Comunicación

La Federación de Sindicatos de Periodistes (FeSP) vieno acabante solicitar esti día al Gobiernu que si decidiere sofitar con ayudes económiques a les empreses de comunicación como solicitaren los editores de diarios el pasáu avientu, se-yos dean namái a les empreses que “garanticen” los puestos de trabayadores de los sos emplegaos.

>

Nun comunicáu asoleyau esti día l’asociación atalante que les ayudes gubernamentales a los medios valdríen si non pa “aumentar les cuentes de resultaos de les empreses”. La FeSP desixe tamién a les empreses la presentación de planes de viabilidá acordaos colos comités; el cumplimientu de les obligaciones de contratación; planes dignos pa les práctiques d’estudiantes y conseyos de redacción que puean asegurar la pluralidá

.

Unos 20.000 asturianos podríen quedar ensin ver la televisión tres l’apagón analóxicu, según asoleyó esti día n’Uviéu’l director de desarrollu de negociu de SES-Astra, Miguel Pingarrón, que presentó les conclusiones d’un estudiu sobre la Televisión Dixital Terrestre (TDT) n’Asturies.

Según Pingarrón “nesti momentu existen 100.000 asturianos que tienen dificultaes pa ver la TDT” y por mor d’ello, dende la empresa SES-Astra pídese a l’Alministración un compromisu pa llevar la televisión al cien por cien de la población, y “non al actual 92 por cientu previstu.

El problema principal. según esti estudiu, ye que les redes terrestres cunten con dos dificultaes especiales, la dispersión xeográfica y la orografía perimportantes nel casu asturianu.

El programa de la radio pública asturiana “Nomes d’Asturies” va emitir güei un programa nuevu, que como cada llunes percorre la vida d’un personaxe asturianu de la hestoria o un espisodiu reseñable de la mesma. Nesti casu, los actores del programa van reproducir la vida del políticu asturianu de la FSA, Belarmino Tomás, que llegó a ser presidente del Conseyu Soberanu d’Asturies y Lleón.

El programa tien guión d’Inacio Rodríguez-Solar, escritor con testos espublizaos en revistes como Lletres Asturianes, Formientu o Reciella Malory.

El programa va emitese’l llunes día 16 a les 19:30 y el domingu 22 a les dos de la tarde.

Chechu García dirixe “Nomes d’Asturies”, onde son actores habituales Eva Vallines, Rocío Pinín, Roberto Corte, Silvino Torre o Azucena Álvarez…

La televisión pública asturiana (TPA), va estrenar el vienres 27 y n’horariu de máxima audiencia, una versión renovada del programa “Terapia de Grupo”, embaxo’l nome “La gran noche de Terapia”. Una gala que va presentar cada vienres Lía Beltrán, que fuere presentadora de TeleUviéu y hasta va poco, reportera del programa “Con dos de azucar”, de la TPA.

El programa, que va emitise de 22 a 24 hores, va producilu Zebrastur y va cuntar cola collaboración de Pedro Durán, Joaquín Pajarón y Alberto Rodríguez, que van interpretar a los yá perconocíos personaxes de La Marquesina, Toño, Raikkonen, Petiso y Samba, ente otros.

Nel programa van facese entrevistes con personaxes d’actualidá nel panorama estatal, como la cantante Soraya, que va ser la primer entrevistada nel programa. La música va tener tamién el so espaciu, y tán concertaes actuaciones d’artistes como David Bustamante o Los Chicos; amás de grupos y solistes asturianos.

La nueva apuesta de TPA, “La gran noche de Terapia”, va tener amás secciones fixes como “El consultorio de La Marquesina” y “Yes mundial”, un concursu de talentos que quier descubrir a los artistes más “llamativos” d’Asturies. El ganador va llevase 6.000 euros.

Pa esti programa, TPA estrena plató, el más grande d’Asturies, asitiáu n’Avilés y con una estensión de 900 metros cuadraos.

La hestórica sección del diariu El Comercio, que cumplió l’añu pasáu 30 años espublizándose, pasa dende esta selmana de quincenal a periodicidá selmanal, anque pasa de dos a una páxina. La sección n’asturianu espublízase los martes y trata noticies culturales, con dellos artículos de fondu, d’escritores como Ana Vanessa Gutiérrez, Berta Piñán o Xuan Bello, ente otros.

“Alitar Asturies” entamó pola iniciativa de Conceyu Bable embaxo’l nome d’Estaya Rexonal y dempués d’un tiempu curtiu ensin presencia d’asturianu n’El Comercio, recuperóse col nome col que mos llegó hasta güei.

La estaya entamó llevándose n’andecha polos miembros de Conceyu Bable, más tarde foi Ramón d’Andrés, que tuvo que dexar la xestión de la sección en manes del so pá, l’escritor yá fallecíu Mánfer de la Llera, pa más tarde llevala los dos a comuña. La sección tuvo unos entamos más políticos y col tiempu garró la forma d’una sección cultural centrada na cultura asturiana y na lliteratura na nuesa llingua.

Les últimes etapes de la sección lleváronles alantre Francisco Álvarez, Xurde Fernández y Enrique Carballeira, responsable actual de la estaya.

La canal estatal Telecinco vieno acabante firmar el “Manifiestu pola Llingua Común, el castellán”, qu’impulsen dellos medios de comunicación como El Mundo o la Cadena COPE y personalidaes del mundu de la cultura, principalmente. El documentu pretende reducir la presencia de les llingües minorizaes na enseñanza de les comunidaes autonómes billingües, ente otros oxetivos, col envís de reforciar la hexemonía del castellán. Esti posicionamientu fizo qu’un movimientu non organizáu de particulares entamaren un boicot escontra la canal, qu’entamen a apoyar delles organizaciones.

El “Manifiestu” que fizo que xurdiera la polémica ta firmáu por dellos intelectuales, como Mario Vargas Llosa, Fernando Savater o Álvaro Pombo, y nél piden al parllamentu español aperiar una normativa p’afitar que ‘l castellán seya la llingua oficial de tol territoriu y la única “que puea ser emplegada polos sos ciudadanos”.

Telecinco ye la primer televisión que s’enxerta nesti manifiestu. Amás, Telecinco dixo nel informativu del meudía, que pon a disposición del colectivu qu’entama esta iniciativa, la so canal de televisión pa dar sofitu a esti proyectu.

N’Asturies, l’Asociación Cultural N’AST unvió estos díes un comunicáu nel que sofita la iniciativa popular que percuerre la rede pidiendo’l boicot a la cadena de televisión Telecinco. Dende l’Asociación en defensa de la cultura y la llingua asturianes N’AST tienenlo pernidio: “Si ellos roblen el manifiestu, nós apagamos Telecinco” y fain llamáu a apagar Tele5 “pola so postura escontra la diversidá llingüística y los derechos llingüísticos de los falantes de llingües diferentes al castellán”.

El testu completu del boicot a Telecinco ye’l siguiente:

Apaga Tele5

La canal de televisión Telecinco sofita dende güei el ‘Manifiesto por la lengua común’, que ‘l pasáu 23 de Xunu asoleyó un ensame d’ inteleutuales en Madrid.

La canal comparte los petites d’ esti ensame d’ inteleutuales, ente los que s’ afaya Mario Vargas Llosa, Fernando Savater o Álvaro Pombo, que piden al parllamentu español aperiar una normativa p’ afitar que ‘l castellán seya la llingua oficial de tol territoriu y la única ‘que puea ser emplegada polos sos ciudadanos’.

Telecinco ye la primer televisión que s’ enxerta nesti manifiestu. Amás, Telecinco dixo nel informativu del mediudía, que pon a dimposición del coleutivu qu’ entama esta iniciativa, la so canal de televisión pa dar sofitu a esti proyeutu.

Si ellos roblen el manifiestu, nós apagamos Telecinco.

Xuntos podemos!

Apaga Tele5

El PP de Xixón convida a los sos militantes a firmar el “Manifiestu pola Llingua Común, el castellán”

Esti vienres 23 de xineru, a les doce la mañana, l’Aula Magna del Edificiu Hestóricu va tener llugar l’Actu d’Homenaxe a Paco Ignacio Taibo I, nel que va facese entrega del I Premiu ASICOM de Periodismu Cultural. Nesti mesmu actu va realizase la inauguración de la Cátedra ASICOM de Periodismu Cultural Paco Ignacio Taibo I, que va celebrar la so primer conferencia esi mesmu día, impartida por Benito Taibo Mahojo y col títulu “Too ye cultura. El retu de la comunicación”.

Según pudo saber la redacción d’Asturnews, la canal llocal de Xixón (TLG), que ta acabante anunciar el despidu de más de trenta trabayadores, punxo fin nesti despidu masivu al contratu que caltenía col etnógrafu Alberto Álvarez Peña pa la realización del programa “Marabayu”, que xunto cola axenda cultural diaría, presentaba dende febreru de 2008 l’estudiosu de la tradición asturiana, na canal xixonesa.

D’esta manera, Televisión Llocal Xixón termina con cerca de quince años de programación en llingua asturiana na so canal dende qu’en 1994 Xosé María Vega presentare “La miriella” y dellos espacios informativos n’asturianu. Un tiempu nel que pasaron pela canal otros comunicadores qu’usen la llingua asturiana como Xurde Morán, col so esitosu programa “Caminos y rondas”, Inaciu Galán cola so “Clas de llingua asturiana”, Daniel García de la Cuesta o Damián Barreiro, ente otros.

Dempués de la fin de les emisiones de Localia TV, y con elles, la fin del programa “La tele de los escolinos” de Mari Luz Pontón, la televisión llocal pierde importantes espacios pal asturianu, mientres la TPA avanza lentamente na realización de programes en llingua asturiana, calteniendo los programes “Al Aldu”, “Pieces”, “Nós”, “Camín de cantares” y otros espacios como”El chigre” o parte de los cuentacuentos del programa infantil “Prestasgaya”.

Alberto Álvarez Peña estrena programa n’asturianu en Tele Xixón

La emisión esti sábadu 24 de xineru del programa “Nós” de la TPA, que s’emite al mediudía, va dedicase a la Banda de Gaites de Villaviciosa, adientrándose nun de los sos ensayos y amosando delles pieces del repertoriu de la Banda.

Nel programa, que dirixe y presenta Próspero Morán, faise un percorríu pela historia y actividaes de la Banda de Gaites que dirixe Martín Poladura.

La sesta entrega d’esta temporada, qu’entamó’l primer sábadu de Payares n’Ibias, componse de 30 capítulos de 10 minutos de duración caún realizaos íntegramente n’asturiano. L’espaciu p>vien superando’l 10 por cientu d’audiencia en dellos programes d’esti añu y algamó na primer temporada una cuota media del 8,2%, que superaba en cásique un puntu al promediu actual de la cadena, un 7,4%, según datos facilitaos por Taylor Nelson Sofres (TNS).

<

Nos emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.

El Partíu Asturianista (PAS) y Unidá Nacionalista Asturiana (UNA), asoleyaron esta selmana pasada dellos comunicaos nos que se solidaricen colos trabayadores de los medios de comunicación asturianos que viven recorte de plantilla nes últimes selmanes.

El PAS amosó’l so sofitu a les plantilles de los medios en peligru cola so presencia na concentración d’esti sábadu en Xixón. Y quixo recordar los casos de Localia, La Voz de Asturias y los trabayadores despidíos en Telexixón, que nun descarten “que seya una represalia poles decisiones del PSOE en Tinéu (al respective, cabe recordar que Telexixón entró nel paquete de negociación pa que Victorino Alonso se ficiere con FERPI, lo que, a la so vegada, enxareyó unes cuantes operaciones en dellos puntos d’España, ente otros, n’El Musel)”.

Pela so parte, UNA ve alarmante “la situación de precariedá de los trabayadores del seutor de la información y comunicaciones asina como’l previsible amenorgamientu de medios de comunicación asturianos, lo qu’afeutará a la pluralidá informativa, tan necesaria anguaño n’Asturies”.