Comunicación

Dende va dellos díes pue atopase nos quioscos y llibreríes de davezu, el númberu 7 de la revista Atlántica XXII, qu’apaez el primer vienres de cada mes.

La revista consta d’80 páxines, distribuyíes nes sos secciones habituales. N’Opinión apaecen dos firmes nueves, les de Miguel Rodríguez Muñoz y Francisco Prendes Quirós.

La fórmula 1 fai dende esti sábadu camudar la programación en llingua asturiana de la TPA. Nós, el programa que dirixe Próspero Morán, entamará a les 10,45 hores y tendrá a la Xunta Pola Defensa de la Llingua Asturiana y los sos cursos d’adultos como protagonistes.

El programa adientraráse nel cursu p’adultos que se vien desendolcando dende’l mes pasáu nel LLar Solidariu d’Uviéu organizáu pola Xunta.

La Xunta pola Defensa de la Llingua Asturiana entamó estos díes una campaña per Internet pa pidir a los miembros de la dirección de la RTPA más programación n’asturianu, con meyores horarios y más amplitú temática, amás de “respetu a la toponimia oficial na programación en castellán”. La campaña vuelve a poner d’actualidá una reivindicación que yá fuere puesta en marcha cuantayá, munchos enantes de l’apaición de la TPA. La Xunta ufre a los ciudadanos un modelu de carta y les señes de corréu lletrónicu a les que la mandar.

Piden amás, nun escaecer mandales a toles cuentes y “tamién a les nuestres señes”, pa llevar cuenta de los correos que lleguen a la RTPA.

Asturnews ufre la carta completa y les direcciones pa mandala

Dende’l domingu la celebre emisora en llingua asturiana Radio Sele reinició les emisiones na FM, dende’l 106.1, y na so páxina web. La emisora, que cumple l’añu que vien un cuartu de sieglu nes ondes, tuvo dellos meses ensin emitir por problemes técnicos na so sede d’Uviéu y vuelve agora cola so programación habitual, qu’inclúi Nueches de Radio,de llunes a xueves de 20 a 22 hores, con Xuanxo Mariño y Mely Fernández.

Nesti programa collaboren Nacho González, que los llunes fai un repás a la información deportiva, Xulio Vixil con “Nun me presten los llunes” o Dolfu Camilo Díaz con “Autopsia” y Beatriz Viado directora del Selmanariu Les Noticies adelantando los conteníos d’una nueva edición del periódicu cada xueves, ente otros.

La editora Silvia Cosío y Ediciones Suburbia protagonicen esti sábadu 20 a les 12,15 hores el tercer programa de la tercer temporada de “Nós”, espaciu dirixíu y presentáu pol periodista asturianu Próspero Morán.

Con formatu d’entrevista, l’espaciu afondará nel papel de la figura profesional d’editora nel mundu lliterariu asturianu de la mano de la más moza de les y los editores asturianos.

Xurde Morán va ser esti sábadu 13 de Febreru, a partir de les 12,15 hores, el protagonista del espaciu “Nós” que recueye imáxenes y alcordances de los pueblos y barrios d’Asturies. Xurde Morán caleyará por dellos de los caminos que perconoz y cuntará con protagonistes de la zona como ye una de les parroquies candansines que más-y presten.

Nós, espaciu dirixíu y presentáu pol periodista y profesor universitariu Próspero Morán, emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.

L’ex director de l’axencia de noticies marroquí MAP en Madrid y presidente de l’asociación de corresponsales estranxeros n’España (ACPE), el Said Ida Hassan, vieno acabante entamar ‘Andalus Press’ (www.andaluspress.com), el primer periódicu on line d’información xeneral n’árabe dirixíu a la comunidá d’inmigrantes, especialmente marroquís, qu’usen esta llingua y que s’alluguen alrodiu del millón de persones

Güei, vienres 5 de febreru, y según da anuncia la RPA, va escomenzar a emitise’l miniespaciu de tres minutos de duración en llingua asturiana “Batura”; el programa va dir depués de los informativos de la tarde (16:00, 17:00 y 18:00 hores) de llunes a vienres. Nél va facese un viaxe per diferentes llugares del mundu (que se revela nel últimu programa de la selmana –son quince miniespacios en total a la selmana–) al traviés de personaxes, hestories, efemérides, recomendaciones culturales, etc., que de dalguna manera tengan que ver con esi sitiu.

La encargada de conducir Batura va ser Vanessa Gutiérrez (Urbiés, 1980), presentadora tamién del programa de la TPA Pieces, dedicáu a la cultura producida n’Asturies. Amás d’eso, desarrolla una actividá como escritora: el so primer llibru de poemes, Onde seca l’agua, publicólu nel 2003, y nel 2004 ganó’l Premiu Teodoru Cuesta, na so trecena edición, col poemariu tituláu La danza de la yedra; dende entós ta considerada como una de les voces reseñables de la poesía n’asturianu más moza. La so primer obra en narrativa foi Les palabres que te mando (2006), a la que siguió El país del silenciu (2007), un ensayu documental escritu conxuntamente con Beatriz R. Viado, que rellata en capítulos independientes la vida de muyeres asturianes nacíes a partir de 1910, centrándose nes sos esperiencies de la Guerra Civil. La última obra publicada por Vanessa Gutiérrez tituláse La cama (2008).

La TPA estrena esti sábadu 6 de febreru, a las 12:15 la cuarta temporada del programa “Nós” que va visitar el IES ASTURES de Llugones pa perconocer a les sos profesores y al alumnáu de llingua asturiana de la ESO y del Bachilleratu. Esti sábadu tamién entama la cuarta temporada de la revista audiovisual de cultura asturiana Pieces, que tien a Vanesa Gutierrez como presentadora y que va tener esti día a La Tarrancha como protagonistes cola presentación del so nuevu discu.

Nós, espaciu dirixíu y presentáu pol periodista y profesor universitariu Próspero Morán, emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.

L’Asociación de la Prensa d’Uviéu celebra so centenariu esti vienres 22 de xineru de 2010 con delles actividaes lúdiques, depués de que celebrare esti miércoles la so Aamblea Xeneral Ordinaria. Casa Lobato va acoyer una cena-baile que quier remembrar la qu’entamare los actos de l’Asociación en xineru de 1910.

L’Asociación de la Prensa presentó tamién esta selmana la so nueva páxina web que pue atopase na dirección www.asociacionprensaoviedo.com. L’Asociación de la Prensa d’Uviéu ye’l muérganu colexáu de los periodistes asturianos y ufierta esta páxina col enfotu de facilitar un meyor conocimiento de la profesión. Nella atoparás documentación sobre les nuestres actividaes y opiniones sobre comunicación yainformación.