espectadores les sos ‘Recetes con cuentu’ los miércoles, mientres que los xueves ye Inaciu Galán l’encargáu d’acercanos l’actualidá internacional más entretenida con ‘Xente de casa’. ‘Al aldu’ termina la selmana los vienres con Mercedes Menéndez y la so ‘Axenda d’Asturies’, con actividaes pa la fin de selmana.

El programa pue vese de llunes a vienres a vienres a les 9:30 hores y en delles repeticiones a lo llargo de cada xornada y les fines de selmana.

El director del programa radiofónico “La Linterna”, César Vidal, que s’emite pa tol estáu na Cadena COPE, comentó ayeri la noticia del apoyu del cantautor Víctor Manuel a la campaña “Yo doi la cara pola oficialidᔠal traviés d’un vidiu. Pal periodista, l’artista asturianu “taba pola oficialidá nos años sesenta, cuando escribió esa canción guapísima, conmovedora, que se-y llenen a ún los güeyos de llárimes, cantando les loes del Xeneralísimu Franco”.

Pa Vidal, el mierense ye “la monda” y con esti sofitu a la oficialidá de la llingua asturiana “instalóse definitivamente na llocura”.

Nel programa pudo oyise amás, como los llocutores de la Cadena Cope castellanizaben el nome de la Xunta pola Defensa de la Llingua Asturiana o l’apellíu de la presentadora de la TPA Sonia Fidalgo, que tamién apoya la camapaña pola oficialidá, a la qu’apellidaron “Hidalgo”.

La Televisión Local de Gijón (TLG) podría pesllar darréu, depués de qu’ayeri se conociere que comunicó’l despidu a 30 de los 47 trabayadores con que cuntaba la televisión local pionera n’Asturies. El pieslle de TLG vendría a sumase a los problemes de Localia, de la qu’entá nun se sabe si podrá seguir n’Asturies depués del abandonu de PRISA de la so cadena de televisiones locales.

Los trabayadores de TLG van caltener esta tarde una xunta pa analizar la situación y tienen anunciada una concentración en Xixón, na Plaza Mayor, pal sábadu 17 a les 19 hores.

Convocatoria de la concentración escontra los despidos nos medios asturianos

Les negociaciones ente’l Grupu Zeta y los trabayadores entamen a dar frutos y esti día facíase l’anuncia de que la dirección del Grupu suspende durante 15 días l’Espediente de Regulación d’Emplegu (ERE) que cinca a 25 empreses del grupu y a dellos trabayadores de LA VOZ DE ATURIAS.

,Tres de xuntase durante diez hores colos representantes de los trabayadores y cola mediación de la Generalitat, según fontes de la dirección y de CC.OO, les dos partes algamaron un acluerdu esta cabera nuechi

La dirección del Grupu Zeta vieno acabante asegurar que la empresa comprometiérase a “intentar amenorgar el númberu de trabayadores afectados por el ERE”, que, nun principiu, era de 531.

A dalgo más de venti díes pa que termine’l plazu de votación, la votación pa escoyer al meyor blogue sigue recibiendo votos, según anuncien nel blogue organizador. Nesti momentu, los blogues qu’encabecen la llista de los más votaos son “González y González”, con 47 puntos; “El Trasgu d’Areces” con 30 votaciones y “La verdá ye mentira”, con 27.

A pocos puntos, toos con 25 o menos, tán “L’Asturies Lliberal”, “”El Xanu’l Caborniu” y “Fueya en blanco”.

Ente los venti y los diez puntos tán: “Ta pa ponga”, 13 puntos; “Ensin Refaxu” con 12 puntos; “TrayasgayA” que tien 11; “Escucando Estrelles”, con 11 puntos; “Yetube” que suma 11 puntos; y “La Esfoyaza”, y “La Mirada Moyada” algamando 10 puntos dambos dos. Amás, otros venti blogues apaecen nel llistáu con menos de diez puntos.

Hasta les doce la nueche del 31 de xineru siguen recibiéndose votos de los blogueros qu’usen l’asturianu. Caún pue votar con 5, 3 y 2 puntos a trayasgaya@hotmail.com

Como vien siendo habitual dende l’entamu de les emisiones de la TPA, el Pueblu Exemplar, nomáu pola Fundación Príncipe d’Asturies, va ser el llugar escoyíu pa la emisión de les campanaes de fin d’añu pela cadena autonómica. En Torazu, nel conceyu de Cabranes, van tar como presentadores María del Cueto, de “Conexión Asturias” y el personaxe de “Terapia de Grupo”, Samba.

El programa va entamar a les doce menos cuartu y va durar hasta les doce y media, del yá día 1 de xineru.

Otra cita reseñable de la programación de la TPA va ser a les diez y media la mañna del día 1 de xineru, cuando va retresmitise la ceremonia na que s’entreguen los Premios de la Crítica 2008 RTPA, que se ficieron nel Auditoriu Teodoro Cuesta de Mieres.

Amás, nel añu 2009 va haber novedaes na parrilla de la TPA, qu’elimina les emisiones del magacine de la mañana “Con dos de azucar” y qu’acurtia la duración diaria de “Terapia de grupo”. Sicasí, la programación n’asturianu va continuar ensin novedaes, cola emisión diaria d’Al aldu y los programes selmanales Nós, Camín de cantares y Pieces, que pel momentu nun sufren cambios.

Con motivu de la celebración del III Día de la Llingua Lleonesa entamáu pola Conceyalíade Cultura Lleonesa del Conceyu de Lleón, a lo llargo d’esti martes 30 d’avientu desenrrolláronse una riestra d’actividaes al traviés d’Internet, que se pudieron siguir na páxina web puntulli.org

A les 10 de la mañana’l Conceyal d’Educación, Cultura Lleonesa y Nueves Tecnoloxíes, Abel Pardo Fernández, abrió l’actu con unes pallabres institucionales. A les doce, celebróse una mesa redonda col títulu “El Llïonés na alministración llocal” empobinanda namás pa emplegaos del Conceyu de Lleón.

Les actividaes de la tarde entamaron a les cuatro con “La Llingua Llïonesa y la costrución de páxinas web”, a cargu de Xairu Llópez, diseñador de páxines web.

A les seis, “La Llingua Llïonesa y l’asociacionismu” tuvo al cargu d’Adrianu Martín, presidente de l’Asociación Berciana en defensa de la llingua lleonesa “El Toralín”.

A les ocho la tarde Héctor Villazala, presidente de l’Asociación de la Llingua Llïonesa “El Fueyu”, faló del “ensiñu de la Llingua Llïonesa n’adultos”. El pieslle de la Xornada, tuvo llugar a les 22 hores con Abel Pardo, que dio llectura a la conferencia “Llingua Llïonesa guei: autualidá y programas de futuru”.

Les charres siguíense al traviés del programa messenger en directu.

Internet vieno acabante de superar por primera vegada n’audiencia a los periódicos y, salvo pola televisión, de convertise na fuente cimera de noticies nacionales ya internacionales nos Estaos Xuníos.

Asina lo asoleta una encuesta divulgada esta selmana pol Centru d’Investigación Pew, qu’indicó que’l 40 por cientu de los estadounidenses algama les sos noticies sobre asuntos nacionales ya internacionales d’Internet, en comparación col 24% en septiembre de 2007.

La Televisión del Principáu d’Asturies emitirá nestes Navidaes una programación especial pa celebrar les fiestes y el so tercer aniversariu d’emisiones, cola que quier aportar a tolos públicos. La cadena fadrá un despliegue en dellos actos, el primeru esti llunes cola lotería y delles otres emisiones especiales nes que sedrán los documentales los protagonistes.

Esti vienres 19 a les 8 entamó la emisión d’un nuevu programa en Localia Televisión, “Escolinos y non tan escolinos” que va emitise darréu hasta la fin d’añu en que ta anunciáu’l pieslle de la canal a nivel del Estáu, anque entá nun se conoz lo qu’asocederá cola canal asturiana.

L’espaciu cultural ta empobináu a un públicu mui ampliu y encadarmase en cuatro secciones: la primera ¡Vete tu a saber! Los neños y neñes echarán dellos monólogos, en Dar en clavu, tendrán que responder a una esbilla d’entrugues. Habrá tamién una sección de grupos musicales infantiles, De romería y a lo postrero en De parola, entrevistes.

Emitiránse en total hasta la fin d’añu 6 programes: el primeru ya s’emitió esti vienres 19, y seguirán les emisiones el llunes 22, martes 23, miércoles 24, xueves, 25 y vineres 26, toos dende les 8 de la tarde. El programa presentalu Mª Luz Pontón.