Comunicación

TPA anunció güei l’entamu d’un nuevu programa n’asturianu, “Mirasturies, el pasáu recién”, media hora diaria más de programación na nuesa llingua, con documentales que percurren la hestoria, territoriu, naturaleza, arte y tradiciones del país a lo llargo de cincuenta capítulos. La nueva cita col asturianu ye de llunes a vienres, a les 9:30 hores.

La serie documental repasa a lo llargo d’esta mediu centenar de capítulos la hestoria d’Asturies n’episodios como “Asturies, crónica d’un sieglu” y “Tal como yéramos”; los espacios naturales y la flora y la fauna n’“Árboles y viesques d’Asturies”; “Fauna d’Asturies, de les cumes al monte” y “L’osu pardu”, ente otros.

Mirasturies concede una especial atención al patrimoniu hestóricu-artísticu en “La puerta’l cielu”, “El Románicu n’Asturies”, “Catedral d’Uviéu y Arte Góticu”; y a la cultura popular y a les tradiciones colos capítulos dedicaos a “Ferramientes tradicionales”, “La forxa del metal” y “los Mercaos tradicionales”.

Estos son namás dellos exemplos de los temes que toca esti programa nuevu cols que l’Ente quier “reforciar el so compromisu cola espardimientu de la llingua y la cultura asturianes”. Mirasturies ñaz como prollongación de “Mirasturias”, programa en castellán que lleva n’antena dende l’aniciu de les emisiones regulares de TPA en 2006, cola emisión de documentales de la Productora de Programes del Principáu.

La televisión autonómica emitió pola so canal primera (A7) y nel primer trimestre de 2010, 82 hores y 41 minutos de programación n’asturianu, con programes como “Camín de cantares”, “Al aldu”, “Sones”, “Pieces” o “Nós”.

La programación en llingua asturiana púnxose al frente esti sábadu de l’audiencia de la televisión pública asturiana con unos datos enxamás vistos. El programa que llideró la xornada del sábadu foi “Nós”, dirixíu y presentáu pol direutor d’Asturnews, Próspero Morán, qu’algamó un share del 21,1. Camín de Cantares col 20,9 y TPA Noticias col 19,7 seguieron na clasificación de l’audiencia de la xornada al microespaciu en llingua asturiana.

El espaciu de “Nós”que llideró esti día l’audiencia de la TPA tuvo dedicáu al conceyu de Piloña y nelli participaron l’alcalde del conceyu y la responsable de la Oficina de Política Llingüística de la Mancomunidá.

La Xunta pola Defensa de la Llingua Asturiana (XDLA) entamó va unes selmanes una campaña per Internet pa pidir a los miembros de la dirección de la RTPA más programación n’asturianu, con meyores horarios y más amplitú temática, y el respetu a la toponimia oficial na programación en castellanu. Estos datos d’audiencia paecen dar la razón a l’Asociación nes sos vindicaciones.

El programa “L’Andariegu”, nel que Xurde Morán percorre los caminos de pueblos de toa Asturies falando colos vecinos de cada parroquia, cambia d’horariu. A partir d’agora va emitise los tolos domingos a les 21:00 hores en Canal 10, que s’emite na TDT, en Telecable y al traciés d’internet.

La poesía que protagonizó esti caberu Día de les Lletres Asturianes foi’l motivu del programa que-y dedicó a la xornada de les lletres de 2010 esti sábadu al mediudía’l programa Nós na TPA.

Anxel Nava, Inaciu Galán, Inma González-Quevedo, Xurde Fernández y dellos otros escritores de nueso apaecieron nun programa que recueye l’internu del actu del Campoamor y los poemes que lleyeron nel mesmu estos autores.

La fórmula 1 fai dende dellos sábados camudar la programación en llingua asturiana de la TPA, lo qu’obliga a revisar les hores de programación cada sábadu.

Los profesores d’asturianu que participaron esti añu en Xixón nes II Xornaes del Suatea protagonicen esti domingu a les 10,45 hores na TPA “Nós” nuna visita pel desendolcu d’estes xornaes hai un par de meses.

Beatriz Quirós, Xosé Colodrón y Nel Caldevilla son dalgunos de los participantes que-y cuenten a Próspero Morán lo que se ta faciendo nel ámbitu de les nueves tecnoloxíes y la didáutica na clas d’asturianu.

La fórmula 1 fai dende dellos sábados camudar la programación en llingua asturiana de la TPA, lo qu’obliga a revisar les hores de programación cada sábadu ya inclusu pasar el programa a los domingos como asocede nesta ocasión, tando previstala emisión de Nós pa les 10,45 hores del domingu 30 de mayu.

Embaxo’l títulu “Periodismu llocal y periodismu dixital: un matrimoniu de conveniencia pa documentar la hestoria contemporánea”, entama güei, 21 de mayu, un seminariu que s’encuadra dientro del Master de Comunicación y Tecnoloxíes Nueves de la Universidá d’Uviéu. La cita va tener llugar nes aules del Cine Felgueroso, en Llangréu, y entama güei vienres a les cinco la tarde cola conforencia de Próspero Morán, director d’Asturnews y profesor de la Universidá de Valladolid, titulada “El Periodismu llocal nel mundu dixital: Fontes documentales pa la observación de la Hestoria Contemporánea”.

Darréu, María José Cantalapiedra, Directora del Departamentu de Periodismu II de la universidá vasca vafalar del casu particular del periodismu dixital en Barakaldo cola ayuda d’Aingeru Genaut, profesor Ayundante de la mesma universidá.

La xornada va pesllase cola conferencia “Hiperllocales, medios d’influencia”, pol profesor de la Rei Xuan Carlos de Madrid, José Alonso Seco.

El sabadu celébrase la xornada cabera del Seminariu, a partir de les 11 la mañana, falando del casu de Segovia, con Ignacio Martín Granados, profesor de la UVA y xefe de Prensa del Ayuntamientu de Segovia. Siguíu por Aurelio Martín, director de la edición dixital d’El Adelantado de Segovia, que va falar de la esperiencia del so periódicu na conferencia “El Adelantado: Un decano ante la realidad de Internet”.

El seminariu va pesllase con Juan Luis Manfredi de la Social Media de la IE University, Segovia, falando de “Ser llocal nos medios sociales: retos y oportunidaes pa los diarios llocales.

TPA algama güei xueves, 20 de mayu, ente les 14:00 y les 15:00, les 25.000 hores de programación de la so primer cadena (A7) desque empezó la so emisión regular el 9 de xunu de 2006. Información y actualidá, deportes, programes especiales y cine componen el gruesu de la programación cola que la cadena autonómica llogró xubir la so audiencia en 4,6 puntos en cuatro años hasta algamar el 7,6% col que peslló 2009. Sicasí, y pese a que los programes n’asturianu ayuden a xubir esta media enforma y a que más de 3.500 persones lo pidieron nuna campaña fecha pola XPDLLA, nun s’aumentó’l porcentaxe de programación en llingua asturiana dende l’entamu de les emisiones nesta llingua en 2007.

La cuota de pantalla de la televisión asturiana foi en constante crecedera, el 3% en 2006; el 4,5% en 2007; el 7,4% en 2008; y el 7,6% en 2009. La información ocupa 9.231 y 16 minutos na hestoria de la cadena, la información deportiva, 1.254 hores y 57 minutos, y la cultura y l’entretenimientu 1.273 hores y 19 minutos.

L’asturianu ta presente, según l’Ente “en gran parte de la parrilla”, anque los programes nesta llingua nun medraron nos tiempos últimos. Siguen emitiéndose Camín de cantares, una serie documental basada nel Archivu de la Tradición Oral de Xosé Ambás; Pieces, qu’enceta los principales temes rellacionaos cola cultura asturiana tradicional y contemporanea con Vanesa Gutiérrez; Nos, qu’amuesa aspeutos cotidianos de la cultura del país de la mano de Próspero Morán, y Al Aldu, un programa que s’estrema en cinco secciones (La risión, con Lluis Antón González y otros monologuistes; A galmiaes, con Carlos Suari; Recetes con cuentu con Milio’l del Nido; Xente de casa, con Inaciu Galán y l’Axenda d’Asturies, con Mercerdes Menéndez) y emítese de llunes a vienres.

Amás, emítense dalgunes gales de música tradicional presentaes n’asturianu por Esther Fonseca, Fernando Valler Roso y otros presentadores como Sonia Fidalgo.

El Centru Municipal de Llectura “Gonzalo Anes”, de Cuaña convoca esti premiu periodísticu dotáu con 600 y la publicación del testu en La Nueva España, al que pueden presentase artículos en castellán d’un máximu de trés fueyes alredor de “Coaña: el mar y la montaña”.

Les obres han presentase, hasta’l 25 de xunu, nel Centru Municipal de Llectura “Gonzalo Anes”, Ortiguiera, 33716, Cuaña. Más información nel teléfonu 985 473 461.

Bases completes del premiu

TV3 va ufrir una versión de la televisión pública catalana descargable dende’l dispositivo iPad d’Apple, repitiendo asina lo que ya fizo primero col iPhone.

La directora de TV3, Mònica Terribas, desplicó na comisión de control de la Corporació Catalana de Mitjans Audiovisuals (CCMA) que’l desenrrollu d’esta aplicación cuesta namái 9000 euros, mentantu l’aplicación pal iPhone costó 1.900 euros.

La aplicación de TV3 en directu pal iPhone alcuéntrase disponible dende’l 23 de abril y permite ver en directu los conteníos de TV3CAT y del Canal 3/24 al traviés de los teléfonos iPhone y iPod Touch.

L’Axencia de noticies Europa Press empecipió güei l’andadura de la so portada web en llingua asturiana, “una páxina que va incluyir informaciones de distinta índole en llingua asturiana” y que se suma al serviciu de noticies n’asturianu que dende 2007 tien en marcha l’Axencia.

De forma simultánea, les delegaciones d’Europa Press en Galicia, Cataluña, Islles Baleares, País Vascu y Valencia, punxeron en marcha tamién esti martes el serviciu en gallegu, catalán, occitanu, euskera y valencianu. Sicasí, namás la versión catalana ye dafechu na llingua na que s’ufren les noticies, siendo los elementos secundarios, nel restu los casos, en castellán.

Anque l’axencia tresmite, dende va años, noticies en toles llingües cooficiales del Estáu, a partir de güei podrá aportase llibremente a esta información al traviés de les sos correspondientes portaes.

Páxina web d’Europa Press n’asturianu